Himatoko 3 - Ma Jou ai Demo-demo o Totobelohoka

O Behehongo ma hurata abe ihidumutu o Saridisi ma garejaika

¹ De ahao Una gea wohihulokoli wato, “Naa ngona nohitulihuku ahi demo naa abe o Saridisi ma gareja manga malaekatikali, la unangoli ka idadi wadofanga ahi demo abe o gareja ma nyawaika. Notulihi nato, ‘Naa to Ngohi ahi demo nginika. Ngohi naa abe naga Ngohioka Ma Jou o Womaha ko wokurangua ma duru wongodu-ngodumu, de o murumu tumidi enangoo naga Ngohioka.’” Hokogea Una womahingahu. De ahao Una wahibehehongo onangika wato, “Ngohi tinihioriki ti ngini nia wowango ma datoro, de tinihiorikoo abe o nyawa utu inihiromanga nginika ato o wowango naga nginioka. Masara naa Ngohi tato ngini imaketero hoka nihonengoka ahi himangoka.

² Ho naa ngini kiani nimomikiye nia honengino! De ti ngini nia ngongaku ma hou abe ka ma hohutulokahi, gea ena kiani nimahiputurungoli genangino done ma hou genangoo ma ihonengoka. Angamoi ti ngini nia wowango ma datoro gea ko ingodu-ngodumua ho ko itiaiua Ma Jou ai himangoka.

³ Ho naa ngini kiani ka ihikaika nimahihohininga ma titi ma dodotoko ma rorahai abe ma dihiraino ngini niihene de niodafongoka, la genangino de nitoba hiadono ma rorahai gea nianiikoli. De masara nako ngini ko nimomikua nia howo-howonino, gea Ngohi ahao ka itodokanino de toboa nginika la tinihohowono. De gea toboa imaketero hoka womatengoani wotobatohiki woboa winidohiki, angamoi ngini duru ko nihiorikua o futu o kia ahao Ngohi toboaino.”

⁴ “Masara igoungu naga inimuruono naga o Saridisi ma kotaka gea abe nimaagoanohi la niato ufa naga ma peseke nginioka. De ngini gea ahao naga nia baju ma gare-garehe nimahinoauku de gea ngini de Ngohi homakiniiki hotagi-tagi, angamoi Ngohi tinitailakoka nia hininga de tinietongo tato itiai homakiniiki ngini de Ngohi.”

⁵ “De onagona dika yolaku ho ma dorou ko yahikalaua onangika, onangoo ahao yomahinoauku o baju ma gare-garehe. De ona gea manga roma-romanga duru ko taofiua o Wowango ma Bukuino naa de ka hiado-adonika. De hongoli ahao ahi Baba ai himangoka de ai momalaekatoo manga hima-himangoka de Ngohi tomahingahu abe ona gea tahidadioka to Ngohi ahi nyawa.”

⁶ “De onagona dika de manga ngaukoka kiani ihigihene Ma Jou o Womaha ai Demo-demoino abe ahao naa niihenoka, abe Una gea ai demo wohidumutu ma gogarejaika.” Hokogea ma hurata abe o Saridisi ma garejaika.

O Behehongo ma hurata abe ihidumutu o Filadelfia ma garejaika

⁷ De ahao Una gea wohihulokoli wato, “Naa ngona nohitulihuku ahi demo naa abe o Filadelfia ma gareja manga malaekatikali, la unangoli ka idadi wadofanga ahi demo abe o gareja ma nyawaika. Notulihi nato, ‘Naa to Ngohi ahi demo nginika. Ngohi naa abe duru totebi-tebini de duru tatobagou-goungu ahi hiningaka. De Ngohioka naga ahi kuaha la ka idadi tahikoano o nyawaika abe imaketero hoka ma dodihiraka manga koano o Dautu unangoo de ai kuahaka gea. De nako tohiketero de o ngorana ma dadatoko, gea naga ma kokusi Ngohioka, ho nako hiadono Ngohi tafelengaka moi ma ngorana, gea ko moiua la o nyawa ka yakunu yatatokoli. De hokogenangoo nako Ngohi ma ngorana moi tatatokoka, gea ko moiua la o nyawa ka idadi yakunu yafelengali.’” Hokogea Una womahingahu.

⁸ De ahao Una wahibehehongo onangika wato, “Ngohi tinihioriki ti ngini nia wowango ma datoro. Abe ngini nia doomuoka gea ko niwoeua ho ti ngini nia kuaha ko ilamokua o Filadelfia ma kotaka gea. De masara ngini niatobagou-goungu nianiiki ahi demo nginika de ko nioporetua to Ngohi ahi romangika. Ho naa abeika, Ngohi o ngorana moi nia himangoka tinibelenga, de gea o nyawa ko moiua la ka yakunu gea yatatoko.

⁹ De gea abe Ngohi tohiaturu la ona o Ibilihi ma haeke ma doomuino abe ma oraha naa ona inihikangela, ahao ona gea yoboa nginika de kiani inihoromati nginika. De gea ona abe yoelu-eluku de yomahiromanga ato o Yahudi ma nyawa, masara ona gea ko o Yahudi ma nyawa ma gou-goungua, angamoi o Ibilihi ma haeke ona yanii-niiki. Ho abeika nitotoihene! Ngohi ahao tohiaturu la ona gea ko idadiokaua inihikangela, masara gea ahao yoboa de yomamotumuku nia himangoka, de ma oraha gea ona ihioriki abe ngini gea Ngohi duru tinidora nginika.”

¹⁰ “De ngini ngaro nia kangela ma goronaka ma nimatongohono nia ngongakuoka de ko nirehenua genangino, abe gea imaketero hoka ma dihiraino tinihulokoka la nimatongohono. Ho ma titi nia dongohono gea ho Ngohi ahao tinidatoko o kangelaino abe ko itedekanokaua de o kangela ma amoko yadaene o nyawa mata-mata o dunia ma amokika. Angamoi ma oraha gea o dunia ma nyawa mata-mataika yataili manga ngongaku ma hidumutu gea o kiaika. Masara gea ngini tinidatoko genangino.

¹¹ De naa ko itedekanokaua de Ngohi toboali, ho ngini kiani nigila-gila nimahigagao nia ngongakuika la gea nianiikohi done ahao ngini ko niamakeuali ti ngini nia lalaku ma hadia Ngohino.”

¹² “De onagona dika yolaku ho ma dorou ko yahikalaua onangika, ona gea tahigogere ahi Jou ai Tau ma goronaka la genangoka dika yogogere ka hiado-adonika. De gea ona tahiketero tato ona yodadioka hoka o liate Ma Jou ai Tauoka abe duru ko ikelu-kelua. De onangika gea ahao tahitulihika to ahi Jou ai romanga, de to Ngohioo ahi romanga ma hungi tahitulihi onangika, de ahi Jou ai kota ma romanga, enangoo ma tahitulihi onangika gea. De ma kota ma romanga gea o Yerusaleeme ma Hungi, abe ahao o Horogaka de auku Ma Jou wohigutiuku ai kota gea.”

¹³ “De onagona dika de manga ngaukoka kiani ihigihene Ma Jou o Womaha ai Demo-demoino abe ahao naa niihenoka, abe Una gea ai demo wohidumutu ma gogarejaika.” Hokogea ma hurata abe o Filadelfia ma garejaika.

O Behehongo ma hurata abe ihidumutu o Laodikia ma garejaika

¹⁴ De ahao Una gea wohihulokoli wato, “Naa ngona nohitulihuku ahi demo naa abe o Laodikia ma gareja manga malaekatikali, la unangoli ka idadi wadofanga ahi demo abe o gareja ma nyawaika. Notulihi nato, ‘Naa to Ngohi ahi demo nginika. Ngohi naa abe ihihiromanga o Amin, angamoi ahi demo mata-mata ma gou-goungu dika, de nako hiadono totemoka, gea ahi demo hokogenangoo. De Ngohi tatobagou-goungu tahingahu o nyawaika Ma Jou ai hingahu ma demo, angamoi to Ngohi ahi demo mata-mata ka ma gou-goungu dika. De Ngohi naa Ma Jou ai dulaada ma titi de ma koano gea Ngohioka.’” Hokogea Una womahingahu.

¹⁵ De ahao Una wahibehehongo onangika wato, “Ngohi tinihioriki ti ngini nia wowango ma datoro. Abe ngini genangoka nia ngongaku Ngohino ka ma hononga dika, hoka ko inimagaweua nihileleani, masara nako nihioluku, genangoo ma ko nioigoua nihioluku Ngohino. Masara nako Ngohi koaho nimangiriki la niagou-goungu nihiniiki ekola nihioluku, ma iti ufa ma hononga dika nia ngongaku Ngohino.

¹⁶ Masara mangale ma titi naa ngini nia ngongaku ka ma hononga dika, ho naa Ngohi tinihiopuru Ngohioka de aino abe imaketero hoka o akere ma maha-maha tohiopurika.

¹⁷ De ngini nimahingahu niato, ‘Ngone naa ka yaowa, angamoi duru hokayaka de nanga perelu ingodu-ngodumoka ho ko iwa ma kuranga.’ Hokogea ti ngini nia hininga nimahingahu. Masara hiokoo ngini, angamoi ko nihiorikua abe tanu ngini naa o hu-huha ma nyawa ma titi nia ngongakuino. De nako Ma Jou ai himangoka, Una winietongo ngini hoka o hiokoo ma nyawa abe duru ko kia-kiaua inidaene. De winietongo ngini nirafi-rafioka de abe ka nia bululunoka.

¹⁸ Ho naa Ngohi tinihigaro nginika tato koaho nimaija Ngohioka o gurasi iree-reeika abe yahitebinoka o uku ma goronaka de aino, la gea nimaijaka Ngohioka de ahao niagou-goungu nikaya Ma Jou ai himangoka. De tinihigaro nginika tato Ngohioka nimaija o baju ma gare-garehe la gea nimahinoauku la ufa inihimaleke ma titi ka nia bululunoka. De tinihigaro nginika tato nimaija Ngohioka nia lako ma bibiu ma houru la gea nihiehe dakaa nia lakoino la hiadono ngini ka idadi nimahioriki.

¹⁹ De hokogea ahi higaro ma demo nginika angamoi Ngohi tinidora ngini. De onagona dika tadora, ona gea kiani Ngohi tataere de tadotoko onangika. Ho gea ngini kiani naga nia magawe la nihiniiki Ngohi de nia hininga ma gahumu, de gea kiani ngini nitoba de nilio Ngohino.

²⁰ Abeika nitotoihene tomahiketero! Ngohi naga ti ngini nia tau homoi-homoi nia ngoranoka de tiniahoko tato towohama nia tau ma goronaika. De nako onagona dika yoihene ahi ilingi de gea ma ngorana ihibelenga, gea Ngohi towohamino la ona de Ngohi homakutuono holomo, abe gea ngone duru homaketedodiawo.”

²¹ “De onagona dika yolaku ho ma dorou ko yahikalaua onangika, ona gea ahao tahidoaka ma kuaha onangika la ona yogogeruku to Ngohi ahi datekoka abe ahi kadera ma hohailoa o Horogaka. De genangoka ahao yokoano de de Ngohi. De gea duru imaketero abe hoka ma dihiraino Ngohioo tolaku de ahao togogeruku ahi Baba ai datekoka abe ai kadera ma hohailoauku.”

²² “De onagona dika de manga ngaukoka kiani ihigihene Ma Jou o Womaha ai Demo-demoino abe ahao naa niihenoka, abe Una gea ai demo wohidumutu ma gogarejaika.” Hokogea ma hurata abe o Laodikia ma garejaika.