Himatoko 19 - Ma Jou ai Demo-demo o Totobelohoka

Ona mata-mata o Horogaka iwihigiriiri Ma Jouika

¹ De gea ipaha de ahao ngohi toihene hoka duru ko manga ngoe manga hagaaga ma ilingi daku o Horogaka de gea yopoa-poaka ato, “Haleluya, hihigiriiri Ma Jouika! Una gea duru de ai medebini ma dararonoka! Una duru de ai kuahaka! Una gea abe wonaduhunu ngone!

² De gea hihigiriiri angamoi nako Una waurusu o nyawa manga howo-howono, gea ai putuhu duru itaana de itiai. De naa ka idadi hamake abe ai putuhu duru itiai, angamoi naa Una waputuhoka de wahohowono onangika abe o Babele ma kotaka, de gea ma kota abe yahiromanga enangika ato o ngofeka gea abe biaha momatobafukunu ami badanga. Ho naa womihohowonoka munangika abe ami romanga duru ilamoko o duniaka, angamoi muna mahirehenoka o dunia ma nyawa mata-mata la onangoo iminiiki o howonika de hiadono yomakitigi de muna. De ma titi ai hohowono munangika ho Ma Jou wahibalahoka to ai gogilaongo manga awunu, angamoi muna gea abe matomaka ai nyawaika.”

³ De naa ma moioli ona ko manga ngoe ka ma moiiye yopoaka ato, “Haleluya! Hihigiriiri Unangika ma titi abe ma nofo o Babele ma kotaka de aiye idoa, gea ko itogu-togumua idoaiye ka hiado-adonika.” Hokogea ona iwihigiriiri Unangika.

⁴ De ahao o dimono yamonaoko de yaiata de o aewani ma ngango iata yomakokimotumuku de yomahuba Ma Jouika abe Una naga wogogeruku to Una ai pareta ma kadera ma hohailoaka. De gea iwihigiriiri ato, “Amin. Haleluya.”

⁵ De ahao naga o ilingi moi itemo ai kadera ma hohailoaka de aino ato, “Hihigiriiri nanga Jou! Ngone mata-mataika abe hileleani de hihoromati Unangika, ngaro nanga gogere ikurutiye eko ngaro itipokouku, masara ngone mata-mataika kiani hihigiriiri Unangika.”

⁶ De gea ipaha de ahao ngohi toihene o ilingi moi duru ma amokiye, abe marai ma ilingi gea hoka o nyawa ko manga ngoe manga hagaaga ma ilingi eko marai hoka o moku-moku ma ngoe ihohe ma koroongo, ekola marai hoka yokuruuhu duru ilamokiye de yoliarika ma ilingi. De gea ma ilingi ma demo toihene itemo ato, “Haleluya! Hihigiriiri nanga Baluhu idodutu de nanga Jouika! Una ngaro mata-mataika ma ka Unangohi duru de ai kuaha kohaamoko! Hihigiriiri Unangika angamoi naa womulaengoka la o dunia duru wahipareta!

⁷ Koaho ngone ka hogogaragoka de homorenoka de hihigiriiri Unangika! Hihigiriiri angamoi naa ma wange adonoka abe o Domba ma Ngofaka Una woilaka! De to Una ai darunu momahidiaioka la midafongo!

⁸ De munangika naga imihidoaka o baju duru ma gare-garehe de duru itebini, de gea ami baju yodiai abe ma lawe duru ma rorahai de duru ma alu-aluhino.” (Angamoi ma lawe ma rorahai gea ena hoka o hiketero moi abe ma titi Ma Jou ai debi-debini ma nyawa manga datoro ma totiai.)

⁹ De o malaekata wohihuloko ngohi o Yohanesino wato, “Kiani ahi demo naa nohitulihuku. Notulihi nato, ‘Onagona dika abe yahokino la ka idadi yaniiki o Domba ma Ngofaka ai gogilaka ma rame-rame de ma ngolo-ngolomo, ona gea duru de manga utumoka!’” De ahao una ka wohitemohi ngohino wato, “De ma demo-demo gea tonihingahuoka, gea duru Ma Jou ai hingahu ma demo ma gou-goungu.”

¹⁰ Ho ka de wohitemo hokogea de ngohi tomamotumukuoka o malaekata gea ai louoka la tato tomahuba unangika. Masara una wohitaere ngohino wato, “Ufa hokogea nodiai! Ngona kiani Ma Jouika dika nomahuba. Angamoi ngohi naa to Una ai gilaongo abe imaketero hoka ngonali de abe hoka nanga gogianongoru utuoli abe ngone homoi-homoi hahingahu-ngahu o Yesusu ai ade-ade de duru hahigaro o nyawaika la hato ona ka idadi iwingaku Unangika. Angamoi ma hingahu ma demo abe yahigaro o nyawaika la iwingaku o Yesusika, ena gea ma hirete abe yahiakunu Ma Jou ai nyawaika la ma abari gea ka idadi yahingahu-ngahu o nyawa utuika.” Hokogea o malaekata ai demo ngohino.

Una abe o kuda ma gare-garehoka wobarenuku

¹¹ De ipahaino de ngohi tamake abe o Horoga hoka ifelengaika. De gea ngohi ihitodokana angamoi genangoka ngohi tamake o kuda ma gare-garehe moi, de naga womatengo wobarenuku ma kudaka gea. De Una gea wobare-barenuku ai romanga Watobagou-goungu de Wotobatotiai, de Una ka ihikaika wototiai abe ma titi hokokia wahohowono de waparangi to Una ai musuika.

¹² De to Una ai lako duru de ma dararonoka abe hoka o uku ma dokara ma dararono. De to Una ai peauku naga womahisapeouku de o koano ma sapeo duru ma ngoe. De nagali Unangoka ai romanga moi abe iwihitulihika Unangoka, masara ka Una dika ma hirete wohioriki ai romanga gea ma titi, ho utu ko moiua ihioriki.

¹³ De Una womahinoaukuoka de o baju ma guru-gurutuku abe yatonoka de o nyawa manga awunuku. De Una gea abe iwihiromangoli Unangika ato Una gea Ma Jou ai Demo.

¹⁴ De naga ai poretino o Horoga ma tentara ko manga ngoe iwihidoduruino, abe ona gea yomahinoaukuoka de manga baju ma gare-garehe de duru itebi-tebini abe ena gea o lawe duru ma alu-aluhino yodiai. De onangoo homoi-homoiika yoboribarenuku o kuda ma gare-garehuku.

¹⁵ De Una gea ai uruoka de aino naga ihupu o humaranga o dopo-dopoino abe duru idoto, de ai humaranga gea wapake la wahikala o dunia ma nyawa mata-mataika. De onangika gea ahao duru wahipareta de ma dubuho abe imaketero hoka wapake de o behi. De gea Ma Jou ai ngamo ma hohowono duru ikiria ai musuika ho imaketero hoka o angguru ma hofoko wakokitoomuinoka abe o ngengedere ma ngioka la genangoka duru wawede-wederuku ma hofoko gea. De hokogenangoo ahao idadi ona iwilawa-lawanika, angamoi ngaro mata-mataika ma ka Ma Jouohi duru de ai kuaha kohaamoko, de ai ngamo ma hohowono duru kohagiria onangika.

¹⁶ De naga ai romanga moioli ihitulihika abe ai baju ma guru-gurutuku ma uguroko, de gea iwihiromanga ato, “O kokoano mata-mata manga Koano de o balu-baluhu mata-mata manga Baluhu idodutu.” Hokogea to Una ai romanga.

¹⁷ De ipahaino de ngohi tamake o malaekata womatengo abe una womaokoino o wangeoka. De una gea wahoko waamo-amokiye abe o totaleo mata-mataika ihoo-hoho daku ma hoanino. De wahoko ma totaleoika wato, “Niainohi! Nimatoomuinohi la ka idadi nianiiki ma ngolo-ngolomo kohaamoko abe naa Ma Jou winihidiai!

¹⁸ Niaino la niaolomo o kokoano manga roehe de o tentara manga hae-haeke manga roehe, de ngaro o nyawa manga gogilaongo eko ko o gilaongua ma nyawa, eko ngaro o nyawa manga gogere hatoli ikurutiye eko itipokouku, ma ona mata-mata manga roehe ahao inihidiaioka! De ngaro ona abe duru yopoputurungu yoparangi eko ona abe manga kudaka yobare-barenuku, de ngaro manga kuda-kuda gea ma roehe, masara mata-mataika gea ahao Ma Jou winihiolomo nginika!” Hokogea wohingahu o totaleo mata-mataika.

¹⁹ De ipahaino de ngohi tamake ma aewani ihira-hiraika gea de o dunia ma kokoano abe ona amomoiika naga de manga tentara ko manga ngoe. De ona mata-mata yomakokitoomuinoka la ato iwiparangi Unangika abe ai kuda ma gare-garehuku wobarenuku de abe to Una ai tentaraikaoo.

²⁰ De ahao ma aewani ihira-hiraika gea abe nengokadauino o gahiye ihupuiye, de gea ena ikala hiadono yataoko, de hokogenangoo ma aewani itoturuino gea abe yahitobahirehene o nyawaika la yaniikoli ma aewani ihira-hiraika, enangoo gea yataokoka. De gea ena abe nengokadauino itobadiai o heheranga ma dodunguu o aewani ihira-hiraika ma himangoka la yahirehene de yabudi o nyawaika gea abe ona yodafongoka ma aewani ma dodunguu de abe yomahuba ma aewani ma pangaoika. Ho ena gea de ma aewani ihira-hiraika, gea hinootoo yataokino de gea ma ngango yaumoika o uku ma ngootika abe genangoka yauku de o uba itoka-tokara.

²¹ De Una abe ai kuda ma gare-garehuku wobarenuku, Una gea duru wahou ma tentara mata-mata gea abe iwilawana Unangika. De gea wahikokibinaaha onangika de ai humaranga o dopo-dopoino abe ai uruoka de aino ihupu. De gea o totaleo mata-mata akokiolomo ma roehe genangoka ka hiadono duru akokipunuhoka mata-mataika.