Higalioli 33 - Ma Jou ai Demo-demo o Totobelohoka

O Pasala 33 ko atailakouahi O Musa wahiowa o Isiraele ma nyawaika

¹ Masara ko wopahauahi de Ma Jou ai uru ma dodofanga o Musa wahiowa o Isiraele ma nyawaika. De hokonaa to una ai hiowa ma demo onangika, wato,

² “Ma Jou o Yawe Una woboa o Sinai ma lokuoka de waino ngoneino, de ipahaino de Una o Edomo ma lokuoka de wonahitawangeuku ngoneuku. De ipahainoli de Ma Jou ai dararono ma medebini inahitararono ngoneuku o Parana ma lokuoka de auku, de gea naga ai momalaekata yasana ngimoi abe iwinii-niiki Unangika. De ma oraha gea ai giama ma nirakoka naga wasoino o uku moi abe itoka-tokara.

³ De Una duru winidora ngini to Una ai nyawa, ho winitobapaliara irahai ngini mata-mata abe nidadioka to Una. De ngini nianii-niiki ai ngekomika, abe ma titi naga nia hingounu to Una ai dodotokika.

⁴ Abe ma oraha gea ngohi o Musa tinidofanga nginika Ma Jou ai Pareta, de ai Pareta gea idadi hoka ti ngini nia oara Unangoka abe duru de ma ijaka.

⁵ De gea ti ngini nia balu-baluhu yomatoomuino, de nagali ngini o kokawaaha mata-mataika nginioo nimakokitoomuino ma oraha gea. De hokogea Ma Jou o Yawe wodadi ti ngini o Isiraele ma nyawa nia Koano.”

⁶ De hokonaa o Musa ai hiowa ma demo abe ihidumutu o Rubene ma nyawaika, wato, “Ngaro o Rubene ma nyawa ka ihikaika naga, de ko idadiua ona o dutu moi yohotumu. Abe ngaro ona duru ko yowoe-woeua, masara ka idadi yotongohono ka hiado-adonika.”

⁷ De o Musa ai hiowa ma demo ma titi o Yehuda ma nyawa hokonaa, wato, “Ma Jou o Yawe, duru tagahoko o Yehuda ma nyawa, la ma oraha o kokangela yaohana de yomagahoko o duduhunu, gea Ngona napaluhu de naduhunu la ka idadi nahigilioli ona manga gogianongoruika. De tagahoko la to ona manga buturungu duru ilamoko, de ma oraha yomaketeparangi de manga musu de Ngona duru nahiputurungu onangika.”

⁸ De o Musa ai hiowa ma demo ma titi o Lewi ma nyawa hokonaa, wato, “Ma Jou o Yawe, Ngona nahidoakoka o Urimi de o Tumimi o Lewi ma nyawaika, abe o mai-maihi ma kiahonanga gea o tagongo moi duru ma hohailoa, de ma tagongo gea nahidoaka ani hidemo ma nyawaika abe yagou-goungu ininiiki Ngonaika. De ma dihira ani nyawa mata-mata gea natailako ma ngioka abe ma romanga hinooto, abe ihiromanga o Hitaili de o Ribuutuino, angamoi genangoka ona manga ribuutu Ngonaika duru o fara moi, de duru inihitaili ma oraha inihigurubungu ma titi o akere.

⁹ De o Lewi ma nyawa gea naga manga hingounu to Ngona ani Demo-demoika, de ona ka ihikaika yodemo ani behehongo ma demo de ani Pareta. De nako to ona ma hirete manga ngofa-ngofaka de manga dimo-dimono de manga gogianongoru utuoli, gea hatoli yaporetika dika onangika. Masara nako Ngonaika, ona gea duru yagou-goungu initobaniiki ani hiningaika.

¹⁰ De ona yatobadotoko ani pareta de ani hiaturu ma demo manga gogianongoru o Isiraele ma nyawaika, de ka ihikaika yaoino o manyanyi la gea yatufuku de inihihuba Ngonaika, de nagali o aewani ma badanga ma gahumu yatobakelenga o huhuba ma ngioka, la ma roehe gea ona inihihuba-huba Ngonaika.

¹¹ Ho irahai la Ngona mia Jou nahiowa o Lewi ma nyawaika gea, de to ona manga leleani ma karajaanga mata-mata nosanangi nadafongo. De nako naga manga musu yoboaino, ngohi tagahoko la Ngona duru nahiodiri manga musuika, hiadono ona gea duru ko yapoakaua yomaokoiye ma tonakoka de aiye.”

¹² De o Musa ai hiowa ma demo abe ihidumutu o Benyamini ma nyawaika hokonaa, wato, “O Benyamini ma nyawa, ona gea Ma Jou o Yawe duru wadora onangika, de ona yowango yosanangi dika to Una ai datekoka. Abe Una ka ihikaika watobagoa-goana, de wahigororomino arihononga la ufa o bodito o kia dika idadi onangika.”

¹³ De nagali o Musa ai hiowa ma demo abe ihidumutu o Yusupu ai totoforaukuika, de gea wotemo wato, “Ngaro Ma Jou o Yawe ka wahiowa to ona manga tonakika, abe ma titi ka idadi o gagini ma dihangoka de auku iparonuku de ihipehaka manga tonakuku, de o jobuubu enangoo ka idadi dau ma tonakoka de aiye ihihupuiye o akere la manga tonaka de ma hasiloka.

¹⁴ De ipahaino to ona manga joro abe iwangoiye o wange ma timiuku, gea duru ikokikutufuru, de o mede-medeiye naga ma hofoko duru irorahai.

¹⁵ De ngaro o loku-lokuoka gea abe duru ma dodihiraka de idadioka, masara genangokaoo de ona ka idadi yamake manga datomo ma joro abe duru irorahai, de ma oraha youtuku de ma hasili duru ilamokoholi.

¹⁶ De nahidoaka onangika la yamake ma hasili abe ka enangohi irahai nako o dunia ma amokika. De Ngona abe ma dihiraino de nomahimatoko o gota ma etetekoka gea abe itoka-tokara ma ko youkua. Ho tagahoko la Ngona gea ani hininga ma owa nahidoaka o Yusupu ai totoforauku mata-mataika gea. La ani hiowa gea ka ihikaika imanoa onangoka, angamoi o Yusupu gea ma dihiraino de wodadi ai ria-dodoto mata-mata manga hihira.

¹⁷ De ai totoforauku gea to ona manga kuaha duru ma hohailoa, de nagali abe ona duru de manga bobuturungoka. De mangale ma titi manga buturungu gea hiadono duru yolaku-laku, abe ngaro o homoa ma nyawa mata-mata ma ona ka idadi yahikala manga musuika gea. De hokogea ahi hiowa ma demo o Efaraimi de o Manase ma nyawaika, abe o Manase manga ngoe ona duru yosana, masara nako de o Efaraimi ma nyawa ka onangohi duru yowoeholi.”

¹⁸ De o Musa ai hiowa ma demo ma titi o Sebulono de o Isakara ma nyawa hokonaa, wato, “Ngohi tinigahoko ngini o Sebulono ma nyawa, la ma oraha ngini nia dodagi ma goronaka de ka idadi niamake nia hasili ma rorahai. De nako ngini o Isakara ma nyawa, nginioo tinigahoko, la nginioo niamake nia hasili ma rorahai abe ma oraha ngini nigogere nia boritauoka nia tonakoka gea.

¹⁹ De o dutu hinooto gea ona yahoko manga gogianongoru o Isiraele ma nyawa utu, la ka idadi ona mata-mata yomakutuono yodoa manga lokuiye, de daku manga lokuoka gea yomahihuba o huhuba abe duru itaana Ma Jou ai himangoka. De ona gea ahao yamake manga utumu de manga kaya o gahioka de aino, abe ma hasili gea imagogono doka o dowongi ma honongaka, de gea ma titi imanoa o gahi ma timiuku.”

²⁰ De o Musa ai hiowa ma demo abe ihidumutu o Gaada ma nyawaika hokonaa, wato, “Ahao Ma Jou o tonaka wohidogo o Gaada ma nyawa manga tonakika la wohiwoatoli, ho ngini o Gaada ai totoforauku kiani niwihigiriiri Ma Jouika ma titi nia tonaka gea. De ona gea yomanoa manga tonakoka hoka o singa ma boki ma beka, abe o ngekomo ma date-datekoka yahagogono la manga musu yoboaino, de ahao ka itodokanino de ona yabaatika de yahiodiri manga badangika.

²¹ De abe ma titi manga tonaka, ona gea yomale abe duru enangohi ma rahai, abe biaha o kokoano dika yamake o tonaka ma rorahai hokogea. De abe ma oraha o Isiraele ma nyawa manga balu-baluhu mata-mata yomatoomuino, de o Gaada ma nyawa duru yahingounu irahai Ma Jou o Yawe ai pareta ma totiaiika, de ngaro Ma Jou ai hiaturu ma demo masara enangikaoo naga manga hingounu.”

²² De o Musa ai hiowa ma demo abe ihidumutu o Daana ma nyawaika hokonaa, wato, “O Daana ai totoforauku ona hoka o singa ma boki ma ngofaka, de ona ahao manga tonaka o Basanoka de yohupu la yabaatika manga musuika.”

²³ De o Musa ai hiowa ma demo abe ma titi o Nafatali ma nyawaika hokonaa, wato, “Ngini o Nafatali ai totoforauku duru de nia utumoka, abe ma titi Ma Jou o Yawe duru winihiowa nginika. De gea ka idadi nimahitingini ma tonaka abe imanoa doka nia batingi ma honongaka, abe ma tonaka dakuiye idateke de abe o wange ma hiwariha idateke, gea mata-mata ahao idadi ti nginioli nia oara ma tonaka.”

²⁴ De nagahi o Musa ai hiowa ma demo abe ma titi o Asere ma nyawa abe wotemo hokonaa, wato, “Ngaro Ma Jou duru winihiowa ngini o Asere ai totoforaukuika, abe ma titi ngaro o Asere ai ria-dodoto utu mata-mataika, masara ka to o Aserohi ai totoforauku manga hiowa kohaamoko. Ho ahao to ona manga saitunu ma gota duru itohofoko, hiadono manga hasili o saitunu ma minya duru ifoloiholi onangoka.

²⁵ De tinigahokoo la nia kota duru ipoputurungu, abe nia kota ma ngorana yodiai o behino de o tabagaino. Ho genangoka ngini ka idadi nigogere nisosanangi dika, abe nia wowango hokokia dika ma dekana de nia hininga duru de ma riidoka dika.” Hokogea o Musa ai hiowa ma demo abe o Isiraele manga dutu homoi-homoiika.

²⁶ De ahao o Musa wohibobaha ai demo gea abe wotemo o Isiraele ma nyawa mata-mata manga hima-himangoka wato, “Ngini o Isiraele ma nyawa, abeika nitotoihene ahi demoino naa, abe Ma Jou duru wonadora ngone to Una ma hirete ai nyawa. De Una gea, o jou mata-mataino masara moioo de ko iwa abe yomakadaene hoka Unangoli. Abe Una ka idadi o lobi-lobi wofarene hoka ai goroba parangi, ho Una daku ma dihangoka wotagi o lobi-lobioka, de abeika Una woboa daku de wauku la wonaduhunu ngone naanguku!

²⁷ De nanga Jou Una gea duru ko iwa ai bobaha, ho ka ihikaika Una wodadi nanga dadatoko ma ngi. De ngone naa wonahawoka de ai giama la wonaduhunu, ho igoungu Una naga nanga arihonongaka. De ti ngini nia musu Una wakiniiki la yoara dika, de winihuloko nginika wato, ‘Ngini niahibinaaha onangika!’

²⁸ Ho hiadono ngini o Isiraele ma nyawa o dame dika ilaku-laku nia tonakoka naa, de ngini o Yakubu ai totoforauku nia ngioka de ko iwaka nia musu. De nia tonaka gea duru ma hasili ilamoko, abe o gandumu ma redi duru itohofoko, de ngaro nia angguru ma roehe mata-mata masara enangoo ihihofoko o hahaku kohangoe, angamoi nia tonaka ihipehaka irahai de o gagini abe o dihangoka de auku yodiriiuku.

²⁹ Ho ngini naa o Isiraele ma nyawa nia hiowa duru kohangoe niamakeoka! De ngaro o nyawa mata-mataika masara ka ngini dika abe Ma Jou o Yawe winiduhunu nginika, ho ka ti nginiohi nia utumu duru ilago-agomo abe nako de o nyawa utu mata-mata! Abe Una ma hirete wodadioka ti ngini nia dadatoko, de ka idadi hihiromanga hato Una hoka nia humaranga abe duru ka ihikaika itobalaku! Ho hiadono nia musu ka yomaponuku dika nia himangoka ma titi manga modongo, de ngini ka idadi niadoko-doko onanguku angamoi ona duru yokalaka.” De hokogea dika aika o Musa ai hiowa ma demo o Isiraele ma nyawa mata-mataika abe ma oraha itigioka ai wowango ma baha.