Himatoko 17 - Ma Jou ai Demo-demo o Totobelohoka

Abe ma titi muna gea abe biaha momatobafukunu ami badanga

¹ De ipahaino de ahao o malaekata womatengo woboa ngohino, de una gea abe ona yatumidino abe ahao kangano yaso-soino ma mangko amomoiika. De una woboa de wohitemo ngohino wato, “Nainohi nohiniiki ngohi la tonihimatoko ngonaika abe hokokia ahao Ma Jou womihohowono munangika gea abe biaha momatobafukunu ami badanga ho ami romanga idadioka ilamoko o duniaka. De muna abe biaha momatobafukunu ami badanga, muna gea tanu duru momaketero dika de o Babele ma kota abe o akere ma ngoe-ngoeoka imanoa ma kota gea.

² De o dunia ma kokoano ona yomakitigi de muna ho yahowono manga badangoka ma titi munangino gea. De nako o dunia ma nyawa mata-mataika ona hoka yadalukoka ma titi to muna ami howono ami badangoka, abe genangino yalufungu manga hiningaka hiadono yomaketero hoka yadalukoka de o angguru ma teongo ma gohaka.” Hokogea ma malaekata ai demo ngohino.

³ De wotemo ibootino de Ma Jou o Womaha ai kuaha ihilufungoli ngohi de ahao o malaekata gea wohiao abe o tonaka ma kakaahaika. De genangoka naga tomimake o ngofeka momatengo abe mobarenuku o aewani ma doka-dokara moi ma poretuku. De ma aewani gea naga to ena ma pea tumidi de ma tataduku naga ngimoi, de naga atulihika ma aewani ma badanga ma amokika o roma-romanga abe iwingelo Ma Jouika.

⁴ De ma ngofeka gea momahinoauku de o koano ma baju abe ma wuu-wuu de ma doka-dokara, de ami badangoka naga momahinoa duru kohangoe ami gule de ami gogoli de ami ngaukuku, abe utu o gurasino yodiai, de utu o hakaruino duru ma leto-letongo, de utu o biagaro ma hakaru abe duru ma hali-hali, ho gea ena ma hohailoa naga duru ma ngoe munangoka momahinoauku. De ami giamoka naga masoino o mangko moi o gurasino, de gea ena ma dola ma pese-peseke de ma dodorou abe ma titi ami datoro ma dorouino, angamoi muna ami biaha momahitigi-tigi o nyawaika de mahowono.

⁵ De muna gea ami pea ma nyore-nyoreoko naga ihitulihika o romanga moi abe naga ma titi de ma dogogonoka. De gea ma romanga ihitulihika itemo ato, “Ngohi naa o Babele ma amoko, abe ngohi to ona mata-mata manga meme abe biaha yomatobafukunu manga badanga. De abe o datoro ma dorou mata-mataika o duniaka abe duru itorou Ma Jou ai himangoka, gea ma titi ngohioka de aino iboa.” Hokogea to muna ami romanga ami pea ma nyore-nyoreoko.

⁶ De ngohi tomimake de ka idadi tomihioriki muna imidalukoka, de gea imidaluku ko de o dalukua masara de Ma Jou ai nyawa manga awunu. Abe ona gea yahingahu-ngahu o nyawa utuika ma titi o Yesusu, ona gea muna matomaka ho naa imidalukoka de to ona gea manga awunu. De gea tomimake de duru tomiheranga.

⁷ De ahao o malaekata gea wohileha ngohino wato, “Adodoa ho muna gea nomiheranga? Igoungu naga moi o dogogono abe ma titi o ngofeka gea de ma aewanioo mobare-barenuku, abe ma aewani gea naga ma pea tumidi de ma tataduku ngimoi. De naa ngohi ka idadi tonihimatoko ngonaika ma dogogono gea ma titi.

⁸ De ma aewani gea abe ahao naa ngona namake, gea nengokadau ka iwangohi masara naa ihonengoka. De gea ma aewani ahao kiani o haaroka de aiye ihupu, abe ma haara gea duru kohagurutuku. De o dunia ma nyawa ma oraha gea ahao duru yokokiheranga ma titi ma aewani gea iboali. De abe ma titi o dunia ma nyawa, gea ona abe manga roma-romanga ko iwa o Wowango ma Buku ma goronaka. Abe ma buku gea o dunia naa ko wotulaadauahi de ihitulihukuokau manga roma-romanga onagona dika abe ahao o wowango ma ngango amake. Masara nako ona ko iwingaku-ngakua to ona gea manga roma-romanga ko itulihukua genanguku. Ho ma oraha gea de ma aewani abe nengokadauino ihonengokau masara naa iboali, de gea o dunia ma nyawa duru yokokiheranga ma titi ma aewani gea. Masara gea ipahaika de ahao ma aewani gea ibinaahaka ka hiado-adonika.”

⁹ “De ma titi naa ena ngone ka idadi hataoko itiai, iti abe to ngone nanga hininga naga de ma sosawaroka. Abe nako ma aewani ma pea tumidi, gea ena tanu ma titi o loku tumidi abe naga imanoa ma kotaka gea o kiaka ma ngofeka mogogere. De ma pea tumidi gea naga ma titi moioli, abe gea ma titi naga o koano yatumidi.

¹⁰ De abe ona o koano yatumidino, naga yamotoa abe manga bobaha amakeoka, de naga womatengoli abe ma oraha naa ka wokoanohi, de naga womatengokahi abe ko woboauahi. De abe ma koano ma tumidi, una gea igoungu ahao wodadi wokoano, masara ko iwitedekanuahi de kiani iwihiguti ai kaderaka de wauku.

¹¹ De nako ma aewani ma doka-dokara gea abe nengokadau iwango masara naa ihonengoka, enangoli gea ahao idadi o koano ma tufange. De igoungu ena gea idadi ma koano ma tufange, masara ena tanu o koano moi abe ma koano yatumidino gea iboa. De ipahaika de ahao enangoo ibinaahaka ka hiado-adonika.”

¹² “De nako ma aewani ma tataduku ngimoi abe ngona kangano namake, gea ma tataduku enangoo ma titi o koano. Ho gea o koano yangimoi abe ma oraha naa ko yodadiuahi yokoano. Masara ahao naga ma oraha adono abe ona yodadi yoborikoano de de ma aewani gea ma oraha enangoo ikoano. De manga oraha abe yoborikoano, gea duru ko itedekanuahi de ahao yahikokigutioka.

¹³ De ona yangimoi gea manga hiningaka duru yomaketehiningamoi abe yoigo ma aewanika gea, ho to ona manga kuaha de manga buturungu ihidoakoka dika enangika.

¹⁴ Ho ona de ma aewani yoiki yomakuduhunu iwiparangi abe o Domba ma Ngofakika, masara o Domba ma Ngofaka de to Una ai nyawa ahao yahikala, angamoi Una gea o balu-baluhu mata-mata manga Baluhu idodutu de o kokoano mata-mata manga Koano. De ai nyawa abe iwinii-niiki, ona gea abe Ma Jou wahokoka manga ngongakuino de wairikoka la yodadi ai nyawa, de ona duru yatobagou-goungu iwiniiki Unangika.”

¹⁵ De ma malaekata gea ka wohitemo-temohi ngohino wato, “De nako o akere ma ngoe gea namake kangano abe o kiaka muna momatobafukunu ami badanga mogogeruku, o akere gea ma titi o nyawa manga dutu amomoiika o dunia ma amokika. Abe ngaro o nyawa manga popareta yomaketemomomoi eko manga bahasa ma enangoo yomaketemomomoi eko manga dutu ma enangoo yomaketemomomoi, masara ona mata-mataika gea abe ma titi o akere ma ngoeino. Ho abe muna mogogeruku o akere ma ngoeoka, gea ma titi naga to muna ami kuaha o dunia ma amokika.

¹⁶ Ho ahao naga ma oraha adono abe ma aewani ma doka-dokara de to ena ma tataduku ngimoi, abe genangino ma titi o koano yangimoi, ona mata-mata ahao duru imidohata munangika abe biaha momatobafukunu ami badanga. De ona ahao ami kiahonanga mata-mata yomahitoona hiadono to muna duru ko iwaka, de ngaro ami baju ma enangoo gea yahuputoka la muna ka ami bululunokahi. De gea ahao to muna ami roehe yaolomo de nako ami hou, gea yatufuku la imiuku hiadono duru motinoka.

¹⁷ De hokogea manga datoro ma dorou ahao idadi angamoi Ma Jou ahao wokarajaanga o kokoano manga hiningaka la hiadono ngaro to ona manga hininga ma dumutu itorou, ma manga putuhu gea duru imakiniiki de to Una ma hirete ai putuhu de ai hininga. Ho ahao ma oraha gea de ona o koano yangimoi Ma Jou wahikokiaturu manga hiningaka la gea ka moi dika, ho yoputuhu ato manga kuaha ihikokidoaka abe ma aewani ma doka-dokarika. De hokogea ahao ona ihingodumu Ma Jou ai hidee abe ma dihiraino de wohingahuokau ai Demo-demoino. Ho ma aewani gea ikoano o duniaka ka hiadono Ma Jou ai Demo-demo gea ingodu-ngodumoka.

¹⁸ De nako ma ngofeka abe kangano nomimakeoka, muna gea tomihiketero de o kota ma amoko moi. De ma kota ma amoko gea hohiorikoka abe gea ena ma kota abe ma oraha naa yahipareta o dunia ma amokika, de ngaro o dunia ma koano mata-mataika, ma onangoo ma kota gea ma kuahaka.” Hokogea o malaekata ai hitararono ma demo ngohino ma titi ma himatoko abe ngohi tamakeoka ma oraha ihilufungu de Ma Jou o Womaha ai kuaha.