Higalioli 34 - Ma Jou ai Demo-demo o Totobelohoka

O Musa wohonenge

¹ O Isiraele ma nyawa o Musa wahiowa ibooto de ko itedekanua de o Musa ona wanoa o Moaba ma tonaka ma dolaka de una womatengo dika woiki wodoa o belaka ma doku abe ma tubu moi ma romanga o Nebo ma loku de genangiye wodoa o Musa. De nagali ma tubu moioli ma romanga o Pisaga de genangiye o Musa wogila-gila wodoa ka hiadono o Pisaga ma tubuiye womahiadonoka. De o Pisaga ma tubu imarihimanga de o kota o Yeriko abe doka o Yorodani ma akere ma honongaka o Kanani ma tonakoka. De o Musa dakenangoka waiye de Ma Jou wihidumutu unangika o tonaka gea mata-mataika. Ho ngaro ma tonaka ma dobiki abe ma digi-digino abe ihiromanga o Gileada ma tonaka ka hiadono ma dobikuku abe ahao idadi o Daana ai totoforauku manga tonaka masara gea mata-mataika o Musa wamake.

² Ho o Musa ka idadi wamakeoo o Isiraele ma nyawa manga tonaka ma hidoku abe ahao to Nafatali ai totoforauku manga tonaka, de to Efaraimi de to Manase manga totoforauku manga tonaka, de to Yehudaoo ai totoforauku manga tonaka. O tonaka mata-mata ka idadi wamake ka hiadono ma batingika abe idateke o gahioko abe o wange ma dumunoko.

³ De daku wamakeoli o Negebe ma tonaka ma kakaahaka de ai himangoka naga o Yorodani ma dola abe o Yeriko ma kotaka ka hiadono dau o Soara ma kotauku. De ma oraha gea o Yeriko ihiromanga o Giwatu ma kota angamoi iwangoiye o giwatu ma ngoe genangoka.

⁴ De Ma Jou o Yawe wihingahu o Musaika wato, “Ma tonaka gea mata-mata abe tahibehehongoka o Abarahaamika, de o Isakika, de o Yakubika, tato ahao tahidoaka manga totoforaukuika. Ho o behehongo ma tonaka gea tonihimatokoka ngonaika la namakeoka de ani lako ngaro ngona ko idadiua nowohama ma tonakika gea.” Hokogea Ma Jou wihimatoko o Musaika o Kanani ma tonaka.

⁵ De ahao genangoka o Moaba ma tonakoka o Musa, Ma Jou o Yawe ai duduhunu, wohonenge. Una ma dekanoka winiiki Ma Jou o Yaweika de naa ai leleani ibooto ho wohonenge imaketero hoka ma dihirainohi Ma Jou o Yawe wihingahuoka.

⁶ De gea o Musa ai honenge Ma Jou o Yawe wihilungunu ma ngioka abe ko moiua ihioriki abe o kiaka wilungunu genangoka. Masara ihioriki dika abe ai lungunu ma ngi naga o Moaba ma tonakoka abe idolaika ma hohutulu de yohimangika de o ngi ma romanga o Bete-Peoro.

⁷ De ngaro ma oraha o Musa wohonenge duru iwiperekioka, abe ai ngumuru adonoka ai taongo o ratuhu moi de monaoko, masara nako ai lako duru ka idodonohi de una de ai buturungokahi ka hiadono ai ngomaha itoaka.

⁸ Ka de o Isiraele ma nyawa iwihioriki abe o Musa igoungu wohonengoka de ona duru kahumutaigarika hiadono o Musa iwigari manga dekana manga wange moruange o Moaba ma tonaka ma dolaka gea.

⁹ De naa o Yosua wodadi o Musa ai duruuru abe o Musa wihitunguuokau o Isiraele ma nyawa manga himangoka. De ma oraha wihitunguu wodadi ai duruuru de o Musa wifokumu o Yosua ai mumukuku de o Yosua wamake o sosawaro ma hiakunu ai hiningaka abe duru iwihipareta ngaro ai hiningaka de ngaro ai datorokaoo. Ho o Yosua ai demoino o Isiraele ma nyawa duru iwihigihene hiadono yaniiki Ma Jou o Yawe ai pareta mata-mata gea abe wihidoaka o Musaika de o Musali wadofanga onangika.

¹⁰ De ngaro ma dihira de ka hiadono ma oraha naa de ko moiua Ma Jou ai uru ma dodofanga utu o Isiraele ma nyawa manga hidogoronaka abe to ona manga gogao Ma Jou o Yaweika hoka o Musali. Abe Ma Jou o Yawe de o Musa yomarihimanga de yomakoketemo.

¹¹ De imakohowono o Musu de Ma Jou ai uru ma dodofanga utu abe ko moiua o uru ma dodofanga utu abe Ma Jou o Yawe wahiakunu la hiadono yodiai o heheranga de o dodunguu hoka o Musali, abe una duru ma ngoe wodiai Ma Jou ai buturungu ma himatoko. De gea wodiai o Mesiiri manga koano o Firaunu ai himangoka de ai popareta ma nyawa manga himangoka de hiadono manga kokawaaha mata-mataika yakokimake gea o Musa wodiai.

¹² De gea duru o Musa abe Ma Jou o Yawe wipake la wahimatoko ai buturungu ma gahumu o Isiraele ma nyawaika. De naga abe o Musa wodiai de Ma Jou ai buturungu o Isiraele ma nyawa manga himangoka abe duru yahihawana.