Hihira 5 - Ma Jou ai Demo-demo o Totobelohoka

5:10-17 ko atailakouahi O ngo Debora ami lolaku ma kabaata

¹ De ahao naga ma wange abe o Isiraele ma nyawa yomatoomuino la iwihigiriiri Ma Jouiye de yotarimakase ma titi o lolaku manga musuika hiadono o Sisera de ai tentara yokokihonengoka. De manga doomuoka o Baraka, abe o Abinoama ai ngofaka, una de o ngo Debora ona ihikabaata de o higiriiri ma demo abe ma titi Ma Jou ai buturungu de manga lolaku ma ade-ade. De hokonaa manga kabaata ma demo abe idadi manga higiriiri ma nyanyianga:

² “Ngone hihigiriiri Ma Jou o Yaweiye mangale Una wonahibalaha, Abeika ai duduhunu o Isiraele ma nyawa manga hihiraika, Ona yale manga tagongo de yahihira-hira manga nyawa, De manga nyawa yahigihene manga baluhu, de yanii-niiki, Yanii-niiki de manga sosanangi manga musuika yoparangi, Hihiowa Ma Jou o Yawe!

³ Ngini o kokoano kiani mia kabaata ma demo nenanga nimadoihene! Ngini mata-mata abe niapareta o nyawa kiani nitotoihene! De angamoi ahi demo naa abe ngohi tohikabaata Ma Jou o Yaweiye, De ahi higiriiri ma demo abe tohiboaiye daku Ma Jou o Yaweiye, De Una wosanangi angamoi Una gea o Isiraele ma nyawa manga Jou de woihene. De nginioo mia kabaata ma titi nenanga kiani nimangaratii.”

⁴ “Ma dihiraino, Ngona, Ma Jou o Yawe, nahihira o Isiraele ma nyawa, De ma oraha abe o Seiri ma ngioka nosobo nomihihira o Edomika, Nomihidotobiki o Edomo ma nyawa manga tonakoka de ikelu-kelu, Mia dodagi ma goronaka de nohikelu-kelu manga tonaka. De naa ma duru o dihangoka naga o lobi itoomu ma biri-birini, La o lobi-lobino nohipuraraha o awana koharikimi.

⁵ Ka de Ngona Ma Jou o Yawe noboaino de o loku-loku ifafara, Abe hoka ma dihira o Sinai ma lokuoka Ngona naga de duru ikelu-kelu, Ngona Ma Jou o Yawe abe o loku-loku de o tonaka ma dola ani kuahaka, Hokogea Ngona to ngomi o Isiraele ma nyawa mia Jou!”

⁶ “Ma dihira ngaro ma oraha nanga hihira o Samagara, abe ai baba o Anata, De hiadono ma oraha abe o ngo Jaele naga ngoneoka, Masara nanga Jou ko wonanoaikaua ngaro to ngone nanga huha naga. Naa ma dekana nanga ngekomo ma rorahai ko idadiokaua o nyawa yapakeohi, Abe ona yaika yaino manga kiahonanga yotobafuku-fukunu ko yapakeokaua, Done naga o Kanani ma nyawa yahikangela manga dodagi ma goronaka, Ho ona yapake dika o rerehene ma ngekomo ngaro ijiko-jiko de itorou.

⁷ De hiokoo o Isiraele ma nyawa manga kapongo ma hohumuduru ma ngoe, O Kananioka yahikokangela hiadono ko yamoroinokaua manga kapongoka yogogere, Masara ahao naga momatengo modadi hoka manga ayo ma amokika, O ngo Debora ami dora ma hiokoo itagi o Isiraele ma nyawa mata-mataika. Ho itaana nanga Jou ko wonanoaikaua ngaro to ngone nanga huha naga.

⁸ De abeika idadi ma oraha o Isiraele ma nyawa yomahijou o jou ma homoaika, Yomangiriki ihowono angamoi manga hininga adaene o popangaoika gea, Ho manga kimalaa de o kota ma dimo-dimono ma totiai ko yaniikokaua, Ho hiadono manga hiaturu manga kokawaahaika ko itiaiokaua. Ho ka de manga musu yoboa de onagona yaduhunu la yaparangi onangika? Naga o Isiraele manga nau-nauru yotentara yasana moruata, De kiani ona manga nyawa yagoana de yaduhunu nako o musu yahikangela, Masara, ko moiua yagoraka manga dadatoko de manga kuama! Hiokoo, nanga tentara ko yomoroinua nanga musu yaparangi! O kiaka nanga hihira o nau-nauru abe de manga domoroinoka?

⁹ Masara, ngohi o ngo Debora, tahoko o Isiraele ma nyawa la yoparangi, De manga hihira de ona mata-mata abe yahimanga nanga musu ato yomahidoaka la yaparangi. Ngohi naa ahi hininga duru itagi onangika de ahi dora de ahi horomati, Mangale ona yomahidiai inaduhunu nanga kangelaino. Hihiowa Ma Jou o Yawe!

¹⁰ Abeika nitotoihene, ngini abe nia gogere ikokurutiye. Abe ngini naga de nia keledai ma rorahai, De ko niofarenuahi ma poretuku de niahinao ma keledaioka de nia ngoere, Abe enangoo ka ma rorahai dika. De ngini abe ka nimalou-lou dika ma ngekomika, Nginioo irahai nitotoihene ma lolaku ma ade-ade naa, La ngini mata-mata ka idadi niahingahu-ngahu utuika!

¹¹ Abeika ona yotobanyanyi yomatoomuino o humu-humuoka, Yomatoomuino genangoka de yonyanyi ma titi hokokia Ma Jou wonaduhunu! Abe Una wonaduhunu la ka idadi hahikala nanga musu manga ngoe! De yahikala ipahaino de o Isiraele ma nyawa yomakiniiki, Yomakutuono yoiki o kota ma dadaduhu ma ngoranika.

¹² De genangoka imiahoko o ngo Deboraika ato, “Nomomikoka la nanga kabaata ma nyanyianga nonyanyiohi!” De nagali iwiahoko o Barakika ato, “Baraka, abeika nomasikaa la nanga musu gea naoika manga hohowono ma ngiika!”

¹³ De ahao nanga tentara ma nyawa manga hou, Ona yokokiboa yomatoomuino manga hihiraino, Ho Ma Jou o Yawe ai nyawa yomakiniiki de de ngohi la haparangi nanga musuika.

¹⁴ Abe naga o Efaraimi ma nyawa manga ngoe yoboaino, Ona manga loku-lokuoka yosobo yoboa o tonaka ma dolaino. De ona gea yahidoduruika o Benyamini ma nyawa, Abe ona yomahitatorika la yahihira-hira manga gogianongoru utuoli. De ngaro o Makiri ma nyawa manga hohihira de Sebulono manga hae-haeke masara onangoo yokokiboaino la homakokuduhunu.

¹⁵ De o Isakara manga hae-haeke de manga tentara mata-mata, Onangoo yoboa de yomakiniiki de o ngo Debora de o Baraka. Ho ona gea iwihidoduruika o Baraka manga hihira de yoaguru dau o tonaka ma dolauku. Masara nako o Rubene ma nyawa ona manga hininga ka hinootohi, Abe ma titi ikuranga yoigo yoiki yaparangi manga musuika.

¹⁶ Ho done ma titi o kia ngini o Rubene ma nyawa ka nimagoo-gogerohi nia duduonoka? Bote ka nioigohi niihene o gogoana yahoko manga domba? Ho igoungu o Rubene ma nyawa ona manga hininga ka hinootohi.

¹⁷ De nanga gogianongoru o Gileada ma nyawa onangoo ko yoboaua ho ko inaduhunua, Angamoi ona ka yomanoahi manga tonakoka doka o Yorodani ma akere ma honongaka. De o Daana ma nyawa onangoo ka yomagoo-gogerohi manga ngioka, Bote ona ka yogoa-goana manga kapa dika, ho ko yoboaua. De o Asere ma nyawaoo ko yokelu-kelua, masara o gahi ma ngigorino dika ona yotobagoana manga leleoto.

¹⁸ Masara nako o Sebulono ai totoforauku manga wowango yomahidoaka, De onangoo o Nafatali ai totoforauku ko yohawanua o hone-honengika, O nau-nauru mata-mataika gea yohimanga o hone-honenge de ko yoarua, Dau o parangi ma dolauku youti yaparangi nanga musuika.

¹⁹ O Kanani ma nyawa manga kokoano yoboa de manga tentara, Yomatatorika ma dolaka abe itigi o Taanaka ma kota, Yotigi o akere ibubungiye o Megidoka de genangoka inaparangi! Masara ko yolakua, ho o parangi ibooto de o kiaka manga utumu? O kokoano ato nanga honengino ahao yomagora nanga kiahonanga, Ma, ngaro yomahinganono hokogea masara duru ko yamakeua.

²⁰ Abeika o duduhunu o awanino abe yalawana nanga musuika, O dihangino iboa abe genangoka o muru-murumu aniiki to ena ma dodagi. Genangino, koharikimi iboa o duduhunu de aparangi onangika, O Horogaino ma buturungu abe inaduhunu iwiparangi o Sisera.

²¹ O Sisera ai tentara manga ngoe yoruba o Kisono ma akeroka, Duru ma dodihiraino ihahuroko o Kisono ma akere gea, De naa duru anguihi ho yahihahuru o Kanani ma tentara manga honenge. Ho ngomi mia domoroini ka idogo-dogo abe manga ngoe ko yaiwaka. Ngomi mimahikagaro miato, ‘Hogila-gila dika haparangi onangika! De nanga jiwa ma gahumu hapake la hahibinaahaka!’ Hokogea mia hagaaga.

²² De ahao naga o kuda imapopaata ma koroongo de ma tuuhu o tonakino, Duru manga kuda imapopaata de ma buturungu aika-aino, Masara o kudaoo duru ikangela o parangi ma kapusaka ma goronaka, Ho o Sisera ai nganganono manga kudaino gea parahaja dika.

²³ Masara, abeika o Isiraele ma nyawa utu, onangoo o kokangela yamake, Abe o Meroso ma kota itigi ma ona ko yoboaua iwiduhunu Ma Jou o Yawe, Ho Ma Jou o Yawe ai malaekata wagahoko o kokangela o Meroso ma nyawaika, O kokangela kohadubuho adaene angamoi manga dutu yanoaika dika. Ona ihioriki gea o tentara yotualono abe Ma Jou o Yawe de ai nyawa yahimanga, masara o Meroso ma nyawa gea manga duduhunu duru ko iwa.

²⁴ Ma, abeika o ngo Jaele ami duduhunu hiadono imihiowa ma amoko, Gea muna abe ami rokata o Hebere, de una o Keni ma nyawa, Ngaro o ngo-ngofeka mata-mataino abe yogogere o tau o ngoerino, Ma itiai ka munangohi imihiowa, ma titi ami duduhunu ngoneino.

²⁵ O Sisera woboa munangino iwiboleoka, ai ngomaha yodudungu, O akere womagahoko masara o ngo Jaele muna mihiokere o susu, Maleino o mangko duru ma rahai imaketero hoka o kokoano manga mangko, O susu ma gohaka miguhe o mangkouku gea de mihiokere o Siseraika.

²⁶ Masara o ngo Jaele mihidee unangika, mato muna ma hirete mihohonenge, Ho de ami gubadi maso o bebeloho de ami nirakoka naga ma boboha, O bebeloho ma dolomo naa ai pongo-pongoka de modoboha de ma boboha, De o Sisera ai pea ipidahoka angamoi ai pongo-pongouku moboha, De ami bebeloho ma dolomo mihidobututuku dau ma tonakuku.

²⁷ Itodokanino o Sisera ai badanga hodongoo de igorakiye, De ahao iutiukuoli ma tonakuku. Una abeika worubaka! Duru o ngo Jaele ami louoka o Sisera ai badanga iriidi. Ami tau ma goronaka nanga musu manga hidimono worubaka.

²⁸ Doka o Sisera ai kotaka ngoi ayo midodamaa ami tau ma jendelaka, Naa duru ai dekana de ai goroba parangi ko mamakeuahi. Doka ami hiningaka momaleha, ‘Adodoa ho ahi ngofaka ko woboauahi? Adodoa ho ko hoihenuahi ai goroba parangi ma bola ma koroongo?’

²⁹ De ahao ami leleha yapaluhu ami duduhunu o ngo-ngofeka abe yososawaro, De manga hilaru ma demo mohigali-gali doka ami hiningaka,

³⁰ Mato, ‘Nanga tentara marai duru o Isiraele ma nyawaika yahikalaka, Ho naa to ona manga kiahonanga ma hali-hali yomahikodoku, O tentara homoi-homoiika marai yamake o ngofeka moi eko hinooto. Marai o Sisera womahitouna o baju ma guru-gurutu duru ma rorahai, De naa wolingiri o baju-baju ma rorahai abe yoguriti de ma bunga-bunga. La ena gea wohihidoaka ngohino o baju ma rahai ma guru-gurutuku, Ngohioo ahao tamake o baju ma bihi-bihi ma dutu, de ma wuu-wuu; De o baju ma doka-dokara abe o lawe ma alu-aluhino idadi to ngohi.’ Hokogea o Sisera ngoi ayo ami nganganono, masara ami demo gea ka parahaja dika.”

³¹ “Ngona Ma Jou o Yawe ani musu o Sisera wohonengoka, De ngaro nodiai la ani musu mata-mataika onangoo hoka unangoli! Masara o nyawa mata-mataika abe inidora ngaro ona nahiputurungu, La manga buturungu hohiketero de o wange ma buturungu, Hoka o wange ma dararono ma oraha ipotokaiha duru de ma buturungoka, De ngaro hokogea ka ihikaika ani nyawa manga buturungu.” Hokogea manga lolaku ma kabaata abe o ngo Debora modiai de ahao abe muna de o Baraka yonyanyi ma oraha ihirame-rame manga lolaku. De gea o Isiraele ma nyawa manga musu yahikalaka de ahao yomakao de o dame hiadono o taongo moruatino duru iriidi o Kanani ma tonaka ma amokika.