Higiriiri 34 - Ma Jou ai Demo-demo o Totobelohoka

O Hitararono ma hidogo Ngaro o nyawa mata-mata iwihigiriiri Ma Jou Una abe waabangu de Unangoo abe wahohowono itaana

¹ To ngohi ahi mau la ngohi ka ihikaika tihigiriiri Ma Jou o Yaweiye, Ahi igoka de aino tomahuba, de ahi higiriiri ma demo idoa Unangiye.

² Ahi gimono ma demo ihititi moi dika abe Ma Jou o Yawe ai owa ngohino, Nitotoihene de nigarago ngini abe nia hininga de ma huhaka, La nginioo nia huha niaturuuru de o garago Unangoka de aino.

³ Niaino la ngone Ma Jou o Yawe higorakiye de nanga higiriiri ma demo, Hihigogiriiri ma titi to Una ai totiai duru de ma buturungoka! Homatoomuino higorakiye Una ai romanga Ma Jou o Yawe.

⁴ Ngohi tomaniata Ma Jou o Yaweiye de Una wohipaluhu wohihiputurungu, To ngohi ahi hawana duru wohihihanga de wohihiriidi.

⁵ Ona abe yomahinganono o duduhunu Unangino ahao yogarago, Manga himanga duru itawange de manga garago kohagiria. De manga maleke ko iwaka hiadono manga himanga ko ifufutuokaua.

⁶ Ngohi naa o nauru abe ihitapalu de ahi kangela abe ko itoa-toakua, De ahi hawana ma goronaka de tomagahoko Ma Jou o Yaweiye, De Una wohigihene de ahi hawana waofioka ahi hiningaka.

⁷ Abe Ma Jou o Yawe ai Malaekata to Una ai nyawa wagoana, De woigo waduhunu onangika abe de manga modongo ma horomati Unangika, Ka hiadono wahihupu manga hawanino de manga kangelaino.

⁸ Ngaro ngini nihitaili Ma Jou o Yawe ai owa nginika, De ahao niamake abe hokokia ahao ai owa winihidoaka! De o nyawa abe yomahinganono Unangika dika, Ona de ahao ma ngoe o garago yamake manga wowangoka.

⁹ De ngohi duru toigo la Ma Jou o Yawe ai nyawa yomahuba ai himangoka, De yomahimatoko to ona manga horomati ma gou-goungu Unangika, Abe nako manga horomati de manga hininga ma gahumu Unangika, De Una ahao manga perelu mata-mata wohingodumu.

¹⁰ O boki o singa ma goohi ngaro duru de ma buturungoka, Masara ma moi ma moi ma inomo ko amakeua de yahafini. Ma abeika ona abe manga nganganono duru Ma Jou o Yaweika, De Una ai hidailako ma owa onangika moioo de ko wakurangua.

¹¹ Ahi ngofa-ngofaka niaino nitotoihene ahi demoino naa, Ngohi toigo tinidotoko la duru niataoko itiai ma titi Ma Jou o Yawe. Tinidotoko hiadono nia horomati ma modongo naga Unangika.

¹² Sarakia naga nginioka abe duru nioigo la nia wowango ikurutu? Igoungu, nioigo la nia wowango ikurutu abe o duniaka nigogere e? De nisanangi nako ka ihikaika niamake ma owa nia wowangoka e?

¹³ Nako hokogea nioigo kiani nimahidodiai de nia uru, Done naga ani demo ihititi de ena abe itorou. De kiani ka ihikaika nimahitiari la ufa niapake o ngelu-ngeluku.

¹⁴ Ngini kiani duru nimakitingaka de ma dorou mata-mata. De abe nidiai itorou nitoba genangino de nimangali ma owaika, Ngini kiani ka ihikaika o dame nimahitihira nia wowangoka, Hiadono o hikadame nihidagi la nimakao irahai.

¹⁵ Ona gea abe manga datoro itiai Ma Jou o Yawe duru wagoana onangika, Womalega onangika de wahigihene nako o duduhunu yomagahoko.

¹⁶ Masara Ma Jou o Yawe walawana onangika abe yotobadiai itotorou. De manga ade-ade Una ahao waofi o dunia ma lokuoka, De ka hiadono o nyawa mata-mata manga hiningaino wakokiofi.

¹⁷ Ma, abeika ona abe manga wowango ma datoro itiai, Ka de yomaniata Ma Jou o Yaweiye, yomagahoko o duduhunu, De Una wahigihene de manga kangela mata-mataino wahihupu.

¹⁸ De Una womahidutuku onangika abe manga hininga de ma huhaka, Ngaro manga huha ma dubuho hiadono yamao manga wowango iwederoka, Masara Ma Jou o Yawe wahioriki de wahihupu manga kangelaino gea.

¹⁹ De igoungu ngaro o nyawa manga wowango yao itiai, Ona yaohana o kokangela irupa-rupa ma ngoe, Masara Ma Jou o Yawe naga onangoka de Una wolaku-laku mata-mataika, Ho manga kangela homoi-homoiino Una wahihupu.

²⁰ Mangale ma titi Ma Jou o Yawe woigo la ona wadatoko o kangelaino, Ka hiadono ngaro manga kobongo moioo de ko itobikua.

²¹ Masara ona yotualono ika-ika de o bobinaaha ahao yadaene onangika, De naga o nyawa yadohata onangika abe manga wowango itiai, Masara ona de manga dohata hokogea ahao manga hohowono yamake.

²² Masara ona abe iwileleani Ma Jou o Yawe Una ahao waabangu. De o nyawa mata-mata abe yomahinganono Ma Jouika Una ahao waabangu. La gea to ona manga hohowono duru ko yadaenua onangika.