Higiriiri 2 - Ma Jou ai Demo-demo o Totobelohoka

Parahaja dika nako o kokoano ato iwilawana Ma Jouika

O Koano o Dautu wotulihi o nyanyianga naa

¹ Adodoa ho naga o kapusaka ma gigoro ma amoko o dunia ma nyawa manga tonakoka mata-mataika? De adodoa ho ka ihikaika manga hidee ma dorouika naga? Ngone hoheranga manga hideeika gea angamoi parahaja dika! Masara parahaja manga hininga ma dumutu genangika!

² Abeika o dunia ma kokoano yomaketerimoi yomahidiai yoparangi, De naga utu o dimo-dimono yolingiri o lolaku ma dodagi, Manga hidee ma dorou gea ato ihidagi Ma Jou o Yaweika, Hiadono ato yahikala Ma Jou de ma koano abe Una womadingakoka.

³ Ona yomahikokangahu ato, “Hatoaka Ma Jou ai pareta ma papakiti, Una de ma koano gea inahikangela de manga pareta, Ho manga papakiti ngoneino gea ahao haumo dika!” Hokogea o dunia ma nyawa manga sade ma demo.

⁴ Masara Una abe wogogere daku manga demoika gea wogiete, Una Ma Jou wogiete angamoi ai kuaha mata-mataika Ho ngaro manga hininga hokogea masara, wato ona ko kia-kiaua.

⁵ De ahao Una de ai ngamo duru watemo onangika, Masara manga hidee itorou gea ona ko anoaua, Ho Ma Jou ai dohata duru ihauku onangika Hiadono waditirihi de o hawana onangika ho duru iwimodongo.

⁶ De Ma Jou o Yawe wahingahu-ngahu wato, “Naga womatengo o koano, Una ma koano abe tomahitongohioka, de Una naga o Yerusaleemoka, Ngohi tihigogere ahi loku ma debi-debinoka gea.” Hokogea Ma Jou womaputuhu de wahingahuoka.

⁷ De ahao ma Koano gea wohidogo to ai Baba ai hingahu, wato, “Ngohi naa Ma Jou ai koano abe womahitounangoka, Ho ma titi Ngohi, hiadono Ma Jou o Yawe ai demo hokogea, Abe Una ma dihiraino wohihingahuokau Ngohino wato, ‘Ngohi o wange naa de tomahitaanoka abe Ngona nodadioka ahi Ngofaka, De abe Ngohi tagou-goungu to Ngona ani Baba.

⁸ Ho ka de nomagahoko o dunia ma nyawa o tonaka mata-mataika, De ona gea tonihidoaka Ngonaika, la yodadi ani oara Ngohino, Hiadono ona o dunia ma amokika ahao yogogere ani kuahaka.

⁹ De ona abe inalawana ahao Ngona napake hoka o boboha o behino, De gea ena ahao nahipoha onangika hiadono nahibinaaha. Ona gea hoka o boto o tonakino abe nohipoha de ani boboha gea, Ho ka de napoha onangika de duru yowede-wederuku.’ Hokogea Ma Jou o Baba ai demo Ngohino to Una ai Ngofakino.”

¹⁰ Ho ngini o dunia ma kokoano nitotoihene to Una ai demoika gea, Ngini nimafikiri nihidodiai ai hingahuika gea la idadi o dodotoko nginika, Nimahidodiai o dunia ma nyawa niapareta de niahohowono onangika.

¹¹ Ngini kiani niwimodongo Ma Jou o Yaweika la niwileleani itiai, De nia horomati niwihigiriiri Unangika hiadono nifafara, De nia garagoo naga Unangika abe ma oraha niwileleani.

¹² Ho kiani ngini nimahitipokouku de niwidomorene Ma Jou o Ngofakika, Done Una winingamo de winihibinaaha nia karajaanga ma goronaka. Angamoi itodokanino de ka idadi ifae to Una ai ngamo nginika. Masara ona abe ko iwa manga hidee ma dorou Ma Jouika, Gea ona wahiowa angamoi yomahitatoko Unangika, Ma titi to ona manga ngongaku duru Ma Jou o Ngofakika.