Hihira 16 - Ma Jou ai Demo-demo o Totobelohoka

O Simsono o Gasa ma kota ma ngorana wakiwuku de waumo

¹ De ma moiuku ma oraha o Simsono wahihira o Isiraele ma nyawa, una woiki dai o Gasa ma kotaoko abe o Filistina ma nyawa manga kota. De wowohama o Gasa ma goronaika gea de womimake momatengo abe momatobafuku-fukunu ami badanga de womaputuhu o futu gea womaidu munangoka.

² De ona yogogere o Gasa ma kota ma goronaka yomahikokangahu abe o Simsono naga manga kota ma goronaka. Ho naga o nau-nauru yomatoomuino o futu-futuoka iwihidee ato manga musu o Simsono gea kiani iwihigilolitino la ka idadi iwitaoko. Abe ona ato, “Naa adonoka nanga oraha ngone ka idadi hitoma angamoi una naga nanga kota ma goronaka o futu naa. Ho ngade-ngade itawange de ngone higoana o kota ma ngoranoka la ka de wolio de ka idadi hitoma.” Ho ona yomahitigino o kota ma ngoranoka de genangoka iwigoana ka hiadono yahidetebiniye iwihidee ato ka de o Simsono wolio de ka idadi iwitoma.

³ Masara o Simsono womaidu o ngofeka ami koioka ka hiadono o futu gorona dika. Ho duru o futu gorona womomiki de woiki o kota ma ngoranika de wakiwuku ena gea ka ma moi. Abe o ngorana ma dadatoko arihononga de ma liate ka ma moi wohidikiwuku de ma dudukuru dakuino enangoo naga ho ka ma moi wohidomoku de ka wosobo. Ho o kota ma ngorana ma dadatoko mata-mata wao ka hiadono o lokuika abe naga o Heborono ma kota ma himangoka. De wodoa daku o loku ma tubuiye de ahao genangoka o kota ma ngorana ma dadatoko de ma liate de ma dudukuru mata-mata wakokiumo genangoka.

O Simsono de o ngo Delila yomakokubudi

⁴ De ipaha o Simsono ahao ai hininga adaene o ngofeka momatengoikali ami romanga o ngo Delila de muna mogogere o Soreke ma dolaka.

⁵ De o Filistina ma nyawa manga popareta ma haeke abe yokokurutiye ona yomakiniiki yoiki imitutumu o ngo Delilaika. De ona imihingahu ato, “Naga mia gogahoko ngonaika abe duru de ma behehongoka ho idadi to ngona ani utumu duru ilamoko. Ngona kiani o Simsono niribuutu nileha abe ai buturungu ihititi o kiaino hiadono duru ai buturungu kohaamoko. De nilehali hokokia la hiadono ai buturungu gea ka idadi ihihanga. De nako ahao ai buturungu ma dogogono ma hingahu wonihingahuoka de ngona kiani nomihingahuoli ngomino la ka idadi mihihihanga ai buturungu gea hiadono wiwitaoko de wiwipakiti de ko wapoaua womaduhunu. De nako hokogea ngona nomiduhunu ahao ngomi homoi-homoi minihihadia ngonaika o tiwi o se-senge ma haakaino o sana moi de o ratuhu moi. Ho duru ngona noutumu.” Hokogea o Filistina ma nyawa manga popareta ma haeke manga hiaturu ma demo o ngo Delilaika.

⁶ Ho de ahao o ngo Delila motemo o Simsonika mato, “Marai ngohi duru toheranga to ngona ani buturungu kohaamoko hiadono ngohi duru toigo tohioriki o kiaino ani buturungu ihititi. De hokokia o nyawa kiani yodiai ngonaika hiadono ani buturungu ko ilakuokaua? Ho nako ka idadi, ngohi toigo tomagahoko la nohihingahu ani dogogono ma hingahu gea.”

⁷ De o Simsono womipaluhu munangika wato, “Nako o nyawa ihihipakiti de o toimi ma deli ma hungi tumidi, de ena gea mata-mata abe duru ko itoolenguahi, de ahao to ngohi ahi buturungu idadioka hoka o nauru biaha manga buturungu.” Hokogea o Simsono ai hingahu o ngo Delilaika.

⁸ De ai buturungu ma dogogono ma hingahu gea muna mahingahuoli o Filistina manga poparetaika de ona ahao imihidoaka munangika o toimi ma deli ma hungi ma gahumu tumidi abe ko yawoeruahi ho ko itoolenguahi. De ena gea mapake mihipakiti o Simsono ma oraha womaiduoka.

⁹ De naga o Filistina ma nau-nauru yamuruono naga abe kanganoinohi magogonika ami tau ma kamaroka moi. Ho ka de o Simsono mipakiti ibooto de ahao mopoaka mato, “Simsono, nomataiti nomomiki! Naga o Filistina ma nyawa iningino naa!” Hokogea mihitodokana de womomiki de o toimi ma deli gea itoaka hoka o lawe ma oraha adaene o uku ma dokara. Ho ona ko yamakeuahi o Simsono ai buturungu ma dogogono abe ihititi o kiaino.

¹⁰ De ahao o ngo Delila gea mitemo unangika mato, “Adoo! Abeika nohihibodo ngohi! De gea ngona nohieluku angamoi ani hingahu ngohino ko igoungua.” De ahao de ami hininga ma dora mato, “Simsono, de naa togahoko ufa nohieluku ho duru togahoko la nohihingahu abe hokokia o nyawa ka idadi inipakiti hiadono ko idadiua nomaduhunu.” Hokogea o ngo Delila mibole ma goa-goa unangika.

¹¹ De o Simsono womihingahu wato, “Nako o nyawa ihihipakiti de o rukiti duru ihaiti abe ko ma moiuahi o nyawa yapake de ahao ngohi duru ihiboleoka hiadono to ngohi ahi buturungu idadioka hoka o nauru biaha manga buturungu.”

¹² Ho de ahao o ngo Delila male ma oraha abe muna ma hirete ka idadi mohitaili de mapake o rukiti ma hai-haiti abe duru ma hungi de o Simsono ai giama mapaki-pakitoka. De ahao ma moioli mahokino o Filistina ma nau-nauru abe magogonoka o ngi moioka abe naga ami tau ma goronaka de ona yododamaa dika abe nako mahoko ka idadi yoboa la imiduhunu. Ho gea o Simsono ka de mipakiti ibooto de momapoaka mato, “Simsono, naga o Filistina ma nyawa ngade-ngade initaoko!” Masara o Simsono watoaka ai giama ma papakiti gea imaketeroli hoka ena gea ma lawe moi dika.

¹³ De o ngo Delila ka mihiree-reeika dika mato, “Ngona ma moioli nohihangaja dika de ani demo duru ko igoungua. Ho naa kiani nagou-goungu nohihingahu abe hokokia ka idadi o nyawa inipakiti hiadono ko napoaua nomaduhunu.” Naa muna naga ami pahitaaka abe motobadiai o ngoere genangoka ami tau ma goronaka de o Simsono ai tadauru wapaki-pakitino ho naga o pakiti tumidi. De una womihingahu wato, “Nako ahi tadauru ma pakiti tumidi ngona nohidumo de ani lawe nohisapuru ani pahitaakaika hiadono ahi tadauru enangoo idadi to ngona ani ngoere ma lawe de ahao ani pahitaaka nohidobilatuku de nohidepenuku de ngohi ahao duru ihiboleoka. Hokogea hiadono to ngohi ahi buturungu idadioka hoka o nauru biahali manga buturungu.” Hokogea o Simsono ma moioli womiade-ade.

¹⁴ De ahao o ngo Delila mihibuu-buu ami pahitaaka ma datekoka hiadono iwikiooko duru. De ahao ai tadauru ma doomu tumidi mohidumo de ami lawe mohisapuru ami pahitaakaika hiadono ai tadauru enangoo idadi ami ngoere ma lawe de ahao ami pahitaaka mohidobilatuku de mohidepenuku. De ma moioli mopoaka mato “Simsono, naga o Filistina ma nau-nauru yoboakali!” Masara ka de o Simsono womomiki de ma pen wakiwuku de ma pahitaaka wohidogoraka de ai tadauru ma pakiti tumidino wohidoso mata-mata de ka ma moi ai tadauru wahiata ami pahitaakaino.

¹⁵ De ahao o ngo Delila de ami hiona-ona ma demo mato, “Done sarakia ngona nohihingahu nato nohidora de ani hininga ma gahumu? Abe nako nagoungu nohidora de ani hininga ma gahumu ngona de ngohi nanga gogao duru irahai de ko iwa ani hiningaka abe nagogono ngohino. Ngona naa ma hangeou nohieluku de nato nohidora masara ngohi ko toningakua nako ka ihikaika hokonaa. Ngona kiani nagou-goungu nohihingahu o kiaino ani buturungu kohaamoko ihititi.”

¹⁶ Hokogea o ngo Delila o wange-wangeiye o Simsono miribuutu de ami hiona-ona ma demo hiadono duru wodebeturu ami hiona-onaika.

¹⁷ Ho ika-ika de womihitararono munangika ma titi ai dogogono abe o kiaino ihititi ai buturungu. Abe de ai hininga ma gahumu wagou-goungu womihingahu, wato, “Ngohi naa ko ma moiuahi ahi tadauru atobiki de angamoi ka de tomaboa hiadono ma oraha naa to ngohi ahi wowango Ma Jou womadingakoka Unangika ho gea ngohi ihihiromanga o Nasiri ma nyawa. Ho naga o Nasiri ma behehongo abe kiani ngohi taniiki de ahi behehongo moi ko idadiua ahi tadauru yakulu. Ho nako ahi tadauru o nyawa yakulu gea ahi behehongo tatilakuroka de ahi buturungu ihihanga de hiadono ngohioo ahi buturungu idadi imaketero hoka o nauru biahali manga buturungu.”

¹⁸ Hokogea o Simsono womihingahu de naa o ngo Delila mohioriki una wagou-goungu womihingahu munangika mata-mata abe malingiri ma titi. Ho o Filistina manga popareta ma haeke mabehehongo la imitutumu, mato, “Ngini kiani niboa ma moioli de naa ma baha angamoi una gea wagou-goungu wohihingahuoka ma titi ai buturungu.” Ho o Filistina manga popareta ma haeke imitutumoli de ma oraha naa manga hadia ma tiwi abe imihibehehongoka yaoino.

¹⁹ De ahao o ngo Delila o Simsono mihisanangi hiadono una womapanginiye ami uguroka de mihibuu-buu hiadono duru iwikiookoka. De naga womatengo abe miahokokau de una naa duru wigogataheke o Simsonika de ai tadauru ma pakiti tumidi watobiki. De o Simsono ko wimaoua ka hiadono duru waofi-ofioka ai tadauru. De gea ma ngekomo hiadono o ngo Delila momulaenge mohihihanga o Simsono ai buturungu.

²⁰ Hokogea mihikangela de ahao mopoaka mato, “Simsono, o Filistina ma nyawa naa yoboainoli la initaoko!” De una womomiki ai giookino de doka ai hiningaka wofikiri wato, “Ngohi ahao tomaduhunu la tomahihupu manga giamino imaketero hoka ma dihiraino.” Hokogea ai hininga o Simsono masara una ko womagakunua womaduhunu angamoi Ma Jou o Yawe winoaikaka.

²¹ Ho ona o Filistina ma nyawa o Simsono iwitaoko de ahao ai lako hinootoo yakawali ho yahuputoka ai lako ma gomono hinootoo ho worafioka. De ona ahao iwiao manga kota o Gasaika de genangoka iwipapakiti de o papakiti yodiai o tabaagaino abe ihisapuroka de o hori ho duru iputurungu ai papakiti. Hokogea yodiai la duru iwihikangela de ahao iwihikarajaanga o bui ma tauoka. De o Simsono ai karajaanga kiani o gandumu ma ngengedere waloliti ho una wodadi hoka o hapi abe ko imatogu-togumua itagi la ka ihikaika o hakaru kohaamoko yaloliti de o gandumu gea yawedere hiadono idadi o tarigu. Ho duru imaketero hoka o hapi gea o Simsonoli wodadioka wotobaloliti o ngengedere ma hakaru.

²² Masara ipaha ahao o Simsono ai tadauru abe yakuluoka imulaenge ilio ai peaka.

O Simsono ai lolaku ma baha o Filistina ma nyawaika

²³ Naa adonoka ma oraha o Filistina manga popareta ma haeke yomatoomuino de manga kokawaaha duru ko manga ngoe la yodiai o huhuba ma amoko manga jou o Dagonika de yorame-rame de o higiriiri enangika. De angamoi yomahijou enangika gea abe yofikiri duru ena gea abe yaduhunoka ato, “Abeika nanga jou o Dagono iwihikala nanga musu o Simsono de iwihidoaka to ngone nanga giamino.”

²⁴ De ma oraha ona iwimake o Simsono de duru yahigiriiri manga jou o Dagono ato, “Abeika nanga jou abe duru de ma buturungoka, Nanga musu o Simsono iwihidoaka nanga giamino. O Simsono duru de ai buturungu nanga tonaka wohiwedere, De nanga gogianongoru ko manga ngoe watoma, Masara naa abeika, o Dagonohi ilaku.”

²⁵ De yorame-rame hiadono manga sosanangi ilamoko ma dalukino de yomulaenge yopoaka ato, “O Simsono kiani niwihihupu nenangino la ka idadi una wodadi nanga gie-giete ma ngi.” Ho naga o Filistina ma nyawa yoiki o bui ma tauika de o Simsono iwile de iwiao iwiliara manga rame-rame ma tau ma goronaika. De genangoka kiani wodiai abe ka idadi iwigiete. De manga rame-rame ma tau duru ilamoko de una kiani womaokoino duru ma hidogoronaka abe genangoka o tau ma liate hinooto duru ma amoko abe ka enangohi de ma buturungu la ma tau gea yatagaiye.

²⁶ De o Simsono wogahoko unangika abe witobalia-liara, wato, “Ngohi togahoko la ngona nohiliara de nohiao o tau ma liate hinootoika abe ka ena gea o tau naa yatagaiye la ka idadi tomahiaini tomaakeika ma liateika.” De hokogea una witobalia-liara wodiai.

²⁷ De naa o Filistina ma nyawa ko manga ngoe o rame-rame ma tau ma goronaka o nau-nauru de o ngo-ngofeka. De manga dimo-dimono yokokurutiye ona yongodumu genangoka de daku o tau ma lape ma hinootoka nagali o nau-nauru de o ngo-ngofeka yasana hange abe yowuni-wuningi dau ma goronauku de iwigie-giete o Simsono ma oraha una wodiai o gie-giete.

²⁸ De o Simsono ahao womaniata Ma Jou o Yaweiye wato, “Ahi Baluhu, Ngona Ma Jou o Yawe abe mata-mata o dunia ma lokuoka naga ani kuahaka, de naa ngohi tomagahoko la Ngona nohihininga ngohi nenanga. De nohiduhunu la ma oraha naa ma moioli nohihiputurungu la ngohi ka idadi de o hibalaha todiai la ahi lako hinooto abe yahibinaahaka o Filistina ma nyawa ka idadi ka ma moi tahibalaha.” Hokogea o Simsono womagahoko.

²⁹ De ahao una de ai giama arihonongaika womahiso-soika ma liate hinooto o tau ma hidogoronaka gea abe ka enangohi iputurungu manga rame-rame ma tau gea yatagaiye. De ma liate hinootoika gea watila.

³⁰ De ahao o Simsono wopoaka wato, “Ngaro ngohi tohonenge de o Filistina ma nyawa naa!” Ka de hokogea wopoaka de una duru de ai buturungu ma gahumu watila arihononga de o tau gea yadoturabaha o nyawa mata-matauku abe naga o tau ma goronaka gea. Ho ngaro manga dimo-dimono, de ngaro manga kokawaaha mata-mata genangoka, ma ka ma moi yokokihonengoka. Ho o Simsono o Filistina ma nyawa abe wahohonenge ai wowangoka, nako hohidetongo manga ngoe abe ma oraha wowango de ona yohonenge ma oraha una wohonenge de ka onangohi yowoe abe wahohonenge ma oraha yomahidohonenge ka ma moi de una.

³¹ De ahao o Simsono ai ria-dodoto de ai gogianongoru ka de yoihene abe una wohonengoka de yokokiboa o ngiino gea de ai honenge yale. Iwingotaka to una ai tonakika de ahao iwilungunu to una ai baba o Manoa ai lungunu ma ngioka abe una wohira wohonengoka. De ai lungunu ma ngi gea naga o Sora ma kapongo de o Esataolo ma kapongo ma hidogoronaka. O Simsono gea wahihira o Isiraele ma nyawa o taongo monaoko ma dekana.