Higiriiri 11 - Ma Jou ai Demo-demo o Totobelohoka

O nyawa mata-mataika ka ihikaika Ma Jou wonatailako de wonahioriki nanga hininga O Hitararono ma hidogo

O Koano o Dautu wotulihi o nyanyianga naa

¹ Ngohi naa ko tohawanua abe tomahitatokokau Ma Jou o Yaweoka. Ho done sarakia de nihihuloko la ngohi toara tomagogono ahi lokuika? Abe hokogea ngini nihihiowa ngohino niato, “Kiani hoka o totaleoli nomadotoko, Abe ka de o totaleo yamao o bodito itigino de o lokuika ihohoka.”

² De nihihitiari niato, “Abeika, o bodito itigioka, Ona yotobatualono yagogataheke o totiai ma nyawaika, De gea manga toimi ma deli ataurokoka, Abe manga hiningaka yomahidiaioka la inatoimi dika.”

³ De nihihihohininga ngohino niato, “De hongoli, nanga popareta ko aniikokaua o totiai ma hiaturu, Ho ko idadiokaua ngone homakao irahaioli, Angamoi nanga popareta ma lifunu akiliangoka. Ho ko iwaka ma ngekomo la ngone o totiai ma nyawa holaku.” Hokogea ti ngini nia hingahu ma owa ngohino masara ngohi ko toarua.

⁴ Ho naa ngohi tinihihohininga nginika, Abeika, Ma Jou o Yawe naga ai ngi ma debi-debinoka! Una Ma Jou abe ai gogogere daku o Horogaka. Una womalega ngoneuku de ko iwa moi abe ko wamakeua, O nyawa mata-mataika ka ihikaika wonatailako de wonahioriki.

⁵ Ho Ma Jou o Yawe watailako de wahitaana o totiai ma nyawa manga hininga, De ona yotobatualono onangoo watailako de wahitaana, De wadohata onangika mangale manga datoro ma dorou, Abe ka ihikaika o nyawa yahikangela de yatoma.

⁶ Ho wadopuraraha onanguku abe ka idadi yahibinaaha. Wahidopuraraha de o uku de o uba itoka-tokara, De gea wahidataloko onangika de o hidaloko kohahauku. Hokogea manga dohata ma hasili yamake!

⁷ Ho ngaro ufa ngone hamodongo ona yotobatualonika, Ma Jou o Yawe duru wototiai, de wodora ma owaika. Ho duru Una waniikoo o hitaana ma ngekomo. Ho ona yahowonoka wahohowono itiai, De ona abe yaniiki ma totiai onangika wasanangi. Abe ngone mata-mata naga to Una Wototiai ai himangoka.