Hihira 11 - Ma Jou ai Demo-demo o Totobelohoka

O Yefata Ma Jou wihidadi o Isiraele ma nyawa manga hihira

¹ De ahao naga o Isiraele ma nyawa womatengo ai romanga o Yefata abe una duru wotobamoroini o Isiraele ma nyawa manga musuika hiadono duru wososawaro woparangi onangika. O Yefata o Gileada ma nyawa de ai baba unangoo ai romanga o Gileada abe yomahitoomuika de manga tonaka. Masara o Yefata ngoi meme o homoaino ma nyawa abe ai baba o Gileada womihewa la womaidu de muna ho hiadono muna mamake ami ngofaka o Yefata.

² Masara nagali o Gileada ngoi fekata ma gou-goungu, de to ona manga ngofa-ngofaka o nauru yamuruono naga. De ipahaino ma oraha ona yobaluhu de iwidohata o Yefatika de hiadono iwihihupu manga tauino. Ona iwitemo unangika ato, “Ngona ko mia ria-dodotua angamoi ngoni meme o homoaino ma nyawa abe ami badanga momafuku-fukunu ho ngona duru ko namakeua nanga baba ai tonaka ma hidoku ma oraha wohonenge. Ngomi naa minioluku ho ani oara ko iwa nenangoka. Ngona kiani nomatingakoka de ufa nolio nenangino.” Hokogea ai ria-dodoto manga demo unangika.

³ Ho ona ai baba ai tauoka o Yefata wanoaika de woara o Isiraele ma tonaka ma batingika de wogila-gila wowohama o tonaka ma romanga o Tobo de genangoka wogogere o Yefata. De ika-ika naga o nau-nauru iwitobadodiawo manga ngoe abe ona mata-mata yatobalawana o nyawaika de hiadono o nyawa utu ko yadafongua la yogogere manga doomuoka. Ho naa ona gea yodadi o Yefata ai dodiawo.

⁴ De ipaha naga o Amono ma nyawa yaparangi o Isiraele ma nyawaika de hiadono duru yahikangela ona abe yogogere o Gileadoka.

⁵ De ona abe yahibaluhu o Isiraele ma nyawa o Gileada ma tonakoka ona yoiki o Tobo ma tonakika de iwitutumu o Yefata de yogahoko la una woboa de waduhunu yaparangi manga musu o Amono ma nyawa gea.

⁶ Ona yotemo unangika ato, “Yefata, adonoka ma oraha kiani o Tobo nanoaka de nolio nanga tonakino la ngona nodadi nanga hihira la haparangi o Amono ma nyawaika ma oraha yoboa inahikangela.”

⁷ De o Yefata wopaluhu onangika wato, “Ngini hokogea nihioluku de nia dohata hiadono nihikiniikoka ahi baba ai tauino, de done sarakia hiadono hokonaa nogahoko ngohino? De abeika hoka ngini kiani duru nikangelaukuohi de ahao nihiahokoli la ngohi tolio ahi tonakika e?” Hokogea o Yefata womademo.

⁸ De ona yopaluhu o Yefatika ato, “Yefata, ka ngomiua dika miniperelu la nolio de nomihihira. Masara ngomi o Gileada ma nyawa mata-mataika mia hininga moi abe kiani ngona nomihihira miaparangi o Amono ma nyawa ma oraha naa.”

⁹ De o Yefata wapaluhu onangika wato, “Nako ngini niagoungu nihihigilio la gea nohihikuaha la ka idadi o Amono ma nyawa taparangi, de nako Ma Jou o Yawe wohihiakunu hiadono tolaku o parangino, de gea tosanangi todadi nia hihira o Gileadoka.”

¹⁰ Ka de hokogea o Yefata wotemo de ona iwipaluhu, ato, “Ngomi duru misanangi ani demoika de Ma Jou o Yawe duru womihioriki ngomi miagou-goungu mia gogahoko ngonaika.” Hokogea yomahiketehibehehongo.

¹¹ Ho o Gileada ma balu-baluhu ma oraha yolio de o Yefata waniiki de ahao una de o Gileada ma nyawa yomahiketehibehehongo la genangino de iwihidadi to ona manga popareta ma hidimono de manga tentara ma hihira. De o ngi moioka abe ma romanga o Misapa o Yefata waika de genangoka womahingahuoli ai hininga Ma Jou o Yawe ai himangoka de o Gileada ma balu-baluhu manga himangoka wohigalioli ai behehongo ma demo mata-mata abe ihira wahibehehongokau o Gileada manga balu-baluhika.

O Yefata de o Amono ma nyawa manga tonaka ma kadatoro ma ade-ade

¹² De ahao o Yefata ai nyawa yamuruono naga wahidingoto o Amono ma nyawa manga koanoika de ai demo abe yodofanga o koanoika gea hokonaa, “Koano, o kia ngomi o Isiraele ma nyawa mia howono hiadono ngini o Amono ma nyawa nimihikangela? Adodoa ho ngini niboa mia tonakino de nimingohama nimihikangela?” Hokogea o Yefata ai demo yototaka o Amono ma nyawa manga koanoika.

¹³ De o Amono ma nyawa manga koano unangoo wahuloko o Yefata ai hidingoto ma nyawaika la ai babaluhu ma demo yadofanga iwihingahu o Yefatika, de hokonaa o koano gea ai demo wato, “Ma dodihiraka abe ma oraha ngini o Isiraele ma nyawa nihupu o Mesiiri ma tonakino de o tonaka nenanga abe ngohi tohikoano nia totofora gea imiora. Abe ahi tonaka ma batingi o Kokoroongo ma akeroka ka hiadono o Yaboko ma akerika de ka hiadono o Yorodani ma akerika mata-mata yomaleoka ma tonaka gea. Ho naa adonoka ma oraha abe ma tonaka mata-mata gea kiani nihigilio ngomino la homakadame ngini de ngomi de ko homaketeparangiua.” Ho o Amono ma nyawa manga koano ai demo gea yadofanga o Yefatikali.

¹⁴ De ahao o Yefata ai nyawa wahidingotoli la iwitutumoli o Amono ma nyawa manga koano de ai babaluhu ma demo.

¹⁵ Ho yomahiadonoka ma koanoika gea de unangika yadofangoli o Yefata ai hingahu nenanga, wato, “Hokonaa ngohi o Yefata tinihingahu, o Isiraele ma nyawa ko yomagoraua o Moaba ma nyawa manga tonaka de o Amono ma nyawa manga tonakoo ma ko yaoraua.

¹⁶ Hokonaa tonihitararono de ma ade-ade ma gou-goungu abe ma oraha o Isiraele ma nyawa yohupu o Mesiiri ma tonakino. Ona ihira yoiki o tonaka ma kakaahaka abe imakadateke o Bongo-bongo ma gahi de ahao yogila-gila ka hiadono o Kadese ma tonakika.

¹⁷ De genangoka yotuluika de yomahingahu ma koanoika abe wahikoano o Edomo ma tonaka gea de hokonaa o Isiraele ma nyawa manga dimono yomagahoko unangika ato, ‘Koano, ngomi naa mimagahoko la ngona nomihigunoa minitilakuru ngaro ani tonakika miboa.’ Hokogea yomagahoko ato ko yotulua ai tonakoka ka yogila-gila dika masara o Edomo manga koano woluku wahigunoa yoboa ai tonakino. De ahao manga gogahoko imakadaene o Moaba ma tonaka manga koanoika masara unangoo ka woluku dika ho kiani ona o Isiraele ma nyawa ka yomagoo-gogere o Kadesoka.”

¹⁸ “De ahao o Kadese yanoa de yoiki o tonaka ma kakaahaika abe akiloliti o Edomo ma nyawa manga tonaka de o Moaba ma nyawa manga tonaka. De yotagi o wange ma hiwariye la gea o Moaba ma tonaka yakiloliti de ko yowohamua ka hiadono yotulu doka o Kokoroongo ma akere ma honongaka gea abe idadi o Moaba manga tonaka ma batingi. De manga batingi gea ko yatilakurua abe o Kokoroongo ma akere ko yomahihoraua doka ma honongaka gea abe idadi o Moaba manga tonaka ma batingi. De manga batingi gea ko yatilakurua abe o Kokoroongo ma akere ko yomahihoraua doka ma honongaika abe gea to Moaba ma nyawa manga tonaka ho ona genangoka dika ma honongaka yomagoo-gogere.”

¹⁹ De o Yefata ai hidingoto yogila-gila yadofanga o Yefata ai hingahu o Amono ma nyawa manga koanoika, ato, “De ahao o Isiraele ma nyawa ato manga ngekomo la yotobiki o Amori ma nyawa manga tonakika ho manga hidingoto ma nyawa yahidingotoli o Amori ma nyawa manga koanoika, o Sihono, abe wogogere o Hesebono ma kotaka. De unangikaoo yomahingahu de naga o Isiraele ma nyawa manga gogahoko abe yadofangoo unangika ato, ‘Koano, ngomi o Isiraele ma nyawa mimagahoko la ngona nomihigunoa ngomi o Isiraele ma nyawa ani tonakika mihidotobiki la migila-gila mitagi-tagi to ngomi mia tonakika.’” Hokogea de manga horomati unangika yomagahoko ma koanoika.

²⁰ Masara o Sihono gea ko wangakua o Isiraele ma nyawa manga demoika ho una ai tentara watoomuino o Yahasoka de waparangi o Isiraele ma nyawaika.

²¹ Masara ko wolakua angamoi to ngomi o Isiraele ma nyawa mia Jou, Ma Jou o Yawe womiduhunu hiadono womihilaku. Ho ka de o Sihono iwihikala de to una ai tonaka ma hononga gea idadioli to ngomi o Isiraele ma nyawa mia tonaka ho o Amori ma nyawa abe yogogere ma tonakoka gea to ngomiokali mia kuahaka yogogere.

²² Abe o Kokoroongo ma akeroka ka hiadono o Yaboko ma akerika o Isiraele ma nyawa ka idadi yomahitoona ma tonaka gea. De o tonaka ma kakaahaka ka hiadono o Yorodani ma akerika enangoo idadioka o Isiraele ma nyawa manga tonaka.

²³ “Hokogea ma ade-ade ma gou-goungu la ka idadi ngona o koano nomangaratii abe gea Ma Jou o Yawe, to ngomi o Isiraele ma nyawa mia Jou, Una ko wahigunoakaua o Amori ma nyawa yapareta ma tonaka gea masara womihidoaka ngomino, ngomi o Isiraele ma nyawa. Ho done sarakia de ngona o koano nogahoko la mia tonaka kiani mihigilio ngonaika?

²⁴ Ngona napareta dika o tonaka abe ti ngini nia jou o Kamoso inihidoaka ngini o Amori ma nyawaika de ngomi o Isiraele ma nyawa miapareta o tonaka abe to ngomi mia Jou, Ma Jou o Yawe, womihidoakoka ngomino.

²⁵ Abeika, ma dihira gea o Moaba ma nyawa manga tonakoo idadioka o Isiraele ma nyawa manga tonaka. De ma oraha gea manga koano o Balaka, abe ai baba o Siporo, ko womilawanua. De sarakia, nako ngona de o koano o Balaka gea ka ngonahi nokurutiye? Sarakia o Balaka gea womihohowono wato o tonaka gea ko to ngomiua ngomi o Isiraele ma nyawa? Koua, de sarakia una womiparangi ngomino? Koua, o Moaba manga koano o Balaka gea de ngomi duru ko miokadatorua de ma tonaka gea.

²⁶ Abe naa ma deka-dekanuku o taongo o ratuhu hange ipahaika de ko iwa ma kadatoro masara ma oraha naa de ahao ngona nohipudali abe nohititi genangino la idadi hokadatoro! Ngomi o Isiraele ma nyawa abe migogere o tonakoka naa mia taongo o ratuhu hange ibooto! De mia gogere de mia kuaha o Hesebono ma kotaka ka hiadono o Aroere ma kotaika de o kapongo mata-mataika abe naga o Kokoroongo ma akere ma ngigoroka. Ho done sarakia ngini o Amono ma nyawa ma oraha ma dihira gea ka hiadono ma oraha naa de ko ma moiuahi nihitaili ma tonaka naa nihigilio.

²⁷ Ngohi, o Yefata naa, ko ma moiuahi tahowono ngonaika masara ngona, o koano, nahowonoka abe nato nohiparangi ngohi abe tahihira o Isiraele ma nyawa. Naga Ma Jou o Yawe abe ngone o nyawa mata-mataika ai kuahaka de Una wonahohowono itiai ho kiani ngone mata-mata hihigunoa la ka Una dika waputuhu onagona yolaku ma oraha homaketeparangi, o Amono ma nyawa eko o Isiraele ma nyawa.” Hokogea o Yefata ai demo o Amono ma nyawa manga koanoika.

²⁸ Masara o Yefata ai demo gea o Amono ma nyawa manga koano una duru ko wohigihenua.

O Yefata ai behehongo ma toduba ma ade-ade

²⁹ De ma oraha gea o Yefata iwilufungu de Ma Jou o Yawe ai Womaha de ahao wotagi-tagi watoomu ai tentara ho waika waino o Gileada de o Manase ma nyawa manga tonaka mata-mataika. De gea wotuluika o Misapa ma ngioka abe naga o Gileada ma tonakoka. De naga unangoka ai tentara yowoe abe watoomino la wahihira-hira ma oraha o Amono ma nyawaika yaparangi.

³⁰ De o Yefata wihibehehongo Ma Jou o Yaweika wato, “Ahi Jou tomagahoko la Ngona nomiduhunu miaparangi o Amono ma nyawa hiadono o lolaku nohihidoaka ngohino.

³¹ De ngohi tonihibehehongo ahi hidoaka Ngonaika. Abe ka de o Amono ma nyawa tahikalaka de ahao ngohi mia lolaku ma ngioka de taino de ahao tomahihuba Ngonaika ena abe ihira ahi tauino ihupu la ihibuhuku ma oraha toboa. Ho ena gea ihira ihupu ahi tauino idadi ahi huhuba iharo-harongo Ngonaiye.” Hokogea o Yefata ai behehongo ma demo Ma Jouiye.

³² Ho gea ibooto de ahao o Yefata wahihira-hira ai tentara o akere yomahihora doka ma honongaika abe genangoka o Amono ma nyawa manga tentara. De duru yaparangi onangika de Ma Jou o Yawe o Yefata ai tentara waduhunu o parangioka hiadono wihidoaka o lolaku o Yefatika.

³³ Abe o Amono ma nyawa duru wahikala ko manga ngoeholi abe o Aroere ma kotaka de ka hiadono o tonaka abe itigi o Miniti ma kota. Abe gea o kota monaoko wahikala de ka hiadono o Abele-Keramimi angamoi Ma Jou o Yawe o Amono ma nyawa wahikokidoaka o Yefata ai giamika. Hokogea o Isiraele ma nyawa duru yawedere o Amono ma nyawa manga buturungu.

³⁴ De ahao Yefata wolio de ma oraha woboa ai tauino o Misapoka de abe yohira yohupu ai tauino gea ka to una ngoi ora mibuhuku. De o Yefata ai ngofaka gea ka muna momatengo dika de naa ami baba mibuhuku de mao ami gogereenge mohiboha-boha de mohiselo-selo de ami garago ilamoko.

³⁵ Masara ka de o Yefata womimake ngoi ora abe mohupu ai tauino de gea duru wohuhaholi hiadono ai baju wakakihi. De wohidakadunu de ai hininga ma huha de wato, “Hiokoo ngohi ora! Duru itubuhoholi ngohi ani baba tamao abe ka de tonimake ngona naa nohibuhuku! De ahi huha ma titi ngonaka angamoi ahi behehongo Ma Jou o Yaweika. Ngohi o parangika ko toikuahi de tihibehehongo Unangika tato nako wohihidoaka o lolaku de ngohi tomahihuba iharo-harongo gea abe ihira ihupu ahi tauino la ihibuhuku! De ahi behehongo gea ko idadiua tahihanga.” Hokogea o Yefata ai huha ma hingahu ngoi oraika.

³⁶ De muna motemo ami babaika mato, “Baba, nako hokogea abe nohibehehongo Ma Jou o Yaweika de kiani ngona nodiai ngohino duru imaketero hoka nihibehehongoka. De angamoi ma oraha naa ma hibalaha nanga musu o Amono ma nyawaika Ma Jou o Yawe wonihidoakoka.”

³⁷ De ahao muna naga ami gogahoko, mato, “Masara ahi baba, naa moi togahoko de gea la nohihigunoa ngohi de ahi dodiawo o momoholehe miloiki o loku-lokuika o mede hinooto ma dekana la genangoka mimatingaka o nyawa utuino. De ngomi miaika miaino miari-ari ma titi ngohi naa ka o moholehohi abe ko ma moiuahi tomaidu de o nauru de kiani tohonenge.” Hokogea ngoi ora momagahoko.

³⁸ De ami baba wopaluhu, wato, “Irahai ngohi ora, ngona noiki dika nodiai hoka nogahokoka.” De womihigunoa moiki o mede hinooto ma dekana. Ho muna de ami dodiawo o momoholehe yamuruono naga yoiki o loku-lokuiye de genangoka de imigari angamoi muna ka o moholehohi de mohonenge de ami rokata de ami ngofaka ko iwahi.

³⁹ De manga mede hinooto ipaha de ahao muna molio ami babaika de una wodiai munangika duru imaketero abe wohibehehongoka Ma Jouika. Muna o moholehe abe ko ma moiuahi yomakitigi de o nauru de mohonengoka. Ho ma titi gea o Isiraele ma nyawa naga manga hohininga abe ahao ka ihikaika yodiai.

⁴⁰ De manga hohininga yodiai hokonaa, o tao-taongiye o Isiraele ma nyawa manga momoholehe yohupu ma hoanika de manga wange iatino ma dekana la yomahohininga o Yefata ngoi ora ami dubuho abe imidaene munangika. Muna o Isiraele ma nyawa abe manga dutu adaene o Gileada ma nyawaika.