Higiriiri 107 - Ma Jou ai Demo-demo o Totobelohoka

Ma Jou ai dora ai nyawaika ko itoa-toakua de wahihupu manga kangela ma ngoeino

¹ Kiani ngone o nyawa hihigiriiri Ma Jou o Yaweika! De nanga hininga ma gahumu hotarimakase Ma Jou o Yaweika! De angamoi Una mata-mataika ai hininga ma owa! To Una ai dora ko itoa-toakua ka hiado-adonika.

² O demo naa ngini kiani nihigali-galioli la gea niwihigiriiri Ma Jou o Yaweiye! Ngini mata-mata, abe Ma Jou winibanguoka la nia gogao itiai Unangika. De niahingahuoo o nyawaika abe Una winihihupuoka nia musu manga kuahaino.

³ De Ma Jou winihitoomu o nyawa manga tona-tonakino abe winiaoino, Ngaro nia gogere o tonaka ma gurutika o wange ma hiwariha, De ngaro nia gogere o tonaka o wange ma dumuniha, De ngaro nia gogere o tonaka dau ma honongauku, De ngaro nia gogere daku o tonaka ma honongaiye, Masara ma oraha naa Ma Jou winihikokihigilioka nia tonakino naa.

⁴ Abeika to ngone nanga gogianongoru manga wowango ma dihira, Naga ona abe yaika yaino o tonaka ma kakaahaka, Ko moiua ma kota genangoka abe ka idadi yogogere ma goronaka.

⁵ De ona ma ngoe yohafini de manga ngomaha yodudungu, Ka hiadono ngade-ngade yohonenge o tonaka ma kakaahaka gea.

⁶ De ahao ona duru yopoa-poakiye manga kangela ma goronaka. Yomagahoko ato, “Ngona, Ma Jou o Yawe, nomiduhunu!” De Una wahigihene de wahihupu manga kangelaino.

⁷ Una wahihira-hira wao o ngiika abe genangoka ko yohawanua. Abe Una wao o kotaika abe ka idadi genangoka yogogere yososanangi.

⁸ Ngaro ona duru iwihigiriiri Ma Jou o Yaweiye ma titi ai dora, Abe to Una ai dora duru iwango-wango ka hiado-adonika, De iwihigiriiri ma titi ai karajaanga duru ma rorahai abe wodiai o nyawaika, Una ma ngoe womalega o nyawa manga kangelaika de waduhunu.

⁹ Abe ona manga ngomaha duru yodudungoka Ma Jou wahiwedono manga akere, De ona abe duru yahafini Una ahao wahipunuhu de o inomo ma owa.

¹⁰ De naga nanga gogianongoru utu abe ma dihiraino, Duru yogogere o fufutuoka hiadono manga hininga de ma huhaholi. Abe ona yamao imaketero hoka yabuioka o bui ma tau ma goronaka, De yahidaranteika de o rante o behino ho duru manga badanga ikangela.

¹¹ De hokogea manga wowango angamoi yalawana Ma Jou ai Demo-demoika, Ma dihiraino Una duru Wokokurutiye gea wahidoaka o hiowa ma demo, Hokogea wapaliara onangika, masara ai hiowa ma demo gea duru yaoluku.

¹² De gea ma titi Una wahidoaka o karajaanga kohadubuho onangika, Ka hiadono ona yoruba manga karajaanga ma goronaka de ko moiua yaduhunu.

¹³ Masara de ahao manga kokangela ma goronaka de manga huha ihiboaka, Yomagahoko ato, “Ngona, Ma Jou o Yawe, nomiduhunu!” De Una wahigihene de wahihohe manga kokangelaino.

¹⁴ Abe imaketero hoka Una wahihira-hira la wahihupu o fufutu ma dorouino gea, De abe manga hininga de ma huhaholi enangoo wohihihanga, De gea imaketero de manga rante o behino gea watoaka, Hokogea ai nyawa duru wahiluasa manga kokangelaino.

¹⁵ Ngaro ona duru iwihigiriiri Ma Jou o Yaweiye ma titi ai dora, Abe to Una ai dora duru iwango-wango ka hiado-adonika, De kiani iwihigiriiri ma titi ai karajaanga duru ma rorahai abe wodiai o nyawaika, Una ma ngoe womalega o nyawa manga kangelaika de waduhunu.

¹⁶ Abe imaketero hoka ona yogogere o bui ma tau ma goronaka, De o bui ma tau gea naga ma ngorana ma dadatoko yodiai o tabaagaino, Masara ena gea Ma Jou o Yawe ka idadi duru wohitobi-tobikuku, De ngaro o bui ma dadaduhu yodiai de o behi ma bobululunino, Abe ihiraa-raangika ihidomotekiye masara enangoo Una wohitobi-tobikoka.

¹⁷ De naga nanga gogianongoru utu yotobapopanyake ma titi manga datoro itotorou, Abe duru yodadi yobodo ma titi yotobalawana ho yatobahowono, Ka hiadono ona duru yokokangela angamoi manga howono kohangoe.

¹⁸ De manga kangela ma dubuho ka hiadono ko yohafinokaua o inomika. De yamao manga hohonenge ma gahe duru itigioka.

¹⁹ Masara de ahao manga kokangela ma goronaka de manga huha ihiboaka, Yomagahoko ato, “Ngona, Ma Jou o Yawe, nomiduhunu!” De Ma Jou o Yawe wahigihene de wahihupu manga kangelaino.

²⁰ De Una ka wotemo dika de yotogumu manga panyakeino, Imaketero hoka ona ngade-ngade manga lungunu ma bionoka, De itodokanino Ma Jou o Yawe wagorakiye la ufa yobodito.

²¹ Ngaro ona duru iwihigiriiri Ma Jou o Yaweiye ma titi ai dora, Abe to Una ai dora duru iwango-wango ka hiado-adonika, De kiani iwihigiriiri ma titi ai karajaanga duru ma rorahai abe wodiai o nyawaika, Una ma ngoe womalega o nyawa manga kangelaika de waduhunu.

²² De duru itiai la ona yomahihuba manga tarimakase ma huhuba Ma Jouiye. De ihinyanyi de manga gogarago ma titi abe Una wodiai ma rorahai.

²³ De naga nanga gogianongoru utu abe manga wowangoka, Yoiki o gahika de yokarajaanga o kapaka abe yaika yaino, De yotobafuku-fukunu o nuu-nuuhu ma ngoeika o gahi ma amokika.

²⁴ De ona de manga lako yamake Ma Jou o Yawe ai bobuturungu, Abe gea wodiai o gahi ma lukuku irupa-rupa abe yahiheranga.

²⁵ De Una gea wapareta o hidalokika ka hiadono o rato wohidadi, Ka hiadono o gahi ma lulu idogo-dogo itou-touniye,

²⁶ Ho imaketero de o gahi ma lulu ihitaili imagorakiye o dihangiye, De ahao iuti-uti dau o gahi ma goronauku, de ona o kapaka yokangela, Manga domoroini ihihangoka de yalufungoka de manga hawana ma dorou.

²⁷ De ko idadiokaua yotagi itiai angamoi imaketero hoka ona gea yadaluku. Hoka duru yadalukoka hiadono ona aika aino yotagi ko itiaiokaua. De manga hininga ihuha hiadono ko ihiorikokaua abe kiani yodiai.

²⁸ Ho ona manga kokangela ma goronaka de manga huha ihiboaka, Yomagahoko ato, “Ngona, Ma Jou o Yawe, nomiduhunu!” De Una wahigihene de waduhunu hiadono manga huha ipaha.

²⁹ Ma Jou naga o rato ma goronaka womanoa de ena gea wohiriidi, De wodiai la o gahi ma lulu enangoo ahao duru iriidi.

³⁰ Ho ona o kapaka gea duru yogarago angamoi ko yakoroongokaua, De Ma Jou wahihira-hira hiadono yoboa o leleotiha, Abe genangoka ka idadi youti manga dumutiha de ko yobinaahaua.

³¹ Ngaro ona duru iwihigiriiri Ma Jou o Yaweiye ma titi ai dora, Abe to Una ai dora duru iwango-wango ka hiado-adonika, De kiani iwihigiriiri ma titi ai karajaanga duru ma rorahai abe wodiai o nyawaika, Una ma ngoe womalega o nyawa manga kangelaika de waduhunu.

³² De duru itiai ona gea Ma Jou iwigorakiye manga ade-ade ma goronaka, Ngaro ma oraha ona yomatoomuino de ma titi o kia dika naga, De ngaro ma oraha manga tonakino ma dimo-dimono manga doomu ma goronaka, Ma, kiani ona yomaketeade-ade abe hokokia Ma Jou waduhunu.

³³ Ma Jou wodiai la o tonaka de ma akeroka idadi o tonaka ma kakaaha. De o kiaka naga o akere ipooteke o tonakino Una wajumo, Ka hiadono ma tonaka idadi duru idudungoka.

³⁴ De o tonaka duru ikutufuru hiadono ma datomo duru de ma hofokoka, Una ahao wodiai la ma tonaka gea idadioka igahi, De ka hiadono manga datomo ko iwangokaua. Hokogea Ma Jou wodiai de angamoi o nyawa abe yogogere manga tonakoka gea, Ona duru yotobadiai itotorou hiadono Ma Jou wahohowono onangika.

³⁵ De naga o tonaka utuoli abe Ma Jou ai karajaanga genangoka, Duru imakawalimi de gea ena wodiai ma tonaka ma beha-behakoka. Abe o tonaka ma kakaaha ma goronaka wodiai la naga ma akere, Hiadono wohiaturu la naga o akere itotaaga genangoka, De o tonaka abe idudunguholi genangoka wodiai la o akere ipootekiye.

³⁶ De ahao o nyawa wao genangino de wahigogere genangoka, Abe ma dihiraino manga tonakoka yohuha manga inomo. Ma Jou manga ngi waturuuru abe ona gea wao o tonaka ma rorahaiika, La ka idadi manga kota yomadiai genangoka.

³⁷ De ma tonaka gea idadioka ikutufuru ho ona abe ahao yomaturuuruino, Ona manga bibiti genangoka ihikabarihi de naga utu yodatomo. De manga angguru ma roehe ma ngoe yodatomo la idadi manga angguru ma redi. De ahao manga redi ma joro ma hasili duru ilamoko.

³⁸ De ma titi Ma Jou duru wahiowa ma ngoe hiadono ona yofaa-faatuku, De manga hapi ma doduduonoo enangoo duru ifaa-faatuku ma ngoe.

³⁹ De abe o nyawa abe yokangela angamoi manga hihira yao itorou Ka hiadono yomulaenge yokuranga abe ko yofaa-faatokaua, De yahitapalu de ma dubuho, de yahikangela hiadono ona duru yohuha.

⁴⁰ Ho Ma Jou o Yawe duru ko wadosanangiua manga hihiraika gea, Ho wadogopoa o himaleke onanguku hiadono wahidadi, La ona gea yodadioka yopoparadidu ma nyawa o tonaka ma kakaahaka.

⁴¹ Masara ona abe yohu-huha o kiahonanga wahihupu manga kangelaino, De manga ngofa-ngofaka yodadi yodogo-dogo yowoe, Ka hiadono imaketero hoka ona yodadi o domba ma duduono.

⁴² De mata-mata gea Ma Jou wodiai naga o nyawa yamake ai datoro gea. De ona abe iwiniiki Ma Jou ai hininga ona yamake de yosanangi, Masara ona abe yotobadiai itotorou, ona yamake de yomarii-riidoka dika.

⁴³ De o nyawa abe de manga hininga ma sosawaro hokogenangua, Ona duru yomadotoko abe yamake Ma Jou ai datorino, Abe ona ahao yamake Ma Jou o Yawe ai hiaturu to una ai nyawaika, De ona yataoko itiai ma titi Ma Jou o Yawe ai dora duru ilaku, Abe to Una ai dora duru iwango-wango ka hiado-adonika.