Himatoko 20 - Ma Jou ai Demo-demo o Totobelohoka

Abe ma titi o taongo o sana moiino ma dekana

¹ De gea ipaha de ahao ngohi timake o malaekata womatengo wouti daku o Horogaka de wauku, de naga wasoino ai giamoka o kokusi moi abe o haara duru kohagurutuku gea ma kokusi. De nagali ai giamoka o rante moi o behino duru ma amoko.

^2-3 De gea ma malaekata wataokino de wahikala o naga gea abe tanu to ena ma romanga naga iwoe-woe, de ma romanga moi gea o dodiha, abe duru ma dodihiraka de imahipooteke o dodihaika, de nagali abe ma romanga o Ibilihi ma haeke, de moi o Tobalawana. Ho ma malaekata gea wohikalaka o naga gea de ahao wapakitoka de o rante de waumo dau o haara kohagurutuku gea ma goronauku. De gea waumo ibooto de watatoko ma haara ma ngorana de wakusioka la genangoka dika o naga imanoa abe o taongo o sana moi ma dekanino. De abe o taongo o sana moiino gea de o Ibilihi ma haeke ko idadiokaua ena yabudi o dunia ma nyawaika. Masara ma gahe gea abe o taongo o sana moi adonoka de ahao ihihupuoli ma hoanika, masara gea ma oraha ko itedekanokaua abe ena ka idadi itagi-tagi o duniaka.

⁴ De ahao nagali tamake o kadera ma hohailoa kohangoe de gea amomoiika naga yogoo-gogeruku ma kaderauku, de ona gea naga manga kuaha la yatobauru-urusu o nyawa manga howono de hiadono yahohowono onangika. De ona yogoo-gogeruku gea Ma Jou ai nyawa manga jiwa abe ona nengokadau yatomaka angamoi ma titi ona yasoino ma hingahu ma demoika abe naga Ma Jou ai Demo-demoka, de gea yahingahu-ngahu o nyawaika ma titi o Yesusu de duru yahigaro la ka idadi iwingaku Unangika. De ona gea abe ko yomahubaua o aewanika gea eko to ena ma pangaoika, de gea ma dodunguu ko yodafongua abe manga pea ma nyore-nyoreoko eko manga giamoka. Ho ona gea yomomiki manga honengino de yomakiniiki yokoano de de ma Mesia o Kristusu abe o taongo o sana moi ma dekanino yokoano.

⁵ De abe ona yomomiki, gea o momomiki ma oraha abe ihira-hira. Masara ona utu abe yohone-honengoka, ona ko yomomikuahi ma oraha gea. Ahao ma taongo o sana moi gea ipahaikaka de ahao ona utu yomomiki manga honengino.

⁶ De nako ona abe o momomiki ma hira-hiraka de yomomiki manga honengino, ona gea duru de manga utumoka de duru yotebi-tebini. Angamoi ona gea ahao duru ko yamaoua o hohonenge ma hinooto ma titi gea ko iwa ma kuaha onangika. Masara gea ona ahao iwileleani Ma Jou de o Kristusika abe hoka ma dodihiraino ona yodadi o hidemo Unangiye onangoo iwileleani Unangika. De gea ona yokoano de de Una abe o taongo o sana moiino ma dekana.

O Ibilihi ma haeke Ma Jou wohikala enangika

⁷ De nako hiadono ma taongo o sana moi gea ipahaikaka, gea de ahao o Ibilihi ma haeke ihigunoa la ihupu ma bui ma haaroka de aino.

⁸ De gea ihupuoka de iloiki o dunia ma amokika la ato o nyawa mata-mata yabudi de yatoomuino la gea ona mata-mata yomakokuduhunu iwiparangi Ma Jouika. De ona abe o Ibilihi ma haeke yabudi de yatoomuino, o nyawa gea o doomu hinootoino abe yahiromanga onangika ato o Gogu de o Magogu ma nyawa, de ona gea duru ko manga ngoe abe gea yomaketero hoka o dowongi ma mui ma ngoe o gahi ma ngigorino.

⁹ De gea yomatoomuinoka de yoboaino de yomahitigikaka ma kotaika abe Ma Jou duru wadora ma kotaka gea. De ona duru ko manga ngoe ho hiadono ma tonaka genangoka duru yakokitamunoka de o nyawa ho ko idadiokaua ma tonaka gea yamake. De ona yoboaino de yahigiloliti ma kota gea abe Ma Jou ai nyawa naga yomanoa genangoka. Masara gea yahigilolitinoka la ato yaparangi Ma Jou ai nyawaika, de ahao ka itodokanino naga o uku o Horogaka de auku iuti dau o tonakuku de gea yakokitufuku Ma Jou ai musu mata-mataika ka hiadono ona yokokitinoka.

¹⁰ De gea yokokitinoka de ahao o Ibilihi ma haeke abe yakokibudioka ma nyawaika gea, ena gea yataokinoli de yaumo o uku ma ngooto ma goronaika, de genangoka naga o uba kohaamokika itoka-tokara. De genangoka ma ngi abe ma dihiraino ma aewani ihira-hiraika gea de to ena ma dodiawo abe yahitobahirehene o nyawa la yaniikoli ma aewani ihira-hiraika, ena gea hinootoo ma dihiraino de yaumoikaka o uku ma ngootika gea. De ngaro ena hinooto de ngaro o Ibilihi ma haeke, ma ena mata-mata ka ihikaika ma kangela de ma huha yaborimake o futu de o wange ka hiado-adonika.

Ma Jou ai hohowono ma baha

¹¹ De gea ipaha de ahao ngohi tamake o pareta ma kadera ma hohailoa moi ma gare-garehe abe duru kohaamoko. De Una abe naga wogogerukuoka ma kaderauku, Unangoo timake. De ka itodokanino de o dunia de ma dihangoo ka aiaho de ko iliokaua, abe gea hoka iloara Ma Jou ai himangoka de aino.

^12-13 De ahao tamake o nyawa mata-mata abe yohone-honengoka yoboaino ma kadera ma gare-garehino gea la genangoka yomaokoino. De gea o nyawa abe ma dihira ngaro manga wowango ma gogere hatoli ikurutiye eko ngaro ka itipokouku dika, de ngaro ona abe nengokadau de yohonenge o gahi ma lukuoka eko ngaro o tonakoka yohonenge, ma ona duru mata-mataika abe o hone-honenge ma ngioka ona yokokiboaino to Una ai kadera ma gare-garehino. De genangoka ona yomakokiokoinoka de ahao Ma Jou wohiaturu la o buku muruono naga yaoino abe gea ma dola o nyawa gea manga wowango ma datoro homoi-homoiika yodiaioka, ho gea mata-mata ihikokitulihukuoka abe ma buku gea ma goronaka. De ma buku gea yafelenga de ahao o nyawa gea homoi-homoiika yaboriurusu ma titi to ona manga datoro hokokia naga ihitulihuku ma buku ma goronaka, la genangino ahao ihioriki manga hohowono homoi-homoiika kiani hokokia. De hokogea Ma Jou wohikaaturu la mata-mata duru ihioriki itararono abe to ona gea manga hohowono duru itiai yamake angamoi duru itaana de to ona manga wowango ma datoro. De genangoka naga o buku moioli abe enangoo yafelengaika, de gea o Wowango ma Buku. Abe ma buku ma dolauku gea naga manga romanga abe onagona dika naga genangoka, ona gea yamakeoka o wowango ka hiado-adonika.

^14-15 De nako onagona dika yohone-honengoka abe manga romanga ko iwa o Wowango ma Bukuoka, ona gea ahao yaumo o uku ma ngooto ma goronaika. De o uku ma ngooto gea ena abe ihiromanga enangika ato o hohonenge ma hinooto. De ma oraha gea de Ma Jou duru wohibobaha o hone-honenge ma kuaha ka hiado-adonika! Ho genangoka de imahikaika duru ko iwaka abe yohonenge, de ko iwaka o hone-honenge ma ngi angamoi gea ma perelu ko iwaka ma titi o hone-honenge ma kuaha Ma Jou duru wohibobahaka!