Higiriiri 91 - Ma Jou ai Demo-demo o Totobelohoka

91:1-16 ko atailakouahi Ma Jou duru waduhunu o nyawaika abe iwitobanii-niiki Unangika

¹ Koaho ngini nimahitatoko Ma Jou Wokokurutiye ai timiuku, de irahai la ngini nimanoa Una Wokokurutiye ai fofongoka.

² Abe nako Unangoka nimanoa ahao ka idadi nitemo o Yaweika niato, “Ngona nodadioka ahi dadatoko ma ngi abe genangoka duru ko idadiua o bodito ihihikala! Ngona duru de ani bobuturungoka, ho ngohi ka idadi tomahitatoko Ngonaka! Ho ka Ngonaika dika tomahinganono, ahi Jou!”

³ De igoungu Una gea ahao winiduhunu ngaro o nyawa ato inihidiliko de manga modoi, de ngaro o gogama imahora-hora arihononga masara Una ka wakunu winidatoko.

⁴ De Una ahao winigoana ngini abe hoka o totaleo ma mayo yogoana ma ngofaka, ho ai gafuufu ma timiuku gea de ko kia-kiaua idadi nginika. Abe Una watobagou-goungu wagoana ai nyawaika, de ai gogoana gea imaketero hoka o dadatoko moi, de hoka o dadaduhu abe duru iputurungu.

⁵ Ho ngini ngaro ufa dika o futu-futuoka de nihawana ma titi o bodito. De nako o wange-wange ngaro ufa nihawana o hihiipi abe nia musu inihitoimi nginika.

⁶ De ngaro o panyake abe inigogataheke o fufutuoka eko ma oraha o wange ikorona, masara gea ngaro ufa ngini nihawana enangika.

⁷ De nako o parangi ma goronaka de naga yasana moi yobodito ani datekoka, de ngaro ko manga ngoe yoruba ani arihonongaka, masara o bodito gea ko inihidotadaenua.

⁸ De ngini ahao niamake abe o dorou ma nyawa yamake manga hohowono, angamoi ahao Una wahibalaha onangika de gea ngini niamake de ti ngini nia lako hinooto.

⁹ Ho mangale ma titi ngini nimanoa Ma Jou Wokokurutiyeoka, abe Una o Yawe to ngohioo ahi dadatoko ma ngi,

¹⁰ ho ko kia-kiaua o bodito inidaene, de o panyake ko inidiginoua nia tauino.

¹¹ Angamoi Una wahuloko ai momalaekatika la initobagoa-goana nia dodagioka,

¹² ho gea imaketero hoka initoo-totirino, la ufa nia lou ipeleke o hakaruika.

¹³ De abe ma oraha nimarihimanga de o singa eko de o dodiha ma biha, masara ka idadi niadoko dika ho niahikala enangika.

¹⁴ Abe Ma Jou o Yawe womahingahu wato, “Mangale ma titi ona naa manga hininga itagi ka Ngohino dika, ho Ngohi ka idadi taduhunu onangika ma titi ihitobaniiki Ngohino.

¹⁵ De ma oraha o duduhunu yomagahoko de Ngohi totoihene ho taduhunu. De manga kangela ma goronaka de Ngohi naga onangoka tagoana, ho gea taduhunu la hiadono ona yolaku de ahao naga o horomati yamake utuino.

¹⁶ De to ona gea manga hininga tahisanangi abe manga wowango ma guru-gurutu tahidoaka onangika, de nagali tahimatoko onangika ahi duduhunu ma kuaha manga wowangoka.” De hokogea Ma Jou o Yawe womahingahu abe ma titi hokokia waduhunu o nyawa abe iwitobanii-niiki Unangika.