Himatoko 21 - Ma Jou ai Demo-demo o Totobelohoka

Ma Jou waturuuru o dunia de ma dihangoo ho duru ma hungioli wohidadi

¹ De gea ipaha de ahao ngohi tamake o dunia ma hungi de ma dihangoo ma hungi. De gea ma dunia de ma dihanga ihira-hiraika, gea mata-mata ipahakau ho ko iwaka. De nako o dunia ma hungi, genangoka duru ko iwa o gahi ma ngooto.

² De ahao nagali tamake o kota ma debi-debini abe Ma Jou wohigutiuku o Horogaka de auku, de gea ma kota ma romanga o Yerusaleeme ma Hungi ma kota. De ma kota gea duru imahidiaioka de ma hohailoa, abe gea imaketero hoka o ngofeka momatengo ami gogilaka ma wangeoka de momahinoahi de ma hohailoa de duru momahidiai la ami rupa duru mohailoa ma oraha ami darunu womidafongo. De hokogenangoo ma kota naa duru imahidiaioka de ma hohailoa.

³ De ahao ngohi toihene o ilingi moi ma amokiye itemo ai kadera ma hohailoaka de aino ato, “Abeika! Naa Ma Jou ai ngi abe Una womatobanoa ai nyawa manga hidogoronaka. Abe Una womanoa onangoka la ka ihikaika Una naga de de ona. Angamoi ona yodadioka to Una ma hirete ai nyawa, de Una wodadi to ona manga Jou.

⁴ De Una ahao manga koongo mata-mata abe manga lakoka de aino gea wakokiehe, angamoi ma kotaka gea duru ko iwaka o nyawa yohonenge de manga hininga ma huha de yoari-ari, de ngaro manga badanga ma kangela ma enangoo ko iwaka. De genangoka de imahikaika duru ko iwaka mata-mata gea. Angamoi gea ihira-hiraika duru ko iwakau.” Hokogea itemo ma ilingi gea.

⁵ De ahao Una abe wogogerukuoka ai kadera ma hohailoauku Unangoo wotemo wato, “Abeika! Naa Ngohi taturuuru de ma hungi mata-mataika la ma hungioli idadi.” De ahao Una wohihuloko ngohino wato, “Naa ma demo abe ahao naa noihene, gea kiani nohitulihuku, angamoi gea ma demo-demo ka ma gou-goungu dika de ka idadi nangaku enangika.”

⁶ De ahao ka wotemohi wato, “Naa tabootokau ahi karajaanga abe ma dodihiraka de tohideeokau! De Ngohi naa ko kia-kiauahi idadi de Ngohi nagau, de Ngohi duru ko iwa ahi bobaha. De onagona dika abe manga ngomaha yodudungoka, onangika gea ahao Ngohi tahiokere o jobuubuino abe nako ma akere genangino yaokere, de gea yamake o wowango genangino. De gea tahiokere onangika masara ngaro ufa de yofangu angamoi Ngohi ka tahidoaka dika onangika.

⁷ De onagona dika yolaku ho ma dorou ko yahikalaua onangika, ona gea ahao yamake ma hiowa mata-mata gea Ngohioka, de Ngohi todadi to ona manga Jou, ho ona gea yodadi to Ngohi ahi ngofaka.

⁸ Masara ona utu abe yohawana ihingaku Ngohino ho ona ihioluku de ko ihingakua, ona gea manga baha ahao yaumoikaka abe o uku ma ngooto ma goronaika. De hokogenangoo to ona manga hohowono abe ona yomahidadidorouoka, de onangoo yatotoma o nyawa, de ona abe yomakitigi ko itiaiua, de ona abe ka ihikaika yaniiki manga dodiai, de ona yomahuba-huba o popangaoika, de ona mata-mata abe yotobaelu-eluku. Ho ona gea mata-mata ahao manga baha yamake o uku ma ngooto ma goronaka, abe genangoka o uku de o uba itoka-tokara yauku onangika. De o uku ma ngooto gea ena abe ihiromanga enangika ato o hohonenge ma hinooto.” Hokogea to Una ai demo ngohino.

Abe hokokia ma rupa o Yerusaleeme ma Hungi ma kota

⁹ De ahao o malaekata womatengo woboa ngohino, de una gea o malaekata yatumidino gea abe nengokadau ona amomoiika yasoino o mangko moi de gea ma dola o kangela kohagiria ma baha abe yahipoha dau o duniauku. Ho una woboa ngohino de wato, “Nainohi la nohiniiki ngohi la tonihimatoko ngonaika muna abe modadi o Domba ma Ngofaka ngoi fekata.”

¹⁰ De wotemo ibooto de ahao Ma Jou o Womaha ai kuaha ihilufungoli ngohi de o malaekata gea wohiao o loku moi ma tubuiye abe ma loku gea duru ikurutiye. De genangoka una wohihimatoko ngohino ma kota ma debi-debini abe Ma Jou wohigutiuku o Horogaka de auku, abe gea ma kota ma romanga o Yerusaleeme ma kota.

¹¹ De ma kotaka gea naga Ma Jou ai medebini ma dararono imanoa genangoka ho gea ma kotaoo hoka ihileletongo de ma dararono gea. De to ena ma dararono gea hoka o hakaru ma leto-letongo moi ma romanga o yasipis ma meletongo, de ma hakaru gea duru kohahali de duru ma doo-dodono abe imaketero hoka o kristala ma hakaruoli.

¹² De ma kota gea ihigilolitino de ma dadaduhu abe duru ma ngoatika de duru kohagurutiye. De ma dadaduhoka gea naga ma ngorana ngimoi de hinooto, de ma ngorana amomoiika naga o malaekata womatengo la woogoana de nagali o romanga homoi-homoiika ihitulihika ma ngoranoka. De ma roma-romanga gea o Isiraele ai ngofa-ngofaka yangimoi de yahinootoino manga romanga abe ona yodadioka o dutu homoi-homoiika.

¹³ De abe ma dadaduhu ma pahagi iata, gea amomoiika naga ma ngorana ahohangeika. Ho ma dadaduhu ma pahagi abe daioko idateke, gea naga ma ngorana hangeika. De ma pahagi abe dinaiha idateke, enangoo naga ma ngorana hangeika. De ngaro ma pahagi abe dakuiye idateke de ngaro enangoo abe daukuku idateke, ma gea homoi-homoiika naga ma ngorana ahohangeika.

¹⁴ De ma kota ma dadaduhu gea dau ma lifunoka naga ihiagu-agurika o hakaru ma ago-agomo ngimoi de hinooto abe ena gea duru ihiraika yakelengauku dau ma tonakuku. De ma hakaru amomoiika gea naga ihitulihika o romanga moi. De gea to ona manga romanga abe o Domba ma Ngofaka ai hidingoto ma nyawa ma dihiraino.

¹⁵ De ma malaekata gea abe wohitemo-temo ngohino, una ai giamoka naga wasoino o duduga moi o gurasino abe ma rupa hoka o tutukunu. De gea wato wapake la watuga ma kota de ma dadaduhu de ma ngorana la wohioriki ma amoko de ma gurutu hokokia.

¹⁶ De ma kota gea watuga de wamake abe gea ma pahagi iatino, de to ena ma ngoata gea duru imaketero abe hoka ma gurutu. De gea watuga de ai duduga ho ma kota ma ngoata gea o kilo o sana hinooto de o ratuhu hinooto. De ngaro ma kota ma gurutu de ngaro ma kota ma gurutiye, ma gea duru imakoketero dika de to ena ma ngoata, o kilo o sana hinooto de o ratuhu hinooto.

¹⁷ De ahao una watuga ma kota ma dadaduhu, de to ena gea ma gurutiye o metere moributaanga de motoa. De gea ma malaekata watuga-tuga ma kotaka, gea una wapake ma duduga abe ngone o nyawa biaha hatobapake, ho ko imakohowonua ma malaekata ai duduga gea.

¹⁸ De nako ma kota ma dola mata-mata gea yodiai o gurasi duru ma dutuino, ho to ena ma meletongo gea hoka o kahinaa duru ma debi-debini ma meletongo. De nako o kota gea ma dadaduhu, gea yodiai o hakaru ma leto-letongino moi ma romanga o yasipis.

¹⁹ De ma dadaduhu gea abe ma kota ihigilolitino, gea ena ma lifunu ma hakaru amomoiika naga ma bilere abe o hakaru ma leto-letongo irupa-rupaino. De gea ma lifunu ma hakaru ihiraika naga yobileroka de o yasipis ma hakaru ma leto-letongo. De ma lifunu ma hakaru ma hinooto yobileroka de o hakaru ma leto-letongo moioli ma romanga o nilam abe gea ena duru ma bihi-bihi ma dutu. De nako ma lifunu ma hakaru ma hange de gea to enangoo naga ma bilere abe o hakaru ma leto-letongo moioli ma romanga o yakutu. De nako ma lifunu ma hakaru ma iata, gea yobileroka de o hakaru ma leto-letongo abe ma bihi-bihi hoka o bole ma hoka ma mibihi, de gea ma romanga o samurudu.

²⁰ De nako ma lifunu ma hakaru ma motoa, to enangoo ma bilere abe o baiduri sepa ma hakaru ma leto-letongo. De ma butaanga gea yobileroka de o hakaru ma leto-letongo moioli ma doka-dokara abe gea ena ma romanga o saridisi. De nako ma lifunu ma hakaru ma tumidi gea yobileroka de o hakaru ma leto-letongo ma gogurati abe ma romanga o ratna sempaka. De nako ma tufange to enangoo naga ma bilere abe o hakaru ma leto-letongo ma bihi-bihi abe hoka o gahioka ma mibihi, de gea ma romanga o pirusu. De o dadaduhu ma lifunu ma hakaru ma hiwo ma bilere enangoo o hakaru ma leto-letongo ma gogurati abe gea ma romanga o topasa. De ma ngimoi gea ma bilere o hakaru ma leto-letongo moioli ma bihi-bihi abe ma romanga o krisoparasa. De nako ma ngimoi de moi gea naga de ma bilere ma bihi-bihi abe hoka daku ma hoanino ma mibihi, de gea ma romanga o lasuardi. De nako ma dadaduhu ma lifunu ma hakaru ma ngimoi de hinooto, to ena gea ma bilere o hakaru ma leto-letongo moioli abe ma wuu-wuu, de ma hakaru gea ma romanga o kesubungu. Hokogea ma bilere o hakaru ma leto-letongino abe naga o kota ma dadaduhu ma lifunu ma hakaru amomoiika.

²¹ De nako ma ngorana ma dadatoko ngimoi de hinooto, gea homoi-homoiika naga o biagaro ma hakaru abe duru ma hali-hali, masara nenangohi duru ilago-agomo, ho o ngorana ma dadatoko gea yapake o biagaro ma hakaruino. De nako ma ngeko-ngekomo o kota ma goronaka, gea o gurasino yodiai, abe o gurasi dika duru iree-reeika la duru ileto-letongo abe hoka o kahinaa ma doo-dodono ma meletongo.

²² De o kota ma goronaka gea de ngohi tamake abe ko iwa Ma Jou ai Tau genangoka, angamoi nanga Baluhu idodutu Ma Jou abe ngaro mata-mataika ma ka Unangohi duru de ai kuaha kohaamoko, Una de o Domba ma Ngofaka Ona yodadioka hoka Ma Jou ai Tau ma kotaka gea. Abe ma titi ai nyawa o kiaka dika o kota ma goronaka gea de ka genangoka dika ona ka idadi iwihigiriiri Unangika, ho ngaro ufa dika yoiki Ma Jou ai Tau ma goronaika la iwihigiriiri.

²³ De ma kota gea ko imahinganonua o wange de o medeika la ato to ena ma dararono ihitararono ma kotauku. Hokogenangua, angamoi to Ma Jou ma hirete ai medebini ma dararono gea ihitararono ma kota ma amokika, de nagali abe imaketero hoka to ma kota ma hilo gea o Domba ma Ngofakoka de aino wohitararono.

^24-26 De gea ma kota ma dararono ahao yahitararono o dunia ma nyawa mata-mataika. De o kota gea ma ngorana ifelengaika dika ka ihikaika angamoi duru ko iwa la yofutu genangoka. Ho nako ko yofutua, gea ko iwa ma titi la ma ngorana yatatoko. De ma oraha gea o dunia ma nyawa manga kiahonanga ma hali-hali de ma hohailoa, gea mata-mata yaoino abe o kota ma goronaino la ato iwihoromati Ma Jouika. De ngaro o dunia ma kokoano masara onangoo mata-mata yaoino manga kiahonanga ma hali-hali o kota ma goronaino la ato iwihoromati Unangika.

²⁷ De gea ko yahigunoaua ma dorou o kia dika la iwohama ma kota ma goronaika. De ngaro hoka naga womatengoani abe ai wowangoka ma datoro itorou eko abe yotobaeluku, ma unangoo ko iwihigunoaua la o kota ma goronaika wowohama. Masara ona abe manga roma-romanga naga ihitulihukuoka abe o Domba ma Ngofaka ai Wowango ma Buku ma dolauku, ona gea dika abe ka idadi yowohama ma kota ma goronaika.