Hihira 12 - Ma Jou ai Demo-demo o Totobelohoka

O Efaraimi ma nyawa iwitaleana o Yefata ma titi ai lolaku

¹ O Amono ma nyawa duru o Yefata wahikalaka de ahao o Efaraimi ma nyawa iwihininga kuranga o Yefatika hiadono manga nau-nauru ato kiani yotemo unangika. Ho yomatoomuino de o Yorodani ma akere yomahihora doka o Safono ma kapongika. De ona genangoka de ahao manga hidingoto yoiki o Yefatika iwihingahu ato, “Ngona o Amono ma nyawa naparangi masara ko nomiahokua la ngomioo miniduhunu niaparangi onangika. De gea ngona duru ko itiaiua nodiai abe ko nomiahokua, ho naa ngomi miboa de ani tau minihidutufuku ka ma moi de ngona.” Hokogea yotemo.

² De o Yefata wapaluhu onangika wato, “Abeika, ngini nihioriki abe ma dihiraino o Amono ma nyawa imihikangela ngomi de hiadono naa ma duruino mimaketeparangi. De ngini nihiorikoo abe ngohi tagoungu tiniahokoka la ngini o Efaraimi ma nyawa niboa nimiduhunu ngomi. Masara ngini nioluku niboa.

³ Ho gea ngohi ko idadiua tomahinganono nginika ho ahi wowango tomahidoaka la ngohi de ahi tentara miahimanga o Amono ma nyawa gea. Ngomi miadobongo onangika de Ma Jou o Yawe womiduhunu miaparangi o Amono manga tentara ka hiadono o lolaku Una womihidoaka ngomino. Hokogea ngini nioluku abe nimiduhunu ho ko niboaua masara naa ngomi milakuoka de ahao niboaino niato nimiparangi ngomi. Adodoa ho ngini nidiai hokogea?” Hokogea o Yefata wapaluhu onangika.

⁴ Masara ka de o Efaraimi ma nyawa manga dimo-dimono yoihene o Yefata ai demo gea de yopaluhu unangika ato, “Ngini o Gileada ma nyawa igoungu ma dihiraino nginioo nimahidutu o Efaraimoka masara nimiao ko itiaiua ngomino ka hiadono nimatingaka ngomino. De hokogea nia hininga ka hiadono ma oraha naa ngaro ka nigogerohi to ngomi o Efaraimi de o Manase ma nyawa mia tonaka ma hidogoronaka. Ho ngomi naa minihiromanga ngini nidadi mia nau-nauru ma hou-hou dika abe ma dihiraino o Efaraimi ma doomu nimatingakoka ho minietongo ngini ko o nau-naurua.” Hokogea yadanauru ho o Yefata ai tentara wahoko la ona mata-mata yomatoomuino de ahao yoiki yaparangi o Efaraimi ma nyawa ma doomuika abe yotemo hokogea de yahikala.

⁵ De o Yefata de ai tentara ka de o Efaraimi manga tentara yahikalaka de ahao yagoana o Yorodani ma dodobongika la ufa o Efaraimi ma tentara ma hou yolio. Abe nako naga womatengo woigo womahihora ona ato done una o Efaraimi manga tentara womatengo woara wolio. Ho ona o dodobongino yogoana iwihuloko la wohitaili wofetongo o betongo moi abe ona iwileha ato, “Marai ngona o Efaraimi ma nyawa e?” De nako una wopaluhu wato, “Ko ngohiua,”

⁶ de ahao ona iwihuloko la wofetongo o gooko ma hofoko, abe nako to Gileada manga demo, “o syibolete.” De nako una wofetongo duru itiai, gea de ahao iwihigunoa wogila-gila ma nako wofetongo wato, “sibolete” de ona duru iwihioriki abe una o Efaraimi ma nyawa. De iwihioriki angamoi o Efaraimi ma nyawa ko idadiua yofetongo o “syi” ho ngaro una wohitaili wofetongo ma ko idadiua. Ho ka yoihene dika wofetongo o “si” ho iwihioriki abe woigo wotobongo una gea woeluku, una igoungu o Efaraimi ma nyawa. De gea una iwitaoko de duru o Yorodani ma dodobongoka gea iwihohonenge. De o Efaraimi ma nau-nauru abe yohonenge o parangioka gea manga ngoe yasana moruata de yasana hinooto.

⁷ De o Yefata, abe o Gileada ma nyawa gea, una wodadi o Isiraele ma nyawa manga hihira o taongo butaanga dika ma dekana de una wohonenge. De una wohonengoka de iwilungunu o ngi moioka abe imakitingaka ko ikurutikaua de manga kota moi o Gileada ma tonakoka.

O Isiraele ma nyawa manga hihira yahange abe yomatoturuuru

⁸ De o Yefata wohonengoka de ahao womatengo ai romanga o Ebasana wodadi o Isiraele ma nyawa manga hihira. O Ebasana gea wogogere o kapongo moi ma romanga o Beteleheeme.

⁹ De to una ai ngofa-ngofaka o nau-nauru yamoruange manga ngoe de ngoi ora onangoo yamoruange de una woluku yomahikokoona yoilaka. Ho ngoi ora gea wahikokigogilaka de o nau-nauru abe ko to una ai doomuinoua, ho ai totoroa ona o homoaino ma nyawa ree-ree. De ahao wale o ngo-ngofeka ma homoaino la ona wahigogilaka de ai ngofaka o nau-nauru, ho ngoi hunu-hunungu onangoo o homoaino ree-ree. De o Ebasana gea o Isiraele ma nyawa wahihira o taongo tumidi ma dekana.

¹⁰ De ma oraha una wohonenge de ai nyawa iwilungunu ai kapongo o Beteleheemoka.

¹¹ De o Isiraele ma nyawa manga hihira abe o Ebasana wituruuru ai romanga o Elono abe una o Sebulono ma doomuino. De o Elono wahihira o Isiraele ma nyawa o taongo ngimoi ma dekana.

¹² De ma oraha una wohonenge iwilungunu o Ayalono ma kapongoka abe o Sebulono ma tonakoka.

¹³ De ma oraha o Elono wohonengoka de ahao ai duruuru o Abadono abe ai baba o Hilele de wogogere o Piratono ma kotaka.

¹⁴ De o Abadono to una ai ngofa-ngofaka o nau-nauru yamoruata manga ngoe de ai danongo o nau-nauru yokuranga abe manga ngoe ka ona yamoruange dika. De ai ngofa-ngofaka de ai dano-danongo o nau-nauru gea homoi-homoiika yotagi-tagi de yapake o keledai ho manga keledai moritumidi. De o Abadono gea wodadi o Isiraele ma nyawa manga hihira o taongo tufange ma dekana.

¹⁵ De ma oraha una wohonengoka de iwilungunu o Piratono ma kotaka abe naga o Efaraimi ma tonaka ma honongaka daku o loku-lokuoka abe naga o Amaleke ma nyawa yogogere genangoka.