Higiriiri 33 - Ma Jou ai Demo-demo o Totobelohoka

33:6-22 ko atailakouahi Hihigiriiri Ma Jou o Yaweiye ma titi Una Wotobatulaada!

⁶ Mangale ma titi Ma Jou o Yawe ai uru ma demo dika de ma dihanga imadadi, o demo moi dika ipaata ai uruino de o murumu mata-mata watulaada.

⁷ Una wohiaturu la o gahi ma ngooto naga de ma batingoka, de ka idadi Una watoomuino ma gahi gea to ena ma ngioka.

⁸ Ho abeika o nyawa mata-mata koaho iwimodongo Ma Jou o Yaweika, o dunia ma amokika de kiani manga horomati ma amoko itagi Unangika!

⁹ Angamoi Una gea ka wotemo dika de idadioka, ma titi ai huhuloko ma demo dika de ka itodokanino naga abe hoka wahulo-hulokoka.

¹⁰ De abe ona ko iwingaku-ngakua, Una o Yawe duru wahikapusaka to ona manga hidee, abe ngaro hokokia manga hininga masara Una ka wakunu wodiai la ko idadiuali.

¹¹ Masara nako to Una ai putuhu gea itongohono ka hiado-adonika, de ai hininga ma hidee duru ko iwa ma bobaha.

¹² Ho abeika hokokia ma amoko ma owa abe ona o dutu moi yamake iti manga jou gea o Yawe! Abe duru ma rorahai yamake mangale ona gea wairikoka la wato wahiowa onangika!

¹³ Daku o Horogaka Una naga wonalega-lega ngoneuku, abe ka idadi wonamake ngone mata-mata.

¹⁴ De ai gogogere gea duru ikokurutiye, ho Una ai ngioka gea de duru wonatailako ngone mata-mata o duniauku naa.

¹⁵ Una gea abe wohidadi to ngone homoi-homoi nanga hininga, ho ko idadiua nanga datoro moioo de homagogono Unangino.

¹⁶ Nako naga o koano womatengo de yomaketeparangi de ai musu, gea tanu ko ma titiua ai tentara manga ngoe hiadono ma koano gea wahikala ai musuika. De ko ma titiua womatengo o tentara naga de ai bobuturungoka hiadono una wakunu womaduhunu ai musuino.

¹⁷ De o parangi ma goronaka de o nyawa ko idadiua yomahinganono manga kudaika dika, angamoi ngaro duru de ma buturungoka, manga kuda gea ko idadiua yaduhunu onangika.

¹⁸ Ho koaho ufa hawohanga abe ma titi nanga Jou o Yawe ai hininga ma lako, abe ka Una dika wonagoa-goana ngone onagona dika hitobanii-niiki Unangika. De Una gea wonaduhunu ngone abe homahinganono ai doraika abe ko ihoa-hoanua.

¹⁹ Abe gea wonaduhunu la ufa hobodito, de ngaro o hafini ma amoko ma ka idadi wonahidailako.

²⁰ Ho gea hiadono ngone hidodamaa dika nanga Jou o Yawe, angamoi ka Una dika nanga duduhunu de nanga dadatoko.

²¹ Duru ma titi Una dika hiadono nanga hininga igogarago, angamoi nanga ngongaku ihititi to Una dika ai romanga ma debi-debinika.

²² Ho naa ngomi mimahinganono Ngonaika dika mia Jou o Yawe, de midodamaa la miamake ani dora gea abe duru ko ihoa-hoanua imilufungu ngomiuku.