Hihira 15 - Ma Jou ai Demo-demo o Totobelohoka

O Simsono womahibalaha o Filistina ma nyawaika

¹ De ahao adonoka o nyawa manga gandumu ma gugutuku ma oraha. De gea o Simsono wato woiki womitutumu ngoi fekata de hoka manga biaha wao o hidoaka moi. Abe gea o kabingi ma ngofaka moi waoika wato womihidoaka la womihisanangi. Ho womahiadono ami baba ai tauoka de wihingahu wato, “Ahi toroa, ngohi naa toboa ngohi fekata tomitutumu ho tomahilooa ma toigo togila-gila ami kamarika.” Hokogea womahingahu masara ami baba ko wihigunoaua o Simsono wowohama ai tau ma goronaika.

² De wihingahu o Simsonika wato, “Hokogea ngona nosobo de ani dohata ilamoko hiadono ngohi tato bote igoungu ngohi ora nomiolukoka ho tomihigogilakokali. De ani dodiawo abe duru wonidodiawo ani gogilakoka unangikali tihidoakoka. Ma, abeika nagahi ngomi dodoto, abe munangoo ngohi ora idodutu de ka munangohi morahai ho ka muna dika nomile. Ngohi tosanangi dika tinihigogilaka ngona de muna.” Hokogea o Simsono ai toroa ai demo.

³ Masara o Simsono duru ko wosanangiua de ai hininga ma goronaka wato ona yahowono unangika ho wato ahao womahibalaha. Ho una wotemo wato, “O kokangela abe ahao inidaene ngini o Filistina ma nyawa ahi giamino gea ti ngini nia tagongo, ko to ngohiua ahi howono. De angamoi mata-mata abe de ahao todiai gea ma titi nia howono ngohino. Abe ngohi fekata nimihigogilakokali de o nauru womatengoli ho naa nia howono ngohino gea tomahibalaha!” Hokogea o Simsono ai hininga womahingahu.

^4-5 De ahao o Simsono woiki ma hoanika abe genangoka ka idadi wataoko o fuhuku ma kaho masara ihira o gota ma hoka ma doolenge ma didaka ma ngoe wautukino. De ka de o fuhuku ma kaho hinooto wataokino de to ena ma bikini hinooto wahidiliko ka ma moi de o didaka. De ahao ma didaka watufuku de ma kaho hinooto gea wapidili o Filistina ma nyawa manga redi-redioka la imapopaata de imakatauru yaika yaino de ma uku ihikabarihika hiadono duru imahora-hora. Hokogea wohigali-gali wodiai hiadono o fuhuku ma kaho o ratuhu hange o pasanga ahohinooto waloara de mata-mata naga de ma ukuoka to ena ma bikini ma lilikoka. Ho o Filistina ma nyawa manga gandumu mata-mataika wakokitufuku. Abe ngaro ikuratioka abe ko yautukuahi de ngaro ena abe yautukinoka de apaki-pakitoka manga redioka, de ngaro ena abe yatou-touniyeoka ma ko yarerouahi enangoo akokitufukoka. Ho o Simsono manga gandumu wohibinaaha mata-mata. De o Filistina ma nyawa manga angguru ma redi-redi de manga saitunu ma gota ma redi-redi enangoo yokokiukuoka ho manga redi duru kohangoe o Simsono wohibinaaha.

⁶ De o Filistina ma nyawa duru de manga huhaka yomakokeleha ato, “O bobinaaha ma uku nenanga onagona yodiai?” De naga o nyawa yahingahu ato, “Gea o Simsono! Una wodiai angamoi ai toroa, o Timana ma nyawa gea, una o Simsono ngoi fekata womihigogilakokali. Ami baba gea womihidoaka unangikali abe duru widodiawo o Simsonika ai gogilaka ma rame-rameoka.” Hokogea o Simsono ai hibalaha ma ade-ade itagi. Ho o Filistina ma nyawa yaika de o Simsono ngoi fekata de ami baba yale de yahohowono de o uku abe yatufuku hiadono yohonenge.

⁷ Hokogea yodiai itorou de o Simsono duru wohuha de wahingahu onangika wato, “Ngini naa nidiai duru itorou ngohi fekata ami tauika! Ho naa ahi hibalaha ngini o Filistina ma nyawaika itagioli ka hiadono ahi hininga iriidi.”

⁸ Hokogea wotemo ibooto de o Simsono duru de ai dohata ma buturungu womulaenge watoma o Filistina ma nyawa hiadono duru ko manga ngoe wahohonenge. De ahao woara o lokuhakaru moiika o Etamoka de genangoka womagogono o aruku ma goronaka.

⁹ De ahao o Filistina ma nau-nauru ato kiani iwitaoko o Simsono ho ko manga ngoe yowohama o Yehuda ma tonakika la iwilingiri de yahikangela o Isiraele ma nyawa abe yogogere o Lehi ma kapongoka.

¹⁰ Ho o Yehuda ma nyawa genangoka yaleha onangika ato, “Adodoa ho ngini nimingohama de nimihikangela hokonaa?” De ona yapaluhu onangika ato, “Ngomi miboa ma titi moi dika de gea la o Simsono wiwitaoko la ka idadi ngomi midiai unangika imaketero hoka una wodiai ngomino.” Hokogea yomahingahu o Yehuda ma nyawaika.

¹¹ De ahao o Yehuda ma nyawa gea yomaputuhu kiani yaduhunu o Filistina ma nyawa done utuohi yahikangela. Ho naga manga nau-nauru ngade-ngade yasana hange yoiki o Etama ma lokuhakaruika gea angamoi ona iwihiorikoka o Simsono womatobagogono genangoka. De iwitemo o Simsonika, ato, “Abeika ngona, duru nomihikangela ngomi ani gogianongoru. Ngona nohioriki ngone hogogere o Filistina ma nyawa manga kuahaka! Done sarakia hokogea nodiai de ko nofikirikaua abe ona kiani ahao yomahibalaha ngoneino?” Masara o Simsono womademo wato, “Ngohi todiai dika onangika duru imaketero hoka ona yodiai ngohino.”

¹² Ai demo gea yoihene de ahao ona yomahingahu unangika, ato, “Simsono, hokonaa hiadono ngomi miboa minitutumu, ngomi miboa la minipakiti dika la ka idadi miniao de minihidoaka o Filistina ma nyawa manga giamika.” De o Simsono wapaluhu onangika wato, “Ahi gogianongoru nako gea ka idadi. Masara nako ngohi tohupu nginika kiani ngini nihira nihihibehehongo ngohino niato ko nginiua abe ahao nihitoma.”

¹³ De ona iwihibehehongo o Simsonika, ato, “Ngomi minihibehehongo hokogea de miagoungu nako nohupu ngomino ko minitomaua masara ahao minipakiti dika la ka idadi minihidoaka o Filistina ma nyawa manga giamika.” Hokogea iwihibehehongo de ahao iwipakiti duru akee-keketino de o rukiti ma hungi hinooto de iwiao ma lokuhakaruoka de aino.

¹⁴ De yoboa yotigi o Lehi ma kapongika de naga o Filistina ma nyawa genangoka de ka de iwimake o Simsono woboa de yomulaenge yomahagaaga de o lolaku ma hagaaga de unangika iwibuhuku yomapopaata. Masara duru ka itodokanino de o Simsono iwilufungu de Ma Jou o Yawe ai Womaha de duru wihiputurungu ho watoaka o rukiti ma hungi hinooto gea imaketero hoka ai papakiti gea o lawe dika ho iotaka o tonakuku ma rukiti gea.

¹⁵ De genangoka naga o keledai ma okoko ma kobongo abe ko itedekanuahi ma keledai ihonenguku. De o Simsono wamake ma okoko gea de wagorakino de ena idadi ai dae abe wapake watoma o Filistina ma nau-nauru gea ka hiadono yasana moi watomaka.

¹⁶ De gea ona watomaka de ahao o Simsono wahikabaata wato, “Abeika ngohi todiai de o keledai ma okoko ma kobongo dika, Abe manga honenge tatou-touniye ko manga ngoe, De ahi dae igoungu o keledai ma okoko ma kobongo dika, Hiadono o nau-nauru yasana moi ngohi tatomaka!”

¹⁷ Hokogea o Simsono ai kabaata ma demo! De ahao o keledai ma okoko ma kobongo gea waumo o lokuika. De ma ngi gea ihiromanga o Ramata-Lehi abe ma titi, o keledai ma okoko ma loku.

¹⁸ De ona gea watoma ibooto de o Simsono duru ai ngomaha yodudungu ho duru iwiboleoka de waamokiye womagahoko Ma Jou o Yaweiye, wato, “Ngona nohihigunoa ngohi la ani lolaku ma amoko nenanga namake to ngohi ahi giamino. Ahi Jou, ngohi tonileleani Ngona ho done nohihigunoa tohonenge angamoi o akere ko iwa nenangoka? De done ahi kangela ma goronaka de o Filistina ma nyawa, abe ngohi taemono ma titi ona ko yodadiua to Ngona ani nyawa, ihitaoko ngohi naa de ihiao.” Hokogea o Simsono womagahoko Ma Jouiye.

¹⁹ Ho Ma Jou o Yawe o akere wohibubungiye o tonakino abe naga ma ngi moi genangoka o Lehioka abe ma tonaka iluhunguku. De o ngi ma goronaka gea Ma Jou wapelaka de itodokanino naga o akere ibubungiye. De o Simsono wokere o akerino gea ka hiadono ai buturungu de ai magawe ilio. Ho o akere ibubungiye gea ihiromanga, “Una womagaho-gahoko to una ai akere ibubungiye.” De ma oraha o buku nenanga totulihi o akere ibubungiye gea nagahi o Lehioka.

²⁰ De o Simsono wodadi o Isiraele ma nyawa manga hihira ai taongo monaoko ma dekana. De ngaro una to ona manga hihira masara ma oraha gea ka o Filistina ma nyawahi de manga kuaha ilamoko o tonaka ma amokika.