Higiriiri 105 - Ma Jou ai Demo-demo o Totobelohoka

Homahihohininga abe Ma Jou o Yawe ai nyawa waduhunu de ai heheranga ma ngoe

O Koano o Dautu wotulihi o nyanyianga naa

¹ Ahi gogianongoru kiani de nanga hininga ma gahumu hotarimakase Ma Jou o Yaweika! To Una ai romanga duru hohiboa-boakiye la Una higorakiye! To ngone nanga karajaanga hahingahu-ngahu o dunia ma amokika ma titi Una, La o nyawa o tonaka mata-mataika iwihioriki gea abe Una wodiai.

² Ngone honyanyi Unangiye de gea hohinyanyi nanga higiriiri Unangiye. De ai heheranga wodiai gea haade-ade o nyawa mata-mataika.

³ Ma Jou o Yawe ai romanga duru ma debi-debini De ngone kiani ai romanga hagorakiye de nanga gimono, Ka hiadono to Una ai romanga ihiboa o sosanangi ma amoko. De ngone homahuba-huba Ma Jou o Yaweika de o garago ma ilingi.

⁴ De kiani ngone hilingiri Ma Jou o Yawe de ai buturungu, De ngone ka ihikaika Una ka hilingirohi de nanga hininga ma gahumu.

⁵ Ahi gogianongoru gea abe Ma Jou wodiaioka ngone kiani homahihohininga. Ma rorahaiholi mata-mata abe wodiaioka la wonaduhunu. De homahihohiningaoo abe ai heheranga de ai hohowono o nyawaika.

⁶ Abeika ngone naa o Abarahaama ai totoforauku! Abe o Abarahaama ai hininga la ka ihikaika wileleani Ma Jou, Ngone naa Ma Jou wonairikoka la hodadioka to Una ai nyawa, Abe ngone o Yakubu ai ngofa-ngofakuku womahitouna.

⁷ Ngone homahijou Ma Jou o Yaweika, Una to ngone nanga Jou. De itararono, abe Una wapareta o dunia ma nyawa mata-mataika.

⁸ De to Una ai behehongo o nyawaika duru ko waturuurua abe wahibehehongoka. Ho ngaro o nyawa abe yolape-lapeuku o sana moiuku, Masara Una ko wawohongua ai behehongo abe wato ahao wodiai.

⁹ De naga Ma Jou ai behehongo moi nanga toforaika o Abarahaamika, De ai behehongo gea womahitaana de o koboto ma behehongo o Isakika,

¹⁰ De ahao Ma Jou ai behehongo gea wihibehehongoli o Yakubika. De ena gea o behehongo abe imahilaku ka hiado-adonika, abe wotemo wato,

¹¹ “Ngohi ahao tinihidoaka nginika o Kanani ma tonaka abe nia oara Ngohino, De ma tonaka gea ahao idadi ti ngini nia oara ma rorahai ka hiado-adonika.”

¹² Hokogea Ma Jou wahibehehongo ai nyawaika ma oraha ona ko yowoeuahi, De o nyawa utu yamake nanga totofora gea duru ko kia-kiaua ato, “Ona o homoaino ma nyawa abe yomahidioniki nenangoka.”

¹³ Abe ma oraha gea nanga totofora yaika yaino o tonaka muruono naga, De o nyawa o tonaka homoi-homoiika gea naga manga koano, De o kokoano gea yahikoano o nyawa mata-mataika abe naga manga tonakoka.

¹⁴ Masara Ma Jou o kokoano gea ko wahigunoaua la ai nyawa yahikangela, Hiadono Ma Jou watemo o kokoanoika gea de ai hitiari onangika, De ai nyawa wademo done ona abe duru de manga buturungu yahikangela.

¹⁵ Ma Jou wahitiari wato, “Ngini ufa to Ngohi ahi nyawa niahikangela, Ona gea tairikoka de tomahitongohioka, De naga ahi uru ma dodofanga manga hidogoronaka, ho ufa onangoo niahikangela.”

¹⁶ De ahao Ma Jou wohiaturu la naga o hiwara abe duru ikiria, De adaene o Kanani ma tonaka mata-mataika hiadono o inomo ko iwaka.

¹⁷ Masara o hiwara gea ko idadiuahi de ma dihirainohi Ma Jou ai hidee naga, To Una ai nyawaino wiiriki womatengo la wihidingoto o Mesiiri ma tonakika. Abe una wiirikino gea o Yusupu de una iwifukunu la iwihidadi manga huhuloko.

¹⁸ De ma oraha o Yusupu naga o Mesiiri ma tonakoka o kangela iwidaene, Abe ai louika yahidaranteika hiadono ai lou ma roehe yatingihiri. De ai tomarino ihidatabanino de o behi de iwihidapakitika genangika.

¹⁹ De o Mesiiri ma tonakoka Ma Jou widotoko o Yusupu, Abe to una ai datoro ma gou-goungu Ma Jou witaili, De o Yusupu ai demo abe ma dihira wohingahuoka, Gea ahao idadi duru imakadaene abe hoka wotemoka.

²⁰ De ahao Ma Jou wipake o Mesiiri ma nyawa manga koano o Firaunu, La de ai koano ma kuaha o Yusupika wihihupu ai kokangelaino, Una wohuloko la o bui ma ngorana wafelenga de o Yusupu wihihoheoka.

²¹ De ahao o Firaunu gea o Yusupu wigorakiye hiadono unangoo de ai kuahaka, De wihitagongo la o koano ai tau ma hiaturu mata-mataika wihidoaka, De ngaro o koano ai kiahonanga enangoo o Yusupu ai kuaha ma goronaka.

²² De o Yusupu wadotoko o koano o Firaunu ai duduhunu ma nyawaika, De onangoo wadotoko abe manga koano iwiduhunu de manga sosawaro, De ma titi o kia dika o Yusupu woigo wadotoko onangika ma ka idadi.

²³ De ahao adonoka ma oraha o Yusupu ai baba o Isiraele de ona ai tauoka yokokiboa, To una ai romanga hinooto abe ma dihira iwihiromanga o Yakubu, De naa unangoo wogogere hoka o homoaino ma nyawa o Haama ai tonakoka. Abe ma dihira o Nuhi ai ngofaka o Haama ai gogere o Mesiiri ma tonakoka.

²⁴ De Ma Jou o Yawe ai nyawa wapaliara genangoka de duru yofaa-faatuku, Hiadono nako manga musu de ona, ka to onangohi manga buturungu ilaku.

²⁵ De ma oraha gea Ma Jou wahigaro o Mesiiri ma nyawaika, La gea yalawana o Isiraele ma nyawaika de yahidee itorou onangika.

²⁶ Masara Ma Jou o Yawe ai gilaongo o Musa wihidingoto ai nyawaika, De o Harunu unangoo wiirikoka la yomakiniiki de o Musa.

²⁷ La ona yahinooto ihitunguu de Ma Jou ai heheranga o Mesiiri ma nyawaika, Hiadono o heheranga ma ngoe yamake o Haama ai tonakoka gea.

²⁸ De Ma Jou o Yawe wohiboa ai dodunguu o fufutu abe yahidofufutuoka, Angamoi o Mesiiri ma nyawa duru yalawana Ma Jou ai demoika, Abe duru yoluku yahigunoa Ma Jou ai nyawa o Mesiiri ma tonaka yanoa.

²⁹ De naga Ma Jou ai dodunguu moi abe wohipoha manga akerika, De manga akere gea wohidadi o awunu ho ma nawoko ikokihonenge.

³⁰ De naga o dodunguu moioli abe manga tonaka aomangoka de o popaa duru kohangoe, Ka hiadono ngaro o koano ai kamara abe o nyawa utu ko idadiua yowohamika, Masara o popaa gea iboa hiadono utu ka idadi iwohama ai kamara ma goronaika.

³¹ De Ma Jou o Yawe ka wotemo dika de o hihiri de o gufuru duru kohangoe iboa, De yahikangela abe yakokolongunu o Mesiiri ma nyawaika, O Mesiiri ma tonaka ma dobikoka ka hiadono doka ma bahaika o hihiri gea naga.

³² De o awana biahaua Ma Jou wadoburaraha onanguku, Abe o Mesiiri ma nyawa duru yadoburaraha de o es ma awana, De imakasapuru de o leletongo abe yahihawana manga tonaka ma amokika.

³³ De hokogea Ma Jou wohirusaka o Mesiiri ma nyawa manga dato-datomo, Ka hiadono manga angguru de manga gota-gota wohiwedere mata-mataika.

³⁴ De Ma Jou ka wotemo dika de o kabotara iboa kohangoe o Mesiiri ma nyawaino, O nyawa ko idadiua yaetongo o kabotara abe ihibinaahaka manga inomo.

³⁵ Abe manga tonaka atamunoka de ma kabotara ho ma bihi-bihi o kia dika naga, De yakokiolomo hiadono o Mesiiri ma nyawa manga datomo yamataka.

³⁶ De ahao Ma Jou wapoha o Mesiiri ma nyawa manga domo-domorika, Ho o nau-nauru gea abe duru yomaimono onangika Una wakokihohonengoka.

³⁷ De Ma Jou ai hohowono gea ibooto de ahao ka idadi ai nyawa yohupu, O Mesiiri ma tonakino Ma Jou ai nyawa wahihupu mata-mata. De ngaro ma dihira yohu-huha ma naa yosobo de o gurasi de o haaka ma ngoe. De ko moiua onangoka yobole eko yopanyake ma oraha yohupu.

³⁸ De Ma Jou ai nyawa yopahaka de o Mesiiri ma nyawa ona duru yososanangi dika, De angamoi duru yalufungoka de manga modongo ai nyawaika.

³⁹ De o Isiraele ma nyawa manga dodagi ma goronaka naga o lobi moi, De Ma Jou o Yawe ai lobi gea hoka o dadamunu abe wawoata manga lokuino, De wahidoaka onangika o uku ma dokara ikurutiye abe yahitararono o futu-futuoka.

⁴⁰ De ona yomagahoko o roehe de Ma Jou wahiolomo de o totaleo o puyu, De ka ihikaika wahidailako o roti o mana o Horogaino hiadono yapunuhoka.

⁴¹ De Ma Jou o hakaru ma amoko wapelaka de o akere iharabaka, De o akere gea ihahuru ma amoko hiadono o tonaka ma kakaahaika.

⁴² De o heheranga mata-mata gea Ma Jou wodiai ihititi ai behehongoka, Abe ma dihira wihibehehongo ai gilaongo o Abarahaamika, De ma oraha naa adonoka Ma Jou wohingodumu ai demo ma debi-debini gea.

⁴³ Ona abe wairikoka la yodadi to Una ai nyawa duru de manga garagoka wahihupu, Hiadono o Mesiiri ma tonaka yanoaika de ona duru iwihigiriiri manga Jouika.

⁴⁴ De ahao wahidoaka onangika o nyawa utu manga tonaka abe de ma redi-redioka, O nyawa utu gea ko yomahuba Ma Jouikaua masara yomahuba o popangaoika. Ho to ona manga redi ma hasili naa idadi o Isiraele ma nyawali manga utumu.

⁴⁵ De mata-mata gea Una wohiaturu la ka idadi yamake ai duduhunu onangika, Abe hokogea idadi de ona yosanangi yaniiki to Ma Jou ai mau, De to Una ai mau la ai popareta de ai behehongo onangika ihikokihingounu. Ho naa ngone kiani hihigiriiri Ma Jou o Yaweika!