Higiriiri 127 - Ma Jou ai Demo-demo o Totobelohoka

127:1-5 ko atailakouahi Abe ma titi kiani homahinganono ka Ma Jouika dika

¹ Nako o nyawa manga tau ihigoko, masara gea ko imakiniikua de Ma Jou o Yawe ai mau, gea ka parahaja dika manga tau yomadiai. De hokogenangoo nako Ma Jou o Yawe ko ai hiningaua la wogoana o kota moi, ngaro naga de manga gogoanoka masara ko idadiua yaduhunu o kota ma nyawaika.

² De naa moioli abe ka parahaja dika, nako o nyawa duru yokarajaangaholi la ato yomahidailako manga perelu. Abe nako duru yongorumu yosobo la yokarajaanga ka hiadono yahidufutuku, gea ko ma titiua abe manga karajaanga kiani naga de ma hasiloka. Angamoi Una gea ka idadi wonahidailako ngaro homasikaa de ngaro homaiduoka, iti to Una ai hininga ma dora duru itagi ngoneino.

³ De nako o nyawa yomamake manga ngofaka o nauru, gea o hiowa moi Ma Jou o Yaweoka de aino, de ma utumu ma amoko ahao yamake onangino.

⁴ Angamoi nako ngone hatoli ka o goohi de homamakeoka nanga ngofaka o nauru, gea ahao yomaketero hoka o hihiipi nanga giamoka ma oraha homaketeparangi de nanga musu.

⁵ Ho nako to ngone nanga nauru hatoli yowoe, gea ngone duru de nanga utumoka. Angamoi ahao ma oraha homarihimanga de ona inalawa-lawana o kota ma dadaduhu ma ngoranoka, de gea nanga ngofaka o nauru inademo ho ko idadiua inahikala ngoneino.