Himatoko 16 - Ma Jou ai Demo-demo o Totobelohoka

Abe ma titi Ma Jou wahohowono o duniaika de o kangela tumidi abe duru kohagiria

¹ De ahao ngohi toihene o ilingi moi ma amokiye Ma Jou ai Tauoka de aino. De ma ilingi gea itemo o malaekata tumidika gea ato, “Ngini niloiki la homoi-homoiika niakokikopoaka nia mangko tumidi gea o duniauku, abe to ena ma dola Ma Jou ai ngamo ma hohowono o duniaika.”

² De itemo ipahaino de o malaekata womatengo wosoboka de wakopoa to una ai mangko ma dola dau o duniauku, de gea o nyawa o duniaka idadioka manga boroho o bara manga badangika abe onagona dika yodafongoka ma aewani gea ma dodunguu de yomahuba to ena ma pangaoika. De ona manga boroho o bara gea duru itorou de duru kohaodiri manga badangika.

³ De gea ipahaino de ahao o malaekata ma hinooto wakopoa to unangoli ai mangko ma dola dau o gahiuku. De ka de wakopoauku de ma gahi mata-mataika idadioka imaketero hoka o honenge ma awunu, ho ma nawoko de ma aewani ma ngango mata-mataika o gahioka gea ikokihonengoka.

⁴ De gea ipahaino de ahao o malaekata ma hange to unangoli ai mangko ma dola wakopoauku o akeruku de o jojobuubu mata-mataika, de enangoo mata-mata idadioka o awunu.

⁵ De ahao ngohi toihene o malaekata womatengoli abe ma dodihirainohi de Ma Jou wohidoakokau ma kuaha ma malaekatika gea la wato o duniaka ma akere mata-mataika idadi to ma malaekata ma kuahaka. De ma malaekata gea wotemo Ma Jouika wato, “Ngona Jou duru notebi-tebini, de ma oraha naa Ngona nagahi, de ngaro ka hiado-adonino ma Ngona nagau. De naa Ngona ani hohowono duru itiai abe o duniaika,

⁶ angamoi ani musu gea yatomaka to Ngona ani debi-debini ma nyawa, abe ona utu yodadi to Ngona ani uru ma dodofanga. Ho gea ani musu abe to Ngona ani nyawa yatomaka de akopoaka manga awunu, ho naa to ona manga balaha duru itaana yamakeoka, abe Ngona nahiokere ani musuika gea de o awunu, de gea duru itiai ani hibalaha onangika.” Hokogea o malaekata ai demo Ma Jouika.

⁷ De ahao o ilingi moioli toihene abe o huhuba ma ngioka de aino ipaluhu ato, “Ma demo gea igoungu. Mia Baluhu idodutu, Ngona mia Jou abe ngaro mata-mataika ma ka to Ngonahi ani kuaha duru kohaamoko. De to Ngona ani putuhu de ani hohowono mata-mata gea duru itotiai de itaana.” Hokogea ma ilingi itemo.

⁸ De gea ipahaino de ahao o malaekata ma iata unangoli woiki de wakopoa ai mangko ma dola o wangeuku, de gea ma wange idadioka duru kohahauku hiadono yauku o nyawaika ma titi to ena ma haukino.

⁹ De o nyawa yakokiuku ma titi o wange ma hauku kohagiria gea, ho hiadono ona duru iwingelo-ngelo Ma Jou ai romangika. De gea to Una ai kuahaka abe ma hohowono ma kokangela gea yadaene o dunia ma nyawaika. De ngaro hokogea masara ona iwingelo Unangika, de ka yoluku yotoba manga datorino de yoluku iwihigiriiri Unangika.

¹⁰ De gea ipahaino de ahao o malaekata ma motoa unangoli woiki wakopoa ai mangko ma dola abe o aewani ihira-hiraika o gahioka de aiye gea ma kuaha ma kaderauku. De ka de wogopoaka de idadioka ifufutu abe o kiaka dika ma aewani gea yahipareta to ena ma kokawaahaika. De gea de ahao to ena ma nyawa gea ka yomahidokagoli manga akiri ma titi manga odiri ko yapoakaua.

¹¹ De ona gea ka iwingelohi de iwidoa-doanohi Ma Jouika o Horogaka ma titi manga badanga ma odiri ma ngoe de manga boro-boroho o bara, de gea ko yotobauahi manga datoro ma dorouino.

O malaekata ma butaanga ai mangko ma dola wakopoa

¹² De gea ipahaino de ahao o malaekata ma butaanga to unangoli ai mangko ma dola wakopoa abe o akere moi ma amokuku ma romanga o Efaraata ma akere. De ka de wogopoauku de o akere ma amoko gea idudungoka hiadono igapanga o nyawa yomahihora doka ma honongaika genangoka. De hokogea idadi la o kokoano abe o wange ma hiwariha yoboa la ahao iwilawana Ma Jouika, gea manga ngekomo yahidiaioka. Abe ona homoi-homoi manga tentara yowoe-woe yakokiao la ato yomahihora doka o akere ma honongaika, ho gea ka idadi ona yapake ma ngekomo abe ma akere gea idudungoka.

¹³ De ahao ngohi tamake o tokata ma dorou o gahumu hange ihupuino, de ena gea ma rupa hoka o popaa ma rupa. De ma tokata ma dorou moi gea ihupu o naga ma uruoka de aino, de ma tokata ma dorou moioli gea ihupu o aewani ma uruino abe ma dihiraino o gahioka de aiye ihupu ma aewani. De naga moioli ma tokata ma dorou abe ihupu o aewani moioli ma uruino, de gea ma aewani abe ma dihiraino o tonakoka de aiye ihupu, de gea ena ma aewani abe naa ihiromanga enangika ato ena gea yahitobahirehene o nyawa la yaniikoli o aewani ihira-hiraika gea abe o gahioka de aiye ihupu.

¹⁴ De ma tokata ma dorou o gahumu hange gea naga de ma kuahaka la o heheranga ma dodunguu ka yakunu yodiai. De ena gea isobo itagi o dunia ma amokika la ato yahigaro o kokoano mata-mataika de hiadono yatoomuino o parangi ma ngioka la ahao ka idadi yomakokuduhunu iwikokilawana Ma Jouika. Angamoi ahao naga ma wange adonoka de ahao Ma Jou abe ka to Unangohi ai kuaha duru kohaamoko, Una ahao ai hohowono wahipoha onanguku abe ka iwilawa-lawanohi. De to Una ai Hohowono ma wange gea de ahao yomarihimanga de Ma Jou ona mata-mata abe yomatoomuinoka la yomakokuduhunu iwiparangi Unangika.

Nanga Baluhu Una wonahitiari ngoneino

¹⁵ De ahao nanga Baluhu idodutu wonahitiari wato, “Abeika nitotoihene! Ngohi ahao ka itodokanino de toboa nginika. De gea toboa imaketero hoka womatengoani wotobatohiki woboa la wato winidohiki, angamoi ngini duru ko nihiorikua o futu o kia ahao toboaino. Ho onagona dika yomagoa-goana de yomahinoaukuoka manga baju, ona gea ahao duru de manga utumoka. Masara nako ona utu abe ko yomahidiaiuahi, done ahao yotagi-tagi ka manga bululunokahi de utu yamake de duru yamaleke ona gea.” Hokogea nanga Baluhu idodutu ai hitiari ma demo.

¹⁶ Ho ma tokata ma dorou o gahumu hange gea yatoomuino o dunia ma kokoano ma ngioka abe nako o Yahudi ma nyawa manga demo yotemo ato o Harmagedono ma ngi, la genangoka ahao iwikokiparangi Ma Jouika.

O malaekata ma tumidi ai mangko ma dola wogopoa

¹⁷ De gea ipahaino de ahao o malaekata ma tumidi ai mangko ma dola wogopoa daku ma hoanino. De gea wogopoaka de ahao naga o ilingi moi duru ilamokiye Ma Jou ai Tauoka de aino, de gea to Una ai pareta ma kadera ma hohailoaino iboa abe waamo-amokiye wato, “Naa ibootokau!”

¹⁸ De wotemo ibootino de ahao naga yoleletongo ma ngoeika, de nagali yokuruuhu ma amokiye de ma ilingi ka yoliarika. De nagali ma oraha gea dika ma tonaka ihikelu-kelu duru kohagiria, de ngaro ma tonaka ihikelu-kelu ma dodihirainohi mata-mataika abe ma oraha o nyawa wonatulaadauku de aino hidutu naa masara ka nenangohi duru kohagiria.

¹⁹ De nako o kota ma amoko o Babeloka, genangoka ma tonaka ihikelu-kelu hiadono ma kota iregu hangeoka ma titi ipelaka ma tonakino de imakokitingakoka ma kota ma regu hange gea. De ngaro o kota-kota utu abe o dunia ma amokika, ma enangoo mata-mataika ikokiwederoka ho ikokiturabahoka to ena ma tau. De hokogea wahohowono o Babele ma kotaika, angamoi Ma Jou ko wawohangua to ona manga howo-howono Unangika, ho naa adonoka manga hohowono ma oraha, de kiani ona yamake Ma Jou ai ngamo ma hohowono abe duru ingodu-ngodumoka. Abe gea nako tohiketero manga hohowono gea de o angguru ma gohaka o mangko moi ma gomanga, gea ona kiani yakokiokere hiadono amataka la duru ingodu-ngodumoka to ona manga hohowono.

²⁰ De ma oraha gea o nuuhu de o loku-loku mata-mataika o dunia ma amokika gea ka aiaho, ko hamakeokaua!

²¹ De nagali idadi o es ma awana ma dodogowini ipurarahuku dau o dunia ma nyawauku. De gea o es ma awana duru kohaago-agomo de duru ma dodubuho, abe amomoiika ma dubuho ngade-ngade o kilo moruata. De gea o nyawa yamao duru itubuhoholi manga kangela gea abe yadaenoka, ho hiadono ona iwidoa-doana de iwingelo Ma Jouika.