Himatoko 2 - Ma Jou ai Demo-demo o Totobelohoka

O Behehongo ma hurata abe ihidumutu o Efesusu ma garejaika

¹ De ahao Una gea wohihuloko wato, “Naa ngona nohitulihuku ahi demo naa abe o Efesusu ma gareja manga malaekatika, la unangoli ka idadi wadofanga ahi demo abe o gareja ma nyawaika. Notulihi nato, ‘Naa to Ngohi ahi demo nginika. Ngohi naa abe ma murumu tumidi tasoino ahi giama ma nirakoka, de Ngohi totagi-tagi abe ma posi ma liate tumidi o gurasino ma hidogoronaka.’” Hokogea Una womahingahu.

² De ahao Una wahibehehongo onangika wato, “Ngohi tinihioriki ti ngini nia wowango ma datoro. Abe ngini nikarajaanga de ma dubuho nia ngongakuoka, de ngaro naga nia kangela niaohana, masara gea ngini ka nimatongohono ma dorouino. De Ngohi tohiorikoo abe ngini ko niahigunoaua o dorou ma nyawa nginioka. De abe hoka ona nengokadau yomadokangeluku de yomafetongo abe yoiki yahingahu-ngahu Ma Jou ai Demo-demo o nyawa utuika. Ona gea ngini duru niatailako onangika de naa niahiorikoka abe ona o tobaelu-eluku ma nyawa.

³ De Ngohi tinihioriki abe ngini naga de nia dongohonoka, angamoi inihikangela nginika ma titi Ngohi, masara ngini ko nirehenua nia ngongakuino.

⁴ Masara naga moi ahi dodaere nginika. De gea tato ti ngini nia dora nia hiningaka, gea iowahoka ho ko imakadaenokaua abe hoka ma dodihiraka ma oraha ahao nihingaku Ngohino.

⁵ Ho gea tato ngini kiani nimahihohininga abe ngini hokokia nia dora ma dodihiraka de ma oraha naa hokokia ma gurutuku nirubaka. De ngini kiani nitoba genangino de niogilio la nianiikoli nia wowango ma datoro abe hoka ma dodihiraka nia ngongaku ma wowangoka. De masara nako ngini ko nitobaua, gea Ngohi ahao toboa nginika de tagoraka ti ngini nia posi ma liate to ena ma ngiino la gea nia gareja ma doomu ahao ihikapusakoka. De hokogea ahao kiani Ngohi todiai nako hoka ngini ko nitobaua.

⁶ De masara naga moiohi ma rorahai abe gea ka idadi tinihigiriiri. De gea nginioo duru niodohata abe iwitobanii-niiki o Nikolausu ona manga wowango ma datoro, abe gea imaketero hoka Ngohioo manga datoro todohata enangika.”

⁷ “De onagona dika de manga ngaukoka kiani ihigihene Ma Jou o Womaha ai Demo-demoino abe ahao naa niihenoka, abe Una gea ai demo wohidumutu ma gogarejaika.” “De onagona dika yolaku ho ma dorou ko yahikalaua onangika, ona gea tahigunoa la o wowango ma gota ma hofokino ka idadi yaolomo, de ma gota gea naga iwango Ma Jou ai ngi ma hohailoa abe o Horogaka.” Hokogea ma hurata abe o Efesusu ma garejaika.

O Behehongo ma hurata abe ihidumutu o Semirna ma garejaika

⁸ De ahao Una gea wohihulokoli wato, “Naa ngona nohitulihuku ahi demo naa abe o Semirna ma gareja manga malaekatikali, la unangoli ka idadi wadofanga ahi demo abe o gareja ma nyawaika. Notulihi nato, ‘Naa to Ngohi ahi demo nginika. Ngohi naa abe ko kia-kiauahi idadi de Ngohi nagau, de Ngohi duru ko iwa ahi bobaha. De Ngohi nengokadau tohonengoka masara naa Ngohi towangokali.’” Hokogea Una womahingahu.

⁹ De ahao Una wahibehehongo onangika wato, “Ngohi tinihioriki ti ngini nia wowangoka hokokia idadi, abe nia kangela naa niaohana, de abe ngini nihuha ma titi nia kiahonanga duru ko iwoeua. Masara ngaro hokogea ma tanu ngini duru de nia utumoka abe ma titi nia ngongakuino. De Ngohi tohiorikoo ma titi ona gea abe inidofanga de inidoa-doana nginika. Abe ona yomahiromanga ato to Ngohi ahi Yahudi ma nyawa, masara tanu ona gea ko to Ngohiua. Masara ona gea to o Ibilihi ma haeke ma doomuino.

¹⁰ De naa Ngohi tinihigaro tato ufa ko nihawana ma titi ma kangela abe ko itedekanokaua de kiani gea niaohana. Angamoi naa tinihingahu dika abe o Ibilihi ena gea ahao ngini utu inihidubuika la ato initaili nia ngongakuoka, de o bui ma goronaka gea inihikangela o wange ngimoiino ma dekana. De gea ngaro naga o hidee la ato inihohonenge, ma kiani ngini nimatongohono nia ngongakuoka de ufa nirehene genangino, la ahao Ngohi tohibalaha nginika de o lalaku ma hadia abe o wowango ma ngangoino tinihidoaka.”

¹¹ “De onagona dika de manga ngaukoka kiani ihigihene Ma Jou o Womaha ai Demo-demoino abe ahao naa niihenoka, abe Una gea ai demo wohidumutu ma gogarejaika.” “De onagona dika yolaku ho ma dorou ko yahikalaua, ona gea o hohonenge ma hinooto ko yadaenua, ho ma kangela abe ko iwa ma baha gea ko amakeua.” Hokogea ma hurata abe o Semirna ma garejaika.

O Behehongo ma hurata abe ihidumutu o Peregamusu ma garejaika

¹² De ahao Una gea wohihulokoli wato, “Naa ngona nohitulihuku ahi demo naa abe o Peregamusu ma gareja manga malaekatikali, la unangoli ka idadi wadofanga ahi demo abe o gareja ma nyawaika. Notulihi nato, ‘Naa to Ngohi ahi demo nginika. Ngohi naa abe naga ahi humaranga o dopo-dopoino abe ma doto arihononga.’” Hokogea Una womahingahu.

¹³ De ahao Una wahibehehongo onangika wato, “Ngohi tohioriki ti ngini nia ngi, abe ngini nimanoa o kotaka abe genangoka naga o Ibilihi ma haeke ma gogere. De ngaro genangoka nigogere, ma ngini ka nimahigagaoohi Ngohino de ko nirehenua abe nia ngongaku Ngohino. De gea ka tohiningahi nengokadau ma oraha abe nia gianongoru o Antipasa una ka ihikaika naga wahingahu-ngahu o nyawaika ma titi Ngohi de hiadono una gea iwitomaka ti ngini nia hidogoronaka, abe genangoka o Ibilihi ma haeke imanoa. De gea ngaro nginioka de iwitoma, ma ngini ka nihingakuohi Ngohino, de genangoka de aino ma titi Ngohi duru tinisanangi.

^14-15 De masara naga utu ahi dodaere ma titi nginika. De ngini ka niahigunoa o nyawa utu nia hidogoronaka abe ona yanii-niiki o Nikolausu ai rerehene ma dodotoko. De nako to ona manga dodotoko, tanu gea ngade-ngade imaketero hoka ma dodihiraka o Bileama ai rerehene, abe una gea ma dihiraino wahirehene o Isiraele ma nyawaika ma titi o Balakino. Abe ma oraha gea o Bileama widotoko o Balakika abe hokokia wodiai la o Isiraele ma nyawa yoruba de yahowono Ma Jouika. De gea o Bileama wahigaro la ona o pangaoika yaniiki abe yaolomo o inomo abe ihihubaka o pangaoika, de nagali abe wahigaro la o howono manga badangoka yodiai. De hokogea idadi o Isiraele ma nyawaka abe duru ma deka-dekanuku. De naa ngini nimaketero dika abe hoka ona o Isiraele ma nyawa ma oraha gea, angamoi nginioo niahigunoa o nyawa utu nginioka abe ona yanii-niiki o rerehene ma dodotoko, de ona gea inihigaro nginika la ato nginioo niruba de niahowono Ma Jouika.

¹⁶ Ho gea tato ngini kiani nitoba genangino done ahao Ngohi ka itodokanino de toboa nginika la ka idadi taparangi ona yahowo-howonika. De gea taparangi de tapake ahi humaranga o dopo-dopoino abe ahi uruoka de aino ihupu.”

¹⁷ “De onagona dika de manga ngaukoka kiani ihigihene Ma Jou o Womaha ai Demo-demoino abe ahao naa niihenoka, abe Una gea ai demo wohidumutu ma gogarejaika.” “De onagona dika abe yolaku ho ma dorou ko yahikalaua onangika, gea ona tahigunoa la o mana ka idadi yaolomo, abe gea o mana abe duru ma deka-dekanuku de agogonohi o nyawaino la ufa yamake. De ahao tahidoakoo ona homoi-homoiika o hakaru ma gare-garehe moi abe o hakaruoka gea o romanga ma hungi moi ihitulihika. De ma romanga ma hungi gea o nyawa utu ko moiua ihioriki, masara ka ona dika ma hirete ihioriki abe tahidoaka homoi-homoiika.” Hokogea ma hurata abe o Peregamusu ma garejaika.

O Behehongo ma hurata abe ihidumutu o Tiatira ma garejaika

¹⁸ De ahao Una gea wohihulokoli wato, “Naa ngona nohitulihuku ahi demo naa abe o Tiatira ma gareja manga malaekatikali, la unangoli ka idadi wadofanga ahi demo abe o gareja ma nyawaika. Notulihi nato, ‘Naa to Ngohi ahi demo nginika. Ngohi naa Ma Jou ai Ngofaka, de to Ngohi ahi lako duru de ma dararonoka abe hoka o uku ma dokara ma dararono. De to Ngohi ahi lou duru iletongo abe hoka o tabaaga ma dutu abe hoka yaeheoka hiadono duru iletongo.’” Hokogea Una womahingahu.

¹⁹ De ahao Una wahibehehongo onangika wato, “Ngohi tinihioriki ti ngini nia wowango ma datoro, abe tohioriki ti ngini nia dora de nia ngongaku, de tohioriki ngini nihileleani Ngohino, de tohioriki abe ngaro nia kangela ma goronaka ma nimatongohono ma dorouino. De tohiorikoo abe nako ma dodihiraka ma oraha ahao gea nihingaku Ngohino, de naa ma duruino, masara naa ma duruinohi iwoe ti ngini nia wowango ma datoro ma rorahai.”

²⁰ “Masara naga moi ahi dodaere nginika, de gea ma titi abe ngini ka nimihigunoa la ma ngofeka gea o ngo Isebele madotoko de mahirehene ahi gogilaongo utu nginioka. De muna gea momahiromanga mato bari to Ngohi ahi uru ma dodofanga, masara genangino minielu-eluku nginika. De muna gea mahigaro ahi gogilaongo genangoka la mato o pangaoika yaniiki, abe gea ma titi mahigaro la yodiai o howono manga badangoka de nagali mahigaro la yaolomo o inomo abe ihihubaka o pangaoika.

²¹ De Ngohi tomihidoakoka munangika ami oraha la muna ka idadi motoba ami howonino gea, masara muna ami hininga mato ko manoaua ami badangoka ma howonino gea ma moigo la mogila-gila dika genangika.

²² Ho naa abeika ahi hohowono munangika. Angamoi muna gea duru mosanangi momanoa de mahowo-howono ami koi ma goronaka, ho ngohi naa ahao tomihipoha de o panyake moi la hiadono muna ami koioka dika momaidu-idu de duru ko momoo-momikua. De onangoo abe muna de ona gea yomakitigi abe ko itiaiua, onangoo Ngohi ahao duru tahipoha de o kangela kohaamoko onanguku. De nako ona gea ko yotobaua manga datoro ma dorouino abe ona de muna yotobadiai, gea kiani hokogea ibooto ahi hohowono onanguku.

²³ De o ngo Isebele gea ami nyawa abe iminii-niiki, ona ahao tahibinaahaka de o hohonenge. De ahi hohowono gea ona yamakeoka de ahao o gareja ma doomu mata-mataika duru ihioriki abe Ngohi duru tatailako o nyawa manga hininga ma dolaka de manga hidee hokokia manga hininga ma goronaka, de gea ahao tahibalaha onangika abe hokokia imakiniiki de manga hininga gea. Ho o gareja ma doomu mata-mata ka idadi duru ihioriki abe ngaro nginioo, ma gea ngini homoi-homoi tohibalaha nginika abe hoka duru imakiniiki de ti ngini homoi-homoiika nia wowango ma datoro hokokia.”

²⁴ “De masara naa Ngohi tinitemo abe ngini utuikali, abe ngini utu o Tiatira ma kotaka ko nianiikua o rerehene ma dodotoko gea. De ngini gea ko nimadotokua abe ma dodotoko gea ihiromanga o Ibilihi ma haeke ma dodotoko ma lukuku. De nginika gea tinitemo tato ko tinihidogoua nia hiningaka ma dubuho,

²⁵ ma togahoko dika la ngini duru nimahigagao nia ngongakuika de ufa nirehene genangino naa de ka hiadono ahao Ngohi toboali.”

²⁶ “De onagona dika yolaku ho ma dorou ko yahikalaua onangika, de abe ona ka yatobaniiki ahi hininga ma mau onangika hiadono o dunia naa ma bobaha, ona gea ahao tahidoaka o kuaha onangika la ka idadi yahipareta o dunia ma nyawa ma dutu mata-mataika.

^27-28 De o kuaha gea duru imaketero abe hoka Ngohi tamakeoka ahi Babaka de aino. De o kuaha gea tahidoaka onangika la ona duru yahipareta de ma dubuho abe imaketero hoka yapake de o behi, de gea ona ahao duru yahikala o dunia ma nyawaika gea abe imaketero hoka o boto moi o tonakino yapoha de duru iwede-wederuku. De hokogea ma kuaha abe Ngohi ahao tahidoaka ona yolaku-lakuika. De tahidoakoo onangika o lalaku ma dodunguu, de gea o Koruku ma Beka.”

²⁹ “De onagona dika de manga ngaukoka kiani ihigihene Ma Jou o Womaha ai Demo-demoino abe ahao naa niihenoka, abe Una gea ai demo wohidumutu ma gogarejaika.” Hokogea ma hurata abe o Tiatira ma garejaika.