Hihira 4 - Ma Jou ai Demo-demo o Totobelohoka

O Isiraele ma nyawa manga behehongo Ma Jouika ko yaniikokaua

¹ Ma oraha manga hihira o Ehudu wowango de o Isiraele ma nyawa manga datoro ka yaowa abe yaniikohi Ma Jou ai behehongo masara o Ehudu wohonengoka de ahao yodiaioli abe duru itorou Ma Jou o Yawe ai himangoka.

² Ho ma titi gea hiadono o Isiraele ma nyawa Ma Jou o Yawe wafukunoli de naa wafukunu o koano womatengoika ai romanga o Yabini, abe wahikoano o Kanani ma nyawa manga ngoe de to una ai tau de ai kadera o Hasoro ma kotaka. De ma koano gea ai tentara ma dimono o Sisera masara una de o tentara abe wahihira yogogere o kota moiokali abe yakurunga de o dadaduhu de o kota gea ma romanga o Harosete-hagoimi.

³ De o Sisera wahipareta o goroba parangi o ratuhu hiwo. De o goroba parangi mata-mata gea yodiai o behino ho o Sisera de ai tentara duru de manga buturungu de yahikangela o Isiraele ma nyawa o taongo monaoko ma dekana. Hokogea yohuhaholi de ahao o Isiraele ma nyawa ihigali-gali yomagahoko Ma Jou o Yaweika la waduhunu.

O ngo Debora Ma Jou womihiakunu la o Isiraele ma nyawa mahihira-hira

⁴ De ma oraha gea naga o ngofeka ami romanga o ngo Debora abe Ma Jou womihiakunu la modadi Ma Jou ai uru ma dodofanga momatengo, de munangoo modadi o Isiraele ma nyawa manga hihira. De to muna ami rokata naga de ai romanga o Lapidoto.

⁵ De ona yogoo-gogere o tonakoka abe o Isiraele ma nyawa yomahidutu o Efaraimika manga hidokuino ma tonaka. De o ngo Debora ami karajaanga o Isiraele ma nyawa maurusu abe manga howono matailako de ona abe itaana yahowonoka gea muna manga hohowono maputuhu. De ma oraha mahipareta hokogea de muna mohupu ma hoanika de mogogeruku o dokoto ma gota ma timiuku abe ihiromanga o ngo Debora ami dokoto. De ma dokoto gea ma hoanoka o loku-lokuoka abe o Rama ma kota de o Betele ma kota ma hidogoronaka.

Ma Jou wapake o Isiraele ma nyawa manga tentara de o ngo Jaele la wahibinaaha o Kanani ma nyawa manga tentara

⁶ De o wange moiuku o ngo Debora mibehehongo o baluhu womatengo ai romanga o Baraka, abe ai baba o Abinoama, de yomahidutu o Nafatalika. De o Baraka gea wogogere o Kedesoka abe o Nafatali ai totoforauku manga hidokuino ma tonaka. De abe ami behehongo unangika o Baraka womihigihene ho woboa o ngo Deboraino de muna mihingahu unangika mato, “Baraka, abeika, Ma Jou o Yawe, to ngone o Isiraele ma nyawa nanga Jou, wonahigunoa haparangi o Kanani ma nyawa manga koano o Yabini gea de wohihingahu ngohino ai behehongo ngonaika. Hokonaa Ma Jou wonihuloko, wato, ‘Ngona kiani natoomuino o nau-nauru yasana ngimoi abe yososawaro yoparangi. Nahoko o nau-nauru gea o Nafatali ai totoforaukuino de o Sebulono ai totoforaukuino. De ngini nikokiloiki o Taboro ma lokuika de nimatoomuino genangoka.

⁷ De Ngohi Ma Jou o Yawe ahao titaurino o Sisera abe wahihira-hira o Kanani ma nyawa manga koano o Yabini ai tentara. Hokogea Ngohi todiai la una de ai tentara mata-mata de manga goroba parangi mata-mata onangoo yokokiboa o Kisono ma akerino abe o Taboro ma loku ma timiuku. Genangoka Ngohi Ma Jou o Yawe tiniduhunu niaparangi o Kanani manga tentaraika de tinihidoaka o lolaku.’ Hokogea Baraka, Ma Jou o Yawe ai behehongo ngonaika abe wohihingahu ngohi o ngo Deboraino.”

⁸ Ka de o Baraka woihene o ngo Debora ami hingahu gea de wopaluhu, wato, “Ngohi ka idadi todiai hoka Ma Jou wohihibehehongoka ma, iti ngonaoo mia baluhu, nominiiki ngomi abe midadi to ngona ani tentara. De masara nako ngona ko nominiikua ngohi tato ko toikua tahihira nanga tentara o parangioka.”

⁹ De o ngo Debora mihimoteke ai demoika, ho mato, “Ngohi tagoungu, ahao tininiiki ma oraha niloiki niaparangi o Kanani ma nyawaika gea. Masara mangale ngona nomangiriki hokogea ahao o lolaku ma higiriiri ko ngonaikaua angamoi Ma Jou ahao wapake o ngofeka la wihikala o Sisera de ai tentara. Ho o nyawa manga horomati de manga higiriiri ma dumutu munangika de ko ngona o Barakikaua.” Hokogea o ngo Debora mihitararono. Masara o Baraka ngaro motemo hokogea una wato wohingounu Ma Jou ai behehongika ho wosobo wolio o Kedesika de o ngo Debora miniiki.

¹⁰ Yomahiadonika o Kedesoka de o Baraka wahitoomu o Sebulono de o Nafatali ma nyawa de wamake o nau-nauru yasana ngimoi abe yososawaro yaparangi o nyawaika. De ona yasana ngimoi iwiniiki o Taboro ma lokuika hoka Ma Jou wahibehehongo. De o ngo Debora, munangoo miniiki o Baraka manga dodagioka.

¹¹ De o Kedese ma tonaka ma datekoka naga womatengo wogogere genangoka o Keni ma nyawa abe ai romanga o Hebere de ai tofora o Hobaba abe o Musa ai geri. Una ma dihira ai dutu manga doomu wanoaika de womaturuuru o ngi moiikali ma romanga o Sanaimi abe imakitingaka ko ikurutikaua de o Kedese. Masara ai tau o ngoerino wohigokoiye ma hoanoka abe genangoka naga o gota ma amoko imatengoka de o gota ma datekoka yogogere o Hebere de ngoi fekata o ngo Jaele.

¹² Naa, doka o Baraka, abe una gea o Abinoama ai ngofaka, una de ona yasana ngimoi yososawaro yoparangi yokokidoa o Taboro ma lokuiye. De naga o nyawa iwihingahu manga musuika, o Sisera gea, abe o Isiraele ma nyawa manga tentara gea naga doka o Taboro ma lokuoka.

¹³ Ka de o abari gea o Sisera woihene de watoomuino ai tentara de manga goroba parangi o ratuhu hiwo abe yodiai o behino gea. De ahao onangoo yomahidiai yoparangi. Ho yomakokitoomuinoka de ahao manga kota o Harosete-hagoimi yosobo de duru de manga buturungoka yotagi-tagi manga dumutu o Taboro ma lokuika. De yomahiadono o Kisono ma akerino abe o loku gea ma timiuku.

¹⁴ De o ngo Debora de o Baraka yamake ona yoboaino de o ngo Debora mihuloko o Barakika mato, “Ngini nimahidiaioka niaparangi! Naa o lolaku ma oraha adonoka. Abeika ona gea Ma Jou o Yawe winihidoaka ti ngini nia giamika de o Sisera de ai tentara gea niahikala angamoi Ma Jou o Yawe wohira wouti onanguku!” Ho o Baraka wahihira ai tentara yasana ngimoi gea de ona ka moi youti o Taboro ma geleforuku de yaparangi manga musu o Kanani ma nyawa gea!

¹⁵ De ka de yangino yaparangi de Ma Jou o Yawe wahihawana de wahikapusaka o Sisera ai tentara ka hiadono o Isiraele ma nau-nauru yolaku. Abe de manga humaranga abe ma doto arihononga dika manga musu yahikala ngaro ona yalou-lou de ngaro ona abe yapake manga goroba parangi o behino angamoi o Isiraele ma nyawahi de manga buturungoka. Ho o goroba parangi mata-mata yokokiloara masara manga haeke o Sisera ai goroba parangi wanoaika de womapopaata woara.

¹⁶ De ngaro o Sisera ai tentara yoara de o goroba parangi masara o Baraka de ai tentara duru yanii-niiki de ko yomahiadonuahi manga kota o Harosete-hagoimi de ko yaiwaka angamoi o Baraka de ai tentara gea yakokitomaka de manga humaranga hiadono ko moiokaua o Sisera ai tentara.

¹⁷ Masara manga haeke o Sisera ka wowangohi angamoi worehene ma gurutika womapopaata ai dumutu o tau moi ma hoanoka abe genangoka o Hebere, o Keni ma nyawa gea, wogogere. De genangika woara angamoi o Hebere de ai dutu ma doomu ona yomakao irahai de o Kanani ma nyawa manga koano o Yabini abe wogogere o Hasoro ma kotaka. Ho o Kanani ma nyawa manga tentara manga hidimono o Sisera womapopaata woboa o Hebere ai tauino de ngoi fekata o ngo Jaele naga o tau ma goronaka.

¹⁸ Ho ka de muna mimake o Sisera woboaino de mohupu ami tauino mibuhuku de mato, “Ahi baluhu nowohamino. Ngaro ufa ngona nohawana.” Hokogea o ngo Jaele miahoko ho wowohama ami tau ma goronaika de ahao muna migogono abe mitamunu de o nanao ma biri-birini.

¹⁹ De o Sisera womagahoko o akere, wato, “Ngohi duru ahi ngomaha yodudungu.” Ho o ngo Jaele maleino o susu de mihiokere de ahao mihidatamunoli de ma nanao gea.

²⁰ De o Sisera womihitiari wato, “Ngona kiani o ngoranoka nogoana done naga o nyawa yoboa yoigo yowohama. Ho nako naga o nyawa yoboa de inileha nako naga o nyawa utu nenangoka ngona nopaluhu nato, ‘Ko moiua naangoka.’” Hokogea o Sisera womidotoko.

²¹ Masara o Sisera duru iwiboleoka ho jai-jai dika de iwikiookoka. De o ngo Jaele maleino o ngoere ma tau ma bebeloho de to ena ma boboha de moboa momabole-bole o Siseraino la ufa womimao. De ahao ami tau ma bebeloho ma dolomo mohidodiai mituduku o Sisera ai pongo-pongouku. De ma bebeloho masoino hokogea de ahao moboha ma barenuku hiadono mihidobututuku ka hiadono ihapongo ai pea ma timiuku de iwohama o tonakuku. Ho itodokanino de o Sisera wohonengoka angamoi o ngo Jaele mitomaka.

²² De ipaha o Baraka woboaino o Sisera wilingirohi de o ngo Jaele mohupu mibuhuku de motemo unangika mato, “Ahi baluhu, marai ka idadi tonihimatoko o nyawa gea abe ngona nilingiri, ho naino ahi tauino nowohama.” Hokogea miahoko ho o Baraka wominiiki ami tau ma goronaika de genangoka wimake o Sisera ai honenge de o ngo Jaele ami tau ma bebeloho naga ai peaka.

²³ Hokogea Ma Jou o Yawe wihikala o Kanani ma nyawa manga koano o Yabini abe to una ai tentara yahibinaaha duru o Isiraele ma nyawa manga himangoka.

²⁴ De ahao ka ihikaika o Isiraele ma nyawa manga buturungu idogo ho ngaro nagahi o Kanani ma nyawa manga nau-nauru masara ka idadi yaparangiohi onangika gea abe yomahikoano o Yabinika ka hiadono yahibinaahaka ka ma moi de manga koano.