Higiriiri 82 - Ma Jou ai Demo-demo o Totobelohoka

82:1-8 ko atailakouahi Ma Jou watailako de waurusu o jou-jou utu

¹ Ma Jou naga womaokoino o Horoga ma dodoomuoka, de gea waurusu o jou-jou utu abe yomatoomuino genangoka.

² Ho Una watemo o jou-jouika gea wato, “Done hokokiahi ma dekana abe ngini ka niaduhunohi o dorou ma nyawaika? Abe ti ngini nia putuhu ko itaanua ma oraha niaurusu o nyawaika!

³ Masara koaho ngini niademo ona abe yohu-huha de o gohihi. De abe o nyawa yahikangela hiadono ko kia-kiaua yadaene, irahai niaputuhu la manga hibalaha ma totiai yamake.

⁴ De koaho niaduhunu ona abe yohuha hiadono duru de manga kurangoka, abe irahai ona gea niahihupu o dorou ma nyawa manga giamino!”

⁵ De ahao Ma Jou ka wotemohi ma titi o jou-jou utu gea, wato, “Ona duru ko kia-kiaua yataoko itiai, ho imaketero ka ihikaika yohuruputu angamoi o fufutu dika yatobaniiki. De mangale ma titi manga hininga gea hiadono o dunia ma amokika de hoka ihikelu-keluoka, abe ma titi o totiai ko ilakuokaua o duniaka.”

⁶ De ahao naga Ma Jou ai putuhu abe wahohowono onangika wato, “Ngohi tato ngini igoungu o jou-jou, abe ngini mata-mata duru de nia kuahaka.

⁷ Masara ngaro hokogea ahao naga nia gahe, de ma oraha gea ngini ahao nihonenge dika abe imaketero hoka o nyawali yohonenge. De abe hoka o balu-baluhu utu mata-mata, ho nginioli nia wowango de ma batingoka.”

⁸ De ipaha naga abe yopaluhu de iwihigaro Ma Jouika, ato, “Irahai Ngona nowangoro de noaguru, mia Jou, la ka idadi natailako de naurusu o dunia ma amokika. Angamoi igoungu o dutu mata-mata o duniaka to Ngona dika ani nyawa.”