Hihira 14 - Ma Jou ai Demo-demo o Totobelohoka

O Simsono woilaka de momatengo o Filistina ma nyawaino

¹ De ma moiuku o Simsono wotagi o Timana ma kotaika de genangoka womimake o ngofeka momatengo abe duru mihisanangi. De muna o Filistina ma nyawa o Timana ma kotaka gea.

² De o Simsono wolio ai baba de ngoi memeika de wahingahu onangika wato, “Ngohi o Timana ma kotaika totulu de tomimake momatengo o Filistina ma ngofeka abe muna ahi hininga adaene munangika ho togahoko la baba de meme ngini niloiki nihiaturu ahi gogilaka la muna modadi ngohi fekata.” Hokogea womagahoko ai dimonika la muna gea modadi ngoi fekata.

³ Masara ai baba de ngoi meme ko yosanangiua ho iwileha manga ngofakika ato, “Simsono, adodoa ho ngoni fekata ko nomaleua to ngone nanga gogianongoruoka? Ko iwa o ngofeka o Isiraele ma nyawaka hiadono ngona nato ngoni fekata nale o nyawaino abe ngone haemono angamoi ona ko yodadiua Ma Jou ai nyawa? Ngona nohioriki hokogea ona o Filistina ma nyawa.” Masara o Simsono wihibehehongoli ai babaika, wato, “Baba, ka muna dika ngohi tomiigo la modadi ngohi fekata ho duru tonganono la ngini ahi dimono nihiaturu hiadono ka idadi tomile.”

⁴ Hokogea o Simsono ai hininga masara ai baba de ngoi meme yohuha angamoi ona ko ihiorikuahi abe ma titi o higaro nenanga igoungu imadadi Ma Jou o Yaweoka de aino. De hokogea Ma Jou o Yawe ai hininga la naga ma ngekomo abe ka idadi wapoha o Filistina ma nyawa angamoi ma oraha gea ona yapareta o Isiraele ma nyawa mata-mataika de ma dubuho.

⁵ De ahao o Simsono waniiki ai baba de ngoi meme de yoiki o Timana ma kotaika. Masara ma oraha yomahiadono o Timana ma nyawa manga angguru ma redi-redi de o Simsono worehene ma redika de ai baba de ngoi meme ona yogila-gila. De ahao o redi ma goronaka itodokanino naga o boki o singa duru ma amoko iwihimanga o Simsono de ingamo unangika hiadono inyao ma amokiye!

⁶ De Ma Jou o Yawe ai Womaha duru wihiputurungu o Simsonika ka hiadono una de ai giama ma homoa dika wataoko ma singa gea de o boki ma amoko gea wakakihi hiadono ma badanga wapelaka hinootoka imaketero hoka o kabingi ma ngofaka o nyawa yaoto ka ma moi dika de apelaka hinootoka. Masara gea wodiai ko wahingahua ai baba de ngoi memeika.

⁷ De ahao o Simsono wogila-gila o Timana ma kotaika de yomakoketemo una de o ngofeka gea de una duru womisanangi munangika.

⁸ Ho ipaha ma oraha adonoka o Simsono woikoli o Timana ma kotaika la ka idadi ai gogilaka yahitiai. Ho waika de ka de wotigioka ma ngi abe o singa gea watomauku de wodulu o singa ma honenge la wolega. De una wamake naga o ofungu yoigutu o singa ma honenge ma pokoro ma goronaka de ma ofungu gea ena abe imadiai to ena ma gula kohaamoko.

⁹ Ho una womagoraka ma igutu abe de ma gulaka de wogila-gila womahiloi-loiki waolo-olomo o ofungu ma gula gea de utu ahao wahidoaka ai baba de ngoi memeika de onangoo yaolomo. Masara ko wahingahua onangika abe o ofungu ma gula gea wale o singa ma honengino.

¹⁰ De ahao o Simsono ai baba woiki o ngofeka ami tauika la yomakoketemo o Simsono ai gogilaka. De yomahikaaturu ibooto de ahao o Simsono wodiai o ngolo-ngolomo ma amoko de yorame-rame o wange tumidi ma dekana. De hokogea o Simsono waniiki angamoi ma oraha gea manga biaha nako o nauru woila-ilaka kiani wodiai o rame-rame hokogea.

¹¹ De ona o ngofekaino iwihidodiawo o Simsonika manga nau-nauru yamoruange la iwidodiawo manga ngolo-ngolomo ma goronaka.

¹² De o Simsono ahao wahingahu ai dodiawoika gea wato, “Abeika naga o gogule ma demo moi abe ngohi toigo tinihingahu nginika de ena gea ahi budi-budi ma demo abe kiani ngini niolingiri ma titi. De ngohi tinihidoaka ma oraha ka hiadono nanga ngolo-ngolomo ma bahaika ho naga o wange tumidino ma dekanino nimafikiri hiadono niamake ahi budi-budi ma demo ma titi. De nako niomakeoka to ena ma titi abe duru niataanoka de ngohi ahao tinihidoaka nginika o baju ma lawe ma alu-aluhu moruange de utuohi o rame-rame ma baju ma rorahai enangoo moruange abe tinihidoaka nginika la hiadono ngini mata-mata niamake nia baju ahohinooto homoi-homoiika.

¹³ Masara nako nanga ngolo-ngolomo ma wange tumidi ibooto de ngini ko niataanua ahi budi-budi ma demo ma titi, de ahao kiani ngini nihihidoaka ngohino o baju ma lawe ma alu-aluhu moruange de o rame-rame ma baju ma rorahai moruange.” Hokogea o Simsono ai demo onangika. De ona iwipaluhu ato, “Irahai, nomihidoaka dika ani budi-budi ma demo gea. Ngomi mioigo miihene ani gogule ma demo gea.”

¹⁴ De o Simsono wahingahu ai budi-budi ma demo abe hokonaa, wato, “Ena gea abe itobagoli la yolomo, ahao to ena ma goronaino iboa o inomo, de ena abe duru iputurungu, ahao naga ma muti-mutiti ihupu enangino.” Hokogea wahingahu ai dodiawoika yamoruange gea de ona duru yomalingiri ai budi-budi ma demo ma titi masara ngaro o wange hange ma dekana ma duru ka yopusingohi abe ma babaluhu ko yamakeuahi.

¹⁵ De o wange ma iatoka yomatohiki imihingahu ngoi fekatika ato, “Mia biranga, ngona kiani ani rokata niribuutu ka hiadono womihingahu ngomino ai budi-budi ma demo ma babaluhu. De ngona ahao nomatoduba nako una ko womihingahua angamoi ahao miatufuku ani baba ai tau ka ma moi de ngona. Abe miatufuku ma oraha ngonaoo naga ma goronaka ho iniuku hiadono nohonenge nako ani rokata ko niribuutua hiadono womihingahu. Angamoi nako ngona ko nomiduhunua de ahao ngomi kiani wiwihidailako o Simsonika o baju moributaanga abe ma ija ma hali-hali mata-mata. De gea imaketero hoka nomiahokino nia gogilaka ma rame-rameino nenanga la ngona nomihidadi o huha ma nyawa abe duru mirugi mia tiwi ilamoko nako ma babaluhu gea ko miamakeua.” Hokogea imiribuutu o Simsono ngoi fekatika.

¹⁶ De ahao o Simsono ngoi fekata duru de ami koongo ipuraraha mohigari-gari momagahoko ami rokatika la womihingahu ai budi-budi ma demo ma titi, de hiadono mato, “Ngona marai nohidohata ngohino. Ngona nomahitaana abe ko nohidoraua ngoni fekatino. Abeika ngona nahibudi ahi gogianongoru nenangoka de ani budi-budi ma demo gea masara ngaro ngohi todadioka ngoni fekata ma, ko nohihitararonua ngohino ani budi-budi ma demo ma titi.” De o Simsono wopaluhu dika wato, “Abeika, nako ahi demo ma titi gea ngaro ahi baba de ngohi meme ma ko tahingahuahi, ho done sarakia de tonihingahu ngonaika?” Hokogea womipaluhu ngoi fekatika.

¹⁷ De muna hokogea de hiadono de ami koongo miribuutu o Simsonika o wange-wangeiye ka hiadono manga wange ma tumidoka de angamoi muna duru imihigali-gali miribuutu ho ma bahaika womihingahu ai budi-budi ma demo ma titi. De o wange ma tumidoka gea muna moiki ami gogianongoruika de mahitararono onangika ma titi.

¹⁸ De ahao o wange ko itumunuahi, o wange ma tumidoka gea, de o Timana ma nyawa iwihingahu o Simsonika ato, “Ngomi naa ani budi-budi ma demo gea miapaluhu hokonaa: Nako o ofungu ma gula duru imutiti de o inomo utu. Done sarakia naga abe ka enangohi imutiti? Duru ko iwa! De nako o singa duru iputurungu de o aewani utu. Done sarakia naga abe ka enangohi iputurungu? Duru ko iwa!” Hokogea manga babaluhu de ahao o Simsono watemo onangika, wato, “Ti ngini nia babaluhu ma demo ngohi tapaluhu de o hiketero ma demo naa: Ngini nimipake ngohi fekata hoka muna to ngohi ahi hapi ma beka dika, Abe gea nimabauino la ti ngini nia redioka niapake. Abe nako ngini ko hokogenangua nimiribuutu munangika, Ngini duru ko niamakeua ma babaluhu gea.” Hokogea o Simsono de ai hininga ma huha watemo o nau-nauru yamoruangeika gea.

¹⁹ De Ma Jou o Yawe ai Womaha wihilufungu de ai buturungu de ka wosobo o Simsono. Una woiki o Asekelono ma kotaika de genangoka watoma o Filistina ma nau-nauru yamoruange de manga pakeanga wakokihuputoka de wogila-gila wolio. De manga pakeanga gea enangoo o rame-rame ma baju ma rorahai de ena wahikokodoku o nau-naurika gea abe yotohiki ai budi-budi ma demo ma babaluhu. Ma ngaro hokogea wahidoakoka masara ai ngamo duru ka ihaukohi abe ihitii-titi mata-mata gea abe idadioka ho ka wolio dika ai baba de ngoi memeika.

²⁰ Ho ahao ngoi fekata ami dimono imihigogilakoli womatengoika abe una gea ma oraha o Simsono woilaka de una duru ai datekoka widodiawo. Ho naa o Simsono ngoi fekata muna modadi to unangoli ngoi fekata abe una o Simsono ai rame-rame ma dodiawo yamoruangeino.