Higiriiri 1 - Ma Jou ai Demo-demo o Totobelohoka

Ma Jou wahiowa onangika abe iwitobanii-niiki Unangika

¹ Ona abe ma hiowa yamake, gea ona abe: Ko yaniikua o nyawa manga higaro ma demo nako ona Ma Jou ko iwingakua, De ko yomahikasapurua onangika abe yatobahowo-howono, De ko yomahidogogerua onangoka abe yahohedu ma totiaiika.

² Masara ona naga manga garago abe ihititi Ma Jou o Yawe ai Demo-demoika, hiadono manga dora itagi enangika, Ho ngaro o futu de o wange ma, ka ihikaika manga hininga ma dumutu ka Ma Jou ai behehongika dika abe genangika yoigo yomahihohininga.

³ Ona gea ahao manga wowango imaketero de o hofoko ma gota Abe o nyawa yodatomo o akere ma ngairi ma datekoka. Ho ma oraha adonoka ihofoko de duru itohofoko ma rorahai ma gota gea, De ngaro o hiwara masara ma gutufuru de ma rorahai ko ihihangua. Hokogea ona abe manga wowango ihibitumuku Ma Jou ai Demo-demoka, De gea mata-mata ona yodiai ahao ihiboa ma hasili ma owa.

⁴ Masara imakohowono to ona manga wowango abe ko iwingakua Ma Jouika, Ona gea manga wowango duru imaketero de o pine ma afa dika, Abe ka de o hidaloko adaene de ihailoka ka hiadono ihihanga.

⁵ Ho ma oraha Ma Jou wahohowono ona ko iwingaku-ngakua gea, De duru ko iwa manga ngekomo la yomaduhunu, De ona yatobahowo-howono gea, Ahao ko yaiwa o totiai ma nyawa manga doomuoka.

⁶ Angamoi yototiai manga wowango ma dodagi Ma Jou o Yawe wagoana, Abe ihititi dau de ka hiadono doka ma bahaika Ma Jou wahihira-hira. Masara ona yatobahowo-howono manga wowango ma dodagi imakohowono, Angamoi to ona manga dumutu o bobinaahaika dika.