Himatoko 18 - Ma Jou ai Demo-demo o Totobelohoka

Abe ma titi hokokia o Babele ma kota irusaka

¹ De gea ipaha de ahao o malaekata womatengoli timake wouti daku o Horogaka de wauku, de una naga de ai kuahaka duru ma amoko. De una gea naga de ai dararonoka kohadararono de gea hiadono naa o duniauku duru yodararonuku abe ma titi unangino.

² De una duru wopoaka kohaamokiye wato, “Irubaka de iwederukuoka! O Babele ma kota kohaamoko gea ma kuaha o duniaka duru iwederoka! De ma kota ma ngioka gea duru ko iwaka o nyawa yogogere genangoka, masara naa idadioka ka o toka-tokatokahi ma igutu ho o tokata ma dorou irupa-rupa genangoka imatobanoa. De nagali o totaleo ma dorou irupa-rupa imatobanoa genangoka, abe ma totaleo gea ka inaporohono ngoneino.

³ De gea o Babele ma kota irubaka angamoi ma titi o Babele ma nyawa manga datoro ma dorou. De ona ma kotaka gea duru yomaketero hoka o ngofeka momatengo abe biaha momatobafukunu ami badanga, angamoi ona duru ka ihikaika yahigaro o dunia ma nyawaika hiadono onangoo yomakiniiki o Babele ma nyawa abe yodiai manga datoro ma dorou. Ho gea o Babele ma nyawa duru yahigaro de yahiata-atara o dunia ma kokoanoika hiadono manga hiningaka duru akokilufungoka de manga badanga ma gimono de gea ma bahauku de hoka yomakitigi de o Babele ma nyawa la ato manga hafini gea ihingodumu. De gea o dunia ma kokoano yaniikoka o Babele ma nyawa manga wowango ma datoro ma dorou. De nako ona abe biaha o kiahonanga yafuku-fukunu de yoija-ija abe o kiaka dika yogogere o dunia ma amokika, ona gea yodadioka duru yokayaka mangale ma titi o Babele ma nyawa manga hafini duru ilamoko abe o kiahonangika duru ma hohailoaholi.” Hokogea ma malaekata ai hingahu ma demo abe ma titi o Babele ma kota duru irubaka.

⁴ De ahao o ilingi moioli toihene o Horogaka de aino, itemo ato, “To Ngohi ahi nyawa, ngini kiani nimatingaka gea ma kotaka de aino la ufa to ona manga howono nginioo nianiiki, done ahao manga kokangela ma hohowono ka ma moi inihidotadaene nginiukuoo.

⁵ Angamoi ona gea manga howo-howono itouniyeoka hiadono itiki naa o Horogaiye, de Ngohi naa ko tamalaikaua manga datoro ma dorou gea.

⁶ De naa Ngohi tato o Babele ma nyawa gea kiani manga kangela amake la imakiniiki de ma kangela abe hokokia ona yahikangela o nyawa utuika. De masara nako to ona manga kangela ma hohowono, gea tanu kiani utuohi ikiria yokangela, la nako to ona manga kangela naa de o nyawa utu manga kangela abe ma dihiraino abe yahikangela onangika, masara ka nenangohi duru ikiria to ona manga kangela. Ho nako hoka hohiketero de o daluku, gea kiani yahiokere onangika de o daluku abe duru imali, ho ngaro ma dihiraino ma mali yahiokere utuika, masara ka nenangohi duru ma mali abe ona ma hirete kiani yaokere.”

⁷ “De angamoi ma titi ona duru yomasadeholi de yomahigiriiri de yomahisosanangi dika ma titi manga kiahonanga abe ihohailoaholi, ho naa ona kiani ma hibalaha yamake de gea kiani yamao o kokangela ma odiri de o hininga ma dodubuho. De ona gea yomatemo manga hiningaka ato, ‘Ngomi naa duru midadioka o kokoano de o nyawa utu naga mia kuahaka. Duru ko iwa mia hininga ma dubuho eko mia kangela, de marai ka ihikaika ka ma rorahai dika miatobamake.’ Hokogea ona manga demo manga hiningaka.

⁸ Ho mangale hokogea yomahigiriiri, ho ahao manga oraha adonoka de manga kokangela yadaenoka onanguku. Abe ahao o wange moiuku de ka ma moiuku yadaene o panyake abe imahora-hora de o hafinoo hiadono o honenge ma amoko, ho ko manga ngoe ma oraha gea ka yoari-ari dika. De ahao o Babele ma kota gea youkuoka ho ko iwaka angamoi duru itinoka, angamoi gea Ngohi nia Baluhu idodutu Ma Jou abe tahohowono onangika, de Ngohi duru ahi buturungu ma amoko.” Hokogea itemo ma ilingi gea abe o Horogaka de aino toihene.

⁹ De ma oraha gea o dunia ma kokoano ahao yamake ma nofo abe idoa o Babele ma kota ma ukuoka de aiye, de gea duru yoari-ari de yopoa-poaka ma titi manga hininga duru ihuha. Angamoi ona gea ma dihiraino de ka ihikaika yomakitigi abe o Babele ma nyawaika de yomahisosanangi de de ona ma titi manga badanga ma hafini ka ihikaika ihingodumu onangika.

¹⁰ Ho o dunia ma kokoano gea ahao yomaokoino abe manga gurutika de yolega-lega dika o Babele ma kotaika angamoi ona yohawanoka ato done onangoo yahidotadaene o Babele ma nyawa manga hohowono gea. De ona ato, “Adoo, adoo! O Babele ma kota gea ma dihiraino de duru ma romanga ma amoko de duru de ma kuahaka. Masara naa hoka o lakodawi moi ma hiapoto de to ona manga hohowono amakeokau.” Hokogea manga demo abe yopoa-poaka.

¹¹ De ma oraha gea ona abe biaha o kiahonanga yafuku-fukunu de yoija-ija abe o kiaka dika yogogere o dunia ma amokika, ma onangoo mata-mata yoari-ari de manga hiningaka yomafiki-fikiri ato, “Naa done sarakia ngomi, angamoi ko moiokaua la yoija to ngomi mia kiahonanga. Naa duru mikangelaka.” Hokogea to ona manga hininga, angamoi ma dihiraino de ona o Babele ma kotaka duru ilamokoholi ma kiahonanga yomaija-ija.

¹² Abe ona ma dihiraino biaha yomaija o gurasi de o haaka de o hakaru ma leto-letongo de o biagaro ma hakaru abe duru ma hali-hali. De nagali ona biaha yomaijaino o ngoere de o baju abe duru ma rorahai, abe naga utu o lawe ma alu-aluhino yodiai, de utu ma wuu-wuu eko ma doka-dokara, de utu o ngoere abe duru inouhuholi ho duru ihali. De nagali yomaijaino o kiahonanga irupa-rupa abe yodiaioka o gota ma hali-halino de o gaja ma aewani ma hihipatino de o tabaagaino de o behino de o hakaru ma hohailoaino.

¹³ De naga utuoli ona biaha yomaijaino o kayu manis de o manyanyi de o muuru de utuoli naga abe ma bounu duru irahai, de o angguru ma teongo ma gohaka de o saitunu ma minya de o tarigu ma hali de o gandum. De naga utuoli ona biaha yomaijaino o hapi ma duduono de o domba ma duduono, de o kuda ma duduono, de o goroba ma ngoe. De ngaro o gogilaongo ma nyawa de o nyawa utu abe yataokino, ma onangoo o Babele ma nyawa ma dihiraino ko manga ngoe yomaijaino.

^14-15 De ona abe manga kiahonanga yafuku-fukunu de yoija-ija o Babele ma kotaka gea de yomatiwi-tiwi genangoka hiadono ona duru yokayaka, onangoo gea ko manga gurutika yomaokoino. Angamoi onangoo yohawanoka ato done onangoo yahidotadaene o Babele ma nyawa manga hohowono. De gea duru yoari-ari ma titi o Babele ma kota ihihangoka de yomahingahu manga hininga ma huha ato, “Ti ngini nia sosanangi ma kiahonanga abe nia hininga duru yohafini enangika, gea mata-mata duru ko iwaka nginioka. De ti ngini nia kiahonanga abe ileto-letongo de abe ihohailoaholi, gea mata-mata ikokihihangoka ka hiado-adonika ho ko niamakeokauali nia kiahonanga gea.

¹⁶ Adoo! Abeika nia hininga ma huha abe ngini o Babele ma kotaka nimanoa angamoi naa ihihangoka! Ma dihiraino de nia romanga duru ilamoko o duniaka, de ngini biaha nimahinoauku de o baju abe o lawe ma alu-aluhino yodiai de o baju ma wuu-wuu de ma doka-dokara, de naga nimahinoa de o gurasi de o hakaru ma leto-letongo de o biagaro ma hakaru duru ma hali-hali ho nia rupa duru nirorahai dika!

¹⁷ Masara naa hoka o lakodawi moi ma hiapoto de nia kiahonanga duru kohaamoko gea ka aiaho!” Hokogea manga hininga ma huha ma demo. De nagali genangoka ona mata-mata abe yomatiwi-tiwi o kapaka, abe ngaro o kapa ma ago-agomoka ma kaputeene eko ona utu yotobakarajaanga o kapaka eko ngaro onagona dika yatobaniiki o kapa, ma onangoo mata-mata ma oraha gea de yomaokoino abe manga gurutika de yolega-lega o Babele ma kotaika.

^18-19 De gea ona yawuningi ma nofo idoa daku ma hoaniye de onangoo yoari-ari de o tonaka ma kokuhuhunu yomadererouku manga peauku la gea yomahitunguu manga hininga ma huha, de yotemo ato, “Adoo! Ga gena o Babele ma kota duru ko iwaka! Done o kiaka naga o kota moioli abe imakadaene ma hohailoa de o Babele ma kota abe gea youkuoka? Abeika ma kota gea abe ma dihiraino de to ena ma romanga duru ilamoko o duniaka. De duru ma titi ma kota gea hiadono ngone abe de nanga kapaka nanga tiwi idadi ilamoko genangino, angamoi ona ma kotaka gea duru manga tiwi ilamoko. Masara naa ka itodokanino de gea mata-mata ka aiaho. Adoo!” Hokogea to ona manga demo.

²⁰ Ho ngini mata-mata o Horogaka ngaro ka nigogaragoka ma titi o Babele ma kota ibinaahaka! De ngini abe ma dihiraino Ma Jou winihidadi ai hidingoto ma nyawa de abe utuoli ai uru ma dodofanga, de ngaro ngini utu mata-mata abe nidadioka to Una ai debi-debini ma nyawa, masara ngini mata-mataika ngaro ka nigogaragoka angamoi naa Ma Jou winihibalahoka ngini. De gea Ma Jou wahohowonoka o Babele ma nyawaika abe hokokia imakiniiki de to ona manga datoro ma dorou nengokadau abe yodiai nginika.

²¹ De ahao o malaekata womatengo abe duru woputurungu una o hakaru moi duru kohaamoko wagoraka de waumoka o gahiuku. De gea wotemo wato, “Abe imaketero hoka ma hakaru taumoka o gahiuku de ko hamakeokaua, hokogenangoo ahao o Babele ma kota duru Ma Jou wohibinaahaka la ko amakeokauali ka hiado-adonika ma kota ma amo-amoko gea.

²² De ma oraha gea de imahikaika ko iwaka o nyanyianga ma ilingi o kota ma goronaka gea. De ngaro ona abe o sulingi eko o guguli yotobawuwu eko abe naga moi manga kia naga yapita-pitata, ma gea mata-mata ma ilingi ahao duru ko yoihenokaua ma kota ma goronaka gea. De ngaro ona abe yososawaro manga karajaangoka la genangino yomatiwi-tiwi, ma ona ko moiokaua gea ma kotaka. De ngaro manga gandum ma duru ko iwaka ho enangoo ko iwaka ma ilingi abe ma gandum yotuu-tutuku.

²³ De nako o futu-futu duru ko amakeokaua o hilo eko o posi ma dararono, ma ifufutuoka dika. De duru ko yoihenokaua abe o gogilaka ma rame-rame ma hagaaga o kota ma goronaka gea, masara duru irii-riidoka dika. De hokogea ma kota wohibinaahaka Ma Jou angamoi ma titi to ena ma nyawa abe yafuku-fukunu de yoija-ija, ona gea manga roma-romanga idadi ilamoko o duniaka de hiadono ona yahirehene o dunia ma nyawaika la o totiai ma ngekomo yakokinoaka. De gea yahirehene ma titi manga dodiaiino yatobapake la yahibudi o dunia ma nyawa mata-mataika.

²⁴ De kiani manga hohowono adaene angamoi onangoka naga Ma Jou ai nyawa manga awunu. Angamoi ona yatomaka to Una ai uru ma dodofanga. De ngaro o nyawa utuoli abe o dunia ma amokika, masara onangoo o Babele ma nyawa yatomaka, ho gea ma titi hiadono Ma Jou kiani wahohowono onangika.” Hokogea o malaekata gea ai hingahu ma demo.