Hihira 3 - Ma Jou ai Demo-demo o Totobelohoka

O nyawa o dutu muruono abe nagahi yogogere o Kanani ma tonakoka

¹ De naga o nyawa o dutu muruono abe Ma Jou o Yawe wanoaika la ka yogogerohi o Kanani ma tonakoka. Hokogea Ma Jou wahitaili o Isiraele ma nyawa abe ko yobaluhuahi ma oraha yowohama de yopoparangi o Kanani ma tonakoka.

² Ho angamoi naga o Isiraele ma nau-nauru abe ko ma moiuahi yaparangi o nyawaika, ona gea Ma Jou woigo wahilati la yososawaro yoparangi, de manga ngofa-ngofakukuoli ahao onangoo ka idadi wahilati la yososawaro manga musu yaparangi. De gea ma titi manga musu gea Ma Jou wanoaika la ka yogogerohi o Kanani ma tonakoka.

³ Ho manga musu abe nagahi o Isiraele ma nyawa manga tonakoka o Filistina ma nyawa o doomu motoa abe de manga koano amomoiika. Ho o Filistina ma nyawa manga koano yamotoa. De nagaoo abe ko o Filistina ma nyawaua de gea ona abe yogogere o Libanono ma loku-lokuoka abe doka o loku ma romanga o Baala-Horomonoka hiadono o ngekomika abe itagi o Lebo-Hamatika. Ona gea o Kanani ma nyawa, o Sidono ma nyawa, de o Hewi ma nyawa.

⁴ O nyawa mata-mata gea abe Ma Jou o Yawe wapake la wataili o Isiraele ma nyawa abe nako ona ai behehongo ihingounu eko ko ihingounua. Abe ma dihira Ma Jou wipake o Musa la ai behehongo wahikokidoaka manga totoforaika la yaniiki itiai Ma Jou ai behehongo mata-mata gea.

⁵ De o Isiraele ma nyawa yogogere yomahikasapurino de o Kanani ma nyawa, de o Hete ma nyawa, de o Amori ma nyawa, de o Ferisi ma nyawa, de o Hewi ma nyawa, de o Yebusi ma nyawa.

⁶ De o nyawa mata-mataino gea o Isiraele ma nyawa yomale o ngo-ngofeka abe yahigogilaka de to ona manga ngofa-ngofaka o nauru. De to ona manga ora yahigogilaka de o nau-nauru abe ko o Isiraele ma nyawaua. De utuohi o Isiraele ma nyawa yahowono abe yomahuba o nyawa gea manga jou ma homoaika ho yoleleani enangika.

O Otiniele Ma Jou wihiakunu la o Isiraele ma nyawa wahihira

⁷ Hokogea o Isiraele ma nyawa yodiai duru itorou Ma Jou o Yawe ai himangoka de ka hiadono iwiwohanga manga Jou, Ma Jou o Yawe, de yaleleani o popangao abe ihiromanga o Baala, de o popangao utu abe ma hapa irupa-rupa de ena gea ihiromanga o Hiowa ma Ngofeka abe nako to ona manga demo o ngo Asitorete ma popangao.

⁸ De Ma Jou o Yawe ai ngamo duru ihauku o Isiraele ma nyawaika ka hiadono wafukunu o koano moiika ai romanga o Kusiana-Risataimi abe wahikoano o Arama ma nyawa abe yogoo-gogere o Mesopotamia ma tonakoka. Ho o taongo tufange ma dekana o Isiraele ma nyawa onangoo yogogere o koano gea ai kuahaka.

⁹ Masara o Isiraele ma nyawa yohuhaholi ka hiadono duru ihigali-gali yomagahoko Ma Jou o Yaweika la waduhunu. De Ma Jou wagihene manga gogahoko de wiiriki womatengo ai romanga o Otiniele abe o Kalebe ai dodoto o Kenasa ai ngofaka. De o Otiniele gea Ma Jou wihiakunu la una ka idadi o Isiraele ma nyawa wahihupu manga kangelaino.

¹⁰ Abe Ma Jou o Yawe wihikuaha o Otiniele de ai Womaha la una ka idadi wahihira-hira o Isiraele ma nyawa de watoomuino o Isiraele ma nau-nauru la yotentara. De ahao o Otiniele ai tentara watoomuino de yoiki yoparangi. De Ma Jou o Yawe waduhunu la iwihikala o Arama ma nyawa manga koano o Kusiana-Risataimi. Ho ka de Ma Jou o Yawe wihidoaka manga koano gea o Otinielika de o Isiraele ma nyawa ko yohuhakaua genangoka de yomakadame de ona abe manga gogere o Mesopotamia ma tonakoka.

¹¹ De o Isiraele ma nyawa yogogere yososanangi o taongo moruata ma dekanino o tonakoka gea hiadono manga hihira o Otiniele wohonenge, una gea o Otiniele abe ai baba o Kenasa.

O Ehudu Ma Jou wihiakunu la o Isiraele ma nyawa wahihira

¹² Ho manga hihira Ma Jouino gea wohonengoka de ahao o Isiraele ma nyawa yomulaengoli yodiai itorou Ma Jou o Yawe ai himangoka ho wahohowonoli. De angamoi yotobadiaioli itorou ho Ma Jou o Yawe wihiputurungu o Moaba ma nyawa manga koano o Egono hiadono unangoli wapareta o Isiraele ma nyawaika.

¹³ De hokonaa o Egono womahidiai ai ngekomo la o Isiraele ma nyawa wahikala. Ihira wahigaro o Amono ma nyawa de o Amaleke ma nyawa la ona mata-mata yomatoomuino yomakuduhunu yaparangi o Isiraele ma nyawaika. Ho o Egono wahihira o tentara manga ngoe gea de yaparangi de yahikala o Isiraele ma nyawa de yomale o Yeriko ma kota abe ma oraha naa ihiromangoli o Dokoto ma kota angamoi o dokoto ma ngoe iwango genangoka hiadono aturuuru ma romanga.

¹⁴ De o taongo ngimoi de tufange ma dekana kiani o Isiraele ma nyawa ihingounu o Egono ai pareta onangika angamoi hokogea ma dekana wahikoano.

¹⁵ De ahao ma moioli o Isiraele ma nyawa yohuhaholi ma titi o Moaba ma nyawa manga koano o Egono wahikangela. Ho ona duru ihigali-gali yomagahoko Ma Jou o Yaweika la waduhunu. De Ma Jou wagihene manga gogahoko de wiiriki womatengoli ai romanga o Ehudu la una wodadi manga hihira abe wahihupu manga kangelaino. O Ehudu una gea o Benyamini ma nyawa de ai baba o Gera de una o nauru abe wokubadi woto, o Ehudu gea. De naa adonoka ma oraha o Isiraele ma nyawa kiani iwihidoaka manga koano o Egonika manga pajaka ma tiwi de manga hidoaka ma hidogo o kiahonanga ma hali-hali. Ho manga hidoaka ihidiaioka de ahao o Ehudu iwiiriki la una wahihira-hira ona mata-mata gea abe yoiki o Isiraele ma nyawa manga hidoaka iwidotaka ma koanoika gea o Moaba ma tonakoka.

¹⁶ Ho o Ehudu womahidiai woiki witutumu o koano de wodiai o dopo-dopo idoto arihononga o panga moi ma gurutu de wao masara wagogono la ufa o nyawa amake. Abe womahidabanino ai uguru ma nirakoka ai pakeanga ma goronaka la ko idadiua o nyawa ihioriki.

¹⁷ De ahao o Ehudu woiki de iwidodiawo o nau-nauru yamuruono naga abe yamoku o hidoaka ma kiahonanga de ahao yomakutuono yokokiloiki iwitutumu o Egono abe o Moaba ma nyawa manga koanoika. De o koano gea duru wolamoko ma titi ai haki ilamokoholi.

^18-19 De yomahiadonoka o koano ai tauika de o Isiraele ma nyawa manga pajaka ma tiwi de manga hidoaka ma kiahonanga mata-mata iwihidoaka o koanoika. Gea iwihidoaka ibooto de ahao yomahilooa de yosobo masara ngade-ngade yomahiadono o Gigala abe genangoka naga o popangao ma ngi ho naga genangoka o popangao ma ngoe o nyawa ihigoko abe yapawa o hakaruino. De o Ehudu wahuloko ai dodiawoika abe kangano yamoku ma hidoaka, wato, “Ngini nihira dika nilio de ngohi ahao toturuino.” Ho ona yogila-gila yolio manga tauika. Masara o Ehudu duru o popangao ma ngioka gea de womadogilioro ai poretoko de wolio o koanoika. De wowohamoli ma koano ai tauika de wodoa ai ngiiye daku abe ikuranga ihauku de genangoka o koano naga wogogeruku. De o Ehudu woboa ai himangika de wihingahu, wato, “Ahi koano, naga ma hingahu abe ngohi tadofanga ngonaika abe ufa o nyawa utu ihioriki.” Ho o Egono wotemo wato, “Nako gea bole-boleohi nohihingahu!” De ahao wahuloko la ai nyawa abe naga ai kamara ma goronaka la ona mata-mata yokokihupuoka la ufa yoihene o Ehudu ai hingahu ma demo gea.

²⁰ Ho genangoka yahinootokahi o Ehudu de o Egono ai kamaroka abe daku ai tau ma katu ma timiuku. De o Ehudu wotemo wato, “O hingahu nenanga Ma Jouino abe ngohi naa tadofanga ngonaika.” Hokogea wotemo de ahao o Egono womaokoino.

²¹ De ahao o Ehudu de ai giama o gubadioka wale ai dopo-dopo ai uguru ma nirakino de witopoko duru o koano ai pokoroko la wihohonenge.

²² De ai dopo-dopo iwohama ka hiadono ma otini ahawoka abe de o Egono ai haki. De ma dopo-dopo ma dolomo ihapongo ai poretoko de ai wariki ma dola ihupu genangino. De o Ehudu ai dopo-dopo gea ko wahuputua ho wanoaika dika o Egono ai badanga ma goronaka.

²³ De woara ho womataiti wohupu o Egono ai kamara ma pungaika de ahao o kamara ma ngorana moi dika masara ma dadatoko hinooto ho ka ma moi wohidukusioka.

²⁴ Ho o Ehudu woaroka de ahao ona iwileleani o Egono, abe kanganoino wahuloko la yohupu, ona yolio ai kamarika masara ka de yamake ai kamara ma ngorana akokikusioka de yomakoketemo ato, “Marai o koano wale ma oraha una ka womatengoka naa la womahupu doka ma goronaka.”

²⁵ De yodamaa ka hiadono yamaleke manga koano iwinoa ma dekana masara o Egono ko wafelengaua ai kamara ma ngorana ho ona yale o ngorana ma kokusi de yafelenga ma ngorana. De doka ma goronaka ona iwimake manga koano abe kanganoinohi worubauku de wohonengoka.

²⁶ Masara ngaro ona ato kiani o Ehudu iwitaoko ma, ko iwidaenua angamoi una wopahaka ma gurutika ma oraha ona yododamaa dika yowohama manga koano ai kamarika. Abe o Ehudu wotilakuroka o popangao ma ngi gea abe o nyawa yapawa o hakaruino de ihigoko o Gigaloka de wogila-gila hiadono o ngiika ma romanga o Seira.

²⁷ De o Seira gea naga o loku-lokuoka abe o Efaraimi ai totoforauku manga tonaka. Ka de o Ehudu woboaka de ai guguli wawuwu kohaamokiye ma ilingi la wahokino o Isiraele ma nyawa. De gea o nau-nauru watoomuino de wahihira-hira de youti o loku-lokuino gea.

²⁸ De wahingahu onangika wato, “Ngini nihiniiki ngohi naa angamoi Ma Jou o Yawe wonahidoaka o lolaku. Nanga musu o Moaba ma nyawa ko idadiua yolaku angamoi imaketero de nanga Jou wonahidoakoka ona gea nanga giamino.” Hokogea manga hihira o Ehudu wahigaro onangika. Ho o Isiraele ma nau-nauru iwiniiki o Ehudu youti o Yorodani ma dolauku de yagoana o dodobongo o Yorodani ma akerino abe biaha o nyawa yotobongo o Moaba ma tonakika doka ma honongaika de angamoi ko ilukua ma akere genangoka. De ko moiua yahigunoa o nyawa yotobongo genangoka.

²⁹ De ahao o Ehudu de ai tentara gea yaparangi o Moaba manga tentaraika de yahohonenge o Moaba manga nau-nauru ngade-ngade yasana ngimoi. De ona yohonenge gea o Moaba manga tentara abe ka onangohi duru yototomoroini de yoputurungu. Masara ngaro hokogea ko moiua ka idadi yoara la ufa yohonenge.

³⁰ Ho o Moaba ma nyawa duru yahikalaka de ahao duru yoriidoka o Isiraele manga tonakoka o taongo moritufange ma dekanino abe hokogea ma dekana ko iwaka o parangi manga tonaka ma amokika.

O Samagara Ma Jou wihiakunu la o Isiraele ma nyawa wahihira

³¹ O Ehudu wohonengoka de ipaha o Filistina ma nyawa yahikangela o Isiraele ma nyawaika. Masara ipahaino de naga o Isiraeloka manga hihira womatengoli ai romanga o Samagara abe ai baba o Anata. De o Samagara gea ma moiuku una watoma o Filistina ma nau-nauru yaratuhu butaanga de ai dae o hapi ma boboha dika abe wapake hiadono wakokitoma yaratuhu butaanga gea.