Higiriiri 103 - Ma Jou ai Demo-demo o Totobelohoka

O Dautu ai Higiriiri Ma Jou o Yaweika ma titi ai dora

¹ Doka ahi hiningaka tomatemo tato, “Iti ngohi tihigiriiri Ma Jou o Yaweika; De ahi hininga ma gahumu tohigiriiri ai romanga ma debi-debinika!”

² De ngohi tohigalioli tomatemo tato, “Iti ngohi tihigiriiri Ma Jou o Yaweika; De ufa tawohanga ma owa mata-mata gea abe wodiai la wohiduhunu.”

³ “Una woigo wohihiapongo hiadono ka ihikaika ahi howono Unangika waofi, De ma oraha topanyake Una abe ka ihikaika wohihitogumu ahi popanyakeino.

⁴ De Una wohibangu hiadono wohihihupu o hohonenge ma kuahaino. De naga ma ngoe wohiboa ahi wowangoino abe genangoka wohihimatoko ai dora, De to Una ai dora ma hiokoo ka ihikaika wohihimatoko ngohino.

⁵ De wohihidailako de ma owa ma ngoe ahi wowango ma goronaka, De wohihiputurungu ka hiadono tamao hoka ahi badanga ma gooikali ilio, Hiadono ahi buturungu imaketero hoka o totaleo o koloba ma buturungu.”

⁶ Ma Jou o Yawe naga ai mau la to Una ai totiai wahidoaka ai nyawaika. Abe ma ngoe o Isiraele ma nyawa manga hininga ihuha angamoi o nyawa utu yao itorou. De o nyawa gea manga howono abe ai nyawaika Ma Jou watailako de wahohowono, Hokogea Una wodiai la ai nyawa mata-mata wahihupu manga kangelaino.

⁷ De Ma Jou o Yawe ai hiaturu o nyawaika wohimatoko o Musaika, De wahimatoko o Isiraele ma nyawa mata-mataika ai hiowa onangika.

⁸ Abe Ma Jou o Yawe ai dora ma hiokoo duru itagi ngoneuku, De ai dora ko homaijaua angamoi ai dora wonahidoaka dika. De ngaro hahowono Unangika masara ai ngamo ko itaitua ifae ngoneika, De angamoi Ma Jou o Yawe ai dora duru de ma dongohonoka.

⁹ Ho hiadono Una ma moi ma moi dika wonataere ngoneino, De ai dodaere ma ngamo enangoo itagi ko ikiriaua ngoneino.

¹⁰ Ho ngaro ngone hahowono Unangika ma ngoe ma, abeika ai owa, Ngaro hahowono ma getongo, ma una ko wonahohowonua. De nako nanga datoro ma dorou de hohidotelega, De abe nanga hohowono hamake Unangino, Ma titi duru nanga datoro ma dorouohi abe duru itubuho. Abe tanu itiai nako nanga hohowono utuohi itubuho hamake Unangino. Masara mangale ma titi Ma Jou ai dora ma amoko, ho, hokogenangua hamake.

¹¹ To Una ai dora ngoneino duru ko itoa-toakua ngoneino, Abe iti ngone naga nanga horomati ma modongo Unangika. De nako hakunu Ma Jou ai dora hotuga ena gea duru kohagurutiye, Abe o dunia de o Horoga imakitingaka duru kohagurutiye, De hokogea Ma Jou o Yawe ai dora ma gurutiye.

¹² Abe de nanga howono Unangika ena gea wohikatingaka ngoneino, Hoka o wange ma bootoka de o wange ma dumuniha hokogea inahikatingaka, Abe hokogea ma gurutika ngone de nanga howono inahikatingaka,

¹³ De Ma Jou o Yawe ka idadi to Una ai hininga hohiketero Abe imaketero hoka o ngofa-ngofaka manga baba ai hininga onangika. Abe Ma Jou o Yawe ai hininga ka ihikaika duru ibole ngoneino, Abe iti ka ihikaika nanga horomati ma modongo naga Unangika.

¹⁴ De hokogea Ma Jou ai hininga ngoneino angamoi womangaratii, Abe to ngone nanga buturungu de nanga dongohono duru ko kia-kiaua. Una wonahioriki ngone o nyawa abe wonahidadi o tonakino.

¹⁵ Hohiketero abe to ngone nanga dekana o dunia ma lokuoka, Imaketero hoka o ruruubu de o fuhuku ma bunga-bunga, Abe iwangoiye masara ka jai-jai dika de ihonenge. De ngoneoo nanga wowango iwango de ibunga irahai, Masara enangoo imaketero ka jai-jai dika de nanga badanga ihonenge.

¹⁶ Ka de o hidaloko yawuwuoli nanga ngiika de ko inaiwaka. Ho imaketero dika hoka ko ma moiuahi hogogere genangoka.

¹⁷ Masara Ma Jou o Yawe ai dora duru iwango-wango ka hiado-adonika, De ai dora gea naga onangoka abe de manga horomati ma modongoka Unangika. De to Una ai totiai itagi to ona manga ngofa-ngofakika, De imahikauku itagi hiadono to onangoo manga ngofa-ngofakuku.

¹⁸ Iti onangoo ka ihikaika duru yaniiki to Una ai behehongo. De ona yahingounu to Una ai behehongo mata-mataika.

¹⁹ Ma Jou o Yawe womaputuhu daku Una wogogere o Horogaka, Genangoka ai kadera de wahikoano ai dulaada mata-mataika.

²⁰ Ngini o momalaekata genangoka niwihigiriiri Ma Jou o Yaweika. Ngini abe winihidadi ai duduhunu abe ka ihikaika winihikarajaanga, De abe niwihigihene la to Una ai hiaturu nihidagi mata-mataika, kiani ngini niwihigiriiri!

²¹ Ngini duru nia ngoeholi Ma Jou ai tentara o momalaekata, De tohigalioli tinihigaro nginika tato itiai niwihigiriiri Ma Jou o Yaweika! Abe ngini ka ihikaika niwileleani de nianiiki to Una ai mau, ho, niwihigiriiri!

²² De ngaro Ma Jou ai dulaada mata-mataika ka idadi tahigaro, La ena abe Una wahikoano mata-mataika iwihiborigiriiri Ma Jou o Yaweika. De ngohioo tomahigaro la ka ihikaika tihigiriiri Ma Jou o Yaweiye!