Himatoko 15 - Ma Jou ai Demo-demo o Totobelohoka

O nyawa ko manga ngoe o Horogaka yonyanyi o higiriiri ma nyanyianga

¹ De ipaha de ahao ngohi tomalega daku o Horogaiye de genangoka tamake o heheranga ma dodunguu moioli abe duru ma titi ikurutiye de gea duru ihihiheranga ngohino. De gea ngohi tamake o malaekata yatumidi de onangoka naga amomoiika manga tagongo la o kangela kohagiria ahao ihipoha dau o duniauku. De ma kokangela gea ena Ma Jou ai hohowono ma kangela duru ma baha o duniaika, angamoi nako gea wahipoha ibootino de ahao duru ingodu-ngodumoka to Ma Jou ai ngamo ma hohowono o dunia ma nyawaika.

² De nagali tamake ma rupa hoka o taaga o kahinaaino yodiai masara gea hoka imakasapuroka de o uku. De genangoka naga yomaokoino o nyawa ko manga ngoe abe yolaku-laku ho ma aewani ma dorou gea ko yahikalaua onangika. De gea ona abe ko ihigiriiriua de ko yomahubaua ma aewani ma pangaoika de ko yodafongua to ena ma romanga ma nomoro. De ona homoi-homoioka naga yasoino o kia moi ma rupa hoka o hitar ma eteteke masara o fara moi ma rupa, de naa ena ka yapita-pitata dika, de gea Ma Jouoka de aino wahidoakoka onangika.

³ De ona gea mata-mata yonyanyi de iwihigiriiri Ma Jouika ma titi abe hokokia nengokadauino wokarajaanga ai huhuloko o Musaika de ma titioo abe hokokia wokarajaanga ai Domba ma Ngofakika. De gea ma nyanyianga ihiromanga ato, “O Musa de o Domba ma Ngofaka ma nyanyianga.” De gea ma nyanyianga ma demo yonyanyi ato, “To Ngona dika Jou ani karajaanga duru ikurutiye de duru inahiheranga! Ngona dika Jou to ngomi mia Baluhu idodutu abe ngaro mata-mataika ma ka to Ngonahi ani kuaha duru kohaamoko. To Ngona ani hininga de ani ngekomo duru ka itotiai de itobagou-goungu dika. Ngona nodadi o dunia ma popareta mata-mata manga Koano nokokurutiye!

⁴ Mode ka onagona abe ko inimodongua de ko inihoromatiua Ngonaika? De mode ka onagona yoluku ihilamoko ani romanga de inihigiriiri Ngonaika? Angamoi ka Ngona dika notebi-tebini! De o dunia ma nyawa mata-mataika ahao yokokiboa de yomahuba to Ngona ani himangoka, angamoi ani datoro ma totiai ona yakokimakeoka.” Hokogea manga nyanyianga ma demo Unangika.

O malaekata yatumidi yomahidiai la o kokangela yogopoa o duniauku

⁵ De gea ipaha de ahao ngohi tamake Ma Jou ai Tau o Horogaka naga ifelenga la ka idadi tamake doka ma goronaika, de genangoka naga Ma Jou ai ngi duru ma debi-debini.

⁶ De ahao ma malaekata tumidi gea abe amomoiika naga manga tagongo la o kokangela yahipoha dau o duniauku, ona Ma Jou ai Tauoka de aino yohupu. De gea yomahinoaukuoka de o baju ma guru-gurutuku abe duru ma gare-garehe de ma leto-letongo, de gea ma lawe duru ma alu-aluhino yodiai. De naga manga aluino o ban o gurasino abe ihipakitino.

⁷ De ahao o aewani ma ngango moi abe ma aewani iatino, gea yahikodoku o malaekata tumidi amomoiika o mangko o gurasino abe ma dola gea Ma Jou ai ngamo ma hohowono, abe Una gea wotobawango ka hiado-adonika.

⁸ De ahao Ma Jou ai Tau duru aomangoka de o nofo ma titi Ma Jou ai medebini ma dararono de ai kuaha duru kohaamoko. De ma nofo gea imanoa ai Tau ma goronaka ka hiadono ai hohowono ibootoka. Ho ko moiua yahigunoa la yowohamika ai Tau ma goronaika ka hiadono o malaekata yatumidi gea o kokangela tumidi homoi-homoiika yogogopoakahi o duniauku. De nako ahao ai hohowono gea ingodu-ngodumoka o duniaka, gea de ahao ka idadi utu yowohamikali ai Tau ma goronaika.