Himatoko 1 - Ma Jou ai Demo-demo o Totobelohoka

O Yohanese ai hitararono ma demo abe ma titi ai buku naa hokokia ma hidumutu

¹ O buku naa ma dolaka naga o Yesusu Kristusu ai himatoko abe Ma Jou wihidoaka Unangika ma titi hokokia abe ko itedekanokaua de kiani idadioka. De gea o Yesusu Kristusoli wihidingoto ai malaekata womatengo abe ngohi to Una ai gilaongino la ai malaekatino gea de ngohi tamake ma himatoko. De gea ihihimatoko ngohino la ahao ngohioli ka idadi tadofanga ma himatoko naa abe to Una ai gogilaongo utuikali.

² De ngohi naa o Yohanese, de gea ngohi duru tohidodiai tohitulihuku Ma Jou ai hingahu ma demo, abe ai demo gea o Yesusu Kristusu wamake Unangino de ahao o Yesusoli wohihingahu de wohihimatoko ngohino abe ai himatoko ma goronaka. De o kia dika naga abe ngohi tamake ma himatoko ma goronaka, gea mata-mataika ngohi tohitulihuku naa ma bukuoka.

³ De onagona dika yobasa abe naa Ma Jou ai hingahu ma demoino manga gogianongoru manga himangoka, ona gea duru de manga utumoka! De ngaro onagona dika naga abe yototoihene naa ma demoino de yaniiki to ena ma behehongo atulihuku nenangoka, onangoo ma duru de manga utumoka! Angamoi itigioka ma oraha abe idadi imaketero hoka ihitulihukuoka naa ma bukuino, ho onagona dika yototoihenoka naa ma buku ma demoino, ona gea ahao ko yatodokanua ma oraha mata-mata gea idadi, masara yomahidiaiokau.

⁴ De naa ngohi o Yohanese tinihurata abe ngini ahi gogianongoru o gareja tumidika, de abe nia gareja ma doomu tumidi gea naga nimanoa o Asia ma propinsioka. De ngohi tinigahoko Ma Jouiye de tonganono la to Una ai owa de ai hininga ma miriidi winihidoaka nginika. De Una gea abe ma oraha naa Una nagahi, de Una ngaro ka hiado-adonino ma Una nagau, de ngaro ka hiado-adonika ma Una gea ka wowangohi. De to Una ai kadera duru ma hohailoa ma himangoka de naga genangoka Ma Jou o Womaha ko wokurangua ma duru wongodu-ngodumu.

⁵ De nagali o Yesusu Kristusu, abe Una gea watobagou-goungu ai hingahu ma demoino. De naa to Una ai himatoko ma dihirainohi de Ma Jou wihimatokoka Unangika, ho ma oraha naangoli de o Yesusu wohihimatoko gea ena ngohino. De ai himatoko naa ngone duru ka idadi hangaku genangika angamoi o Yesusu Kristusu Una gea watobagou-goungu ai hingahuino. De Una gea duru wohira womomiki ai honengino de ko wohonengokaua. De gea Unangoo o dunia naa ma kokoano manga Koano. Ho nanga Jouika gea abe tinigahoko ngini la ahao ai owa de ai hininga ma miriidi winihidoaka nginika. De naa ngone ngaro ka hihigiriirioka o Yesusu Kristusika, angamoi Una gea wonadora ngoneino de wonahihoheoo nanga howo-howonino abe ma oraha wohonenge de to Una ai awunu iuihi.

⁶ De Una wonahidadi ngone to Una ai kokawaaha o doomu moi la ngone ka idadi hileleani ai Baba Ma Jouika abe hoka ma dihiraino ona o hidemo ma nyawa Ma Jouiye iwileleani Unangika. Ho gea kiani ka ihikaika hihigiriiri o Yesusu Kristusika, de ai kuaha kohabuturungu gea kiani hohimatoko o nyawa utuika naa de ka hiado-adonika! Amin!

⁷ Abeika nimafikiri. Una gea ahao woboa o lobi-lobi ma goronaka, de ma oraha gea o nyawa mata-mataika ahao iwimake Una de manga lako hinooto. De ngaro ona ma dihiraino abe iwihakara ai badangika, ma onangoo iwimake ma oraha woboa. De gea iwimake de ahao o dutu amomoiika o dunia ma amokika ona duru yoari de yopoa-poaka kohaamokiye ma titi Una woboa. De gea duru igoungu abe hokogea ahao idadi. Amin.

⁸ De naa nanga Baluhu idodutu Ma Jou wotemo wato, “Ngohi naa ko kia-kiauahi idadi de Ngohi nagau. De Ngohi duru ko iwa ahi bobaha. De Ngohi naga abe Ngohi naga, de ngaro ka hiado-adonino ma Ngohi nagau, de ngaro ka hiado-adonika ma Ngohi ka towangohi. De Ngohi naa de utu mata-mataika, ma ka Ngohiohi duru de ahi kuaha kohaamoko.”

O Yohanese wimake o Nyawa ma Ngofaka

⁹ Ngohi naa o Yohanese ti ngini nia gianongoru o Yesusoka. De mangale ngohi de ngini nanga borigogere naga Unangoka, ho ngone mata-mata naga nanga kangela abe hoborihimanga. De genangino tohioriki abe ngini de ngohi homahiketehigogao angamoi ngone mata-mata hodadioka to Una ai kokawaaha o doomu moioka. De ngohi tohiorikoo abe ngone homaketero ma titi abe ngaro o kangela ma goronaka masara ngone ka homatongohono dika ma dorouino. De naa tomahingahu nginika abe ngohi nengokadau ihitaokino de ihihidingoto nenangino la ihihohowono ma nuuhino naa abe ma romanga o Patomos. De gea ngohi ihitaokino de ihihohowono ma nuuhino naa ma titi tahingahu-ngahu o nyawaika abe Ma Jou ai Demo-demo de abe o Yesusu ai ade-ade gea duru tahigaro la tato yangaku enangika.

¹⁰ Ho naa o Patomos ma nuuhoka de o wange moiuku ihilufungu de Ma Jou o Womaha ai kuaha. De gea ihilufungu ma wangeoka abe ngone Ma Jou ai nyawa nanga biaha homatoomuino de hihigiriiri nanga Baluhu idodutuika. De ka itodokanino de ngohi toihene ahi poretoka o ilingi moi duru ilamokiye, de gea ma ilingi ngade-ngade hoka o guguli yawuwu.

¹¹ De ma ilingi gea itemo ngohino ato, “Abe naa bootino namake de ani lako, gea kiani nohitulihuku o buku moiuku de gea nohidingoto abe o gareja ma doomu tumidika. De gea ma gareja ma doomu moi o Efesusu ma kotaika nohidingoto, de o gareja moiikali abe o Semirna ma kotaka, de o gareja moioli abe o Peregamusu ma kotaka, de naga moioli abe o Tiatira ma kotaka, de nagali abe o Saridisi ma kotaka, de nagali abe o Filadelfia ma kotaka, de naga moiohi abe o Laodikia ma kotaka. Ho gea ma buku ahao kiani nohidingoto ma gareja tumidika gea.”

¹² De ma demo gea toihene ipaha de ahao tomadogilioro ahi poretoko la tato tohioriki gea onagona yotemo ngohino. De gea ngohi tamake o posi ma liate tumidi abe o gurasino yodiai.

¹³ De ma hidogoronaka naga womatengo ai rupa hoka o nyawa. De Una gea womahinoaukuoka o baju ma guru-gurutuku de naga ai aluino o ban moi o gurasino abe wohipakitino.

¹⁴ De to Una ai pea ma tadauru duru iareheholi, de ma magarehe gea hoka o gotoaka ma gogo ma magarehe. De to Una ai lako duru de ma dararonoka abe hoka o uku ma dokara ma dararono.

¹⁵ De to Una ai lou duru iletongo abe hoka o tabaaga ma dutu abe to ena ma ioko ihikatingakoka o uku ma goronaka de aino, de ahao yaehe ho hiadono duru iletongo ma tabaaga gea. De to Una ai ilingi gea duru ilamokiye abe hoka o moku-moku ma ngoe ihohe ma koroongo.

¹⁶ De naga to Una ai giama ma nirakoka wasoino o murumu tumidi. De ai uruoka de aino naga ihupu o humaranga o dopo-dopoino abe ma doto arihononga, de gea ena duru idoto. De nako to Una ai himanga, gea duru kohadararono abe hoka o wange ma gomono ma dararono imaketero.

¹⁷ De ngohi ka de timake de tomamotumukuoka to Una ai louoka de gea hoka ngohi tohonengoka. Masara gea Una wohituku de ai giama ma niraka ngohiuku de wotemo wato, “Ufa nohimodongo! Ngohi naa abe ko kia-kiauahi idadi de Ngohi nagau, de Ngohi duru ko iwa ahi bobaha.

¹⁸ De Ngohi naa totobawango. Abe Ngohi nengokadau tohonengoka masara abeika Ngohi naa towangokali naa de ka hiado-adonika! De Ngohioka naga o hohonenge ma kuaha, de gea Ngohi tahikoano onangika abe yohone-honengoka, la nako ona ihihononga yohonenge ekola Ngohi tahimomiki manga honengino, ma gea ma kuaha Ngohioka.”

¹⁹ De ahao Una wohibehehongo wato, “Ahao inihimatoko ngonaika abe hokokia ahao idadi ma oraha naa naga, de o himatoko utuoli inihimatoko abe ena gea ika-ika de ahao idadi. Ho ngona kiani nohitulihuku o buku moiuku gea mata-mata abe namake.

²⁰ De naa tonihimatoko dika abe ma dogogono kangano ma titi ma murumu tumidi namake ahi giama ma nirakoka de ma posi ma liate enangoo tumidi abe o gurasino yodiai. De hokonaa ma dogogono gea ma titi. Abe ma posi ma liate tumidi, gea ena ma gareja ma doomu tumidi. De abe ma murumu enangoo tumidi, gea ma gareja tumidi homoi-homoi manga malaekata. Hokogea ma dogogono ma titi.”