Hihira 10 - Ma Jou ai Demo-demo o Totobelohoka

O Pasala 10 ko atailakouahi O Tola Ma Jou wihidadi manga hihira o Isiraeloka

¹ De ipahaino abe o Abimeleke wopahaka de ahao naga womatengo o Isakara manga dutuino abe ai romanga o Tola. De unangoli gea wodadi o Isiraeloka manga hihira la wahihupu manga musu manga giamoka de aino. De to una ai baba o Pua, de to una ai ete o Dodo. De una wogogere o Samiri ma kapongoka abe imanoa o Efaraimi ma loku-lokuoka.

² Ho una wahihira o Isiraele ma nyawa ai taongo monaoko de hange ma dekanino de ahao una wohonenge. De wopahaka de iwilungunu ai kapongo o Samiroka.

O Yairi Ma Jou wihidadi manga hihira o Isiraeloka

³ De ipahaino abe o Tola wopahaka de ahao naga womatengo o Gileada ma tonakoka abe ai romanga o Yairi. De unangoli gea wodadi o Isiraeloka manga hihira, ho una wahihira o Isiraele ma nyawa ai taongo monaoko de hinooto ma dekanino.

⁴ De o Yairi gea naga ai ngofaka o nauru yamoruange abe ona homoi-homoi yotobafarene o keledai ma oraha yotagi-tagi aika aino. De ai ngofaka gea onangoo homoi-homoi yahiboripareta o kota moruange o Gileada ma tonakoka. De ma kota moruange gea o nyawa ihiromanga enangika ka ma moi ato o Yairi ma / ai kota-kota. De ngaro hiadono ma oraha naa abe tohitulihuku ma ade-ade masara ma kota gea ka ihiromangohi o Yairi ma / ai kota-kota.

⁵ De ipahaino abe ma oraha o Yairi wohonenge de iwilungunu o Kamono ma kapongoka.

O Amono de o Filistina ma nyawa yahikangela o Isiraelika

⁶ De ipahaino de o Isiraele ma nyawa ma moioli yodiai itorou Ma Jou o Yawe ai himangoka. Abe ona yomahuba-huba o jou-jou ma homoaika. Ho gea naga o homoa ma nyawa o Siria de o Sidono de o Moaba de o Amono de o Filistina, de to ona mata-mata manga jou-jouika o Isiraele ma nyawa yomahuba-huba enangika. De nagali o Baala de o ngo Asitorete abe enangikaoo yomahuba-huba. Ho ona duru iwiporete Ma Jou o Yaweika de ko yomahubakaua Unangika.

⁷ De mangale ma titi manga datoro gea ho Una duru wangamo ai nyawaika hiadono wahidoaka ona o Filistina de o Amono ma nyawa manga kuahaika.

⁸ De ma oraha gea naga o Isiraele ma nyawa abe yogogere o Gileada ma tonakoka, de gea doka o Yorodani ma akere ma honongaika o Amori ma nyawa manga tonakoka. Ho gea de ahao o Filistina de o Amono ma nyawa ona duru yahikangela o Isiraele ma nyawaika gea, de ka hokogea dika igila-gila o taongo ngimoi de tufange ma dekanino.

⁹ De o Amono ma nyawa ona yomahihora o Yorodani ma akere ma honongaika la yomakalawanoo de o Yehuda de o Benyamini de o Efaraimi manga dutu-dutuika. Ho o Isiraele ma nyawa ma oraha gea de manga wowangoka duru yokangelaka.

¹⁰ De mangale ma titi duru yokangelaka ho ipahaino de ona duru yomagaho-gahoko o duduhunu Ma Jou o Yaweika ato, “Ngomi naa duru miahowonoka. Abe ngomi miniporete Ngona la ka idadi mimahijou utuika, de gea mimahuba-huba o Baala ma popangaoika.”

¹¹ De Una wapaluhu onangika wato, “Sarakia, bote ngini naa ko niohiningakaua ma oraha tiniduhunu o nyawa manga ngoe manga giama homoi-homoiino? Abe ma dihiraino de ngaro o Mesiiri ma nyawa de abe o Amorioka de o Amono de o Filistina,

¹² de o Sidono de o Amaleke de o Midianoka, masara ona mata-mata naga ma oraha abe inihikangela nginika. De gea nia kangela ma gogiriaka de ngini nimagaho-gahoko o duduhunu Ngohino, de ahao Ngohi naa tinipaluhu de tinihihupu manga kuaha homoi-homoiino.

¹³ De ngaro hokogea tohigali-galioli tiniduhunu masara naa de nihiporetoli de nimahuba-huba o jou ma homoaika. Ho ibooto! Ngohi naa ko tiniduhunokaua!

¹⁴ Ho abeika ngini niloiki enangika dika abe nimangiirikoka de abe nimahijou enangika la o duduhunu nimagaho-gahoko! De ahao hamake nako ena gea iniduhunu nia kangelaka de aino!” Hokogea Ma Jou duru wahiree-reeika onangika.

¹⁵ De ona yoihene ai demoino de iwipaluhu Ma Jou o Yaweika ato, “Koua, ufa hokogea nodiai! Ngona ani demoino de duru nagoungu abe ngomi naa miahowonoka. Ho mimagahoko la Ngona nomihohowono abe hokokia dika itaana de ani hininga. Masara iti o wange naa dika de Ngona nomiduhunu de nomihihupu mia musu manga giamoka de aino!”

¹⁶ De gea yomagahoko ipaha de ahao ona mata-mata ka yaumo dika manga popangao de ma moioli yomahuba-huba Ma Jou o Yaweika. Ho ma bahauku de Una wamake abe manga hininga ma huha duru ilamokoholi, ho to Una ai dora ma hiokoo itagiokali onangika.

¹⁷ De ma oraha gea o Amono ma nyawa manga tentara yomatoomuino de yomahidiai la yomaketeparangi de o Isiraele ma nyawa. Ho o Amono ma nyawa manga doomu ma ngi naga o Gileada ma tonakoka, de o Isiraele ma nyawa onangoo yomatoomuino o Gileada ma tonakoka, abe manga doomu ma ngi abe o Misapa ma kapongoka.

¹⁸ De ahao o Isiraele ma nyawa manga hihira abe o Gileadino yoboa, ona yomakeleha ato, “Ho naa onaguna yotomoroini la wonahihira ma oraha hoaguru de halawana o Amono ma nyawaika? Abe onaguna dika inahihira, ahao nanga kangela naa ipahaikahi de una gea higoraka la wahipareta o Gileada ma nyawa mata-mataika!” Hokogea manga higaro ma demo.