Higiriiri 106 - Ma Jou ai Demo-demo o TotobelohokaMa Jou wahidoaka ma owa ai nyawaika ngaro ona ka ihikaika iwiporete 1 Kiani ngone o nyawa hihigiriiri Ma Jou o Yaweika! De nanga hininga ma gahumu hotarimakase Ma Jou o Yaweika! De angamoi Una mata-mataika ai hininga ma owa! To Una ai dora ko itoa-toakua ka hiado-adonika. 2 De ko moiua ngoneoka hakunu hohitulihuku mata-mata wodiai de ai buturungu. Angamoi Ma Jou o Yawe kohangoe wodiai abe duru ma rorahai, De hiadono nanga higiriiri Unangiye ko yadonikaua angamoi kohangoeholi wodiai. 3 De ngone abe ai behehongo hohingounu mata-mata ngone hogarago. De nanga gogao o nyawa utuika hapaliara duru irahai, De hoigo la mata-mata hodiai duru itiai Ma Jou ai himangoka. 4 De ngohioo naa tomagahoko Ngona Ma Jou o Yaweika la ka ihikaika nohihohininga, Abe ma oraha Ngona nahiowa to Ngona ani nyawaika, De abe ma oraha ona nahihupu manga hohowonino, iti ngohioo nohiduhunu. 5 Ngaro ngohioo ma toigo tamake ani hiowa o kiahonangino, Naga irupa-rupa ma ngoe abe nahikodoku onangika abe nairikoka, De gea ngomi ma dihiraino nairiki la midadioka to Ngona ani nyawa. Ho ngohioo tonihigiriiri de tomaimono nohihidadioka to Ngona ani nyawa, De hiadono ngomi ani nyawa mata-mata nomadingakoka Ngonaino. 6 Hokogea tomagahoko Ngona Ma Jouika masara, hiokoo! Ngomioo ma oraha naa miahowonoka! Miahowono imaketero hoka mia totoforali yahowono Ngonaika. Ona yohira yodiai itotorou de ma oraha naa ngomioo midiai itotorou! 7 Ahi gogianongoru naa kiani nitotoihene nanga totofora manga ade-ade, Ma dihira abe nanga totofora o Mesiiri ma tonakokahi de ko yomangaratiiuahi, Ngaro yamake abe Ma Jou o Yawe wodiai o heheranga ma ngoe, Ma, ko itedekanua de ona yawohangoka ai duduhunu abe ai doraka de aino. Ho ngaro to Una ani dora ma hiokoo wagopoa onanguku, Masara ona ka iwilawana dika o Bongo-bongo ma gahi ma datekoka, Una Ma Jou Wokokurutiye de abeika ona ka idadi iwilawana. 8 De masara Una woigo la wahihupu manga boditoino la ai romanga wodatoko, Una waduhunu de o heheranga la ai bobuturungu wahimatoko o nyawaika. 9 Ho Ma Jou wohuloko la o Bongo-bongo ma gahi ahao iregu hinooto, De ai kuaha wohuloko o gahika de iregu la idudungu o gahi ma hidogoronaka, De ahao Ma Jou wahihira-hira yomahihora doka ma honongaika, De o Isiraele ma nyawa ngaro yotagi-tagi o gahi ma goronaka, Masara yadoko-doko o tonaka ma dudungika dika. 10 Hokogea Ma Jou ai nyawa wahihupu manga musu manga giamino, Ho o Mesiiri ma nyawa manga kuaha o Isiraele ma nyawaika ko iwaka. 11 De o gahi imakahumoli de manga musu yahidatamunoka de o gahi. Ho manga musu gea ko moiua yolio angamoi yokokihonengoka. 12 De ahao gea o Isiraele ma nyawa duru yangaku Ma Jou ai behehongika, De ona duru de manga garago yonyanyi ihiboa manga higiriiri Ma Jouiye. 13 Masara gea abe Ma Jou wodiaioka onangika ko itedekanua de ona yawohangoka, De hiadono ko yomatongohonua yodamaa ai hiaturu ma owa onangika. 14 Ona o tonaka ma kakaahaka de manga gimono ma hafini duru yahipareta, De ka hiadono yahowo-howono ho Ma Jou ai dongohono yataili. 15 Ho de ahao Una wahidoaka onangika o kia dika yomagahoko, Masara manga gogahoko gea wahidoaka ka ma moi de o panyake. 16 De ahao ona naga manga dodogumoka o tonaka ma kakaahaka, De naga o nau-nauru duru yataleana o Musaika de o Harunikaoo, O Harunu Ma Jou o Yawe ai gilaongo abe Ma Jou womadingakoka, Abe o Harunu wihidadi ai gogianongoru manga hidemo Unangika. 17 De mangale ma titi o Datana de o Abirama manga daleana gea, O dunia ma tonaka ipelaka ma ngoatika hiadono yaotaka dau ma belakuku, Ho o Datana de o Abirama de ona mata-mata abe yotobalawana yahidulungunoka. 18 De ma moioli Ma Jou wohiboa manga doomuino o hohowono ma rupa o uku. De abe ona yodiai itotorou Ma Jouika yauku hiadono yotinoka. 19 De o Sinai ma lokuoka ona yomadiai manga pangao ma rupa o hapi ma ngofaka, De yomahuba-huba o hapi ma ngofakika abe yodiai o gurasino. 20 Hokogea Ma Jou o Yawe ai medebini ma dararono ato yaturuuru, Abe yomahuba-huba ko Unangikaua masara duru ma rupa o hapika, Abeika Ma Jou Wotebi-tebini iwiporetika de yomaponuku enangika, Hoka yomahijou ma rupa o aewanika dika abe o ruruubu itobaolomo. 21 Ona hoka manga Jou iwiwohangoka abe wahihupu manga boditoino, Una Ma Jou Wopoputurungu abe wodiai o heheranga ma ngoe ma ago-agomo, Hiadono ona o Mesiiri ma tonakoka yamake mata-mata wodiai de ai buturungu. 22 Igoungu, duru o nyawa yatomomonoka de manga heranga genangika, Abe Ma Jou wodiai o Haama ai tonakoka, de ka utuohi wodiai, Abe o Bongo-bongo ma gahino yoboa de yatomomonokali ai heherangika, Angamoi Una wotobadiai abe o nyawa duru ko yakunua yodiai hokogea. 23 Ho ma titi Ma Jou iwiporetoka hiadono Una wahidee wato ona wahibinaaha, Masara o Musa abe Ma Jou wiirikoka duru ai nyawa waademo Ma Jouika, Nako o Musa ko wodadiua manga hidemo Ma Jou o Yaweika ona yokokihonenge, Masara una duru wagahoko hiadono Ma Jou ai ngamo wohiriidi. 24 De ma oraha ona nagau o behehongo ma tonaka ma batingoka, De ona ko yomahinganonua Ma Jou ai buturungika de yoluku yowohama, Abe manga ngongaku ai behehongika ko yagou-goungua ho ka yoluku dika, Ona ko yowohamua angamoi yomafikiri Ma Jou ko wakunua wapaliara. 25 De ona yokurubungu dika manga tau o ngoerino ma goronaka, De ko iwihingounua abe Ma Jou o Yawe ai ilingi yoluku ihigihene. 26 Ho Ma Jou wahibehehongo de o hikoboto ma demo onangika, Wato wodiai la ona o balu-baluhu wahohonenge dika o tonaka ma kakaahaka. 27 De to ona manga ngofa-ngofakuku ahao wahikabarihi o tonaka utuika, De wato wahihupu manga tonakino de wahigogere o nyawa ma homoaka, Ka hiadono o tonaka ma ngoe abe duru ikurutika de genangoka ahao wahigogere. 28 De ahao naga nanga totofora abe yomatobahuba-huba o pangao o Baalika, Yaniiki o Moaba ma nyawa ma oraha yomahuba o Baalika o Peoro ma lokuoka, De ngaro manga huhuba ma inomo abe yahihuba manga goma-gomangika, Ma Jou ai nyawa onangoo yaolomo manga huhuba ma inomo gea. 29 De Ma Jou o Yawe wamake ai nyawa hokogea yahowono Unangika, De duru ai ngamo ifae onangika ma titi gea abe yotobadiai ihowono. Ho Ma Jou wohiboa o panyake abe duru imahora-hora manga hidogoronaka. 30 De ahao nanga tofora womatengo abe ai romanga o Pinehasa womahisapuru, Una gea wamoroini o nyawa manga howono wohitogumu ma goronaka, Ho o panyake gea ko itagiokaua angamoi Ma Jou wisanangi o Pinehasika. 31 De o Pinehasa gea iwietongo o totiai ma nyawa de ai hitogumu ma ade-ade gea, De ka hiadono ma oraha naa o nyawa ka yoade-adeohi ma titi una. 32 De o Meriba ma ngioka genangokaoo Ma Jou o Yawe wangamo ai nyawaika, De wihuloko o Musaika abe kiani wodiai la o akere ihupu o hakaruino, Masara o Musaoo ahao wamake o kangela abe ma titi ona yodiai ma dorou. 33 De angamoi o Musa ahao de ai ngamo ma demo wataere onangika, Masara ai demo gea ko womafikirikaua de ka wohidemo ko itiaiua gea. 34 De abe Ma Jou wahibehehongo ai nyawaika gea ona ko ihingounua, Una wato kiani yahibinaaha o nyawa abe ma dihiraino yogogere o Kanani ma tonakoka, 35 Masara hokogenangua yodiai, ona ahao yomahikasapurika o nyawaika gea, De yaniiki o Kanani ma nyawa manga wowango ma biaha abe duru yodiai itotorou, Ka hiadono o Kanani ma nyawa manga popangao Ma Jou ai nyawa yomahitoona. 36 De Ma Jou ai nyawa yaleleani o Kanani ma nyawa manga popangaoika gea, Ka hiadono o popangao gea idadioka hoka o modoi onangika. 37 De gea igoungu ka hiadono manga ngofa-ngofaka yahihuba, Abe ngaro o nauru eko o ngofeka ma, yahihuba o toka-tokatika. 38 Yakopoa manga ngofa-ngofaka manga awunu o pangao ma huhuba ma ngioka, De ngaro manga ngofa-ngofaka gea manga howono ko iwa. Masara manga awunu yakopoa la yomahihuba o Kanani ma nyawa manga popangaoika, De hokogea ihipeseke manga tonaka de o domaino. 39 Ho gea onangoo duru yomahipeseke de gea yodiai duru itotorou, Abe manga hininga adaene o nyawa manga popangaoika, De yodiai abe itotorou gea duru Ma Jou o Yawe ai himangoka, Imaketero hoka o ngofeka modiai itorou abe ami badanga motobafukunu. 40 De gea ma titi hiadono Ma Jou o Yawe ai ngamo duru ifae, De ifae to Una ai nyawaika ka hiadono waemono onangika, Ngaro ka ona dika ma dihiraino wahidadi to Una ai nyawa, De wahibehehongo onangika wato to ona manga oara naga abe Unangoka de aino. 41 Masara ona iwiolukoka ho wahidoaka o nyawa utu manga giamika, Ho hiadono ona gea abe ko iwingakua Ma Jouika de duru yadohata ai nyawaika, Onangika gea Ma Jou wahidoaka la onangoli ai nyawa yahipareta. 42 De manga musu gea duru yahiwedere o Isiraele ma nyawa manga wowango. De duru yahitipokouku de manga kuaha ma dualono. 43 Ma ngoe Ma Jou ai nyawa wahihupu manga musu manga kuahaino, Masara ona ka ihikaika yomangiriki la iwilawana Unangika, De ka hiadono de to ona ma hirete manga howono yomahikangela. 44 Masara manga kangela ma goronaka de Ma Jou ai dora ka ilakuohi, Abe de ai dora ma hiokoo wagihene ma oraha manga kangela ihiboa-boaka. 45 De Ma Jou womahihohininga ai behehongika abe wahibehehongoka, Abe ma dihira wato, “Ngohi ahi nyawa tapaliara ka hiado-adonika,” Ho ai hohowono gea ko wohigila-gilaua angamoi ai dora onangika ko itoakua. 46 De Una wokarajaanga to ona manga hiningaka abe yahipareta ai nyawaika, Hiadono onangoo yamao manga dora ma hiokoo itagi Ma Jou ai nyawaika. 47 Ho naa Ngonaiye, Ma Jou o Yawe, ngohi tomigahoko ngomi ani nyawa! Ngona to ngomi mia Jou de duru tomigahoko la nomihihupu mia boditoino! Togahoko la Ngona nomihitoomuino o nyawa utu manga tona-tonakino, De nomihigilio mia tonakika la ka idadi mitarimakase Ngonaiye, Mia tarimakase ma demo mihiboa to Ngona ani romanga ma debi-debiniye, De mia gogarago de mia higiriiri mihiboa Ngona mia Jouiye. Hokogea ahi gogahoko Ngonaiye, to ngomi mia Jou. 48 De naa ahi gogianongoru ngaro ngone hihigiriiri Ma Jou o Yawe, Una to ngone o Isiraele ma nyawa nanga Jou, Una abe wowango ka hiado-adonino de ka hiado-adonika! Gea hoihene de ngone o nyawa mata-mataika kiani hotemo, “Amin!” De tohigali-gali tonahigaro, “Hihigiriiri Ma Jou o Yaweiye!” |
Gereja Firman Allah, Yayasan Misi Masyarakat di Pedalaman
New Tribes Mission