Hihira 13 - Ma Jou ai Demo-demo o Totobelohoka

O Simsono ka de womaboa de iwidingakoka Ma Jouika

¹ De ahao o Isiraele ma nyawa yomulaengoli yodiai itotorou Ma Jou o Yawe ai himangoka ho wahohowonoli. De angamoi yotobadiaioli itotorou ho Ma Jou o Yawe wahidoaka o Filistina ma nyawa manga kuahaika de ona yapareta o Isiraele ma nyawa de ma dubuhoka o taongo moruata ma dekana.

² De ma oraha gea naga o Isiraele ma nyawa womatengo ai romanga o Manoa abe womahidutu o Yakubu ai ngofaka o Daana ma dutuino. De o Manoa gea wogogere o Sora ma kotaka. O Manoa ngoi fekata naga masara muna ko idadiua modami ho ko ma moiuahi ami ngofaka mamake.

³ De ahao naga Ma Jou o Yawe ai malaekata womahimatoko munangika de womihingahu wato, “Ngona igoungu ma dihirainohi de ko idadiua nodami ho namakeuahi ani ngofaka. Masara ko itedekanokaua de ngona ahao idadi de ani badangoka de ani ngofaka gea o nauru.

⁴ De ngona ka de ani badangoka de kiani nomahidodiai nokere. Abe Ma Jou wonihibohono naokere o angguru ma gohaka eko o ngokere utu abe de ena gea ka idadi inihidaluku. De o inomo enangoo nomahidodiai la ufa naolomo o inomo abe Ma Jou ai Pareta ato ko idadiua ngini o Isiraele ma nyawa niaolomo.

⁵ De hokogea nomagoana ani ngokere de ani ngolomino angamoi ani ngofaka gea Ma Jou womadingakoka la ai wowango ma dumutu ka ihikaika Unangoka dika. Abe ka de una womaboa de ani ngofaka wodadi o Nasiri ma nyawa ho ko idadiua ngini niwiguti ai tadauru ngaro o ngai moi dika, de ko idadiua una womakulu. Abe ani ngofaka iwitingakoka Ma Jouika la una ahao Ma Jou wipake la wodadi womulaenge wahihupu o Isiraele ma nyawa o Filistina ma nyawa manga kuahaino.” Hokogea Ma Jou o Yawe ai malaekata ai hingahu o Manoa ngoi fekatika.

⁶ De o malaekata gea wosoboka de ahao o Manoa ngoi fekata mitutumu ami rokata de mihingahu unangika, mato, “Manoa! Kangano naga womatengo Ma Jouoka de waino ngohino de ai rupa marai hoka o malaekata angamoi ngohi de ahi hawana ma heranga timake. De ngohi ko tilehaua una o kiaino ma nyawa de una gea ko womahingahua abe ai romanga onaguna.

⁷ Masara una wohihingahu ngohino wato, ‘Ngona ahao idadi de ani badangoka de ani ngofaka gea o nauru. De ka de womaboa hiadono wohonenge de ani ngofaka ai wowango Ma Jou womadingakoka Unangino, ho ko idadiua o angguru ma gohaka ngona naokere eko o ngokere utu abe de ena gea ka idadi inihidaluku. De ngona ko idadiua naolomo o inomo abe Ma Jou ai Pareta ato ko idadiua o Isiraele ma nyawa yaolomo.’ Hokogea una mata-mata wohihibohono angamoi wato ahi ngofaka una o Nasiri ma nyawa, ho Ma Jouoka ai wowango igogere ka hiadono ma bahaika.” Hokogea muna mihingahu ami rokatika.

⁸ De o Manoa ngoi fekata ami hingahu gea woihene de ahao una womaniata Ma Jou o Yaweiye, wato, “Ma Jou o Yawe, ngohi duru tomagahoko la una gea abe nihidingoto ngohi fekatika ahao nihigunoa la woboali ngomino la ka idadi womidotoko abe hokokia wiwipaliara mia ngofaka gea abe ahao womaboa.” Hokogea o Manoa ai gogahoko Ma Jouika.

⁹ De Ma Jou wohigihene ai gogahoko gea de ai malaekata wihidingotoli de una woboa o Manoa ngoi fekatika de ma oraha woboa muna mogogeruku ami redioka de masara ami rokata ko iwiwa munangoka.

¹⁰ Ho muna duru momapopaata ami rokatika de mihingahu mato, “Manoa, una woboakali! Una gea abe naa ma duruika wohitutumu ngohi, una naga o redioka womahimatokoli ngohino, abeika higilio.” Hokogea mihigaro ami rokatika.

¹¹ De o Manoa womaokoiye de wominiiki ngoi fekata ho ka de yoboa o malaekatika gea de o Manoa wileha unangika, wato, “Igoungu, ngona naa o nauru gea abe naa ma duru ngohi fekatika naga ani hingahu munangika?” De wipaluhu wato, “Niagoungu, ngohi naa.”

¹² De o Manoa wilehali o malaekatika gea wato, “Ho ma oraha abe ani hingahu idadioka de o ngofaka gea ai wowango ma hiaturu hokokia? De sarakia, ka idadi nomihingahu ai wowango ma karajaanga?”

¹³ De Ma Jou o Yawe ai malaekata gea wipaluhu o Manoaika wato, “Ngona nomiduhunu ngoni fekata la muna maniiki itiai ahi hingahu mata-mata abe tomihingahuoka munangika.

¹⁴ Muna ko idadiua maokere o kia dika abe o angguru ma datomino. Abe kiani momahibohono o angguru ma gohakika la ufa maokere ena gea eko o ngokere utu abe de ena gea abe ka idadi imihidaluku. De ko idadiua maolomo o inomo abe Ma Jou ai Pareta ato ko idadiua ngini o Isiraele ma nyawa niaolomo. Muna kiani maniiki duru imaketero ahi demo mata-mata gea abe tomihingahuoka.” Hokogea ai demo wihigalioli o Manoaika.

¹⁵ De ahao o Manoa witemoli Ma Jou o Yawe ai malaekatika, wato, “Ngohi togahoko la ngona bole-boleohi nolio, nomihigunoa la minitumungohi la ka idadi minihakai o kabingi ma ngofaka moi.” Hokogea witumungu.

¹⁶ Masara Ma Jou o Yawe ai malaekata wipaluhu o Manoaika wato, “Ngaro ngona nohitumungu masara ani inomo gea ko taolomua. Masara nako noigo nomahidiai o huhuba iharo-harongo gea irahai de ahao ani huhuba gea nomahihuba Ma Jou o Yaweika.” Hokogea wihingahu angamoi o Manoa ko wohiorikuahi ma gou-goungu nako witemo Ma Jou o Yawe ai malaekatika.

¹⁷ De ahao o Manoa wileha Ma Jou o Yawe ai malaekatika gea, wato, “Ngohi togahoko la ngona nomihingahu ani romanga la ma oraha ani hingahu ngomino idadi de ngomi ka idadi mia horomati itagi ngonaika.” Hokogea womagahoko o Manoa.

¹⁸ Masara Ma Jou o Yawe ai malaekata wileha unangika wato, “Adodoa ho hiadono ngona noleha ahi romanga? De angamoi nako to ngohi ahi romanga o nyawa yoihene de yahiherangaholi hiadono ko yapoaua yomangaratii.” Hokogea Ma Jou ai malaekata ai hingahu o Manoaika.

¹⁹ De o Manoa wosanangi wodiai hoka o malaekata wihingahu ho waleino moi o kabingi ma ngofaka de o gandumu enangoo waleino de ahao womahidiai ai huhuba iharo-harongo. Ho gea womahidiai ibooto hiadono o kabingi ma ngofaka ma roehe de ma gandumu gea wakelenga o hakaru ma lokuoka de ahao watufuku hoka Ma Jou wadotoko o Isiraele ma nyawa kiani yodiai nako yomahuba Unangika. De ka itodokanino Ma Jou o Yawe wodiai la duru yahiheranga ma oraha o Manoa de ngoi fekata yolega-lega manga huhubaika.

²⁰ Abe ma oraha gea o uku ma dokara ihiruiye, hoka ma dumutu o Horogaiye, de Ma Jou o Yawe ai malaekata gea wowohama o uku ma dokara ma goronaika de wodoa ma uku ma dokara waniikiye hiadono ko iwimakeokaua. Ka de o Manoa de ngoi fekata yamake ma heheranga gea de yomamotumuku ma tonakuku.

²¹ De ona yodamaa genangoka yato abeika nako o nauru gea womahimatokoli masara ko woboakaua. De ahao o Manoa duru wohioriki abe womatengo gea Ma Jou o Yawe ai malaekata.

²² De o Manoa wopoaka de ai hawana wato, “Ngone bootino dika de hohonengoka! Angamoi hokogea ma hohowono o nyawaika nako ona iwimake Ma Jou.”

²³ Masara ngoi fekata mato, “Marai koua, nanga huhuba gea homahidiai de to ngone ma hirete nanga giama ho nako Ma Jou o Yawe ai hininga la wonahohonenge, gea Una ko wodafongua nanga huhuba iharo-harongo de nanga gandumu ma huhuba. Abe nako Una ai hininga la ahao wonahohonenge de igoungu Una marai ko wonahimatokua mata-mata nenanga abe holega-lega, de ko wonahingahua mata-mata abe ngone hoihenoka Unangino nako igoungu ai mau ma bahaika la inahinooto hohonenge.” Hokogea Ma Jou wahingahu ai hidee ma owa o Manoa de ngoi fekatika.

²⁴ De ipahaino de idadi duru hoka Ma Jou wahingahuoka abe muna momagerewoto o ngofaka o nauru. De manga ngofaka gea iwihiromanga o Simsono. De una wofero irahai abe Ma Jou o Yawe wihiowa ai wowangoka ka hiadono wobaluhiye.

²⁵ De Ma Jou o Yawe de ai Womaha womulaenge wihipareta o Simsono de wihiputurungu ma oraha una wogogere o Mahane-Daanoka abe ma ngi gea naga o Sora ma kota de o Esitaolo ma kota ma hidogoronaka.