Higiriiri 121 - Ma Jou ai Demo-demo o Totobelohoka

121:1-8 ko atailakouahi Nanga Jou ai gogoana ngoneino duru ko ihoa-hoanua

¹ Ngohi tomamatagaiye de tomalega o loku-lokuiye de tomaleha, Sarakia, genangoka de aino ahi duduhunu ma titi?

² Gea ahi duduhunu igoungu iboa ka Ma Jou o Yaweoka dika de aino ngohino, abe Una gea wotobatulaada o dunia naa de ma dihangoo.

³ De Una ko winihigunoaua la o bodito inidaene. Una gea ka ihikaika winigoana angamoi duru ko iwikiookua!

⁴ Angamoi to ngone o Isiraele ma nyawa nanga gogoana, Una gea ko ma iwa abe womaiduiha, de duru ko iwa ai giooko!

⁵ Una Ma Jou o Yawe winitobagoana nginika, abe Una nia datekoka de winifofonguku la ufa o wange ma hauku iniruwae.

⁶ De gea igoungu abe o wange ma hauku ko iniruwaeua, de ngaro o futu-futu masara o mede ko idadiua inihibodito.

⁷ Angamoi Una gea winidatoko la ko kia-kiaua idadi nginika, de ti ngini nia wowango Una duru wogoana.

⁸ Ho Una Ma Jou o Yawe ahao winigoana nia wowango ma dodagioka mata-mataika, abe ngaro ma oraha naa de ka hiado-adonika!