Higiriiri 95 - Ma Jou ai Demo-demo o Totobelohoka

Hihigiriiri nanga Koanoika abe ka Unangohi Wokokurutiye

¹ Abeika niaino la ngone honyanyi Ma Jou o Yaweika ma titi nanga gogarago! Irahai nanga higiriiri haamo-amokiye nanga lokuhakaruika, abe Una gea nanga dadatoko de nanga Duduhunu!

² Hokokiboa to Una ai himangino la nanga tarimakase hohinyanyi Unangika, de nanga higiriiri ma nyanyiangino ka idadi hohirame-rame Unangoka!

³ Angamoi to ngone nanga Jou o Yawe Una gea duru wokokurutiye, abe ngaro de o jou mata-mataika masara ka Unangohi woloku-loku mangale Una duru wahikoano mata-mataika.

⁴ Abe o dunia ma amokika naga to Una ai giamoka, ngaro ma haara ma gogurutuku de ma loku ma tubu duru ikokurutiye, masara gea mata-mata Una dika wahipareta.

⁵ De ngaro o gahi ma ngooto ma enangoo to Una dika angamoi Una watobatulaada, de to Una ai giamino wapake la o tonaka ma dudungu wohidadi.

⁶ Ho abeika niainohi la ngone homaponuku to Una gea ai himangoka, de hatilabukuku Ma Jou o Yaweoka abe Una wonatulaada ngone, la ka idadi homahuba-huba Unangika!