Higiriiri 19 - Ma Jou ai Demo-demo o Totobelohoka

19:1-14 ko atailakouahi Ma Jou ai dulaada inahimatoko ai medebini ma dararono

¹ Ma dihanga mata-mata inahingahu ma titi Ma Jou ai medebini ma dararono, de daku ma hoanino hamake ai giama ma hasili.

² O wange-wangeiye gea mata-mata inatemo-temo, O futu-futuiye yoade-ade ma titi Una Wokokurutiye.

³ Abe ngaro ko iwa to ena ma demo, de ko iwa ma ilingi abe ngone hoihene,

⁴ masara gea imaketero hoka to ena ma ilingi itagi o dunia ma amokika, de to ena ma demo duru yogirangika hiadono o dunia ma batingika. Abeika, Una wohiaturu la o wange naga ma ngingidu,

⁵ de ena duru yongorumiye la ihupu ma ngiino de ileto-letongo. De o wange imaketero abe hoka womatengo ahao woilaka duru de ai garagoka. De gea ihupu duru de ma buturungoka, abe imaketero hoka womatengo wososawaro womapopaata o roreebeoka.

⁶ Ho ma wange gea ma hiwaroko ihupu, de ma dodagi atobaniiki ka hiadono ma dumuniha, de duru ko moiua ka idadi imahitatoko to ena ma haukino.

Abe ma titi Ma Jou ai Pareta duru inahiutumu

⁷ Ma Jou ai Pareta gea mata-mata duru ka itotiai dika, de ka idadi nanga jiwa inahiwangoroli. To Una ai hiaturu gea duru igou-goungu hiadono ka idadi hongaku enangika, abe ngaro o nyawa biaha dika ma ka idadi inahisawaro.

⁸ De o Yawe ai behehongo gea ma owa dika, ho nako haniiki ka idadi inahigarago. O Yawe ai huhuloko ka itebi-tebini dika mata-mataika, ho inahitararono nanga hininga ma lakoino.

⁹ De ai hohininga duru itaana abe wato kiani naga nanga horomati itagi ka Unangikahi, de ai demo gea duru ko iwa ma baha ka hiado-adonika. De abe Una o Yawe wonadotoko gea mata-mata duru itaana, de duru ko iwa ma howono ai dodotokino gea.

¹⁰ Abe ngaro hohidotelega de o gurasi masara ka ai dodotokohi duru ihali, de ngaro naga o gurasi ma dutu ma amoko masara haetongo ko kia-kiaua ma titi. De ngaro de o momoroini ma gula masara ka ai dodotokohi ma mao irahai, abe ngaro ma gula gea ahao yomale o momoroini ma igutino, ma to Unangohi ai dodotoko duru imutiti.

¹¹ De hongoli ngohi ani nyawa nohihidumutu ma totiaiika abe ma titi ani dodotokino gea, de onagona dika yomahidodiai yaniiki enangika ahao yamake manga utumu duru ihohailoa.

¹² Angamoi mode ngone o nyawa ka idadi homahioriki nanga howono mata-mataika? Ho duru tomagahoko la ufa ahi hohowono ihidaene ma titi ma howono gea abe ko ahi hiningaua de todiai dika.

¹³ De tomagahokoo nohiduhunu la ufa hiadono gea abe tohiorikoka o howono masara ka uku dika todiai, ufa hiadono ma howono hokogea imahilaku ahi hiningaka! La ngohi ka idadi ahi wowango itotiai dika ani himangoka, de ahi hininga naetongo nato ka itebi-tebini dika!

¹⁴ Ho naa ngohi duru tomagahoko Ngona o Yaweika la ngaro ma demo abe ihupu ahi uruino, de ngaro ahi hininga abe itagi doka ahi hiningaka, masara gea mata-mata duru toigo la inihikokisanangi Ngonaika. Angamoi ka Ngona dika nodadi ahi dadatoko ma hakaru de ahi Duduhunu la ufa o bodito ihidaene!