Higiriiri 139 - Ma Jou ai Demo-demo o Totobelohoka

Abe ma titi Ma Jou ai tobahioriki duru ingodu-ngodumoka

O Koano o Dautu wotulihi o nyanyianga naa

¹ Ngona, Ma Jou o Yawe, gea nohitailakokau, ho duru nohihioriki ngohi naa.

² Ngaro togogeruku eko tomaokoiye ma nohihioriki. De abe itagi doka ahi hiningaka namake ngaro ani gurutika.

³ To ngohi ahi wowango ma dodagi ka ihikaika natailako, ho ngaro tomaidu eko tokarajaanga, ma Ngona duru nohioriki mata-mataika.

⁴ De ahi demo ngaro ko ihupuahi ahi uruino, ho ka doka ahi hiningakahi ahi demo, ma, gea Ngona Ma Jou o Yawe nohiorikokau.

⁵ Ngona duru nohihidogoronainoka ngohi naa, ho ahi himangoka de ahi poretoka Ngona naga, Ngona de ani buturungu nohigoana!

⁶ Ani higoana de ani tobahioriki duru ihohailoaholi ngohino! Hiadono ahi hininga ko aboaikaua genangika afikiri.

⁷ Done o kiaika toiki ngohi de ani Womaha ko iwa genangoka? Ngaro tato toara tomatingaka Ngonaino ma ko idadiua.

⁸ Angamoi ngaro toiki ma dihangiye ma Ngona naga, eko dau yohone-honenge manga ngiuku towohamoka, masara Ngona naga genangokaoo.

⁹ Ngaro ma gurutiha ka idadi tohoho de ahi palesa, hoka ma dararono ma palesa ma oraha o wange ipotokaiye, Ma Ngona ahi gogoana ho de ani buturungu nohitagaiye, ho ngaro o gahi ma honongaika tomahihora la tato genangoka togogere,

¹⁰ Ma, genangokali Ngona de ani kuahaka nohihihira-hira, ho de ani kuahakaoo ahao nohigoana genangoka.

¹¹ Ngaro tomatemo tato, “Ahao o fufutu ihitamunu la gea ngohi ko nohimakeokaua, Abe ihihitararono ngohiuku gea ko iwaka, angamoi o dawange gea ifufutuoka.”

¹² Masara, o fufutu gea ko inidofufutua Ngonaka, nako to Ngona ani himangoka o fufutuoo itawange Ho Ngonaika imaketero o fufutu de o wange-wange, ho, ngohi ka nohimakeohi Ma Jou o Yawe.

¹³ Ngaro ahi badanga ma kiahonanga ma hohumuduru, ma gea Ngona mata-mataika nohitulaada. Gea Ngona nohihidiai o ngofaka ma ngioka, gea doka ngohi meme ami pokoroka,

¹⁴ Ho tonihigiriiri angamoi nohidodiai nohitulaada ngohi, la gea Ngona nohihidadi irahai. Mata-mata gea Ngona nodiai, gea tohioriki duru irorahai mata-mataika.

¹⁵ Ahi badanga abe ma oraha idadi o ngi ifufutuoka gea, De ko iwa la naga ma hohutulu ko namakeua Ma Jou, Abe o ngofaka ma ngioka gea, ma hohumuduru imafafo, la hiadono idadi ahi badanga ma gahumu.

¹⁶ Ma ngaro ahi badanga ko ingodumuahi, De Ngona nohilega ngohino de duru nohihioriki, hiadono ahi dekana togogere o duniaka naa, Ma, enangoo nogelengaka ahi gahe, De nohitulihukuoka ani bukuoka, ngaro ko tomaboauahi.

¹⁷ O, ahi Jou ani hininga ngohino gea duru ihihisanangi, de gea duru kohaamoko ani hininga mata-mata!

¹⁸ Nako ka idadi o dunia ma dowongi takokietongo ma mui, de ahao tohidotelega de to Ngona ani hininga, de gea ka ani hiningahi duru ilamoko. De abeika ani hininga ma rorahai ngohino, ngaro ma oraha ahi giookino tomomiki ma ngohi nagahi Ngonaka.

¹⁹ De naa moi togahoko Ngonaika Ma Jou, abe ona yotobatualono duru irahai nahohonenge dika. Ngohi toigo la tahuloko onangika tato, “Ngini abe niohafini o nyawa manga awunu nimataiti nimatingaka ngohino!”

²⁰ Hokogea ahi hininga onangika angamoi ona inihiade-ade Ngonaika itorou. Ka ihikaika ani musu gea ani romanga yawea-weara dika.

²¹ De Ngona Ma Jou o Yawe! Ho done sarakia nako ona inidohata Ngonaika, de ngohi ko tadohatua onangika? De sarakia nako ko talawanua onangika, abe ka ihikaika inilawana Ngonaika, ahi Jou?

²² Ho to ngohi ahi hininga onangika ma dohata dika, angamoi ona gea ngohioo tahiromanga to ngohi ahi musu.

²³ Ngona ahi Jou, ngohi togahoko la ahi hininga duru natailako, gea nataili la nohioriki ma huha abe igogere genangoka.

²⁴ Nolega nako naga ngohioka abe inihihuha Ngonaika, de nohihihira-hira o ngekomoka abe ka hiado-adonika.