Hihira 1 - Ma Jou ai Demo-demo o Totobelohoka

O Pasala 1 ko atailakouahi O Isiraele ma nyawa yogila-gila yaparangi o Kanani ma nyawaika

¹ Abe ma oraha o Yosua wopahaka de ahao o Isiraele ma nyawa iwileha Ma Jou o Yaweika ato, “Koaho onagona ngomioka abe irahai yohiraika la yoiki yabaata o Kanani ma nyawaika gea?”

² De Una wapaluhu onangika wato, “Kiani nia gogianongoru o Yehuda ma dutuoka ona yabaatika, angamoi Ngohi ahao tahidoaka o lolaku onangika. Ho o Kanani manga tonaka tahidoaka to ona manga giamika.”

³ De ipaha o Yehuda manga nau-nauru yoiki manga gogianongoru o Simeono ma nyawaika de yahoko la ato ka idadi yomakokiniiki yomakuduhunu yaparangi. Abe ona yahoko ato, “Irahai la nginioo niminiiki la homakuduhunu haparangi o Kanani ma nyawaika gea abe yomanoa ma tonakoka gea abe ahao idadi to ngomi mia tonaka. De hahikala ibooto de ahao hogila-gila ma tonakika gea abe ahao idadi ti ngini nia oara ma tonaka de genangokaoo homakokiniiki de habaata ma nyawaika gea ka hiadono hahikala onangika.” De o Simeono manga nau-nauru yosanangi o Yehuda manga demoika ho ka ma moi yomakiniiki yokokisobo.

⁴ De ahao ma oraha o Yehuda ma nyawa ona yoiki yabaata o Kanani de o Ferisi ma nyawaika de Ma Jou o Yawe wahidoaka o lolaku onangika. De abe o Beseke ma kapongoka de yahohonenge manga musu yasana ngimoi.

⁵ De gea manga parangi ma gogiriaka de yomakamake de manga koano abe iwiahoko o Adoni-Beseke. De ngaro yahikala manga musuika o Kanani de o Ferisi ma nyawaika,

⁶ masara manga koano gea ka idadi woara ma homoaika. Masara ko itedekanuahi de o Isiraele ma nyawa iwimakeoli de iwitaokino. De iwitaoko ipaha de ma koano gea ai hagaraara ma ayo abe ai giamoka de ai louokaoo gea yafoko ho yahikatingaka ai badangoka de aino.

⁷ De iwidiai hokogea ipaha de ma koano gea wotemo wato, “Igoungu ma dihiraino de ma moiokau ngohi tahuloko ahi nyawa la o kokoano manga hagaraara ma ayo manga giamoka de manga louoka yafokoka. Abe naga o koano yamoritumidi ngohi tataokinoka de duru hokogea tadiai onangika, de gea ipaha de ona kiani yolomo o inomo ma hou-hou dika abe ioatakuku ahi mejaka de auku. Ho naa duru itararono ngohino abe Ma Jou wohihibalaha ahi datoro gea.” De ahao ona iwiao ma koano gea o Yerusaleeme ma kotaika, de ipahaino de una wohonenge genangoka.

⁸ De ahao o Yehuda ma nau-nauru ona yogila-gila yoiki o Yerusaleeme ma kotaika de yabaata onangika gea. De duru yahikala ma kotaika, abe ma nyawa mata-mata yakokihohonenge de ma kota yatufuku.

⁹ De genangoka yosobo de yoikoli dakuiye la ka idadi yaparangi o Kanani ma nyawa utuoli abe yogogere o loku-lokuoka de o Negebe ma tonaka ma kakaahaka de o loku-loku ma timi-timiuku.

¹⁰ Ho ona yomahiadoniye de yaparangi o Kanani ma nyawaika abe yogogere o Heborono ma kotaika, abe ma dihiraino ihiromanga ma kota gea ato o Kiriata -Aba. De genangoka yahohonenge manga musu manga hihira o Sesai de o Ahimana de o Tamai ka ma moi de manga tentara mata-mataika.

¹¹ De yahikala onangika ibooto de ahao yogila-gila yoiki o Debiri ma kotaika la yabaata onangikali. De o Debiri ma kota ma dihiraino de ihiromanga enangika o Kiriata-Sefere.

¹² De genangoka abe o Kalebe wahibehehongo ai tentara ma nyawaika wato, “Onagona dika nginioka abe ka idadi niahihira nia gogianongoru la niabaata de hiadono niahikala o Kiriata-Seferika, unangika gea ahao tomihidoaka ngohi ora o ngo Akasa la modadi to una ngoi fekata.” Hokogea o Kalebe ai behehongo ma demo.

¹³ De ipahaino naga womatengo ai romanga o Otiniele abe una o Kalebe ai dodoto o Kenasa ai ngofaka. De o Otiniele una gea abe wakunu wahikala ma kota gea, ho igoungu o Kalebe ngoi ora modadi to una ngoi fekata.

¹⁴ De ona yahinooto yoilaka ipahaino de naga ma oraha abe muna moboa ami rokatino de duru mihigaro mato, “Abeika ngone hoiki hitutumu ahi babaika de ngona nomagahoko la una wonahidoaka o redi ma tonaka ngoneino. Ho ipahaino yomahiadono ami baba ai ngiika de muna mouti ami keledai ma poretoka de mauku. De ami baba o Kalebe womimake de woleha wato, “Marai naga abe ngona noigo nomagahoko ngohino?”

¹⁵ De muna mipaluhu unangika mato, “Iya, ahi baba, marai ngohi tomagahoko o hadia moi. Abe mangale ma titi ma dihiraino ngona nohihidoakoka o tonaka moi abe imanoa o Negebe ma tonaka ma kakaahaka, ho naa tomagahoko la o akere ma jobuubuoo nohihidoaka.” De ami gogahoko gea wohimoteke ho womihidoaka ma jobuubu hinooto, abe moi imanoa o tonaka ma dolaka de moioli imanoa hatoli o loku ma geleforino.

¹⁶ De ipahaino naga ma oraha abe o Yehuda ma nyawa yosobo o Yeriko ma kotaka la yoiki manga oara ma tonakika. De o Yeriko ma kota gea naga ma romanga moioli angamoi o nyawa utu yamake o biso ma ngoe iwangoiye genangoka ho yofetongo ato o biso ma kota. De ma oraha o Yehuda ma nyawa yosobo de o Keni ma nyawa yomakiniiki de de ona, abe o Keni ma nyawa gea o Musa ai toroa ai totoforauku. Ho ona mata-mata yomakokiniiki o Yehuda ma tonaka ma kakaahaika de ahao yomahisapuru de o nyawa genangoka ho yomanoa manga hidogoronaka. De manga gogere ma hungi gea o Negebe ma tonakoka abe o Arada ma kapongo ma honongaka.

¹⁷ De ipahaino de o Yehuda ma nyawa de manga gogianongoru o Simeono ma nyawa yomakokiniiki la yaparangi o Kanani ma nyawaika abe yogogere o Sefata ma kotaka. De gea ka idadi ona duru yahikala de hiadono yahibinaaha ma kotaika gea. Ho ma oraha gea de ihiromangoli ma kotaika abe ma romanga ma hungi ato o Hibinaaha. De nako to ona manga demo gea yofetongo ato o Horama.

¹⁸ De ma tonakoka gea nagali ma kota abe ihiromanga o Gasa de o Asekelono de o Ekono, de o Yehuda ma nyawa ona yataoko ma kota-kota enangoo de to ena ma tonaka homoi-homoi.

O Isiraele ma nyawa manga lolaku o Kanani ma tonakoka ko ingodumua

¹⁹ De ma oraha gea Ma Jou o Yawe Una naga de de o Yehuda ma nyawa gea de waduhunu la ka idadi yahikala o nyawa abe o loku-lokuoka de manga tonaka gea ka idadi yomahitoona. Masara o Yehuda ma nyawa ko akunua yahikala o nyawa abe yogogere o tonaka ma dola-dolaka, angamoi ma nyawa gea naga de manga goroba parangi. De manga goroba gea duru irahai, abe naga ma roda yodiai o behino.

²⁰ De abe ma dihiraino o Musa wotemoka wato kiani o Heborono ma kota iwihidoaka o Kalebika, ho gea iwihidoaka la yaniiki o Musa ai huhuloko ma dihiraino gea. De naga o Anaka ai totoforauku yaruange de manga tau yogogere genangoka, ho ipahaino de o Kalebe yakiniiki ona gea la womahitouna manga kota de manga tonaka gea.

²¹ Masara nako o Benyamini ma nyawa ma oraha yowohama manga tonaka ma hungi ma goronaika, ona ko yakiniikua o Yebusi ma nyawa abe yogogere o Yerusaleeme ma kotaka. Ho ngaro ka hiadono ma oraha naa naga abe tohitulihuku manga ade-ade masara o Yebusi ma nyawa nagahi o Yerusaleeme ma kotaka de yomahisapurino de o Benyamini ma nyawa genangoka.

²² De nako o Yusupu ai totoforauku, abe ma titi o Manase ma dutu de o Efaraimi ma dutu, ma oraha ona yabaata o Betele ma kotaika de Ma Jou o Yawe Una naga onangoka de waduhunu.

²³ De o Betele ma kota gea, ma dihiraino de o nyawa ihiromanga enangika ato o Luusu. Ho ma oraha o Yusupu ai totoforauku yatotailako ma kota la ka idadi yabaata enangika,

²⁴ naga womatengo o nauru iwimake wohupu ma kotaka de waino. De ona yoiki unangika de iwitemo ato, “Nako ngona nomihimatoko o ngekomo moi abe ka idadi mianiiki la mimatohi-tohiki miongohama ma kota naa ma goronaika, gea ahao minihidoaka o hadia moi ngonaika.”

²⁵ De manga demo gea woihene ho una wahimatoko ma ngekomo la ka idadi yomatohiki yangohama ma kota ma goronaika. De ahao igoungu ona yangohama de yahohonenge ma kota ma nyawa mata-mataika. Masara nako ma nauru gea de to una ai tau mata-mata, ona yahigunoa la yosobo o ngi moiikali de ko kia-kiaua idadi onangika.

²⁶ Ho una de ai tau yomaturuuru o Hete ma nyawa manga tonakika, de genangoka wohigoko o kota moi de wohiromanga enangika wato o Luusu la imakiniiki de ai kota ma dihiraino ma romanga. De ka hiadono ma oraha naa naga abe tohitulihuku ma ade-ade de ma kota gea nagahi ma romanga o Luusu.

²⁷ De nako o Manase ma nyawa manga tonakoka, ona ko yahikalaua ma kota-kota abe ma romanga o Bete-Seana de o Tanaka de o Doro de o Yibileama de o Megido. De ngaro ma kapo-kapongo abe naga ma kota gea ma digi-digino masara enangoo o Manase ma nyawa ko yahikalaua. Angamoi o Kanani ma nyawa abe yogogere manga ngi homoi-homoioka gea duru yomaribuutu la ka idadiohi yomanoa manga ngioka.

²⁸ De ipahaino abe ma oraha o Isiraele ma nyawa manga kuaha idogo ilamoko de ka idadi yaribuutu o Kanani ma nyawa gea la yodadi manga gogilaongo, masara ko yakiniikua manga tonakoka de yaino.

²⁹ De nako o Efaraimi ma nyawa manga tonakoka, ona ko yahikalaua o Kanani ma nyawa abe yogogere o Gesere ma kotaka. Ho o Kanani ma nyawa nagahi o Gesere ma kotaka de yomahisapurino de o Efaraimi ma nyawa genangoka.

³⁰ De nako o Sebulunu ma nyawa manga tonakoka de ko yahikalaua o Kanani ma nyawa abe yogogere o Kitirono de o Nahalolo ma kota-kotaka, ho ona mata-mata yomahisapurino genangoka. Masara o Sebulunu ma nyawa ka idadi yaribuutu onangika la yodadi manga gogilaongo ho manga karajaanga duru itubuho.

³¹ De nako o Asere ma nyawa manga tonakoka de ko yahikalaua o Kanani ma nyawa abe yogogere o kota murunoka. De ma kota gea ma roma-romanga o Ako de o Sidono de o Alaba de o Akasibi de o Heba de o Afeke de o Rehobo.

³² Ho ma ngi homoi-homoioka gea de o Asere ma nyawa ka yomahisapurino yogogere de o Kanani ma nyawa angamoi ko yakiniikua manga tonakoka de yaino.

³³ De nako o Nafatali ma nyawa manga tonakoka de ko yahikalaua o Kanani ma nyawa abe yogogere o Bete-Semese de o Bete-Anata ma kota-kotaka, ho ona mata-mata yomahisapurino genangoka. Masara o Nafatali ma nyawa ka idadi yaribuutu onangika la yodadi manga gogilaongo ho manga karajaanga duru itubuho.

^34-35 De nako o Daana ma nyawa manga tonakoka ona duru yokangela yomahitoona ma tonaka abe ihikodoku onangika. Angamoi naga o Amori ma nyawa genangoka abe duru yomaribuutu yomadatoko manga ngi-ngi o tonaka ma dolaka abe ma romanga o Ayalono de o Sabimi de o Herese ma lokuoka. Ho ona yomaketeribuutu de o Daana ma nyawa de duru yalawana ka hiadono o Daana ma nyawa kiani yomadohuku manga poretoko de ka yolio daku o loku-lokuiye de yomanoa dakenangoka. Masara ipahaino abe ma oraha manga gogianongoru o Yusupu ai totoforauku manga kuaha idogo ilamoko de yoboa la yomakuduhunu. Ho gea de ahao ka idadi yaribuutu o Amori ma nyawa gea la yodadi manga gogilaongo.

³⁶ De o Amori ma nyawa gea manga tonaka ma batingi naga dau o Sela ma honongauku, abe aniiki o Waitota ma geleforino de ka igila-gilahi dakuiyeoli.