Higiriiri 37 - Ma Jou ai Demo-demo o Totobelohoka

O Dautu ai higiriiri ma nyanyianga ma titi Ma Jou wonahiutumu itiai

¹ Ngini ufa nia hininga ma miriidi ihihanga abe ma titi ona yodiai itotorou, De ufa niataleana onangika ma titi yamake manga utumu manga howonino.

² De angamoi ona gea hoka o ruruubu dika abe imoraa. De ka hiadono itoolenge de ahao iwedere de ko iwaka. Ona gea hoka o bunga-bunga abe de ma oraha ma huri ihohe, De o wange muruono dika ikororomo de ahao ko iwaka.

³ Kiani nimahinganono Ma Jou o Yaweika de nidiai ma rorahai, La gea niwango nisosanangi de nia gogere iriidi nia tonakoka,

⁴ Abe nako ka ihikaika niwidogarago Ma Jou o Yaweika, De Una ahao winihidoaka nginika ena gea abe duru nioigo.

⁵ De o kia dika nidiai de nidiai la ma dumutu Ma Jou o Yaweika. Abe iti ngini niwingaku Unangika de nia hininga ma gahumu, De duru Una woigo winiduhunu de o kia dika nidiai.

⁶ De ngaro o nyawa utu initae ato ngini nidiai ihowono, Masara Ma Jou de ahao ngini winihitaana abe ngini ko niahowonua. Angamoi nidiai de ma dumutu Unangika ho wosanangi enangika. Ma Jou wahiree-reeika wahitararono onangika abe nia howono ko iwa, Imaketero hoka o wange ma dararono yodararonuku o wange ikorona.

⁷ Ngini niriidi Ma Jou o Yawe ai himangoka de kiani nimatongohono, Ka hiadono ma oraha nia gogahoko wopaluhu. De ufa nihuha nako o nyawa utu manga kaya idogo-dogo, Ngaro to ona manga wowangoka yodiai itorou. De igoungu naga o nyawa abe de manga hidee ko itiaiua, Abe ma dumutu ka ihikaika ma dorouika dika, Masara ufa hiadono nia hininga ihuha ma titi ona gea.

⁸ De ngini ufa nimahigunoa la nia ngamo ifae! De ngaro nia dohata naga masara kiani nimangali genangino, De o daleana ufa nihigunoa inihipareta, Abe o daleana ahao iniao o howono ma hiningaika.

⁹ De abeika, ona abe yotobadiai itotorou ahao yahibinaahaka, Masara ona abe iwingaku Ma Jou o Yaweika ko yobinaahaua, De to ona manga tonaka yamake abe ka idadi yoriidi genangoka.

¹⁰ Ho ona yotobadiai itotorou ko itedekanua de yahihangoka, Ho ngaro ngini nialingiri ma ona ko niamakeua, yamataka.

¹¹ Masara ona abe manga hininga yomahitipokouku youtumu, Ona yamake manga tonaka abe ka idadi yoriidi genangoka. De yomahisanangi de manga hasili ilamoko de ma ijaoo ilamoko.

¹² Masara yotobadiai itotorou gea yadohata onangika, Angamoi ko yaigoua onangika abe manga datoro imakiniiki de Ma Jou ai mau. De manga dohata ihihanguru onangika abe manga wowango itiai.

¹³ Masara Ma Jou o Yawe ona wamake manga lawana ma hideeika, De Una ka wagiete dika angamoi wamakeoo abe ahao yadaene, Angamoi ma oraha naga abe manga hohowono ahao iboa onangika.

¹⁴ Ona yotobadiai itotorou manga humaranga de manga toimi yagoraka, Yahidee yahibinaaha ona abe yohu-huha de manga kuranga ma ngoe. De yahidee onangika abe yotobadiai itiai la onangoo yatoma.

¹⁵ Masara manga dae gea ahao atopoko to ona ma hirete manga fuoika, De manga toimi mata-mata ahao ikokitobiki!

¹⁶ Nako ona abe manga datoro itiai de ona abe manga datoro itorou hahidotelega, De hamake ona abe iwiniiki Ma Jou manga kiahonanga ihutulu dika, De hamake ona abe manga datoro itorou manga kiahonanga ma ngoe, Ma, utuohi manga utumu abe manga kiahonanga ihutulu dika.

¹⁷ De hokogea igoungu angamoi abe ona manga datoro itorou, Ma Jou o Yawe manga kuaha de manga buturungu ahao wohiwedere, Masara ona gea abe manga wowango Ma Jou o Yawe wato itotiai, Ona gea wagoana de wahiowa ma titi manga datoro itiai.

¹⁸ Abe ona manga howono Ma Jou o Yawe ko waetongua, abe Una wato yototiai, Una o wange-wangeiye ona gea duru wapaliara irahai, De ona yamake manga oara Unangino abe ka hiado-adonika.

¹⁹ Ho ngaro o kangela yamake masara yomatongohono dika, De ngaro o hiwara ikiriakaholi hiadono naga o hafini iboa, Masara manga inomo wahidailako hiadono ona yawedono.

²⁰ Masara hokogenangua de ona abe yotobadiai itotorou, Ma Jou o Yawe womalega onangika de waetongo ai musu. Ho ona hahiketero hoka o ruruubu ma huri ihohe jai-jai dika, De ahao ma hohailoa gea ikororomo de ko iwaka. Abe yotobadiai itotorou hoka o uku ma nofo abe ihailiye de ihihanga, Hokogea manga wowango jai-jai dika de ona ko yaiwaka.

²¹ De ona yotobadiai itotorou duru yoigo o tiwi de o kiahonanga yomabau, Masara yokangela ena gea abe yomabauino ahao yaturuuru. Imakohowono de ona abe manga hininga ma dumutu la iwihisanangi Ma Jou, Ona yotobaduhunu o nyawaika de manga tiwi de manga kiahonanga.

²² Ho ona abe manga hininga hokogea Ma Jou o Yawe wahiowa, De manga oara Unangino o tonaka abe ka idadi yoriidi genangoka. Masara ona abe manga wowango itorou hiadono kiani wahohowono, To ona manga wowango watobiki ho ka yohonenge dika.

²³ De ona abe manga wowango ma dumutu la iwihisanangi Ma Jou o Yawe, Una ahao wahiaturu manga aguru manga wowango ma ngekomika, De duru wosanangi waduhunu de mata-mata abe yamake manga wowangoka, Ngaro naga abe hato ko kia-kiaua ma to Una ai hininga adaene genangika.

²⁴ De ngaro ona yopeleke ma, ona ko yogila-gilaua yoruba genangika, Abe Ma Jou waduhunu imaketero hoka manga giamika waso de waliara, Hokogea Ma Jou o Yawe waduhunu ona abe yoigo iwihisanangi.

²⁵ Ngohi ma dihira ka o goohi de ma oraha naa ihiperekioka, De ma dekanino gea ko ma moiuahi tamake o totiai ma nyawa, Abe ona manga wowango ma dumutu la iwihisanangi Ma Jou, De Ma Jou ko walegaikaua hiadono manga inomo duru ko iwa. De ngohi ko ma moiuahi tamake manga ngofa-ngofaka manga hafini, Hiadono ona kiani o inomo yomagaho-gahoko o ngekomo ma datekoka.

²⁶ De ona abe manga hininga ka ihikaika la iwihisanangi Ma Jou, Ona duru yatobaduhunu o nyawa hiadono yatobahiowa o nyawaika, De manga tiwi de manga kiahonanga yoigo yatobahidoaka de yatobahibau, La gea o nyawa abe naga manga perelu ka idadi yaduhunu. De to ona manga ngofa-ngofaka onangoo duru yahiowa, De ma titi manga dimonino yotobaduhunu o nyawaika.

²⁷ De naa tinihitiari nginika abe ka nidiaiohi ma dorou, Kiani nitoba nia datoro ma dorouino de nimangali ma owaika. Abe iti nianiiki Ma Jou ai mau de nidiai abe Una wato itiai, De ahao niamake nia gogere iriidi nia tonakoka ka hiado-adonika.

²⁸ Ma Jou o Yawe ai dora itagi onagonaika dika iti yaniiki to Una ai totiai. De Una ko wanoaikaua ona abe manga dumutu la iwihisanangi. Ona abe ka ihikaika iwihisanangi, Una ka ihikaika wadatoko o boditoino. Masara ona abe yotobadiai itotorou manga ngofa-ngofaka yokangela, Abe manga dimono manga hohowono o bobinaahaika adaene onangikaoo.

²⁹ Ona abe manga wowango ma datoro duru imakiniiki de Ma Jou ai totiai, To ona manga oara manga tonaka abe yogogere genangoka ka hiado-adonika.

³⁰ De ona abe manga datoro duru imakiniiki de Ma Jou ai totiai, Manga demo mata-mata ma gou-goungu dika, de duru de ma sosawaroka. Abe ona yososawaro ma owa de ma dorou ihikokohowono itiai.

³¹ De ona abe manga wowango ma datoro duru imakiniiki de Ma Jou ai totiai, Yomadotoko Ma Jou ai behehongino de ma titi yagogono doka manga hiningaka, La ka ihikaika yomahihohininga de o totiai ma ngekomino ko yorehenua.

³² De ona yotobadiai itotorou yatobagoana o totiai ma nyawaika la ato yatoma, De yalingiri o hiaka ma titi la ato itiai yahohowono de o hohonenge.

³³ Masara Ma Jou o Yawe ko wahigunoaua la manga hidee gea idadi, De wohiaturu la una abe wotobaurusu nako igoungu yahowonoka, Una wato o totiai ma nyawa gea ko yahowonua, Ho gea manga hohowono enangoo ko yadaenua.

³⁴ Ho ngini Ma Jou o Yawe ai nyawa, nimariidi ai himangoka de nimatongohono, To Una ai totiai ma ngekomo ka ihikaika nianiiki de ko nirehenua, De Una ahao de ai horomati ma amoko nginika winihidoaka nia tonaka, De ngini ahao niwimake nia Jou wahibinaaha ona abe inimusu.

³⁵ Ma moiokau ngohi ma hirete tamake hokogea idadi womatengoika, De una gea duru womasade ho tihiketero de o gota moi, Abe o gota duru imaboo-bootiye de duru irikoto, Hokogea una womatobasade tihiketero de to una ai buturungu.

³⁶ Masara ahao to una ai ngi totilakuru de una ko iwiwaka genangoka, De ngaro tilingiri ma una iwihihangoka de o nyawa ko moiua iwimake.

³⁷ Ho ngini niatailako ona abe manga datoroka ko hamakeua manga howono, Nimadotoko manga datoro ma owaino abe hokokia yodiai itiai, Angamoi manga himangoka ona ka ihikaika yamake ma owa, Abe ona yodora o dameika ka hiadono manga totoforauku naga.

³⁸ Masara ona abe ka ihikaika yatobahowono dika ahao yahibinaaha. De manga hohowono adaene manga totoforaukuoo.

³⁹ Abe o nyawa manga hohowono Ma Jou o Yawe dika ka idadi wohiofi. De Una waofi to ona manga hohowono abe yamakeokau o totiai Unangino. De ma oraha naga o nyawa yaduduono yangino yahikangela ai totiai ma nyawa, De Una wodadi ai nyawa manga dadatoko ma ngi abe duru de ma buturungoka,

⁴⁰ Ma Jou o Yawe waduhunu to Una ai nyawa abe yomahinganono Unangika, To Una ai nyawa wahihupu o nyawa manga dualonino, Hiadono manga bodito duru ko yadaenua onangika, De angamoi Ma Jou ai nyawa yomahitatoko ka Unangika dika!