Higiriiri 23 - Ma Jou ai Demo-demo o Totobelohoka

O Dautu ai Higiriiri ma Nyanyianga abe ai demo ma goronaka de hoka wotemo wato, “Ngohi hoka Ma Jou o Yawe ai domba de Una to ngohi ahi gogoana.”

¹ Ma Jou o Yawe ngohi naa wohihidadioka hoka to Una ai domba, Ho Una womahidadi hoka to ngohi ahi domba ma gogoana ma rorahai. De ahi perelu mata-mata Una duru wohihidailako.

² Una wohiao o ruruubu duru ma gutufurika de wohihiaini genangoka, Wairiki ahi hiaini ma ngi abe duru iriidi de itebini, Abe hamake o akere ma eteteke ma datekoka.

³ De genangoka ahi hininga ma pusingi de ma huha wohihihanga, De wohiriidi de wohihiputurungu la ahi wowango tao itiai, Una ahi gogoana abe wohihihira-hira o ngekomo ma totiaiika, La ngohi ka ihikaika tohiboa o higiriiri Una Ma Jou o Yaweiye.

⁴ De ngaro ngohi ahi wowango ma ngekomoka, De naga ma oraha abe taohana ahi bodito, Abe duru tamao ihihidotufutuoka tato ahi honenge itigioka, Masara ngohi duru ko tohawanua. Angamoi Ngona ahi Gogoana naga ngohioka ka nohihira-hira, De Ngona nohigoana de nohilaru de ani tutukunu de ani boboha, Hiadono ko moiua ihitigino la ihihibodito.

⁵ De ngaro ahi musu manga ngoe naga ahi himangoka, Masara Ngona nohigoana de nohihiolomo ma rorahai. Ngohi naa Ngona nomadingakoka de nohihitunguu hokogea. Imaketero hoka ani leleani ma nyawa nahitunguu de o minya, Ma oraha ma minya gea naduguihi manga peauku, La inihioriki manga wowango nomahitongona, De hokogenangoli ngohioo nohihitunguuoka Abe Ngona Ma Jou nohiduguihi de ma owa.

⁶ Ngona Ma Jou o Yawe abe nowango ka hiado-adonika, De ma oraha naa Ngona naga ahi wowangoka. De ani owa de ani dora ma hiokoo ka ihikaika naga ngohioka, Ma oraha naa de ka hiadono ahi wowango ma bahaika. De ahao Ngona nohihigogere to Ngona ani tau ma goronaka, De ka hiado-adonika ngohi tomanoa Ngona Ma Jou o Yaweoka.