Higalioli 4 - Ma Jou ai Demo-demo o Totobelohoka

O Pasala 4 ko atailakouahi O Musa wahigaro ai gogianongoru la duru yaniiki itiai Ma Jou ai behehongo onangika

¹ De ipahaino de o Musa wahigaro ai gogianongoruika wato, “Abeika, ngini o Isiraele ma nyawa, ngini kiani duru nitotoihene de nianiiki itiai ma huhuloko ma demo naa nginika. Abe nako naga nia hingounu Ma Jou ai huhuloko ma demoika de ahao ka idadi niwango irahai de niwohama ma tonakika gea abe nia totofora manga Jou o Yawe winihidoaka nginika. De niwohama ipaha de ka idadi nimahitingini ma tonaka gea la idadi ti nginioli.

² De hokonaa tinihitiari tato, ufa ngini nihidogo ma huhuloko ma demoika, abe ngaro o demo ma betongo moioo masara ufa nihidogo nia Jou ai huhulokika abe naa tinidofanga nginika. De hokogenangoo ufa hiadono ngini niakuranga eko niatumungu o demo utu ai huhulokino done niatilakuru enangika. Masara kiani ngini duru nianiiki itiai to Una ai demoika.

³ Angamoi ngini ma hirete niamakeoka de nia lako nanga Jou ai datoro abe wodiaioka ti ngini nia hidogoronaka o Peoro ma lokuoka. Abe gea Una wahibinaaha ona mata-mata nginioka abe yomahuba-huba o Peoroka manga jou o Baalika.

⁴ Masara ngini onagona dika abe nitobagou-goungu nimahuba-huba nanga Jou o Yaweika dika, gea ngini ko kia-kiaua idadi nginika de ngini nagahi ka hiadono ma oraha naa naga, moioo de ko iwa abe inihihanga!

⁵ De abeika ngohi naa tinidofangoka de tinidotokoka to Una ai huhuloko de ai hiaturu mata-mata la ngini ahao ka idadi nianiiki itiai ma oraha niwohama ma tonakika gea.

⁶ Ho kiani ngini duru nihidodiai nianiiki enangika. Angamoi ahao o nyawa utu yamake nia wowango ma dodagi de yoihenoli ma titi ai huhuloko ma demo gea. Ho nako ona yamake abe nia wowango ma datoro ma rorahai gea ihititi to Una ai huhuloko ma demoka de ahao ona yomaketeade-ade de inihigiriiri ato, ‘Abeika o nyawa yowoe-woe gea duru yososawaro!’ Hokogea manga higiriiri ma demo.

⁷ De gea manga demo duru itaana, angamoi duru ko iwa o nyawa utu abe manga jou naga ma digi-digino la yaduhunu onangika. Masara nako to ngone nanga Jou o Yawe, Una naga ngoneoka de ka idadi wonaduhunu ma oraha homagahoko Unangiye!

⁸ De nako o homoa ma nyawa utu abe yowoe-woe de yomahipareta, duru ko iwa abe naga de manga huhuloko de manga hiaturu ma demo abe ka itotiai dika mata-mataika. Masara nako to ngone nanga demo Unangoka de aino abe bootino tinihihohininga nginika, gea ena duru itotiai dika ma demo.”

⁹ “Masara iti ufa ngini niawohanga to Una ai datoro abe ngini ma hirete niamakeoka de nia lako. De ufa hiadono ai datoro ma ade-ade ihihanga nginioka, masara abe hokokia dika nia wowango ma dekana o duniaka naa de kiani ngini nimahiketehihohininga de ai datoro gea niade-ade nia ngofa-ngofakika de nia dano-danonguku la onangoo ihioriki nanga Jou ai datoro gea.

¹⁰ Abe ufa hiadono ngini niawohanga ma oraha nimakokitoomuino o Sinai ma lokuoka. Gea ngini mata-mata naga Ma Jou o Yawe ai himangoka angamoi Una wohihuloko wato, ‘Ngona kiani o nyawa mata-mata gea nakokitoomuino ahi himangoka la Ngohi ma hirete tadotoko onangika ahi demoino. De gea ka idadi yototoihene de yomadotoko la ahao ona ka idadi naga manga horomati itagi Ngohino. Ho ona ihihingounu Ngohino ka hiadono manga wowango ma bahaika, de hongoli ona ka idadi yadofanga de yadotoko ahi demo gea manga ngofa-ngofakika la onangoli manga horomati itagi Ngohino.’ Hokogea to Una ai demo, ho ngohi tiniahoko la ngini mata-mata nimatoomuino.

¹¹ De ahao nikokiboaino de nimaokoino duru o loku gea ma timiuku, de niamake abe ma lokuoka naga ma uku ihololomiye daku ma dihangiye. Masara nagali niamake abe duru ifufutu daku ma lokuoka angamoi ihihawo de hoka o lobi ma biri-birini.

¹² De ahao nanga Jou o Yawe winitemo nginika o uku ma goronaino de ka idadi niihene ai ilingi ma demo masara ko kia-kiaua niamake de nia lako.

¹³ De gea ma oraha abe Una winihimatoko de winihingahu nginika to Una ai behehongo abe ngini de Una nimahiketehibehehongoka. Abe ai behehongo gea ai pareta ngimoi de ihitulihika o hakaru hinootoika. Ho gea ma behehongo ma demo abe Una wato ngini kiani ka ihikaika nianii-niiki enangika.

¹⁴ De nagali ma oraha gea to Una ai demo ngohino abe Una wohihingahu ai huhuloko de ai hiaturu ma demo abe ngini kiani nianiiki ma oraha ngini niowohama ma tonakika gea la nimahitingini. De gea ai demo tinidofanga nginika la ka idadi ngini nihioriki. Hokogea to Una ai datoro de ai demo abe ngini ma hirete niamake ma oraha gea.”

Ma Jou duru woluku la o Isiraele ma nyawa yomahuba-huba o jou ma homoaika

¹⁵ De o Musa wahitiari o Isiraele ma nyawaika wato, “Ngini kiani duru nimahidodiai de nimagoana done niawohangika to Ma Jou ai behehongo. Angamoi ma dihiraino gea abe o Sinai ma lokuoka de Ma Jou o Yawe winitemo-temo o uku ma goronaka de aino de duru ko niamakeua to Una ai rupa o kia dika.

¹⁶ Ho ngohi tinihihohininga ma titi gea la ufa ngini nimadiai moi abe niato gea to Una ai rupa eko ai hapa. Angamoi nako hokogea nia datoro ahao nimahirehene Unangino de ka nimahipeseke to Una ai himangoka. Ho gea hiadono tinihitiari tato ko idadiua ngini nimadiai o kia dika abe ma rupa hoka o nyawali ngaro o nauru de ngaro o ngofeka ma rupa.

¹⁷ De ngaro o aewani o kia dika abe igogere ma tonakoka de o totaleo abe ihoo-hoho ma dihangoka masara ko idadiua gea ma rupa nimadiai la niato nimahijou enangika.

¹⁸ De ngaro o aewani o kia dika abe imalia-liara o tonakoka de ngaro o nawoko o kia dika abe iwango o akeroka de o gahi ma lukuoka ma ko idadiua.

¹⁹ De hokogenangoo nako ngini nimamatagaiye daku o dihangiye de niamake o wange de o mede de o muru-murumu de mata-mata abe naga ka idadi niamake o Horogaka. Genangoo ngini kiani nimahitiari la ufa inihiloara enangika de hiadono nimahuba-huba de nialeleani. Angamoi abe naga o Horogaka gea nia Jou o Yawe Una wahitagongoka la yodadi o dutu homoi-homoi o duniaka manga jou ho ona yomahijou enangika.

²⁰ Masara nako ngini naa nimakohowono de ona angamoi Ma Jou o Yawe winiiriki ngini de winihidadi to Una ma hirete ai nyawa. Abe ma dodihiraino de ngini o Mesiiri ma tonakoka nimanoa de o kokangela ma dodubuho niaohana. Masara ipahaino de Una winihihupu o Mesiiroka de niaino la hiadono ma oraha naa de ka idadi inihiromanga to Una ai nyawa abe ai hininga duru inidaene nginika.” Hokogea o Musa ai hitiari ma demo o Isiraele ma nyawaika la ufa yomahijou ma homoaika.

²¹ De ahao o Musa wohigila-gila ai demo onangika wato, “Masara ipahaino de idadi abe Ma Jou o Yawe duru wongamo ngohino mangale ma titi ngini naa, ho Una womahikoboto wato duru ko idadiua ngohi tomahihora ma akere gea ma honongaika la towohama ma tonaka ma rorahaiika abe Una winihidoaka nginika naa.

²² Ho igoungu ngohi naa ahao tohonenge naa ma honongaka, masara ngini dika ka idadi nimahihora doka ma honongaika de niwohama ma tonakika gea la idadi ti nginioli nia oara ma tonaka.

²³ Ho ngini kiani duru nimahidodiai de nimagoana la ufa niawohangika ti ngini nia behehongo abe nimahiketehibehehongoka de Una. Abe duru ko idadiua ngini nimadiai ma rupa moi la nimahuba enangika, abe ngaro o kia dika ma rupa eko to onagona manga rupa masara gea mata-mata duru ko idadiua nimadiai angamoi hokogea winihulokoka.

²⁴ Angamoi ti ngini nia Jou o Yawe, Una gea duru woluku la ti ngini nia hininga {adaene de utuika / itagi ma homoaika} masara Una wato ngini duru nimahijojo ka Unangika dika. Ho nako nia hininga itagi ma homoaika de ahao to Una ai hohowono duru kohagiria inidaene nginiuku angamoi to Una ai hohowono gea imaketero hoka o uku moi duru kohaamoko abe yahibinaaha mata-mataika abe adaene enangika. Ho ngini kiani duru nimahidodiai la ufa hiadono ngini niawohanga nia behehongo Unangika.”

²⁵ “De ipahaino abe ngini nigogere nia dekanoka ma tonakoka gea de nagau nia ngofa-ngofaka de nia dano-danongo, ma oraha genangoo de kiani nimahidodiai done niatobahowo-howono Unangika. Abe nako ngini nimadiai o kia dika ma rupa la nimahuba enangika, gea o datoro duru itotorou Ma Jou ai himangoka ho ahao to Una ai ngamo duru ifae nginika.

²⁶ Ho nako ahao nia datoro ma dorou hokogea Unangika, o wange naa dika de ngohi tinihitiari abe naga niamake nia hohowono ma amoko. De ahi hitiari ma demo nginika, marai o dunia naa de ma dihangoo idadi hoka o hakihii ma nyawa angamoi ena mata-mata yoihene ahi hitiari ma demo nginika. Abe nako ahao ngini nimahuba o kiaika dika abe to ena ma rupa nimadiai, ahao nia hohowono hokonaa. Gea kiani Ma Jou womataiti winikiniiki de winihihupu nia tonakino gea la niloiki ma homoaika. Ho gea ko initedekanokaua nimanoa genangoka angamoi Una ahao duru winihibinaaha.

²⁷ Abe Una ahao duru winihikabarihi o tonaka ma ngoeika la kiani ngini nimadioniki dika o homoa ma nyawa-nyawaka, de gea ngini nia ngoe nihutuloka ma tona-tonakoka gea.

²⁸ De ipahaino o nyawa manga tona-tonakoka gea de ngini ahao nimahuba-huba to ona manga jou-jou ma popangaoika abe ona ma hirete yomadiai de manga giama dika. Abe utu o gotaino yodiai de utuoli o hakaruino yodiai ho ena gea duru ko akunua imahioriki de ko idadiua iihene de yoame, de ngaro yolomo ma ko idadiua.

²⁹ Masara ngaro hokogea nia wowango ma tona-tonakoka gea, nako ngini ahao niwilingiri ti ngini nia Jou de ka idadi niwimake Unangika. Abe iti ngini niwilingiri de ti ngini nia hininga ma gahumu de nia wowango ma gahumu.

³⁰ Ho abe ma oraha dokena nanga himangika gea de ngini nia huha de nia kokangela mata-mata gea niaohana, gea de ahao ngini ka idadi niwigilio nia Jouika de nisanangi nitotoihene to Una ai demoika.

³¹ Angamoi ti ngini nia Jou o Yawe gea ai hininga duru aomanga de ai dora ma hiokoo, ho Una duru ko wininoaua de ko winihibinaahaua. De Una ko idadiua wawohangika ai behehongo abe Una de ti ngini nia totofora yomahiketehibehehongoka ma dihiraino, abe Una womahikoboto wato ka ihikaika waniiki ma behehongo gea.”

Moioo de ko iwa abe yomaketero de Ma Jou o Yawe

³² De ahao o Musa wahigaro ai gogianongoruika wato, “Abeika nitotoihene ahi higaro ma demoino naa. Angamoi ko ma moiuahi idadi ma datoro ma hohailoa de ma heheranga abe hoka idadi to ngone naa nanga hidogoronaka. Abe ngaro duru ma dodihiraka ma oraha Ma Jou watulaada o nyawa o duniaka naa ka hiadono ma oraha naa naga masara ko iwa ma ade-ade abe imakadaene de to ngone nanga ade-ade. De ngaro o kiaika dika holingiri o dunia ma amokika masara o nyawa utu ko yamakeua ma heheranga abe hoka ngone hamakeoka!

³³ Eko sarakia, ma moiokau idadi o nyawa utuika abe ona yoihene Ma Jou ai ilingi ihupu o uku ma goronaino hoka nginioli ma dihiraino niiehene ai ilingi? Marai duru ko iwa, e? De ngaro ngini niihene ai ilingi hokogea masara ko nihonengua!

³⁴ De abeika hokokia Ma Jou winiduhunu la winihihupu o Mesiiri ma tonakoka de aino. Abe ma oraha gea de Una wapake ai hohowono ma ngoe de ai heheranga muruono naga. De nagali ai kuaha de ai bobuturungu abe waparangi onangika, de naga ai datoro utuoli abe duru yahihawana onangika la ka idadi winihihupu manga giama ma hoatino. Ho sarakia, naga utuoli o nyawa manga jou abe yaduhunu ma nyawaika de to ena ma buturungu hokogea? Duru ko iwa! Masara abeika, duru hokogea nanga Jou ai datoro ma gogurutiye abe wodiaioka la winiduhunu to ona manga giamino! De gea mata-mata ai datoro ngini niamake de ti ngini ma hirete nia lako.

³⁵ De ai datoro gea winihimatoko la genangino de winidotoko nginika abe nanga Jou Una gea o Yawe de duru ko iwa o jou utuoli abe yagou-goungu Ma Jou.

³⁶ Abe Una winihigunoa la ai ilingi niihene o Horogaka de aino la ka idadi winidotoko ai demoino. De winihigunoa la niamake ai uku ma amoko o duniaka naa la genangino ka idadi winitemo-temo nginika.

³⁷ De mangale ma titi Una duru wadora ti ngini nia totofora ho womaputuhu la winihiowa ngini manga totoforauku. Ho Una ma hirete winihihupu ngini o Mesiiri ma tonakoka de aino abe de ai kuaha duru kohaamoko wapake.

³⁸ De ipahaino de Unangoli wakiniiki o nyawa duru ko manga ngoe, abe nako hahidotelega manga dutu homoi-homoi de ngini de ka onangohi duru yowoe. De Una wakiniiki ona gea la ngini ka idadi niwohamino de ahao winihidoaka to ona manga tonaka nginika la idadi ti nginioli nia oara ma tonaka. De gea mata-mata idadioka abe imaketero hoka ma dihiraino de Una winihibehehongoka nginika.”

³⁹ “Ho o wange naa ngini kiani niongano-nganono de ufa niawohangika abe nanga Jou o Yawe ka Una dika Ma Jou o Horogaka de o duniauku naa. Duru ko iwa utu nanga Jou!

⁴⁰ De iti ngini ka ihikaika nianiiki de niahingounu to Una ai huhuloko de ai hiaturu ma demo abe o wange naa tinidofanga nginika, gea ahao ngini de nia ngofa-ngofaka nisosanangi dika nia boriwowangoka. De gea ma titi hiadono ngohi ahi demo naa tinidofanga nginika, la ka idadi nia wowango duru ikurutu de isosanangi dika ma tonaka ma goronaka gea abe nia Jou o Yawe winihidoaka nginika. De gea winihidoaka la wato idadi ti ngini nia tonaka ka hiado-adonika.”

Manga dadatoko ma kapongo hange

⁴¹ De ipahaino de ahao o Musa wahikatingaka o kapongo hange la idadi manga dadatoko ma kapongo. Abe ma kapongo yahangeika gea o Yorodani ma akere ma honongaka abe o wange ma hiwariha idateke.

⁴² Ho nako hiadono idadi onangoka abe o nyawa yomatengo yahohonenge ai gianongoru masara gea ko manga hiningaua la yohonenge de ko manga hininga ma ngamoinoua, ona gea ka idadi yoara ma dadatoko ma kapongo moiika la yomadatoko gea ma goronaka de ko idadiua o nyawa yatoma la yahibalaha manga gianongoru yohone-honengoka gea.

⁴³ Ho ma dadatoko ma kapongo hange gea imanoa o tonaka hange amomoioka. Abe naga moi o Rubene ma nyawa manga tonakoka, de gea imanoa o tonaka ma kakaaha ma goronaka abe duru iwoatika de itiaiika, de to ena ma romanga o Besere ma kapongo. De naga moioli o Gaada ma nyawa manga tonakoka abe imanoa o Gileada ma tonakoka, de gea ihiromanga o Ramoto ma kapongo. De nagali moi o Manase ma nyawa manga tonakoka abe imanoa o Basana ma tonakoka, de ena gea ihiromanga o Golana.