Himatoko 14 - Ma Jou ai Demo-demo o Totobelohoka

O Domba ma Ngofaka de ai nyawa abe yasana o ratuhu moi de moruata de iata

¹ De gea ipaha de ahao ngohi tomalegaika, de naga genangoka tamake o Domba ma Ngofaka womaokoino o Siono ma lokuoka, de naga Unangoka ai nyawa yasana o ratuhu moi de moruata de iata manga ngoe. De ona gea abe naga ihitulihika manga pea ma nyore-nyoreoko to Una ai romanga de to ai Babaoo ai romanga ihitulihika.

² De ahao o ilingi duru ma amokiye toihene o Horogaka de aino, de o ilingi gea ma amokiye hoka o moku-moku ma ngoe ihohe ma koroongo, eko hoka yokuruuhu duru ma amokiye de yoliarika ma ilingi. De nako ma ilingi ma rupa, gea ngade-ngade hoka o nyawa manga ngoe yapita-pitata manga hitar ma hohumuduru ma ilingi ma rupa, masara naa ena o hitar o fara moi.

³ De ma ilingi ma amoko gea o nyanyianga ma hungi abe naga yonyanyi duru ilamokiye to Una ai pareta ma kadera ma hohailoa ma himangoka. De gea to onangoo manga himangoka abe ma aewani ma ngango iata de o dimo-dimono abe ona ka ihikaika naga genangoka. De ma nyanyianga ma demo gea to Una ai nyawa yasana o ratuhu moi de moruata de iata, ka ona dika yakunu yaniiki yonyanyi, de nako utu duru ko moiua abe yakunu ma nyanyianga ma hungi gea yaniiki. De ona abe naga Unangoka, ona gea abe Una wabanguoka de ai awunu o duniaka de aino la genangino wahihohe o tobabudi gea ma kuahaino.

⁴ De ona gea manga wowango ma datoro duru itebini, de ona duru yatobagou-goungu iwinii-niiki o Domba ma Ngofakika dika, ho ona yomaketero hoka o nauru abe duru ko yahowo-howonua de o ngofekaika ho yotebi-tebini, angamoi ona ngaro o kiaika dika o Domba ma Ngofaka woiki, ma onangoo ka ihikaika iwinii-niiki genangika. De ona gea abe wabanguoka la yodadi to Una ai nyawa de to Ma Jouoo ai nyawa, de gea imaketero hoka ma dihiraino o Isiraele ma nyawa manga gota ma domoro ma hofoko gea iwihidoaka Ma Jouika la enangoo gea idadi to Una.

⁵ De ona gea manga uruoka duru ko yoelu-elukua, de ona duru o debi-debini ma nyawa angamoi ko iwa manga howono onangoka.

O malaekata yaruange manga hingahu ma demo

⁶ De ipaha de tamake o malaekata womatengoli de gea una wohoo-hoho daku ma hoanino. De o malaekata gea wohiabari o Abari ma Rorahai abe ko atoturuurua ka hiado-adonika, ho gea wahingahu-ngahu ona mata-mataika abe yogogere o dunia ma amokika, ngaro o pareta amomoiika eko o dutu amomoiika eko o nyawa manga doomu amomoiika abe manga bahasa imaketemomomoi, ma ona mata-mataika o malaekata gea wahiabari.

⁷ De gea wopoa-poaka waamo-amokiye wato, “Ngini kiani duru niwihoromati Ma Jouika de niwihigiriiri Unangika ma titi ai kuaha kohaamoko, angamoi naa adonoka ma oraha la Una waurusu o nyawa mata-mata manga wowango de manga hininga. Ho kiani nimahuba Unangika abe wotobatulaada mata-mataika, abe ngaro daku ma dihangoka eko naa o duniaka eko ngaro o gahioka eko o akere ma jojobuubuoka, ma Una dika wotobatulaada ho kiani niwihigiriiri Unangika.” Hokogea ma malaekata ai hingahu ma demo.

⁸ De ahao tamake naga o malaekata womatengoli wohoho wihidoduruino ai dodiawo daku ma hoanino. De naa o malaekata ma hinooto wahingahu-ngahu wato, “Irubaka de iwederukuoka! O Babele ma kota kohaamoko gea ma kuaha o duniaika duru iwederoka! Abe o Babele ma nyawa ona nengokadau yahirehene o dunia ma nyawa o dutu amomoiino la yaniiki o Babele ma nyawa manga datoro ma dorou hiadono onangoo duru yamagawe o dorouika yotobadiai de yotula-tulaka dika. De gea ma titi manga datoro ma dorouino gea ho hiadono o Babele ma kota iwederoka ma kuaha.” Hokogea o malaekata ma hinooto ai hingahu ma demo.

⁹ Ka de gea ipaha de ahao womatengoli o malaekata wahidoduruino manga poretino abe ma malaekata yahinooto yopahaka. De naa o malaekata ma hange wopoa-poaka waamo-amokiye wato, “Onagona dika abe yomahuba o aewani ihira-hiraika de yomahuba ma pangaoika abe ma rupa hoka ma aewani gea ma rupa, eko ngaro to ma aewani ma dodunguu yodafongo manga pea ma nyore-nyoreoko eko manga giamoka,

¹⁰ ma ona gea mata-mata ahao yadaene onanguku Ma Jou ai ngamo ma hohowono. De gea Ma Jou ai hohowono onanguku duru kohagiria, abe ma hohutuloo de ko ikurangua. Abe gea ai hohowono imaketero hoka o angguru ma teongo ma gohaka abe duru ireeika o angguru dika de ko iwa ma hikasapuru, ho duru ihauku to ena ma mao. De to Ma Jou ai hohowono enangoo hoka duru ihauku, de ona abe yadaene onanguku, ona gea ahao duru yokangela ma titi o uku de nagaoo o ubaino yauku onangika. De o nyawa mata-mata gea manga hohowono, gea idadi o momalaekata manga himangoka de o Domba ma Ngofakoo ai himangoka.

¹¹ De to ona gea manga hohowono ma uku ka ihikaika itokara de ma nofo idoaiye ka hiado-adonika. Ho ona abe yomahuba o aewanika gea de to ena ma pangaoika de yodafongo to ena ma dodunguu onangoka, ona gea duru ko iwa manga hiaini abe manga kangelaino o futu de o wange masara ka ihikaika naga yauku onangika.

¹² De ahi demo naa totemoka la idadi o higaro ma demo abe ngini Ma Jou ai nyawaika hiadono ka nimatongohonohi nia ngongakuoka de ufa nikelu-kelu. Abe ngini igoungu ka ihikaika niatobaniiki Ma Jou ai behehongo nginika de niatobagou-goungu niwiniiki o Yesusika dika.” Hokogea o malaekata ma hange ai hingahu ma demo.

¹³ De ahao o ilingi moioli toihene o Horogaka de aino itemo ngohino ato, “Ngona kiani ahi demo naa nohitulihuku, notulihi nato, ‘Ma oraha naa de imahikaika de onagona dika abe yohonenge ma titi iwinii-niiki nanga Baluhu idodutuika, ona gea duru youtumu.’” De ahao Ma Jou o Womaha wapaluhu wato, “Gea duru igoungu, abe ona gea ahao o Horogaka de ka idadi yomahiaini manga kangela de manga karajaanga ma dubuhoino, angamoi ma titi manga karajaanga ma hasilino ho ahao genangoka de yamake manga sosanangi ma utumu.” Hokogea ma ilingi ma demo abe ngohi toihene.

O gugutuku ma orahoka abe Ma Jou waurusu o dunia ma nyawaika

¹⁴ De ipaha de ngohi tomalegaika, de naga ihihimatoko ngohino o hiketero abe ma titi hokokia Ma Jou waurusu de wahohowono onangika abe iwilawa-lawana abe ahao ma oraha ma baha adonoka. De gea tamake o lobi moi ma gare-garehe, de naga womatengo wogogeruku o lobiuku gea abe ai rupa hoka o nyawa. De ai peauku naga womahisapeouku de o koano ma sapeo o gurasino, de abe ai giamoka naga wasoino hoka o gugutuku ma dia abe duru idoto.

¹⁵ De ahao o malaekata womatengoli woboa Ma Jou ai Tau o Horogaka de aino de una gea wiboakika Unangika abe wogogeruku ma lobioka wato, “De ani gugutuku ma dia gea ka idadi nomulaenge napairi o duniaka, angamoi o dunia ma gugutuku ma oraha adonoka de ma redi ma hofoko ikokilomukoka.”

¹⁶ De gea wotemo ibootino de ahao Una abe wogogeruku ma lobioka ai gugutuku ma dia wohipairi ma moi dika o dunia ma amokika de ka wotengouku wautuku mata-mataika.

¹⁷ De gea ipaha de ahao o malaekata womatengoli Ma Jou ai Tau o Horogaka de aino woboa, de unangoo naga wasoino o gugutuku ma dia moi duru idoto.

¹⁸ De naga womatengoli o malaekata abe o huhuba ma ngioka de waino woboa, de una gea abe wotobagoana ma uku o huhuba ma ngioka. De una woboa de wiboaika ai dodiawoika abe wasoino ai gugutuku ma dia ma doto-doto gea, wato, “Naa ngona ka idadi napairi de ani gugutuku ma dia ma doto-doto abe o dunia ma angguru ma redi mata-mataika la o angguru ma hofoko ma hahaku nakokitoomuino, angamoi ma hofoko gea ikokilomukoka.”

¹⁹ Ka de gea wotemo ipahaino de ahao ma malaekata womatengo gea womulaenge wohipairi de ai gugutuku ma dia o dunia ma amokika de wakokitoomuino o angguru ma hofoko ma hasili abe ma redi homoi-homoiino. De gea wakokitoomuinoka de ahao waumoika o angguru ma ngengedere ma ngi ma amoko ma goronaika la genangoka ahao o angguru ma hofoko yakokiwederuku de yateo. De ma ngengedere ma ngi ma amoko gea imaketero hoka Ma Jou ai ngamo ma hohowono duru kohagiria onangika abe iwiolukoka Unangika.

²⁰ Ho o angguru ma ngengedere ma ngi gea imanoa o kota ma poretoka, de ma hofoko wakokiumoka genangika la yakokiwederuku de yateo, masara gea ka o awunu dika ihupu abe genangoka de aino. De ma awunu gea idadi hoka o nguihi o tonakoka gea, abe ihahurika, o kilo o ratuhu hange ma gurutika, de gea ma awunu ma lukuku ngade-ngade o metere moi de ma hononga. De marai hokogea ma hiketero abe ihihimatoko ngohino hokokia ahao idadi ma oraha Ma Jou waurusu de wahohowono ona iwilawa-lawanika. Abe gea wohiketero ai hohowono de abe o gugutuku ma oraha o duniaka.