Himatoko 10 - Ma Jou ai Demo-demo o Totobelohoka

O malaekata womatengo abe naga unangoka o buku ma lulu ma eteteke moi

¹ De gea ipaha de ahao naga timake o malaekata womatengoli duru ko ai buturungu de una naga wouti daku o Horogaka de wauku. De una gea womahihawoino de o lobi la ma lobi gea imaketero hoka ai baju womahinoauku. De daku ai pea ma lokuiye naga ma dararono abe ma rupa hoka o ngawatoro idiai ihigororomino ai lokuiye. De to una ai himanga gea duru itararono abe hoka o wange ma dararono, de nako to una ai lou gea tamake imaketero hoka o uku ma lou ma rupa.

² De to una ai giamoka naga wasoino o buku ma lulu ma eteteke moi, de gea ma buku ihoheoka. De ahao una womahidokouku o duniauku de ai lou ma niraka wohidoko dai o gahiuku, de ai lou ma gubadi gea wohidoko dina ma dudunguku.

³ De ahao o malaekata gea wopoaka, de ai ilingi gea duru ilamokiye abe hoka o singa inyao duru ma amokiye. De gea ka de wopoaka ibootino de naga yokuruuhu ma tumidi abe gea iwipaluhu ma malaekata.

⁴ De yokuruuhu ma tumidi gea ipaha de ngohi ngade-ngade de tohitulihuku ma demo ma kuruuhino, masara ka itodokanino de o ilingi moi toihene o Horogaka de auku ngohiuku de gea ihitemo ato, “Gea ma demo abe ahao naa noihenoka abe yokuruuhu ma tumidi ma ilingino, gea ma demo ufa nohitulihuku ma kiani ngona nagogonohi dika doka ani hiningaka.” Hokogea o ilingi toihene.

⁵ De ahao ma malaekata gea abe ai lou naga ma hononga o gahioka de ma hononga o dudungoka, una gea ai giama ma niraka wagoraka o Horogaiye la gea wohitunguu ai behehongo moi.

^6-7 De ai giama wagorakoka de ahao wohingahu ai behehongo abe o dunia ma dola de o Horoga ma dola mata-mataika, wato, “De naa tagou-goungu tohingahu tato, ahao nako ma oraha adonoka abe ma malaekata ma tumidi ai guguli wawuwuoka, ma oraha gea de Ma Jou ko wodamaaokaua, masara duru ma wange gea dika de ahao Una wohingodumu to Una ai dogogono ma hidee. Abe ai dogogono ma hidee gea duru ma dodihiraka de Una wahingahuoka ai uru ma dodofangika. Ho ahao ma oraha ma guguli ma tumidi awuwuoka de gea ma oraha abe Una wohingodumu ai dogogono ma hidee. De hokogea ma behehongo abe tinihingahu ngini mata-mataika, masara naa tapake Ma Jou ai romanga la ngini ka idadi duru nihioriki abe ahao kiani idadi abe imaketero hoka tinihibehehongoka, ho naa ngohi tafetongo to Una ai romanga abe wotobawango ka hiado-adonika, abe Una wotulaada o Horoga de to ena ma dola mata-mata, de ngaro o dunia de ngaro o gahi, ma gea ma dola mata-mataika Una dika wotulaada.” Hokogea o malaekata gea ai behehongo de ai hingahu ma demo.

⁸ De ahao ma ilingi gea abe kangano toihenoka o Horogaka de auku iboa, gea ma ilingi ihitemoli ngohino ato, “Noiki ma malaekatika gea abe to una ai lou moi ma gahi ma lokuoka wohidokouku de moioli ma dudungoka wohidokouku. Angamoi to una ai giamoka de aino kiani nodafongo ma buku ma lulu gea abe ihoheoka.”

⁹ Ho gea ngohi toiki tiadono ma malaekatika gea de tomagahoko la ma buku ma lulu ma eteteke gea wohihidoaka ngohino. De una wohipaluhu wato, “Iya, ka idadi ngona nale de naolomo ma buku naa. De abe naolomoko, gea ahao duru namao yahiihi ani pokoro ma goronaka, masara nako ahao ani uruokahi gea namao duru imutiti abe hoka o ofungu ma gula ma mutiti.” Hokogea ai demo ngohino.

¹⁰ Ho gea ngohi todafongo ma buku ma eteteke gea o malaekata ai giamoka de aino de taolomo, de gea igoungu abe ahi uruoka duru tamao imutiti hoka o ofungu ma gula ma mutiti, masara ka de talahiruku de ahao ahi pokoro ma goronaka yahiihi tamao.

¹¹ De ahao naga ihitemoli ngohino ato, “Ngona kiani ma moioli nahingahu o nyawaika abe ma titi hokokia ahao idadi ma oraha dokengoka. De gea ngonaika ahao inihimatoko la nohioriki abe hokokia ika-ika ahao idadi o dunia ma nyawa yowoe-woeika. De ngaro ona o dutu amomoiika de manga paretaoo yomaketemomoiika de manga bahasaoo yomaketemomomoi, ma ahao naga ma hingahu inihimatoko ngonaika ma titi ma nyawa gea de manga kokoanoo homoi-homoiika. De ena gea abe inihimatokoka de ahao kiani ngonali nadofanga ma demo gea o nyawaika.” Hokogea ihitemo ngohino.