Higiriiri 22 - Ma Jou ai Demo-demo o Totobelohoka

O Hitararono ma hidogo O Himatoko abe Ma Jou wihidoaka o Dautika ma titi ai Mesia

¹ Ahi Jou, ahi Jou, adodoa ho nohinoaika ngohi? Ngohi ahi gururihi ma goronaka de o duduhunu tomagahoko Ngonaino, Adodoa ho ahi gogahoko hokogea de o duduhunu ko tamakeua? Adodoa ho Ngona ko nohigihenua, hoka nomatingaka ma gurutika?

² Ahi Jou to ngohi ahi huha duru ihilufungokaholi, Hiadono o duduhunu togari o wangeoka de ka hiadono ihidufutuku, Masara ahi gogahoko hokogea de Ngona ko nohipaluhua, Ngona ahi gari ma ilingi noihene masara ahi huha ko ihailuahi.

³ De ngaro hokogea o huha ma amoko ihidaene ngohino, Masara, igoungu Ngona Ma Jou duru Notebi-tebini, De o Isiraele ma nyawa manga huhuba o higiriiri ka ihikaika inihigilolitino, Abe ka ihikaika Ngona naga nogogeruku ani kaderaka.

⁴ To ngomi mia totofora abe yomahinganono duru ka Ngonaika dika, Ona yomahinganono de manga ngongaku Ngonaika, De Ngona nahihupu mia totofora gea manga kangelaino.

⁵ De ona de manga huha duru ihilufungokaholi de naduhunu, Abe ona de manga ngongaku o duduhunu yogari, De manga huha ko idogo ilamokua angamoi Ngona nahigihene, Nomalega manga ngongakuika de nahihupu manga huhaino.

⁶ Masara ngohi naa tomahiketero hoka o kulubati dika, Ngohi hoka o nyawa abe ko o naurua o nyawa manga himangoka, Ka hiadono naga o nau-nauru ihilega-lega de ihihohedu ngohino. De o nyawa utu onangoo de manga dohata ihiemono ngohino.

⁷ Ho o nyawa mata-mata abe yomalega ngohino de ihihohedu, Ona yohanguru de manga pea ihinipo-niporo de yotemo.

⁸ De manga demo ko iwa ma horomati Ma Jou o Yaweika ato, “Sarakia, una naa abe duru womahinganono Ma Jou o Yaweika? Nako igoungu hokogea de abeika hinoaika dika genangoka! Abe nako itaana Ma Jou o Yawe igoungu duru widora unangika, Ahao una wodadi Ma Jou o Yawe ai tagongo. Ho abeika nako Ma Jou o Yawe woigo wihihupu ai kangelaino naa.” Hokogea manga hohedu ma demo.

⁹ De masara ngohi duru tonihioriki Ngona ahi Jou nohiduhunu, Abe gea Ngona nohihihupu ngohi meme ami ngofaka ma ngiino, De Ngona nohigoana ka hiadono ko moiua la ihidaene ma dorou, Hiadono tososanangi dika tohuhu ngohi meme ami huhuino.

¹⁰ Abe ka de tomaboa de Ngona nohitagongo ahi wowangoka. Ahi wowango ma ngekomo duru igogere Ngonaka, Ngaro ma oraha ngohi meme mohihiao-ao ami pokorokahi, De Ngona nodadiokau to ngohi ahi Jou.

¹¹ Ho ufa Ngona ahi Jou nohitingaka ma gurutika, Angamoi naga o kangela duru itigioka ngohino. De ko moiua naga nenangoka abe yoigo ihiduhunu.

¹² Ma oraha naa ona abe ihigilolitino duru ihimusu ngohino, Ona imaketero hoka o hapi ma nauru ma duduono abe duru itualono, Ona hoka o hapi ma nauru abe naga o Basana ma tonakoka, Abe nako o hapi mata-mataika ka enangohi duru de ma buturungoka.

¹³ De ahi musu naa manga uru ihimoa-moana de manga hafini ma dorou, Ona hoka o boki o singa abe ihigali-gali inyao de ma ilingi ma amokiye, Manga hininga hoka o singa abe akaboto ma inomo ma ngangoika.

¹⁴ De ahi wowango ma buturungu ko iwaka abe iowahoka, Ahi buturungu imaketero hoka o akere abe ikopoaka. De ahi kobongo ma dengo-dengo ma odiri hoka imakokongofuoka, De ahi fuo hoka ko iwaka ma roehe abe ibole imaketero hoka o lilingi, To ena ma buturungu hoka o lilingi iuihi ahi alu ma goronaka.

¹⁵ Ahi roehe yodudungoka ka hiadono ahi buturungu enangoo iowahoka, Imaketero de o tonaka ma tau-taulu abe awoerika o wangeoka hiadono itogowinoka, Hokogea ahi roehe hiadono ahi akiroo imakahumu de ahi uru ma roehe, Ngohi tamao hoka nohikelenga nohiwoere o ngekomo ma kuhuhunoka, De hiadono ahi roehe ngade-ngade idadioka o honenge ma dirihi.

¹⁶ Igoungu ahi musu naa ihigilolitino hoka o kaho o duduono moi, Abe de ma dualono ka ihikaika ihitigi ngohino ihidamaa tohonenge. Ahi giama de ahi lou arihononga, ona yatopokikaka.

¹⁷ De ahi kobongo mata-mata o nyawa ka yobawilika hiadono ka idadi yaetongo. De ahi musu ihidamaanoka de manga lolaku ma gimono.

¹⁸ De ahi musu nenanga ihibululunu abe ahi pakeanga yahuputoka, De abeika ona naa ahi pakeanga gea yomahikodoku, De ka hiadono ona yomakokamaihi la onaguna wamake, La una gea wamake ahi baju de womahitouna.

¹⁹ Masara Ngona naga, Ngona Ma Jou o Yawe ufa nokurutika nohinoa! Ngona to ngohi ahi duduhunu ho duru tomagahoko Ngonaika, Nohihiputurungu ngohi naa ahi kangela ma goronaka, Duru tomagahoko la nomataiti ani duduhunu nohiboa ngohino.

²⁰ Tomagahoko nohihupu ahi jiwa o parangi ma dae ma buturungino, La ufa ahi wowango ahi musu manga giama ma kuahaka, Abe ahi musu naa taetongo hoka ona o dualono ma kaho dika. Ufa nohigunoa ahi badanga yawedere hiadono genangino de ngohi tohonenge.

²¹ Nohihihupu o singa ma uruino abe hokogea manga hafini ma dorou, Nohiguti o fuhuku ma hapi ma tatadukoka! Abe hokogea manga hininga, La ato ihitaduku de ka hiadono ngohi tohonenge, Hokogea manga hininga ma dumutu abe ihimusu ngohino naa.

²² O romanga abe ka enangohi ikokurutiye de yahiheranga o nyawaika, Gea to Ngona dika ani romanga Ma Jou o Yawe, de ngohi toigo tonifetongo, Toigo ani romanga tohigiriiri ahi gogianongoru manga doomu ma goronaka, Ahi higiriiri ma demo ma dumutu ka ihikaika Ngonaiye.

²³ De ngini abe de nia horomati ma modongo Ma Jou o Yaweika, kiani niwihigiriiri! Ngini o Yakubu ai totoforauku kiani ai medebini ma dararono niagorakiye! Nimaokoino Ma Jou o Yawe ai himangoka de nia horomati ma modongo, Ngini o Isiraele ai totoforauku kiani niwihigiriiri Unangika!

²⁴ Angamoi Una womalega yohu-huhaika manga kangela ma goronaka, De ko waemonua onangika, de ai hininga-kuranga ko iwa onangika. Una wamake manga kangela ma goronaka de ko waporetikaua, Una wagihene ona abe ihigari-gari manga kangela ma dubuho! Ho ngini o Yakubu ai totoforauku kiani niwihigiriiri Ma Jou o Yawe.

²⁵ Ahi Jou, ma oraha ngohi tonihigiriiri de ahi higiriirioo Ngonaka de aino. Abe ma oraha ngohi naga to Ngona ani nyawa manga doomuoka, De ahi huhuba abe ma dihiraino ngohi tonihibehehongoka tato tonihidoaka Ngonaika, Ngohi ahao manga himangoka tohidoaka, Abe ma oraha onangoo yomahuba-huba Ngonaika.

²⁶ De abeika Ma Jou o Yawe ai hininga ona yohu-huhaika, Ona ahao Ma Jou wahiolomo ka hiadono yapunuhoka, De ona abe de manga hininga iwilingiri Ma Jou o Yawe, Ona de ahao iwimake, de duru iwihigiriiri Unangika, De iwihigiriiri de manga garagoka abe ka hiado-adonika.

²⁷ De naga ma oraha o nyawa mata-mata o dunia ma amokika iwihihohininga, De yomangali Ma Jou o Yaweika ho hiadono yomahuba itiai Unangika. Abe o nyawa manga tonaka homoi-homoiino de yomangali Unangika, Ka hiadono o tonaka ma nyawa homoi-homoiino iwihigiriiri Ma Jou, De manga dodoomu yomaponuku ree-ree ai himangoka, De ona mata-mata yomahuba-huba de manga horomati Unangika.

²⁸ De angamoi o nyawa mata-mataika yogogere Ma Jou o Yawe ai kuahaka. Ho Ma Jou o Yawe wahikoano o tonaka mata-mataika ma nyawa.

²⁹ Igoungu ona abe yomasade o dunia ma lokuoka onangoo yomaponuku, Abe ona yomangaku ai himangoka abe manga wowango Unangoka de aino, Abe o dunia ma nyawa mata-mata yomaboa de ahao yohonenge, De ona ma hirete ko yakunua manga wowango ihikurutu ma dekana, De naga ma oraha ona mata-mataika yomahuba-huba Ma Jouika.

³⁰ Ho o nyawa naa de ona abe imahikauku yomaboa ahao iwileleani Ma Jouika, De manga dimo-dimono ahao yaade-ade manga ngofa-ngofakuku, Yahingahu gea abe Ma Jou o Yawe wodiai de o heheranga ma ngoe, Ho onangoo ahao yoihene ma titi Ma Jou ai owa onangika.

³¹ De ona ka ihikaika yomaketeturuuru yahingahu onangika abe yolape-lapeuku, Ngaro ma oraha naa de ko yomaboauahi masara ahao onangoo yoihene, Yoihene Ma Jou ai ade-ade abe ma titi gea Una wodiai duru itotiai, La hiadono o nyawa waduhunu manga howo-howonino.