Higiriiri 51 - Ma Jou ai Demo-demo o Totobelohoka

O Hitararono ma hidogo O Koano o Dautu womagahoko Ma Jouiye la wihitebini ai howo-howonino

¹ Ngohi naa tomagahoko Ngonaika Ma Jou la nomalega ngohino de ani dora ma hiokoo, Tomagahoko la Ngona naniiki to Ngona ani dora abe duru ko itoa-toakua, Ahi howono Ngonaika ma ngoe masara ani dora ma hiokoohi duru ilamoko, Ho gea ena Ma Jou napake la ahi howono gea nohiapongo.

² Ahi howono duru idadioka imaketero de o noda to ngohi ahi wowangoka, Ho imaketero hoka o pakeanga yonodaka kiani duru homaboka, De ka hiadono ma noda gea ihihanga la ma pakeanga idadiokali iarehe, Hokogea tomagahoko la Ngona nohihitebini ahi howonino, Ma Jou!

³ Ngohi duru tomangaku mata-mata abe to Ngona ani pareta tatilakurokau. De ahi howono gea ihihimaleke hidutu o wange de o futu tomahihohininga.

⁴ De angamoi tahowono Ngonaika, duru nomatengoika ngohi tahowonoka. Ani himangoka Ma Jou, ngohi todiaioka abe duru itorouholi. De ahao Ngona Ma Jou nomahitaana abe Ngona duru nototiai, Abe ani hohowono ma demo ngohino duru itaana.

⁵ Abeika o duniaka naa ngohi tomaboa o howono ma nyawaino, Ho ka de Ngona nohihidadi ngohi meme ami pokoroka, De ngohi todadi o howono ma nyawa ami ngofaka ma ngi ma goronaka.

⁶ Masara ngaro hokogea tomaboa Ngona noigo la ufa tomahipongono, To Ngona ani mau la ahi hiningaka ma gou-goungu dika itagi. Ngona noigo nohidotoko la naga o sosawaro ahi badanga ma goronaka, Ka hiadono ngohi tososawaro tomahiaturu ahi wowango ma datoroka.

⁷ Duru tomatoduba de tonganono la Ngona Ma Jou nohihitebini ahi howonino, Ngaro de o huhuba ma awunu napake la ahi peseke nohihihanga. Nohihiohiki ngohi hoka ona abe yapado nahitebini manga panyakeino, De ahao to ngohi ahi medebini imaketero hoka o gotoaka ma gogo ma magarehe.

⁸ Duru tomagahoko nodiai ngohino la ahi garago ilio hoka ma dihirali, Ahi kangela naa imaketero hoka naga ahi kobongo abe natobi-tobikoka. Ho duru tomagahoko la Ngona nohihihupu ahi kangelaino naa, Ka hiadono ahi hininga iomanga de o sosanangi de ahi garago tohinyanyi.

⁹ Ngohi duru ko tapoaua Ngona ka ihikaika nomalega ahi howonika, Ho tomagahoko la ahi howono ma noda ahi wowangoka naofioka.

¹⁰ Ahi Jou! Ngohi ahi hininga de ma pesekoka ho ngohi duru tomatoduba, De tomagahoko la nokarajaanga ahi hiningaka hiadono duru itebinoka, Ka idadi Ngona ahi hininga naturuuru de o hininga ma hungi ahi wowangoka.

¹¹ Ufa Ngona nohihihupu ani himangino hiadono homakitingaka ma gurutika, De ahi Jou, ufa Ma Jou o Womaha nihitingaka ngohino.

¹² Ngonaino dika tamake ani duduhunu abe ihihihohe ahi howo-howonino, Nohiduhunu ahi howo-howonino, la ahi gogarago nohigilio ngohino. De nokarajaanga ahi hiningaka la ka ihikaika ihimagawe tonihingounu Ngonaika.

¹³ De ahao ngohi tomagawe taduhunu o howo-howono ma nyawaika, Ngona nohihidumutu o wowango ma datoro itotiai ma ngekomo, De ngohi duru toigo la ani ngekomo gea tadotoko o howo-howono ma nyawaika.

¹⁴ Ngona dika Ma Jou abe ka idadi nohiduhunu ahi howo-howonino! Ngohi itiai Ngona nohihohowono de o hone-honenge, Masara de ahi toduba tomagahoko Ngona Ma Jouika la ahi hohowono gea naofi, De ahao ngohi duru de ahi garago tohinyanyi ma titi Ngona nohihiapongoka.

¹⁵ Abe nako ahi howono nagahi de ahi uru hoka ihidukusioka. Ma, ka de Ngona Ma Jou nohihiapongo de idadioka ahi uru nafelengakali, De ngohi duru tonihigiriiri ma titi ahi howono gea ko nolegaikakaua.

¹⁶ Ngohi ka idadi toboa ani himangino de ahi huhuba ma ngoe, Masara ko idadiua tonihisanangi de o huhuba ma rupa gea, Ngaro tomahihuba ahi huhuba iharo-harongo masara ena gea ko nadafongua.

¹⁷ Masara o huhuba moioli abe Ngona Ma Jou duru nodafongo, Abe o huhuba noigo gea o nyawa manga hininga ma dodipokouku, Ona abe yamao manga hininga iwederoka ma titi manga howono Ngonaika, De yoigo yotoba ho manga hiningaka duru yoigo yoporete manga howonika. O nyawa abe manga hininga hokogea Ngona Ma Jou ko naporetikaua. Ma oraha o Dautu wotulihi o nyanyianga naa de o Yerusaleeme ma kota duru irahai de o kota ma dadaduhu ma gahumohi ho marai o taongo iratuhu ipopaha de ahao naga o Isiraele ma nyawa ihidogo o ayata 18 de 19 abe ma titi o Yerusaleeme ma kota ma dadaduhu irusakoka. Homahihohininga abe ahao ma oraha ipaha o Isiraele ma nyawa manga Jou iwiporetika de yomahuba o popangaoika ho Ma Jou o Yawe wahihupu manga tonakino de o Babele ma nyawa duru yahirusaka o Yerusaleeme ma kota de ma dadaduhu yakilianga. Ho o taongo moritumidi ipaha de manga hohowono ibooto de Ma Jou wohiaturu la ka idadi yolio manga tonakika. De manga hininga hoka o Dautoli ai hiningali ma oraha wotoba ai howonino abe onangoo yomangaku manga howono Ma Jouika de yapake o Dautu ai higiriiri ma nyanyianga naa de yodogo manga nganganono o duduhunu Ma Jouino la ka idadi manga kota o Yerusaleeme yodiai la duru irahaioli hoka ma dihirali.

O Hitararono ma hidogo abe ma titi o ayata 18 de 19

¹⁸ Ma Jou, kiani nomalega o Siono ma lokuika de ani dora ma hiokoo, Genangoka o Yerusaleeme ma kota masara ma dadaduhu irusakoka, Irahai Ngona nohigokokali o Yerusaleeme ma dadaduhu gea.

¹⁹ De ahao ka idadi to Ngona ani nyawa inihisanangi de manga huhuba, Ngomi ka idadi ka ihikaika miboa ani himangino de mia huhuba itotiai. Ngomi miboa mimahihuba o huhuba iharo-harongo Ngona Ma Jouiye, De naga o hapi ma nauru ma ngoe mimahihuba la minihisanangi, Ma oraha o hapi gea mihidaulu ani haro-harongo ma huhuba ma ngi ma lokuoka.