Himatoko 11 - Ma Jou ai Demo-demo o Totobelohoka

Ma Jou ai nyawa yahinooto abe ona yatobahingahu-ngahu ai demo-demo o Yerusaleeme ma kotaka

¹ De gea ipaha de ahao naga ihihidoaka ngohino o duduga moi o gotaino ma rupa hoka o tutukunu, de ahao Ma Jou wohihuloko ngohino wato, “Noiki natuga to Ngohi ahi Tau de ma huhuba ma ngi. De abe ma nyawa yamuruono naga genangoka yomahuba-huba de ihihigogiriiri Ngohino, ona gea ka idadi naetongo manga ngoe.

² Masara nako to Ngohi ahi Tau ma loa ma poretika idate-dateke abe enangoo ihigilolitino de ma dadaduhu, gea ma loa ma gurutu de ma ngoata ngaro ufa dika de natuga, angamoi ma loa gea tohigunoa la idadioka to ona manga kuahaka abe ona ko o Yahudi ma nyawaua. De ona gea ahao yahikala de yahipareta ma titi manga sadeino de hiadono adoko-doko abe ahi kota ma debi-debini o Yerusaleeme ma kotaka. De ahi kota gea to ona manga kuahaka o mede moruata de hinootoino ma dekana, abe gea ma futu o sana moi de o ratuhu hinooto de moributaanga, eko o taongo hange de ma honongaino.

³ De ma oraha gea ahao naga ahi hakihii ma nyawa yahinooto abe ona duru yahigaro o nyawaika la ato ihingaku Ngohino. De ona yahinooto gea abe ma dodihirainohi de nagau ma hingahu ma titi ona abe ahi Demo-demo ma goronaka. De ona yahinooto yomahinoaukuoka de o pakeanga ma kokekekere abe o karongino yodiai, la gea ihitunguu abe ona yaoino o bodito ma hingahu ma demo. De yahinooto gea ahao tahiakunu la yatobamake ahi demo Ngohioka de aino, de ahao genangino o nyawaika yahingahu-ngahu. De abe ma futu o sana moi de o ratuhu hinooto de moributaanga gea abe o nyawa yahipareta to Ngohi ahi kota, hokogenangoo ma dekanino abe ona yahinooto gea yahingahu-ngahu o nyawaika ahi Demo-demo. De gea ma dekana nako haetongo de o taongo, gea o taongo hange de ma honongaino.” Hokogea toihene Ma Jou ai demo ngohino.

⁴ De ona yahinooto gea abe ka ihikaika yomaokoino Ma Jou ai himangoka, de gea iwileleani Unangika abe Una gea o dunia mata-mataika ma Baluhu wokokurutiye. De ona yahinooto gea abe ma dodihiraino de yahiketero ona hoka o saitunu ma gota o utu hinooto eko hoka o posi ma liate hinooto.

⁵ De nako o nyawa onagona dika manga hininga ato yahikangela eko yahiodiri ona yahinooto manga badangika, gea ona yahinooto ahao manga uruiha ihupu o uku de hiadono manga musu gea yatufuku hiadono yotinoka. De kiani hokogea ahao o nyawa yohonenge nako ihitaili la yahikangela yahinootoika gea.

⁶ De ona yahinooto gea naga de manga kuahaka la daku ma hoanino yatatoko ho ko iawanokauahi abe hokokia ma dekanino ona yahingahu-ngahu o nyawaika Ma Jou ai Demo-demoino. De onangoka naga manga kuahaoo la o akere yahidadi o awunu, de ka idadioo o kangela eko o huha o kia dika naga adaene manga hininga, ma gea ka idadi o dunia ma nyawaika yahipoha de ma kangela gea. De ona yahinooto ngaro manga hininga la ato ihigali-galioli yahipoha de o kangela gea, ma ka idadi yodiai.

⁷ De ona yahinooto gea ka yogila-gila dika yahingahu de yahigaro o nyawaika ma titi Ma Jou ai hingahu ma demoino la ato o nyawa ka idadi iwingaku Unangika. De hokogea ka ihikaika yodiai ka hiadono ma hingahu gea ingodumoka de gea ahao to ona manga oraha adonoka. De ahao ma oraha gea de naga ihupu o aewani moi duru itualono dau o haariye, abe ma haara gea ena abe duru kohagurutuku. De gea abe ma aewani ma dodualono ihupuino ma haarino gea ena yaparangi ona yahinootoika de hiadono yahikala de yatoma onangika.

⁸ De ona yahinooto gea manga honenge yanoaika dika o ngekomoka abe o kota ma amoko gea ma goronaka. De gea ena ma kota abe ma dihiraino to ona manga Baluhu idodutu Una iwihidapaku o gota isosalioaika ma kotaka gea. Abe gea ma kota ka idadi hohiromanga enangika o Sodomo ma kota eko hoka o Mesiiri hohiromanga, angamoi ma titi to ona manga wowango ma datoro ma dorou imakiniiki de o Sodomo de o Mesiiri manga datoro ma dorou abe ma dodihiraino.

⁹ Ho gea ona yahinooto manga honenge o nyawa duru ko manga ngoe yamake o ngekomoka, angamoi ko yahigunoaua la yalungunu, de gea ona yohonengoka de o futu hange de ma honongaino ma dekana abe ka idadi o nyawa yalega-lega onangika. De ma nyawa genangoka yomanguningi naga utu abe o dutu amomoiino de o bahasaoo amomoiino de o paretaoo amomoi ma kokawaahaino abe o dunia ma amokino.

¹⁰ De ma oraha gea o dunia ma nyawa ahao duru yogogaragoholi abe ma titi Ma Jou ai nyawa yahinooto ona gea yohonengoka. De gea ahao ona mata-mata ihirame-rame abe yohonengoka ka hiadono o hidoaka yomaketehidingo-dingoto manga dodiawo mata-mataika. De gea ihirame-rame ma titi ma dihiraino de ona yahinooto duru yahikangela onangika, masara naa ona yohonengoka.

¹¹ Masara o futu hange de ma hononga gea ipahaino de ahao naga yangohama manga honengika o wowango ma womaha abe Ma Jouoka de aino iboa. De gea ka de yangohama manga badanga ma goronaika de ona yahinooto gea yomaokoiyeoli angamoi ona yowangokali. De o nyawa genangoka yamake abe gea idadioka de ona mata-mata duru yokokihawanaholi.

¹² De gea ipaha de ahao ona yahinooto o ilingi moi duru ma amoko yoihene o Horogaka de auku. De ma ilingi gea yahingahu onangika ato, “Niaiyeohi nenangiye.” De gea ona yahinooto ka yogoraka abe o lobi yahikorobitino de yodoa daku o Horogaiye. De naga genangoka to ona manga musu yalega-lega abe ma oraha yogoraka dakuiye.

¹³ De gea ka de yogorakoka de ahao naga genangoka ma tonaka ihikelu-kelu duru kohagiria ho hiadono ma kotaka gea manga tau duru ma ngoe ikokiturabahoka. De nako o kotaka gea manga tau haetongo de haregu ngimoi, gea ma regu moi ikokiturabahoka. Ho ma kotaka gea o nyawa yasana tumidi yokokihonenge ma titi o hikelu-keluino gea. De nako ona utu abe ka yowangohi, ona gea duru yohawanoka hiadono iwihigiriiri Ma Jou o Horogaka ato, “Ngona igoungu Ma Jou abe to Ngona ani kuaha duru kohaamoko.” Hokogea to ona manga higiriiri ma demo Ma Jouika.

¹⁴ De gea ibooto ma bodito ma hinooto. Masara abeika naga ma bodito naa moiokahi iboainoka!

O malaekata ma tumidi ai guguli wawuwu de gea ihiboa o bodito ma hange

¹⁵ De gea ipaha de ahao ma malaekata ma tumidi ai guguli wawuwu, de wawuwu ibootino de ahao ngohi toihene o ilingi ma ngoe o Horogaka, de ma ilingi gea ipoa-poaka ato, “Ahao naa adonoka ma oraha abe nanga Baluhu idodutu Ma Jou de abe nanga Koano abe duru ma dodihirakahi de Ma Jou wonahibehehongoka wato ahao woboa, ona gea ma oraha naa de duru yahipareta o dunia ma amokika. Abe ma dihiraino naga utu yahipareta o duniaka, masara naa de ahao o dunia mata-mataika idadioka Ma Jou dika ai kuahaka, de Una wahipareta enangika naa de ka hiado-adonika.” Hokogea ma demo abe ngohi toihene o Horogaka de aino.

¹⁶ De ahao ma dimono yamonaoko de yaiata gea abe yogogeruku manga kadera amomoiika Ma Jou ai himangoka, ona gea yomamotumuku de yomahuba Ma Jouika.

¹⁷ De ona yotemo ato, “Ngomi naa duru mitarimakase Ngonaika, angamoi Ngona mia Baluhu idodutu de mia Jou abe ngaro mata-mataika ma ka Ngonahi duru de ani kuaha kohaamoko. De Ngona naga abe Ngona naga, de ngaro ka hiado-adonino ma Ngona nagau. De gea mitarimakase Ngonaika angamoi ani kuaha kohaamoko gea nagorakiye la nomulaengoka o dunia duru nahipareta enangika!

¹⁸ De naa adonoka ma oraha abe ona yohone-honengoka mata-mata Ngona naurusu onangika de naputuhu manga balaha hokokia ahao yamake. De abe nako ona mata-mata abe ma dihirainohi de ko iningaku-ngakua Ngonaika, igoungu ona gea duru iningamo, masara naa adonoka ma oraha la Ngona nohibalaha onangika de ani ngamo ma hohowono. De onagona dika abe ma dihiraino yahirehene o dunia ma nyawa utuoli manga hininga ma dorouika hiadono manga wowangoo ma ihibinaahaka, onangikaoo gea Ngona nahibinaaha angamoi manga balaha ma oraha adonoka. De ngaro to Ngona ani nyawa, ma to onangoo manga oraha adonoka la yamake manga balaha Ngonaino. De gea ngaro to Ngona ani gogilaongo abe ani uru ma dodofanga, eko ngaro to Ngona ani nyawa utuoli mata-mataika abe inihoromati Ngonaika, ma ona mata-mataika nohibalaha onangika de ma utumu. Ho gea to Ngona ani nyawa abe ngaro manga gogere ko kia-kiaua eko ngaro ikurutiye manga gogere o nyawa manga himangoka, ma ona mata-mata nohibalaha de ma utumu onangika!” Hokogea o dimo-dimono manga higiriiri ma demo Ma Jouika.

¹⁹ De ahao daku o Horogaka ifelenga Ma Jou ai Tau ma hohailoa de gea ngohi ka idadi tamake gea ma goronaka naga Ma Jou ai Behehongo ma Peti, de ma peti gea idadi o hohininga abe ma titi to Una ai behehongo ai nyawaika. De ahao ka itodokanino de yoleletongo ma ngoeika de yokuruuhu duru yoliarika, de naga ma tonakoo ihikelu-kelu, de nagali o es ma awana ma dodogowini ipurarahuku dau o duniauku.