Higiriiri 32 - Ma Jou ai Demo-demo o Totobelohoka

32:1-11 ko atailakouahi O Dautu wonahigaro la homataiti homangaku nanga howono Unangika

¹ “Nako o nyawa abe yatilakuroka Ma Jou ai Pareta ho yahowonoka Unangika, masara nako ipahaino de manga howono gea waofioka ho ko wolegaikakauali, ona gea manga hiningaka de duru yogarago, de naga manga hininga ma miriidi.

² De nako hiadono Ma Jou ko wohiningakauali o nyawa manga howo-howono, ona gea ka idadi duru yogarago de yoriidi manga hiningaka, angamoi ko yomahipongonua manga howo-howono.

³ Ngohi ma dihiraino abe ka tolukohi tomangaku ahi howono, de gea tamao abe ahi badanga ikilauoka, de o wange-wangeiye ka tokururihi dika.

⁴ Angamoi Ngona o futu de o wange nohihikangela de ani dodotoko ma dodubuho, de ahi buturungu ka ihutulu moduku abe hoka o wange ma hau-haukoka ihidahauku.

⁵ Masara ipahaino de ngohi ahi howono tomangaku, de to ngohi ahi soe ko tomahipongonokaua. Abe tomatemo tato, ‘Ngohi kiani ahi lawana gea tomangaku Ma Jou o Yaweika.’ De tomangaku ibootino de Ngona ka naofi dika ahi howono gea.

⁶ Ho mangale ma titi gea to Ngona ani totiai ma nyawa mata-mata koaho ka de yomahioriki manga howono naga de yomaniata la gea yomangaku Ngonaika. De iti yomangaku manga howono de ahao ma dodubuho gea ko yalufungua.

⁷ Ho Ngona nagou-goungu nodadioka ahi dadatoko ma ngi la o kokangela ko imahilakua ngohioka. Abe Ngona hoka nohihigilolitino de o hilaku ma nyanyianga arihononga, ho duru ko idadiua ngohi tokala.

⁸ De o Yawe wohitemo ngohino wato, ‘Ngohi ka idadi tonidotoko la ani wowango nao itiai, abe tonihigaro ma rorahaiika de tonigoa-goana ani dodagioka.’

⁹ Ho ufa nimaaduru abe hoka o kuda abe ko iwa ma tobahioriki, angamoi gea kiani naga o behi ma dobiki moi hohitaanaoko ma uruoko la ihidumutu ma kuda gea. Abe nako ma behi gea ko iwa, duru ko iwa ma kuda ma hingounu ma dutuika, ho ngini naa ufa nimaaduru hoka to enangoli ma hininga, masara koaho naga nia hingounu Unangika.

¹⁰ Abe o dorou ma nyawa o kangela de o huha ma ngoe yadaene, masara o nyawa abe yomahinganono o Yaweika, ona gea ka idadi yamake abe to Una ai dora ka ihikaika yahihawo-hawoino.

¹¹ Ho ngini abe nia wowango itotiai Ma Jou ai himangoka, ka idadi nigogaragoka dika de nisosanangi ma titi Ma Jou o Yawe! De ka nipoa-poaka dika ma titi nia morene ma amoko Unangika!”