Himatoko 12 - Ma Jou ai Demo-demo o Totobelohoka

O himatoko moiohi o Yohanese wamake abe ma titi o ngofeka momatengo de o naga abe duru itualono

¹ De ipaha de ahao daku ma dihangoka naga imahimatoko o heheranga ma dodunguu moi. De genangoka naga o ngofeka momatengo abe ami rupa hoka imihigororomino de o wange ma dararono, de ami lou ma timiuku naga o mede, de ami peaka naga ami sapeo abe ma rupa ngade-ngade hoka o koano ma sapeo, masara naa o murumu ngimoi de hinooto abe imafafo hoka o sapeo ma rupa.

² De muna gea de ami badangoka, de naa mopoa-poaka ma titi igoli-goli angamoi ami kangela imulaengoka ho itigioka momagerewoto.

³ De ahao naga moiohi o heheranga ma dodunguu imahimatoko ma dihangoka, de genangoka tamake o naga moi duru kohaamoko. De ma naga gea ma doka-dokara, de to ena ma pea tumidi, de ma tataduku naga ngimoi. De abe ma pea amomoiika naga abe ma rupa hoka o koano ma sapeo imahisapeouku.

⁴ De o naga ma bikini gea yapake la ihiparihi o murumu la ipuraraha ma dihangoka de auku dau o duniauku. Abe nako o murumu mata-mata ma dihangoka haetongo de haregu hange, gea o regu moi ma aewani akokipurarahoka naa o duniauku. De ahao ma naga gea iloiki ma ngofekaika gea abe ami gahe itigioka la momagerewoto de imaokoino ami himangoka la ato nako hiadono momaguwinoka de ahao ami ngofaka gea ka idadi iwile de iwilahiroka dika.

⁵ De ahao ipaha de momagerewoto de momamake ami ngofaka o nauru, masara ma naga gea ko idadiuali iwiolomo, angamoi ami ngofaka gea iwigorakoka daku Ma Jouiye de iwiao to Ma Jou ai kadera ma hohailoaika. De genangoka ahao o dunia ma nyawa mata-mataika Una duru wahipareta de ma dubuho abe imaketero hoka wapake de o behi.

⁶ De nako ma ngofeka gea abe to Una ngoi meme, muna moara ma hoanika abe ko iwa o nyawa genangoka, angamoi Ma Jou womihidiaioka ami ngi ma hoanoka la genangoka imipaliara abe ami futu o sana moi de o ratuhu hinooto de moributaanga ma dekanino abe imipaliara. De gea ma dekana tanu o taongo hange de ma honongaino.

⁷ De ahao ipahaika de naga yomaketeparangi ma dihangoka. De gea Ma Jou ai malaekata womatengo abe duru woputurungu, to una ai romanga o Mikaele. Ho o Mikaele de to una ai momalaekata, de ma naga kohaamoko gea de to enangoo ma momalaekata gea mata-mataika duru yomaketeparangi.

⁸ Masara ma naga gea ko akunua ho o Mikaele de ai momalaekata ko yahigunoakaua la imanoa o dihangoka.

⁹ De gea ma titi ho hiadono ma naga kohaamoko gea de to ena ma malaekata mata-mata gea yaumoka dau o duniauku. De ma naga gea naga to ena ma romanga ma ngoe, angamoi ena gea abe duru ma dodihiraka imahipooteke o dodihaika, de enangoo abe ihiromanga enangika o Ibilihi ma haeke, eko o Tobalawana, de igoungu ena gea abe yatobabudi o dunia ma nyawa mata-mataika la hiadono yorehenoka o howonika. Ho gea o Ibilihi ma haeke de to ena ma malaekata mata-mata yokala de yaumoka ma dihangoka de auku.

¹⁰ Ka de gea ipaha de ahao ngohi toihene o ilingi ma amokiye moi o Horogaka. De ma ilingi gea itemo ato, “Ho naa ma dekanino de ahao naa idadioka abe to ngone nanga Jou wagorakiye ai kuaha kohaamoko la womulaenge o dunia duru wahipareta! De naa ma oraha abe to Una ai duduhunu ngoneino duru ingodu-ngodumoka! De nako Una abe ma dodihirakahi de Ma Jou wonahibehehongo ngoneino wato ahao wodadi nanga Koano, Unangoo ma oraha naa de ai kuaha kohaamoko womulaengoka wapake! Angamoi ma dihiraino o Ibilihi ma haeke ka ihikaika o futu de o wange ena naga Ma Jou ai himangoka de yatobatae-tae nanga gogianongoruika ma titi manga howo-howono. Masara ena gea abe yatobatae-tae ko iwakau Ma Jouoka ma titi yaumoka daku de auku!

¹¹ De ona nanga gogianongoru ihikala enangika ma titi yomahinganono o Domba ma Ngofaka ai awunika de ma titi Ma Jou ai Demo-demo abe ona yahingahu-ngahu de duru yahigaro o nyawa utuika la ato ka idadi iwingaku Ma Jouika. De ona ngaro o honenge yaohana ma titi o Abari ma Rorahai yahingahu-ngahu, masara ona ato koaho yohonenge dika iti ufa yorehene Ma Jouino. De hokogea ma titi hiadono ka idadi ihikala o Ibilihi ma haekika.”

¹² De ma ilingi gea ka igila-gilahi itemo ato, “Ho gea ngini mata-mata o Horogaka kiani nigogaragoka angamoi o Ibilihi ma haeke gea ikalaka! Masara hiokoo ngini abe nimanoa o dunia ma lokuoka mata-mataika, angamoi o Ibilihi ma haeke iutioka nginiuku. De ena gea duru ingamoholi angamoi to ena ma baha ko itedekanokaua de adonoka, ho ma oraha abe ka idadiohi ma datoro ma dorou idiai, gea ngade-ngade ko iwaka ma oraha, ho duru ingamoholi.” Hokogea ma demo abe ngohi toihene o Horogaka de aino.

¹³ De ma naga gea ka de imahioriki abe yaumoka dau o duniauku de imulaenge iminiiki ma ngofeka gea la ato imihikangela munangika abe ma dihiraino momagerewoto de mamake ami ngofaka o nauru.

¹⁴ Masara naga imihidoaka ma ngofekaika o gafuufu hinooto abe ma rupa hoka o koloba ma amoko ma gafuufu la ka idadi mohoho moara ami ngiika abe ma hoanoka o kiaka ko iwa o nyawa genangoka. De ami ngioka gea ahao imipaliara abe ami taongo hange de ma honongaino ma dekana, de ma naga gea ko idadiua imiadono ami ngiika gea ho ko akunua imibodito munangika.

¹⁵ De gea ahao ma naga ma uruiha naga ihingunangika o akere duru ma amoko, de gea ma akere imidumutu ma ngofekaika la ato imilahini.

¹⁶ Masara gea ma tonaka imiduhunu munangika abe naga o haara moi ma amoko idadi genangoka de ma akere gea abe ma naga ma uruoka de aino gea imaketero hoka ma tonaka alahiroka la ufa ma akere imiadono ma ngofekaika.

¹⁷ De ma naga gea ka de amake abe gea idadioka de duru imingamo munangika, ho ena isoboka la ato iloiki de yaparangi abe to muna ami ngofa-ngofakuku utuikali. De abe ami ngofa-ngofakuku, gea ona abe yatobaniiki Ma Jou ai huhuloko onangika de ka ihikaika yahingahu o nyawaika ma titi o Yesusu ai ade-adeino de gea duru yahigaro la ato o nyawa iwingaku Unangika.

O Aewani moi o gahioka de aiye ihupu

¹⁸ De o naga kohaamoko gea naga imaokoino o gahi ma dowongioka.