Hihira 8 - Ma Jou ai Demo-demo o Totobelohoka

O Gideono ma bahaika wahikala o Midiana manga tentara ma amokika

¹ O Midiana manga tentara yahikalaka de ahao o Efaraimi ma nyawa manga hininga kuranga o Gideonika de yoigo yomaketeribuutu ma titi o lolaku ma horomati ona ato ko yamakeua. Ho iwileha o Gideonika ato, “Adodoa ho ngona ma dihirahi de ko nomiahokua la ngomioo naga ma oraha o Midiana manga tentara nangohama naparangi?” De ahao duru manga daleana ma hauku ifae unangika de iwihigurubungu de manga demo duru de ma buturungu.

² De o Gideono wabaluhu de ai demo ma bole-bole wato, “Ngohi naa tinihibaluhu de toigo tohikohowono ti ngini nia hasili o parangioka naa de to ngohi ahi parangi ma hasili angamoi ka imakohowono. Ngohi de ahi dodiawo abe ihiniiki ngomi miahikala nanga musu manga ngoe de ona o tentara biaha dika. Masara ngini niataoko manga tentara ma balu-baluhu abe yokokurutiye ho ti nginiohi nia hasili imutiti. Abe ngohi ka idadi tohiketero nanga lolaku ma hasili de nanga angguru ma redi ma hasili. Abe nako hohikohowono o angguru ma hofoko ma mutiti, tinileha, o angguru o kiahi duru imutiti, gea abe ihira hotofino eko ituruino hotofi? Ka ma houohi enangohi imutiti e? Hokogea tohiketero de nanga parangi angamoi ngaro ngomi o Abiesere ma dutuino mia hasili ihira ilamoko de ngaro ngini o Efaraimino nia hasili ko ilamokua masara ka enangohi imutiti.

³ Abeika Ma Jou winihidoaka o lolaku nginika abe utuohi hohigiriiri. Ngini niataoko o Midiana manga tentara ma balu-baluhu o Koyo-koyo de o Dualono ma Kaho abe ka onangohi kiani hahibinaaha. Ho nako hohidikilo ti ngini nia lolaku de to ngohi ahi lolaku gea to ngohi ko kia-kiaua. Ho ngini ka idadi nimaimono ma titi nia lolaku o parangi ma goronaka naa duru irahai.” Ka de o Efaraimi ma nyawa yoihene o Gideono ai lalaru ma demo gea de manga ngamo ikurangoka.

⁴ Masara o Gideono ko wabootuahi waparangi o Midiana manga tentara abe yoarika ho una de ai dodiawo yaratuhu hange gea ngaro duru yaboleoka ma, yogila-gila dika yaniiki la ato yataoko. Ho yomahiadono o Yorodani ma akere de yomahihora doka ma honongaika.

⁵ De yogila-gila hiadono yoboa o Isiraele ma nyawa manga kota o Sukoto de watutumu o kota ma dimo-dimono de wotemo onangika wato, “Ngohi tagahoko dika ahi tentara manga inomo angamoi duru yaboleoka de tanu ko ihimoroinua togahoko hokogea masara ngomi kiani ka migila-gilahi mianiiki o Midiana manga koano o Seba de o Samuna abe yoaroka ho duru mionganono la nimiduhunu.” Hokogea o Gideono ai gogahoko.

⁶ Masara o Sukoto ma kota ma dimo-dimono gea ato, “Ho ngini ko niataokuahi manga koano o Seba de o Samuna e? Abeika ngini nigila-gila dika de nihitaili la niataoko. De nako igoungu ka idadi niapoa niataoko de ahao ngini niboali naangino de marai ka idadi ngomi de mia horomati minihiolomo.” Hokogea yahohedu o Gideono de ai tentara gea.

⁷ De o Gideono duru ai hiningaka wohuha ma titi ai gogianongoru manga hohedu ma demo de wapaluhu, wato, “Nako gea ti ngini nia hininga ngohi ahao toboali tinitutumu angamoi ngohi tongaku Ma Jou o Yawe ahao wohihidoaka ahi giamino o Seba de o Samuna gea. Ho ka de ngohi ahao toboali de ti ngini nia badanga tohiragoho de o hihika ma doto de utuoo tapake hoka o take ma hihika abe o tonaka ma kakaahaka iwango.” Hokogea wotemo de o Gideono de ai tentara yogila-gila dika yaniiki manga musu.

⁸ De ahao yoboa o Isiraele manga kota moioli o Penuele ma kota de ma moioli o Gideono ai tentara wagahoko manga inomo imaketero hoka o Sukotokali masara o Penuele manga dimo-dimono onangoo yopaluhu imakadaene hoka ona o Sukoto ma kotaka manga demo.

⁹ Ho o Gideono wapaluhu manga dimo-dimonika gea wato, “Ngohi ahao tamakeoka o lolaku de ahao toboali de tinihohowono. De ngaro ngini niato ka idadi niloara ti ngini nia gogoana ma tau nenangoka, abe duru ikurutiye de iputurungu, la ufa tinihohowono ma ko idadiua nimahinganono enangika. De angamoi ngaro ngini niato ka idadi nimadatoko nia gogoana ma tau ma goronaka masara ka de ngomi miboali de ena gea mihikabarihi ka hiadono ko iwaka nia nganganono ma tauika naa.” Hokogea ai babaluhu ma behehongo onangika.

¹⁰ De naa o Midiana ma nyawa manga koano yahinooto o Seba de o Samuna manga gurutikaka masara ko yomahiadonuahi to ona manga tonakika. Ona naga o Isiraele ma nyawa manga kotaka moi ma romanga o Kakoro abe imahikitigino de manga tonaka ma batingi. Ho naa o Seba de o Samuna naga o Kakoro ma kotaka de manga tentara ma hou onangoo naga genangoka. Ma dihira manga tentara duru ko manga ngoe abe yatoomu o tonaka ma hiwariha abe o tentara yasana o ratuhu moi de moruange de motoa manga ngoe. Masara ma oraha naa manga hou yasana ngimoi de motoahi dika angamoi manga tentara abe yohonengokau yasana o ratuhu moi de monaoko.

¹¹ De naa o Gideono wahioriki abe o Midiana manga koano yahinooto de manga tentara ma hou gea yomahiaini o Kakoro ma kotaka. Ho o Gideono de ai tentara ko yoboaua de o ngekomo abe biaha o nyawa yapake masara una warehene la yololiti doka o wange ma hiwariha abe yaniiki dika o ngekomo abe ona manga tau o ngoerino biaha yapake. De gea yatilakuru o kapongo hinooto ma romanga o Noba de o Jobeha. Hokogea de ahao yoboa doka manga musu manga poretino abe nagahi o Kakoro ma kotaka. Ho o Midiana manga tentara gea yatodokana ma oraha o Gideono de ai tentara yaratuhu hange yangohama de yaparangi.

¹² Masara manga tentara hokogea yatodokana hiadono duru yokapusakino de ona o Gideono ai tentara yakokitaokoka. De o Midiana manga koano yahinooto, o Seba de o Samuna yoara masara o Gideono de ai tentara yaniiki ka hiadono yadaene de yataoko.

¹³ Ho naa o Yoasa ai ngofaka o Gideono de ai tentara gea yolio de una wahihira la yaniiki o Herese ma hidotobiki abe o loku isolauku genangoka.

¹⁴ De genangoka o Gideono ai tentara iwitaoko o Sukoto ma nyawa womatengo o goduuru de o Gideono duru wiribuutu unangika ka hiadono wohitulihuku o Sukoto ma kota manga dimo-dimono manga romanga mata-mata abe ma dihira yoluku yahiolomo. De manga dimo-dimono gea manga ngoe yamoritumidi de yatumidi.

¹⁵ Gea manga romanga yamakeoka de ahao yogila-gila hiadono yoboali o Sukoto ma kotaika de genangoka o Gideono wahoko o Sukoto ma kota manga dimo-dimono mata-mataika de ahao onangika wahimatoko o Midiana manga koano yahinooto abe yataokino gea de wato, “Niaino la niamake o Seba de o Samuna abe ma dihira nihihohedu niato bote ngomi ko miapoaua miataoko ona yahinooto naa. De hokogea nia demo hiadono ka nioluku nimihiolomo ngaro duru ngomi imiboleoka. Hokogea ngini nimihidogo mia kangela.”

¹⁶ Hokogea o Gideono wahimaleke de ahao manga dimono yamoritumidi de yatumidi gea duru wadotoko abe manga kokibadangika wahipoha de wahiragoho de o hihika ma doto de utuoo hoka o take ma hihika abe o tonaka ma kakaahaka iwango. Hokogea ona wahohowono.

¹⁷ De ahao o Gideono de ai tentara yogila-gilali de yotuluoli o Penuele ma kotaka de genangoka yodiai hoka ma dihira o Gideono wotemoka wato wahohowono, abe manga gogoana ma tau ma gurutiye gea yakilianga. Ho duru akiliangoka de ahao o Penuele manga kota ma dimo-dimono ka ma moi wahidotoma.

¹⁸ De ahao o Gideono ma titi moi waleha o Seba de o Samunaika abe ma dihiraino hokokia idadi to una ai tonakoka. Ho una wato, “Ngohi tinihioriki abe ngini inihinooto naa ma dihira naga o Taboro ma kotaka ahi tonakoka de naga o nau-nauru abe ngini niatoma genangoka, ho naa tinileha ma titi ona gea. Ona gea manga himanga ma rupa hokokia?” De ona iwipaluhu unangika ato, “Duru hoka ngonali manga himanga ma rupa mata-mata de ka de miamake manga dodagi de miato bote o koano ai ngofa-ngofaka.” Hokogea yomahingahu abe ona yatoma o Taboro ma kotaka.

¹⁹ De o Gideono wato, “Ona gea duru ahi ria-riaka ma dutu abe ona de ngohi mia meme ka moi! De naa Ma Jou o Yawe wowango-wango ai himangoka tinihingahu nako ahi ria-riaka gea niataokino dika de niahigunoa la ka yowangohi de nginioo tinihigunoa la nginioo niwango de ko tinitomaua.”

²⁰ Ka de hokogea o Gideono wotemo ibooto de womaleloro ai ngofaka o Yeterika, abe una o Gideono ai ngofaka o riaka, de wihuloko unangika wato, “Yetere, ngona natomaka dika!” Masara o Yetere ka o ngofakohi de wohawana ho ai dia ko wahiatua ma harumino.

²¹ De ahao o Seba de o Samuna ona yotemo ato, “Ngona o Gideono ko nomimoroinua e? Nako ngona o nauru adodoa ho ko nomitomaua?” Hokogea iwidanauru de o Gideono wabaatika de wakokitomaka! De manga unta hinooto homoi-homoi naga ma rante abe ihilikoika o koano manga dodunguu de naa ena gea o Gideono waleino manga unta ma tomaroka.

O Gideono wodiai o hohininga ma dodunguu o gurasino abe ika-ika idadi o Isiraele ma nyawa manga pangao

²² De ipaha naga o Isiraele ma nau-nauru ko manga ngoe yoboa yomahingahu manga hininga o Gideonika ato, “De ngomi naa miboa naga mia gogahoko ngonaika la nodadi nomihibaluhu ngomi o Isiraele ma nyawa mata-mataika de ka hiadono ani ngofaka de ani danongo inituruuru, angamoi ngona nomihihupu o Midiana ma nyawa manga giamino.” Hokogea manga higaro ma demo o Gideonika.

²³ Masara o Gideono woluku wato, “Tarimakase nia ngongaku ngohino hokogea, masara ngaro ngohi, ngaro ahi ngofaka, ngomi ko minihikoanoua. De angamoi Ma Jou o Yawe to ngone nanga Baluhu de Una abe ahao winihipareta ka ihikaika.

²⁴ Masara naga to ngohi ahi gogahoko moi nginika, de gea la ngini nihihidoaka ngohino o gurasi abe nimahikodoku ma oraha o parangi ibooto. Abe togahoko ngini homoi-homoiika o ngaukuku moi dika abe niagoraka nanga musu manga honengino.” Hokogea ka idadi o Gideono womagahoko angamoi o nau-nauru utu yotentara manga musuoka abe o Isimaele ai totoforauku de to ona manga biaha yapake o ngaukuku abe yodiai o gurasi ma dutuino.

²⁵ De naa ona o Gideono ai tentara mata-mata duru yosanangi o Gideono ai gogahokika de yopaluhu ato, “Ngomi naa duru misanangi minihidoaka hoka mia baluhu wogahoko.” Ho ona ahao o baju ma guru-gurutu ihinaoika o tonakoka de ahao o nau-nauru gea homoi-homoiika o ngaukuku moi yale manga kiahonangino abe yomagoraka manga musu manga honengino, de ma ngaukuku gea yaumo homoi-homoiika o bajuku abe ihinaoika o tonakoka gea.

²⁶ De o ngaukuku hokogea ma ngoe iwihidoaka o Gideonika hiadono mata-mata adono ngade-ngade o kilo monaoko ma dubuho. De utuohi ma kiahonanga o Gideono wamake manga musuino abe ena yodiai o gurasino de yapake manga badangoka hoka o rante, de o gogoli, de o ali-ali. De nagaoo ma baju ma wuu-wuu abe o Midiana manga koano yapake, de o koano manga dodunguu abe ihilikoino manga unta ma tomarino. Gea mata-mata o Gideono womahitounangoka.

²⁷ De o Gideono wapake ai gurasi gea la wodiai o hohininga moi, de ma rupa hoka o baju ma lape hinootoika abe ma romanga o efodo. De ena gea o Gideono wakelenga to una ai kapongo o Ofara ma goronaka. De ipahaino o Isiraele ma nyawa ko manga ngoe yoboa o Ofara ma kapongino la yomahuba ma efodo o gurasino gea ma himangoka hiadono iwiwohanga Ma Jou angamoi ihigiriiri o Gideono ai hohininga o efodo gea de yomaniata enangika. Ho ai hohininga idadioka manga pangao de idadioo hoka o modoi o Gideonika angamoi ika-ika una de ona ai tauoka onangoo yorehene ma gurutika Ma Jouino.

²⁸ Hokogea ma ade-ade abe o Isiraele ma nyawa yahikala o Midiana ma nyawa de ko yohawanokaua o Midiana ma nyawa yoboali yahikangela hoka ma dihiraino. De manga tonaka ma amokika ko iwaka o parangi hiadono o taongo moruatino ma dekanino de duru iriidi ho yososanangi dika o Isiraele ma nyawa manga tonakoka.

²⁹ De o Gideono abe ma dihira una iwihiromangoli, “Una de o Baala yokadatoro o huhuba ma ngi,” ahao wolio ai tauika abe o Ofara ma kapongoka de wogogere genangoka.

³⁰ De to una ai ngofaka o nau-nauru yamoritumidi manga ngoe angamoi o Gideono ngoi fekata ko manga ngoe.

³¹ De naga ngoi fekata momatengo muna gea ko ngoi fekata ma gou-goungua abe muna ko mogogerua ai tauoka masara mogogere o Sikeme ma kotaka. De o Gideono ai ngofaka o nauru munangino naga womatengo dika de ai ngofaka gea wihiromanga o Abimeleke.

³² Ho o Gideono, abe ai baba o Yoasa, ai wowango ma dekana hiadono ai pea duru iarehoka de ahao wohonenge de iwilungunu ai baba o Yoasa ai lungunu ma ngioka abe ai baba gea wododihiraika wohonengoka. De manga lungunu gea naga o Ofara ma kapongoka abe manga fam o Abiesere manga doomu ma kapongo.

³³ De o Gideono wohonengoka de ahao o Isiraele ma nyawa ko yomahihohiningakaua Ma Jou ai buturungu abe ma dodihiraino waduhunu de ko yomahijouokaua Ma Jouika. De ona yomahuba o Baalika abe ihiromanga o Behehongo ma Baala de yomahijouoli o pangaoika gea.

³⁴ Ho Ma Jou o Yawe abe waduhunu wahihupu manga musu arihonongaka manga kuahaino, ona iwiporetika dika de ko iwileleaniokaua.

³⁵ De hiadono manga horomati o Gideono ai tauikaoo ko iwaka angamoi yaniiki dika o Baala hiadono ngaro o Gideono duru waduhunu ona o Isiraele ma nyawa masara naa wohonengoka de yorehenokali enangika abe duru ma dorouika.